2 Corinthians 13

Enim Korin Wamp Kᵾⱡ Enim Nga Mondpa Pili Ei Rᵾp Etᵾk Kai Mundᵾi!

Akup na ndi, enim kᵾn omp, raldika indimp ent. Wote, Buk Wingti ei ndi, nimba mel, “Wu raⱡ muna raldika ndi, kᵾnangina wamp ti, uⱡ mat ⱡawa em ndam, enim ndi, nᵾk kun mundᵾi!” nitim. Unt na enim kᵾn omp moⱡᵾp, raⱡ endᵾp kᵾn, wamp uⱡ kit etᵾng mbᵾ kᵾn, wamp elpa mat kunda ku, kundᵾp nimp mel, na ndi, uⱡ mat itimp nit. Uⱡ ni, akup na ruⱡ etᵾp moⱡᵾp, enim kundᵾp nᵾnt. Wote, na enim kᵾn unt ei kᵾn, uⱡ kit etᵾk mormin wamp mbᵾ, kandᵾp kui iti nᵾtimp, mon! Ei nga, enim molk piling ei, Kraist ndi, na nga keta ila moⱡpa nᵾtᵾm. Kraist ndi, enim kᵾn kupa nimba, ronduⱡ mundpa kongun etᵾm. Unt, Jisas nga ronduⱡ ti mon ei nga, nde peta ila nil rorung. Wote, Got nga ronduⱡ ila, Jisas akup kont moⱡnga kᵾn, tᵾn Jisas kᵾn nondpa mormun ei nga, ronduⱡ ti mon! Wote, Got nga ronduⱡ ila, tᵾn Kraist kᵾn kunda kont mormᵾn. Wote, ronduⱡ ei ndi ku, tᵾn kongun etpᵾn, enim ronduⱡ ngurmin.

Wote enim ndi, en enim oⱡa tᵾk kandᵾk kᵾn, kᵾmp tᵾk pilᵾi! Enim mondᵾk pilik mormin, muna mon nda? Enim nga mondpa pili ila, Jisas Kraist morum uⱡ ei, pili napᵾtmin ei? Muⱡi nambᵾⱡᵾm ndam, enim Jisas Kraist kᵾn mondᵾk pᵾtmᵾn uⱡ ei, kapⱡa mon. Wote na ndi, pᵾnt ei, enim ndi, tᵾn Jisas nga kongun wu kupa kᵾⱡ nᵾk pileing. Tᵾn ndi, Got kᵾn enim nga nimbun atinga rondᵾrmᵾn uⱡ ei, Got ndi, enim tᵾpa rᵾpᵾndangga kᵾn, uⱡ kit mbᵾ, iti nᵾtᵾng nimbun ninmᵾn. Tᵾn Jisas nga kongun wu kᵾⱡ, kapⱡa etᵾm kᵾⱡ nimbun, wamp nga kuimp keta ila ni nanmᵾn, mon! Tᵾn kapⱡa iti natᵾm ndam, kapⱡa ku, enim uⱡ kai mbᵾ mint iteing nimbun ninmᵾn. Wote tᵾn ndi, ik kupa ei, wak ruimin uⱡ ei nga ni nanmun, mon! Ik kupa ei, tᵾpᵾn rapundpᵾn, tᵾp ou nduimin uⱡ ei nga ninmᵾn. Tᵾn ronduⱡ pi nᵾpᵾmᵾn ndam, enim ronduⱡ pangga muⱡing uⱡ ei nga, tᵾn numan enim. Tᵾn ndi, Got kᵾn ronduⱡ mundpᵾn atinga rundamina kᵾn, enim Got nga wamp kun kai kᵾⱡ muⱡeing. 10 Akup na ruⱡ etᵾp moⱡᵾp kᵾn, enim mon ei, rop ngunt. Wote, na enim kᵾn omp moⱡᵾp, na ndi, enim nga etmin uⱡ kᵾⱡ nga ik mat ronduⱡ mundᵾp, ni nᵾnimp mon! Wote, Nuim elim nga ronduⱡ, na ngurum wu ei nga kongun indimp. Nuim ei nga ronduⱡ ei ndi, enim etpa ronduⱡ mundᵾmba ei nga, enim ropa mana tᵾmba ei mel, kapⱡa mon!

Ik Koⱡmung Kat.

11 Akup na nga wamp angmᵾn mbᵾ ye! Na rawe etᵾp nᵾnt ik mbᵾ, mon rop pora ndup nᵾnt. Enim kongun ronduⱡ mundᵾk etᵾk, Kraist nga rapa tenda wamp ila mbᵾ kᵾn, numan tenda pangga molk, na nga ik ei, kum tek pilik, kai itᵾi! Got nga wamp numan wang ndui uⱡ ei, enim kᵾn piyangga!. Enim numan tenda pilik molk, Got nga wamp numan ngui uⱡ ei kᵾn, numan wang ndui uⱡ kai mbᵾ enim kᵾn piyangga! 12 Enim wamp tenda tenda nᵾk, ki tᵾk, keta nu rok nok itᵾi! 13 Got nga rapa tenda wamp mbᵾ ndi, nim rawe etᵾk nᵾnmin. 14 Nuim Jisas Kraist nga wamp pol ti uⱡ ei kᵾn, Got nga wamp numan ngui uⱡ na, Muⱡnga Wingti nga wamp min mindi uⱡ mbᵾ pora, enim kᵾn kan piyangga!

Copyright information for `MED