2 Corinthians 3

Nimba Mᵾi Rui Ik Kont Ei Nga Kongun Wu

Akup tᵾn nga mbi paka ropᵾn ninmᵾn ei? Ei mon! Enim mon ropᵾn ngunmᵾn ei ndi, tᵾn nga mbi paka rundeing nimbun enmᵾn ei? Ei mon ka! Enim ndi, mon ei mel ti rok, tᵾn tᵾk rᵾpᵾndeing nimbun enmᵾn ei? Uⱡ ei mon ku! Enim tᵾn nga mon mel ralk mormin. Mon ei, tᵾn nga numan ila petᵾm. Wamp mbᵾ ndi pora, mon kᵾⱡ kᵾmp rok kandᵾk pilik iteing. Tᵾn nga kongun etmin ei nga Kraist ndi, mon kᵾⱡ ropa nguⱡnga, tᵾn ndi, enim nᵾmp ngunmᵾn. Enim ndi, Kraist nga mon ropa ngurum kᵾⱡ, ekit tᵾk pena ila ekit mot ndurmin. Mon kᵾⱡ, Kraist ndi, ki ila rui nᵾrᵾrᵾm. Ku kara tila rui nᵾrᵾrᵾm mon ku. Got nga Muⱡnga Wingti rᵾk rᵾk kont morum ei ndi, wamp nga mundmong rukᵾr orunga, mon ropa pinditim.

Ik ei nga puⱡ ei mel, Kraist ndi, tᵾn nga mondpa pili uⱡ ei, etpa ronduⱡ mundrum. Wote tᵾn ndi, Got kᵾn mondᵾp pilpᵾn ik mbᵾ nᵾtmᵾn. Tᵾn nga ronduⱡ tila, kongun mbᵾ etmin, ni nanᵾnmᵾn mon! Got nga ronduⱡ ila mint, tᵾn ronduⱡ ngᵾⱡnga, kongun mbᵾ etmin. Got ndi, tᵾn ronduⱡ ngurum ila, nimba mᵾi rui uⱡ kont nga ila, kindmant kongun etmin. Nimba mᵾi rui ik ei, ya mi ik ei kᵾn kapⱡa mon! Nimba mᵾi rui uⱡ kont ei, Muⱡnga Wingti elim morum. Moses nga mi ik rorung ei ndi, wamp ropa kondrum. Wote Muⱡnga Wingti ei ndi, wamp etpa kont mondrum.

Got nga mi ik kᵾⱡ ku kara ila, mon rurum kᵾⱡ ndi, kongun etpa wamp ropa kondᵾmba itim. Kongun etᵾm ei ndi, Got nga rᵾⱡang kai ei, pendpa urum. I itim uⱡ ei ndi, Moses nga kuimp keta ei, rᵾⱡang minal purum. Wote, Isrel wamp mbᵾ ndi, Moses nga kuimp keta ei kapⱡa, kᵾni nakᵾndrᵾng. Wote, rᵾⱡang ei pora nilinga, Moses nga kuimp keta ei kandrung. Wote, Got nga Muⱡnga Wingti wamp kᵾn kongun enim ei ndi, Moses nga mi ik unt nga kᵾⱡ, ropa mana ndupa kongun elinga rᵾⱡang minal purum. Moses nga mi ik kᵾⱡ ndi, kongun etpa wamp kᵾmp tᵾtᵾm kongun ei, rᵾⱡang purum ndam, wote Got nga wamp etpa kun kai mondrum kongun ei, rᵾⱡang minal mba. 10 Unt nga rᵾⱡang kongun itim uⱡ ei mel, akup kapⱡa mon. Akup Got nga rᵾⱡang ei kᵾn, ronduⱡ ei kᵾn, ama kongun minal enim. 11 Unt kongun tepa ruⱡ pi napᵾmba ila rᵾⱡang minal purum ndam, wote uⱡ nga kᵾnt nga kont mba mul uⱡ ei nga rᵾⱡang ei, ama pepa mint mba.

12 Ei kᵾn, tᵾn mondᵾp pilpᵾn nokundpᵾn moⱡpᵾn kᵾn, Got nga rᵾⱡang ei ndi, tᵾn ronduⱡ minal ngangga kᵾn, tᵾn mundmong iti natᵾpᵾn ik nimin. 13 Tᵾn ndi, Moses nga itim uⱡ kᵾⱡ, mel iti nᵾtmᵾn. Got nga rᵾⱡang ei, Moses nga kuimp keta ila pora ni nᵾni kᵾn, Moses ndi, muⱡ mbal ti tᵾpa, elim nga kuimp keta ila panda rurum. Uⱡ ei, Isrel wamp mbᵾ ndi, elim nga rᵾⱡang ei, omba kel kel itangga, kᵾni nᵾkᵾneing nimba itim. 14 I itim uⱡ ei ndi, Isrel wamp mbᵾ nga numan orunga, ku rᵾrᵾm ila, nimba mᵾi rui ik unt nga mbᵾ mint, kᵾmp rok nᵾk etᵾng. Muⱡ mbal ei pepa mint omba, Jisas kᵾn oi pitim. Tᵾk mundi namᵾndrᵾng mon. Ei kᵾn, wamp nam ti, Kraist kᵾn rᵾmp ndupa moⱡnga ndam, Kraist ndi, muⱡ mbal ei tᵾpa mundᵾmba. 15 Uⱡ ei, kupa mint! Moses nga mi ik mbᵾ mint, kᵾmp rok pilik molk orung ila, muⱡ mbal ei ndi, wamp mbᵾ nga pilpa kungᵾndi ei, kum ropa mint petᵾm. 16 Wamp mat numan ropᵾl rok, Got kᵾn rukᵾr puk elingina ndam, muⱡ mbal ei ndi, wamp numan kum ropa petᵾm ei, Got ndi, tinga ndupa munduⱡnga. 17 Got ei Muⱡnga ei morum. Wote, Got nga Muⱡnga ei, wamp ti kᵾn moⱡum ndam, wamp ei mel ti ndi, kapⱡa imp muⱡi nambᵾⱡmba mon! 18 Wote tᵾn kᵾmp kᵾm, Got nga rᵾⱡang ila mormᵾn wamp kᵾⱡ nga kuimp keta ila mel ti ndi, kum ropa pi napᵾtᵾm mon. Rᵾⱡang ei, Nuim ei kᵾn orum ei, Muⱡnga ei ndi, tᵾn tᵾpa ropᵾl rondpa, Nuim elim mel randrᵾm. Randpa kᵾn, rᵾⱡang minal tᵾn ngurum.

Copyright information for `MED