2 Corinthians 2

Ei nga, na enim kᵾn aldpa ui nᵾwᵾnt ndam, na enim mbun nguimp ei nga pilip itimp. Wote na ndi, enim etᵾp mbun ngunt ndam, wamp nam ndi, na etpa numan kai pendᵾmba? Ei, en enim ndi iting. Enim wamp mbᵾ ndi, na etᵾk numan kai penditmin ei nga, wote na ndi, enim kᵾn mbun timp ei nga, na enim kᵾn ui nawᵾnt. Uⱡ puⱡ ei nga mint. Na ndi, enim unt mon rop ngur ni ka! Uⱡ mat nga na ambulk pᵾnt ndam, enim kunda ku, ambulk palk mormin. Uⱡ ei kupa mint. Na ndi, enim unt mon rop ngur ei kᵾn, na mbun mindil mam mbᵾ tᵾp, ka etᵾp it. Na ndi, enim numan mbun teing nᵾmp, mon rop ngui ngᵾnggᵾr mon! Na ndi, enim numan minal ngur uⱡ ei, enim ndi, pilik mint muⱡeing nᵾmp it.

Uⱡ Kit Mbᵾ Wak Rundi Uⱡ Ei Nga Ik

Wamp nam ti ndi, mbun ti, enim ngum ndam, mbun ei, na ngui ngangᵾmba mon. Enim mbun ngumba ik ei nga, na ndi, ronduⱡ mundᵾp ni nᵾnimp. Wamp nam ti, uⱡ kit em ei, enim wamp ou ndupa mbᵾ ndi, molk etᵾk, elik rondrᵾng uⱡ ei kapⱡa. Akup enim ndi, wamp ei nga uⱡ kit kᵾⱡ, wak rondᵾk etᵾk, numan kai pindᵾi! Wote, uⱡ mbun mam ti ndi, elim tᵾpa mana ndangga wamp ei, elim nga mondpa pili ei, wak romba. Na ndi, enim waldᵾp nᵾnt ei, wamp ei kont kulk numan ngᵾk itᵾi! Na ndi, enim oⱡa tᵾp kᵾnimp pilip kᵾn, mon ti rop, enim unt ngur. Na nga ik nit uⱡ mbᵾ pora, pep rok etmin, muna mon nda, nᵾmp pilimp it. 10 Wamp ti nga uⱡ ⱡawa em kᵾⱡ enim ndi, wak rondung ndam, na ndi, i ku etᵾp, wamp ei nga namba ⱡawa ti, wak rundimp mel pem ndam, ⱡawa ei, Kraist nga kuimp keta ila, wak ramba, enim tᵾpa rapᵾndᵾmba. 11 Uⱡ ei nga, Seitan ndi, tᵾn ik kol ropa, tᵾn tᵾpa mana ndupa etmba ei nga uⱡ etᵾm kᵾⱡ, pilpᵾn pora ndurmᵾn ni ka!

Trowas Kona Ila Pol Numan Mbun Pitim.

12 Na unt Trowas kona ila, Kraist nga Rᵾnang Ik Kai nimp pilip pur ei kᵾn, Got ndi, na elim nga kongun indeimp nimba, nombuⱡa ti ropa tinditim. 13 Wote ei kᵾn, na nga numan orunga mbun mam mat pit. Nambuⱡ emel, na nga ᵾngᵾn Taitas kandᵾp ti nᵾtᵾt. Wote na ndi, Trowas wamp kᵾⱡ, wak rop kelip, Masaroniya orunga pur.

14 Wote na ndi, Got kᵾn, angge nᵾnt. Uⱡ ei, nambuⱡ emel, ui mbila pora, Got ndi, tᵾn tᵾpa rapᵾndrᵾm. Kraist nga mbi ila, tᵾn uⱡ kit mbila, el ropᵾn kai mondurmᵾn uⱡ ei, wamp ndi kandᵾrmin. Kraist nga pilpa kungᵾndi ei, mura rui kai ti, kona mbila pora puⱡnga, wamp mbᵾ pᵾtmin. 15 Nambuⱡ emel, Got kᵾn Kraist raⱡ nga uⱡ tᵾngᵾn etpa, mura rui kai kᵾⱡ tᵾn kᵾn, pepa ekit orum ila, wamp mbᵾ kundᵾp nᵾtmin. Ei nga, ndip kona nombuⱡa mam ei, wamp mat, tᵾk kun etᵾk mormin. Wote, muⱡ kona ping wamp mbᵾ, nombuⱡa mam tila, tᵾk kun etᵾk mormin ku. 16 Wote, ndip kona nombuⱡa mam ei, mura pilik mormin wamp kᵾⱡ, wamp kormin uⱡ ei nga mormin. Wote, muⱡ kona nombuⱡa mam ei, mura kai ti pilik mormin wamp kᵾⱡ, wamp kont mul uⱡ ei nga mura ei, pilik mormin. Kongun kᵾⱡ wamp nam ndi, kapⱡa etmba? 17 Enim ndi, tᵾn pilik mormᵾn! Wu mat ndi, Got nga ik mong mbᵾ, tᵾk pei mundᵾk mek puk, ku moni kongun etmin. Uⱡ ei mel, tᵾn ndi, Got nga ik mong ei, mepᵾn mbun, ik kol ropᵾn kona mbila, andpᵾn kongun iti natᵾtmᵾn mon! Tᵾn ndi, ik kupa ei, Got nga kuimp keta ila, Kraist nga kongun wamp moⱡpᵾn, Got nga ik mong kupa mbᵾ nᵾtmᵾn.

Copyright information for `MED