2 Corinthians 4

Muⱡnga Ei Nga Mel Kai Mat Mᵾi Ming Ila Petᵾm

Got ndi, tᵾn kont kuⱡpa kᵾn, kongun ei, tᵾn ngurum ei nga, tᵾn ronduⱡ mbun mormᵾn. Wamp nga uⱡ pipil kit mo rok etmin mbᵾ, wak rurmᵾn. Ik kol rui uⱡ mbᵾ, iti natᵾtmin. Wote tᵾn ndi, Got nga ik mong mbᵾ ik kol ropᵾn ni nandᵾtmᵾn mon. Got nga kuimp keta ila, ik kupa nᵾtmᵾn ei, wamp mbᵾ ndi, tᵾn nga nᵾtmᵾn ik ei, kum tek pᵾtmᵾn. Ei kᵾn, Got nga ik ei, kun mint nᵾtmᵾn. Wote, wamp mbᵾ nga numan orunga, tᵾn kᵾn, pilik kai pᵾtmᵾn. Tᵾn Rᵾnang Ik Kai nᵾtmᵾn ei, mo rom ndam, kit muⱡing wamp mbᵾ kᵾn, mo romba. Ya mᵾi kona kur kit ei ndi, wamp mbᵾ nga numan orunga, imp moⱡpa kᵾn, mondᵾk pili uⱡ ei, mon etᵾm ila, Kraist nga Rᵾnang Ik Kai ei nga rᵾⱡang ei, wamp mbᵾ nga numan ila rukᵾr pi napᵾrᵾm. Wote, Got Kangᵾm Jisas ni, Got elim mel to ropa morum ei, kandᵾk pili napᵾtmin. Tᵾn nga ik mat, ni nanmᵾn mon! Tᵾn ndi, nimbun mel, Jisas Kraist tᵾn nga Wu Nuim ei nga ik ei, pep ropᵾn nimbun mel, tᵾn enim nga kindmant wamp mbᵾ ndi, Kraist nga kongun endinmᵾn. Unt Got ndi nimba mel,

“Kona rumbᵾⱡ murum ila, rᵾⱡang pangga,” nitim.
Got ei ndi ku, tᵾn nga numan ila etpa rᵾⱡang mundrum. I etᵾm uⱡ ei ndi, Got nga rᵾⱡang mon pi ei, Kraist nga kuimp keta ila, kiraipa muraipa etᵾm uⱡ ei, tᵾn pilpᵾn mbi ndurmin.
Tᵾn nombuⱡa rung wu kᵾⱡ nga rukᵾr orunga, mel ronduⱡ kai mat tetᵾm mbᵾ, mᵾi ming ila, ming rok pendᵾtmᵾn ni mel, tep mormᵾn. Ei nga, wamp ndi, kandᵾk pilik iting ei nga ronduⱡ ei, Got kᵾn tetᵾm, tᵾn nga ronduⱡ ti mon! Kona mbila mbun elpa elpa mat, tᵾn kᵾn orum ila tᵾtmin. Wote, mbun mbᵾ ndi, tᵾn etpa kit mundi namᵾndrᵾm. Uⱡ elpa elpa mat ndi, tᵾn nga pilpa kungᵾndi etᵾp kit mundimp nimba etᵾm uⱡ mbila, tᵾn ronduⱡ mbun mormᵾn. Wu mbᵾ ndi, tᵾn nᵾk kit mondᵾk, andᵾk pep rok, tᵾmbᵾⱡ ndi rok kunding etmin. Wote Got ndi, tᵾn wak rui narᵾrᵾm. Ui mat kᵾn, mbun mindil mat ndi, tᵾn etpa kit mondrum. Wote, tᵾn kit muⱡi nambᵾrmᵾn. 10 Jisas mbun koma ropa kurum uⱡ ei mel, tᵾn nga kᵾng orunga, rᵾk rᵾk mbun koma rormᵾn. Wote, tᵾn nga kᵾng orunga, Jisas kont morum uⱡ ei mel, wamp mbᵾ ndi, kᵾneing nimbun uⱡ mbᵾ, etpᵾn mot ndurmᵾn. 11 Wamp ndi, tᵾn rok kunding pilik etmin. Nambuⱡ emel, tᵾn ndi, Jisas nga kindmant kongun endᵾtmᵾn uⱡ ila, tᵾn rᵾk rᵾk kont mormin. Ei kᵾn, Jisas kont morum ei ndi, tᵾn nga kᵾng kuⱡi kᵾⱡ rᵾp etpa, wamp nga kuimp keta ila mepa andrᵾm. 12 Ei kᵾn, wamp kuⱡi uⱡ ei nga peng ei, tᵾn kᵾn kongun etᵾm. Wote, wamp kont mba mul uⱡ ei, enim kᵾn kongun etᵾm. 13 Buk Wingti ila nimba mel,

“Na Got kᵾn mondᵾp pᵾt uⱡ ei nga nᵾmp ekit ndunt,” nᵾtᵾm.
Ei mel ku, tᵾn Got kᵾn mondpᵾn pᵾtmᵾn uⱡ ei nga, nimbun ekit ndunmᵾn.
14 Nambuⱡ emel, tᵾn pilpᵾn pora ndurmᵾn ni, Nuim Jisas koⱡpa on kona ila pitim ni, Got ndi, ⱡoporpa oⱡa tᵾpa, kont mundrum. Jisas kᵾn itim uⱡ ei mel ku, Got ndi, tᵾn kᵾn, enim kᵾn, ⱡoporpa mepa mba, elim kᵾn nondpa mondᵾmba. 15 Tᵾn kᵾn uⱡ ronduⱡ mat onum mbᵾ, enim tᵾp rᵾpᵾndmin ei nga etᵾm. Got nga wamp poⱡ ti uⱡ ei tepa mba, wamp minal kᵾn, kapⱡa itangga kᵾn, wamp mbᵾ ndi, Got nga mbi ei, minal paka rondᵾk, angge nᵾk iting.

16 Tᵾn Kraist nga mondpa pili wamp mbᵾ ndi, uⱡ ei nga pilpᵾn kᵾn, Got nga kongun ila ronduⱡ mbun etmᵾn. Tᵾn nga kᵾng orunga, rᵾk rᵾk ui mbila akᵾnᵾm ei nga, wote tᵾn nga min ei, rᵾk rᵾk kont mba tetᵾm. 17 Mbun mat tᵾn kᵾn orum mbᵾ, tᵾpᵾn mel wei randᵾrmᵾn. Akup nga ui onunga ila, onum ei ka nᵾtmᵾn. Wote, tᵾn muⱡ kona rᵾk rᵾk kai muⱡmin ei nga pᵾtmᵾn. Muⱡ kona kai muⱡmin uⱡ ei ndi, ya mᵾi kona mbun kᵾⱡ, tᵾpa mana ndurum. 18 Tᵾn mel mat pilpᵾn mong ei ndi, kanmᵾn nᵾtmᵾn ei, kapⱡa mon. Tᵾn ndi, ronduⱡ mundpᵾn mong ei ndi, kᵾni nakᵾndᵾrmᵾn mel mbᵾ, kapⱡa kᵾnᵾmin. Wote, tᵾn nga mong raⱡ ndi, kandᵾrmᵾn mel mbᵾ, akup ui ila mint tetᵾm. Tᵾn nga mong raⱡ ndi, kᵾni nakᵾndᵾrmᵾn mel mbᵾ, rᵾk rᵾk tepa mint mba.

Copyright information for `MED