2 Corinthians 6

Nombuⱡa Rung Wu Kᵾⱡ, Mbun Puⱡi Tᵾk Mek Kongun Etᵾng

Tᵾn Got nga ronduⱡ ila kongun etpᵾn kᵾn, enim ik ronduⱡ kat kundpᵾn ninmᵾn. Enim Got nga wamp poⱡ ti uⱡ ei, tᵾk pora ndurᵾng. Uⱡ ei, enim ndi, nᵾwa wak rui nᵾrᵾi, mon! Got ndi, nimba mel,

“Na nga ui kai ila, na ndi, nim nga ik nitin ei, kum tep pit. Na nim etᵾp timp ui ila, na ndi, nim tᵾp rᵾpᵾndᵾnt,” nᵾtᵾm.
Enim pilik kai itᵾi! Akup nga ant ila, Got nga wamp poⱡ tᵾmba ui ei, akup. Wote, wamp etpa tᵾmba ui ei, akup ku.
Tᵾn nga kongun enmᵾn ei, wamp ti ndi, nᵾk kit mundi nᵾmᵾndeing nimbun kᵾn, wamp ti nga nombuⱡa mam ila uⱡ ti etpᵾn, kit mundi nᵾmᵾndᵾrmᵾn, mon! Wote ei kelpᵾn, tᵾn Got nga kongun wu kᵾⱡ mormin nimbun kᵾn, namba uⱡ etmin mbᵾ, wamp mbᵾ kᵾn tᵾpᵾn, ora ndurmᵾn. Mbun elpa elpa mat, tᵾn kᵾn orum ku. Wote, uⱡ kit mat ndi, tᵾn etpa kit mondnᵾm ku. Wote, tᵾn ronduⱡ mundpᵾn mormin mint. Tᵾn tᵾmbᵾⱡ ndi rok, kan nguk etmin. El puⱡa wamp mbᵾ ndi, tᵾn tᵾk ruk nduk mondᵾk, ik kit nguk etmin, kongun minal etpᵾn, ur pi napᵾtmᵾn, kump kun pukᵾ moⱡpᵾn etmᵾn. Tᵾn numan kun kai mbᵾ pilpᵾn, uⱡ eng nui kupa mbᵾ mint etmᵾn. Tᵾn ik mura tᵾkᵾrpᵾn iti natᵾtmᵾn. Tᵾn ndi, Got nga kongun wamp mbᵾ, etpᵾn kai mint mondurmᵾn. Muⱡnga Wingti nga ronduⱡ ei, tᵾn kᵾn tetᵾm ila, tᵾn ndi, wamp mbᵾ numan ngurmᵾn. Tᵾn nga keta ila mint, ni nandᵾtmᵾn, mon! Wote, tᵾn ik kupa ei mint nimbun, ekit ndurmᵾn. Tᵾn Got nga ronduⱡ ila mint kongun etmᵾn. Tᵾn numan kun kai kᵾⱡ mint pilpᵾn kᵾn, rᵾk rᵾk uⱡ kit mbᵾ, el ropᵾn itmin mel mbᵾ tᵾpᵾn, ki mbo orunga ambuⱡpᵾn, wote ki rar orunga ambuⱡpᵾn, el etmᵾn. Wamp mat tᵾn nga kaip nᵾndᵾtmᵾn, wote wamp mat ndi, tᵾn nga orunga nᵾk kit mondurmin. Wamp mat ndi, tᵾn nga ik mbuldung nᵾndᵾtmᵾn. Wote wamp mat ndi, mat kundᵾk, tᵾn uⱡ kai mbᵾ etmᵾn nᵾtmin. Wamp mat ndi, tᵾn ik kol ronmᵾn nᵾtmin. Wote ei mon! Tᵾn ik kupa ei, mint nᵾtmᵾn. Wamp mat ndi, tᵾn pilik mbi ndui nandᵾrmin. Wote, wamp mat ndi, tᵾn pilik mbi ndurmin. Tᵾn koⱡmina ei nga, wote kont mbun mormᵾn. Got ndi, tᵾn tᵾmbᵾⱡ ndi rorum ei nga, ropa tᵾpa kun mundpa kᵾn, tᵾn tᵾmbᵾⱡ ndi ropa, kundi nakᵾndrᵾm. 10 Tᵾn numan mbun kandᵾp tᵾtmin ku. Wote, rᵾk rᵾk numan kai pili uⱡ ei, tep mormᵾn. Tᵾn wamp kurpa na ni mel raⱡᵾp moⱡpᵾn, wote wamp minal etpᵾn, nuim mondurmᵾn. Tᵾn mel mat, tepᵾn muⱡi nambᵾrmᵾn, wote Got nga mel puⱡi, tᵾn tep mormᵾn.

11 Enim Korin wamp mbᵾ ye! Tᵾn ndi, enim numan minal ngumbun kᵾn, tᵾn nga ik rukᵾr orunga pᵾtmᵾn mbᵾ, enim kᵾn nimbun piral ndupᵾn ngunmᵾn. 12 Tᵾn ndi, enim kᵾn, numan minal nguⱡmina. Wote, enim ndi, tᵾn numan ngui nganggᵾk kᵾn, enim nga numan orunga tᵾn kᵾn, kumba rok mormin. 13 Akup na ndi, enim kundᵾp nᵾnt. Uⱡ ei, tipam ndi, kangambuⱡa mbᵾ kᵾn, nᵾtᵾm ni mel nᵾnt. Tᵾn ndi, enim numan ngunmᵾn ei mel, enim ndi, tᵾn numan minal ngᵾi!

Uⱡ Kit Iti Wamp Mbᵾ Kᵾn, Rup Rui Nurmin

14 Mbo wamp kᵾⱡ, wamp rᵾⱡaip kat mormin. Enim wamp kᵾⱡ kᵾn rᵾp rok andᵾk, uⱡ mat eng mbᵾ, tᵾk rapᵾndᵾk iti nᵾtᵾi, mon! Uⱡ kun kai ei kᵾn, uⱡ kit iti uⱡ ei kᵾn, kapⱡa tᵾp rak nduimᵾn ei? Rᵾⱡang ei kᵾn, rumbᵾⱡ ei kᵾn, tᵾkᵾⱡ rak ndukᵾⱡ kongun etmbil ei? Ei mon! 15 Kraist kᵾn Seitan raⱡ numan tenda pᵾtᵾmbil ei? Mondpa pili wamp ei kᵾn, mondpa pili nᵾpili wamp ei kᵾn, numan tenda pᵾtᵾmbil ei? Ei mon! 16 Kur kit atinga rundi uⱡ ei kᵾn, Got nga manga wingti raⱡ, tᵾk rak ndukᵾⱡ kongun etmbil ei? Tᵾn pᵾtmᵾn ni ka! Got rᵾk rᵾk kont morum. Ei nga, manga wingti ei, tᵾn wamp mbᵾ mormᵾn. Got ndi, nimba mel,

“Na ndi wamp mbᵾ nga ruk ting ila moⱡᵾp, rᵾp rop nombuⱡa andᵾp itamba kᵾn, wamp mbᵾ, na kᵾn muⱡangina, na wamp mbᵾ nga Got ei muⱡimp,” nᵾtᵾm.
17 Wote Got ndi, nimba mel,
“Enim ndi, wamp uⱡ kit etmin mbᵾ, wak rok puk, ronggᵾt elpa muⱡᵾi! Enim mel ⱡar morum mbᵾ, ᵾmbᵾⱡi nᵾmbᵾⱡᵾi! I tangina kᵾn, na ndi, enim rukᵾr timp.
18 Uⱡ i eng ndam, na enim nga Tipam ei muⱡamba kᵾn, enim wamp mbᵾ, na nga kangambuⱡa kᵾⱡ muⱡing,
Got Wu Ronduⱡ Pi ei ndi,
ik mbᵾ nᵾtᵾm.”
Copyright information for `MED