2 Corinthians 12

Pol Ur Kump Mel Itim Ila Got Ndi, Ik Puⱡi Kundpa Nitim.

Nombuⱡa mam elpa ti nga, na nga mbi orunga, paka ruimp mel mon. Uⱡ kᵾⱡ ndi, tᵾn tᵾpa rapᵾndᵾmba mel mon. Wote, akup Nuim ei ndi, na ur kump kat, mo ropa ora ndurum ei nga nimp ent. Na pᵾnt ei, unt pana 14 omba puⱡnga kᵾn, Got nga rapa tenda wu ti, tᵾpa mepa, wi muⱡ kona raldika ila oⱡa purum ei, kᵾng pᵾi morum muna mon? Uⱡ ei, na pili napᵾnt, Got elim mint pᵾtᵾm. Na pᵾnt uⱡ ei, Got ndi, wu ei, tᵾpa mepa wi muⱡ kona purum ila morum. Kᵾng kᵾⱡ pᵾi purum muna mon? Uⱡ ei, na pili napᵾnt. Got elim mint pᵾtᵾm. Wi muⱡ kona ila ik pitim mbᵾ, wamp ti ndi, kandpa nimba mel, kapⱡa mon. Wote, na nga ronduⱡ ti mon! Ei nga, na ndi, wu ei nga mint mbi paka rundimp. Na nga mbi paka rui nᵾrimp mon! Uⱡ ei nga ronduⱡ ti mon! Ei ndi, nanim tᵾpa ora ndumba. Wote, na nga orunga, mbi paka rop nint ndam, na kupᵾr wamp mel raⱡᵾp ni nᵾnimp mon! Ei nambuⱡ emel, na ik kupa ei mint nimp. Wote, na nga orunga, mbi paka rop ni nᵾnimp mon! Na nga mbi paka rop nint ndam, wamp mbᵾ ndi, na pep rok, na nga mbi ou nguing, uⱡ ei mon! Na nga uⱡ kun etᵾp ik nᵾmp, int uⱡ kᵾⱡ wamp mbᵾ ndi, kandᵾk pilik pep ring.

Uⱡ Mindil Kit Wei Kat Pol Ndi Koma Rurum.

Wote Got ndi, uⱡ mam ti etpa, ik mong kᵾⱡ na ora ndurum ei, na nga mbi orunga paka rop neimp nimba, Got ndi, iti nᵾtᵾtᵾm mon! Gal mel ti ndi, na purum uⱡ ei, Seitan nga nombuⱡa rung wu mel ti ndi, na ropa mana ndamba kᵾn, na nga mbi orunga paka rui nᵾreimp nimba itim. Ui raldika, na Nuim ei kᵾn atinga rop, uⱡ mbun mbᵾ tᵾpa mundangga nit. Wote, Nuim ei ndi, na kundpa nimba mel, “Na nga wamp pol ti uⱡ ei, nim kᵾn tetᵾm,” nitim. Wamp ti ronduⱡ pi naprᵾm ei, na nga ronduⱡ ei ndi, kapⱡa etᵾm. Nuim ei ndi, nitim uⱡ ila, na pilip mbun ti natᵾp, Kraist nga ronduⱡ ila, na ambᵾⱡᵾp paⱡᵾp, numan kai minal pᵾt. 10 Uⱡ ei mel ku, Kraist nga mbi ila, na ronduⱡ pi nᵾpᵾr ei kᵾn, wamp mbᵾ ndi, na rok etᵾk, kit mondᵾk etᵾng ila, mbun mindil elpa elpa mat ndi, na titim ei kᵾn, na ronduⱡ pi nᵾpᵾr. Wote, uⱡ ila ku, Kraist ndi, na etpa ronduⱡ mundrum.

Pol Ndi, Korin Wamp Kᵾⱡ Nga Numan Ou Ndupa Pitim

11 Na kupᵾr wamp na ni mel, raⱡᵾp ik mbᵾ nᵾnt. Wote enim ndi, na iteimp nᵾk ninmin mel ku ent. Na nga uⱡ kai et kᵾⱡ, enim ndi, nᵾk mot nduk, na nga mbi paka rondᵾk eng ndam, enim uⱡ kai mbᵾ iting. Enim uⱡ kᵾⱡ iti natᵾng ndam kep, na enim nga nombuⱡa rung wu kuimbal mbᵾ nga mana orunga, muⱡi nambᵾr mon! 12 Na ndi, enim nga nombuⱡa rung wu kupa kongun etᵾp, enim ora ndup, wote mbun elpa elpa mat, ronduⱡ mundᵾp koma rop it. Uⱡ kᵾⱡ ndi, enim kᵾn uⱡ rᵾpᵾndi kat nimp, na Got nga kongun wu ei ndi, enim tᵾp ora ndᵾr. 13 Got nga wamp rapa tenda ila mbᵾ kᵾn et, uⱡ mbᵾ mel ent. Na ndi, enim kᵾn uⱡ ti mint iti natᵾt. Uⱡ ei, na ndi, enim mbun nguimp nᵾmp kᵾn, enim ndi, mel mat, na ngui ngᵾngᵾi nᵾt. Wote, uⱡ ei ndi, na ⱡawa et ndam, na nga ⱡawa kᵾⱡ, enim ndi, wak rundᵾi!

14 Na akup enim kᵾn omp, raldika indimp ei nga, tᵾp kun ent. Na ndi, enim nga mel mat ngeing nimp, ui nᵾwimp, mon. Na ndi, enim etᵾp rukᵾr timp ei nga uimp. Enim pitmin ni ka! Kangambuⱡa mbᵾ ndi, mel mat tᵾk mou rok tipam mamᵾl na mbᵾ, tᵾk rᵾpᵾndi napᵾndᵾrmᵾn mon! Wote tipam mamᵾl mbᵾ ndi, mel mat tᵾk mou rok kangambuⱡa mbᵾ, tᵾk rapᵾndᵾrmin ni ka! 15 Na enim kᵾn numan kai minal pendᵾp kᵾn, na nga mel mbᵾ, enim tᵾp rapᵾndᵾp nguimp. Na ndi, enim numan minal ngamba kᵾn, wote enim ndi, na numan orunga etᵾk nguing. 16 Enim wamp mat ndi, na kundᵾk nᵾk mel, wu ei ndi, tᵾn nga mel mat ti natᵾpa kᵾn, tᵾn nga mel mbᵾ, mo ropa, mawa etpa tᵾpa, ik kep nomba mel mbᵾ, tᵾpa etᵾm ning. 17 Na ndi, wu mat tᵾp mundᵾr ila, enim kᵾn orung mbᵾ ndi ok, enim ik kol rok ngᵾk, enim nga mel tek morung mbᵾ, roldᵾk tᵾk etᵾng nda? 18 Na ndi, Taitas nᵾmp kai etᵾp mundᵾr ila, enim kᵾn urum ei, kang wu ti kunda orᵾnggil. Wote Taitas ndi, enim ik kol ropa ngumba kᵾn, enim nga mel mat kindᵾp nomba titim nᵾng nda? Tᵾl muⱡnga tenda ei mondpᵾⱡ, nombuⱡa mam tenda ila, andpᵾⱡ iti nᵾtᵾtᵾmbᵾⱡ mana mon! Enim pilik kai itᵾi!

19 Enim ndi, pilik kᵾn, na enim kᵾn, ik nᵾnt kᵾⱡ ndi, tᵾn tᵾn tᵾpa rapᵾndᵾmba nᵾk, pili nᵾpᵾlᵾi mon! Tᵾn Kraist nga wu kᵾⱡ moⱡpᵾn, Got nga kuimp keta ila ik mbᵾ nitmin. Enim wamp na nga kupa kᵾⱡ. Tᵾn ndi, enim nga mondpa pili orunga, nimbun ronduⱡ mundpᵾn ninmᵾn. 20 Na onunga kot, mundmong etᵾp pᵾnt uⱡ ei, na ndi, enim uⱡ kai mat itangina, kᵾnimp nᵾmp unt uⱡ ei mel, kᵾni nᵾkᵾnimp mon! Wote enim ndi, na uⱡ kai mat itamba, kᵾnmᵾn nᵾk moⱡung ei mel, kᵾni nᵾkᵾning ku. Uⱡ ei, nambuⱡ emel, el manda mendᵾk muⱡi uⱡ na, wᵾlᵾk rui ik na, ik mbuldung orunga nindi uⱡ na, ik tᵾpa roi ndui uⱡ na, ik nᵾpili uⱡ na, ik mura iti uⱡ na, elim nga orunga mepa oⱡa pi uⱡ na, wamp mat kᵾn numan popᵾⱡ mundi uⱡ na mbᵾ pora enim kᵾn, puⱡ piyangga muⱡing ei nga, na mundmong minal ent. 21 Wote, na mundmong ent ei, na enim kᵾn wamba, na nga Got ei ndi, enim nga kuimp keta ila, na etpa pipil kundᵾmba. Wamp kat unt na ndi, kᵾndᵾr kᵾⱡ, uⱡ kit mbᵾ etᵾk, numan ropᵾl rui narᵾk, uⱡ ⱡar mul mbᵾ, tᵾk mbuⱡ ngui nganggᵾk, wapra rui uⱡ na, wamp kandpa kum pindi uⱡ na mbᵾ, wamp mbᵾ kᵾn pelinga mormin uⱡ ei nga, na kont minal enim ei nga, na ka itimp ku.

Copyright information for `MED