2 Corinthians 5

Muⱡ Kona Muⱡmin Ei Mel

Tᵾn akup ya mᵾi kona mormᵾn muⱡ manga kᵾⱡ, etpa kit moⱡum ndam, wote Got ndi, manga ti, wi muⱡ kona ila tᵾn ngumba ei, pilpᵾn mormᵾn. Manga ei, wamp nga ki ila rᵾki nakrᵾng ei, rᵾk rᵾk tetᵾm. Akup ya mᵾi kona ila moⱡpᵾn kᵾn, muⱡ kona manga ei ndi, tᵾn wal pᵾki kont mel tᵾpa pukᵾndangga, nimbun mindil tinmᵾn. Muⱡ manga ei ndi, tᵾn tᵾpa kum rom ndam, tᵾn nga min ei nga kᵾng ti, mot ni nanᵾmba. Ya mᵾi kona muⱡ manga ila moⱡpᵾn kᵾn, mbun tᵾpᵾn, ka etpᵾn enmᵾn. Wote, tᵾn nga kᵾng unt nga kᵾⱡ, wak rumin ei nga ni nanmᵾn mon! Tᵾn nga kᵾng kont nga kat, wal pᵾki kont na ni mel, pᵾkmin ei nga numan ngumbun nᵾnmᵾn. Ei kᵾn, kont mba mul kᵾng kᵾⱡ ndi, kui kᵾng kᵾⱡ, tᵾpa mana ndumba. Got elim ndi, tᵾn kᵾng kont nga ngumba pilpa kᵾn, Muⱡnga Wingti ei, tᵾn to ropa ngurum. Uⱡ ei ndi, ora ndupa, mel kai ingk ti, wote ngumba ei nga itim.

Tᵾn ndi, uⱡ kᵾⱡ rᵾk rᵾk pilmina kᵾn, tᵾn etpa ronduⱡ mundrum. Akup tᵾn ya kᵾng kᵾⱡ pᵾkᵾ mormun ei kᵾn, Got nga mul kona ila, elim kᵾn muⱡi nambᵾrmᵾn mon. Akup tᵾn nga mondpa pili ila uⱡ kᵾⱡ, kupa nimbun mondᵾp pilip mormᵾn. Wote elim mong raⱡ ndi, kᵾni uⱡ ei mon! Na nᵾmp pora ndur. Tᵾn nga numan ila ronduⱡ punmᵾn ei, tᵾn nga mᵾi kona kᵾng kᵾⱡ wak ropᵾn, tᵾn nga kona kupa ila mbun, Got kᵾn muⱡamin ka nᵾmp pᵾnmᵾn. Ei nga, tᵾn ya mᵾi kona ila kᵾng kᵾⱡ, tep muⱡmᵾn ndam kep, wak rumᵾn ndam kep, Got nga numan pᵾtᵾm uⱡ mbᵾ mel mint, ronduⱡ mundpᵾn etmin. 10 Tᵾn wamp pora, Jisas ndi, kᵾmp tᵾmba. Ei nga, ya mᵾi kona ila, tᵾn moⱡpᵾn uⱡ kit mbᵾ etmin muna, uⱡ kai etmin mbᵾ mel, Jisas ndi, yant omba kᵾn, tᵾn punt ropa, elpa elpa ngumba.

Kraist Ndi, Tᵾn Wamp Mbᵾ, Got Kᵾn Tᵾpa Tenda Etᵾm

11 Tᵾn Got kᵾn, mundmong iti uⱡ ei pilpᵾn kᵾn, wamp mat etᵾp rukᵾr timin etmin. Got ndi, tᵾn pilpa pora ndurum. Ei mel, enim ndi, na pilik pora ndurmᵾn nᵾmp pᵾt ku. 12 Ya ik kᵾⱡ ndi, tᵾn nga kaip ninding nimbun ik ti, ni nanᵾnmᵾn mon. Enim ndi, tᵾn kᵾn numan kai piling ei nga ik pᵾⱡ ei, kundpᵾn ninmᵾn. Ei pilik molk kᵾn, wamp mat ndi, wamp mat nga mundmong rukᵾr orunga, kᵾni nakᵾndᵾk kᵾng orunga, uⱡ mbᵾ kandᵾk, kaip nᵾk etmin wamp mbᵾ nga ik punt reing nimbun, man ngump ninmin. 13 Tᵾn kupᵾr wamp raⱡpᵾn, ik nimin ndam, uⱡ ni, Got nga kongun endpᵾn kᵾn nᵾtmᵾn. Wote, tᵾn numan kun pilpᵾn nᵾtmᵾn ndam, uⱡ ni ndi, enim tᵾpᵾn rapundpᵾn nᵾtmᵾn. 14 Kraist nga wamp kont kul uⱡ ei ndi, tᵾn nokundrum. Ei kᵾn, tᵾn pilpᵾn mbi ndupᵾn etmᵾn ei, wu tenda ti ndi, tᵾn wamp pora nga nimba kurum. Uⱡ ei nga, tᵾn wamp mbᵾ pora, elim kurum ei mel kuⱡmin. 15 Wu ei, tᵾn wamp mbᵾ pora nga nimba kurum. Ei nga, tᵾn kont mormᵾn ei kᵾn, tᵾn nga orunga mint, pili napilpᵾn, tᵾn nga nimba koⱡpa, wote aldpa ⱡoporpa oⱡa murum wu ei nga mint, pilpᵾn muⱡᵾmin.

16 Ei kᵾn, akup ui mbila, wamp nga numan kandpᵾn tᵾpᵾn, wamp ti kᵾmp ti nᵾtmin. Unt tᵾn wamp nga numan kandpᵾn tᵾpᵾn, Kraist kᵾmp titmin. Uⱡ ei, tᵾn aldpa iti nᵾtmin. 17 Ei nga, wamp nam ti, Kraist kᵾn rᵾmp ndupa, moⱡum ndam, wamp ei kont nga ti ku moⱡmba. Uⱡ unt nga etᵾm nimbᵾ, pora nᵾtᵾm. Akup uⱡ kont nga mat etᵾm. 18 Uⱡ mbᵾ pora, Got ndi, etpa tᵾn kᵾn pinditim. Tᵾn unt, Got kᵾn oi kan pendpᵾn murmᵾn ila, Kraist ndi, tᵾn etpa, Got kᵾn numan tenda mundrum. Ei kᵾn, el puⱡa wamp mat, Got kᵾn numan tenda mundᵾk muⱡing uⱡ ei nga kongun ei, tᵾn ngurum. 19 Got ei, Jisas kᵾn moⱡnga kᵾn, el puⱡa wamp mormin mbᵾ etpa, Got kᵾn numan tenda mundrum. Ei nga, tᵾn ik nᵾtmin. Wamp mbᵾ nga uⱡ kit etmin mbᵾ, Got ndi, pili napᵾtᵾm. Ei kᵾn, Got ndi, el puⱡa wamp mbᵾ, elim kᵾn etpa, numan tenda mundrum uⱡ ei nga, tᵾn ik nᵾtmᵾn. 20 Tᵾn Kraist nga keta tᵾpᵾn kᵾn, wamp mbᵾ, nimbun ngurmᵾn. Got elim ndi, tᵾn nga keta ila moⱡpa, wamp mbᵾ wi rorum. Ei kᵾn, tᵾn Kraist nga mbi ila moⱡpᵾn, enim wamp mbᵾ, waldpᵾn nimbun mel, enim Got kᵾn oi kan pendᵾk mormin uⱡ ei, wak rok, Got elim kᵾn rukᵾr puk, numan tenda mundᵾk muⱡᵾi! 21 Kraist ni, uⱡ kit ti, iti nᵾtᵾtᵾm mon. Wote Got ndi, tᵾn wamp mbᵾ, tᵾpa rapundpa kᵾn, tᵾn nga uⱡ kit etmin mbᵾ, Kraist ndi, tᵾpa rak ndupa, koma rurum. Kraist ni, uⱡ kit etmin wu na ni mel, kapⱡa kurum. Ei nga, Got ndi, uⱡ itim ei, tᵾn wamp mbᵾ, Kraist kᵾn rᵾmp ndupᵾn moⱡpᵾn kᵾn, Got nga wamp kun kai kᵾⱡ, muⱡᵾmin nimba itim.

Copyright information for `MED