2 Corinthians 7

Wamp angmᵾn! Tᵾn Got nga nimba mᵾi rurum ik kᵾⱡ, pilpᵾn pora ndurmᵾn. Ei nga, tᵾn nga kᵾng orunga kep, muⱡnga orunga kep, uⱡ ⱡar mul mbᵾ, wak ropᵾn, Got nga mundmong endpᵾn, uⱡ kun kai eng nui mbᵾ, rᵾk rᵾk itᵾmin.

Korin Wamp Kᵾⱡ Numan Ropᵾl Roⱡungina, Pol Numan Kai Pitim.

Enim ndi, tᵾn numan minal ngᵾi! Tᵾn ndi, wamp mat kᵾn, uⱡ ⱡawa mat iti natᵾpᵾn, wote ropᵾn kit mondpᵾn uⱡ ti, iti natᵾtmᵾn. Tᵾn ndi, wamp mat ik kol ropᵾn ngumbun mel mat, ti nᵾtᵾtmᵾn, mon ku! Na ik nᵾnt ei, enim kᵾmp tᵾp ni nanᵾnt, mon! Na ndi, enim kundᵾp nᵾmp pora ndᵾr ni, tᵾn ndi, enim numan minal ngurmᵾn. Enim koⱡung ndam, tᵾn enim kᵾn, kunda kuⱡmin. Enim kont moⱡᵾng ndam, tᵾn kunda, enim kᵾn kont muⱡmin ku. Enim nga uⱡ etmin mbᵾ na ndi pilip kᵾn, enim numan minal ngunt. Na ndi, enim kᵾn numan minal ngunt. Tᵾn kᵾn mbun mam mat orum ei kᵾn, na ndi, enim nga nᵾmp pᵾt uⱡ ei ndi, na etpa ronduⱡ munduⱡnga, numan kai minal pᵾt.

Tᵾn unt, Masaroniya kona ila ekit oⱡmina kᵾn, kᵾng orunga mbun elpa elpa mat tᵾn kᵾn oⱡnga, tᵾn muⱡ ti nᵾtᵾtmᵾn. Wote, tᵾn nga numan rukᵾr orunga, mundmong itmᵾn. Wote, wamp mbun tᵾtmin uⱡ mbᵾ, Got numan kai ngurum wu ei ndi, Taitas tᵾpa, tᵾn kᵾn mundrum ila, tᵾn etpa numan kai pinditim. Taitas tᵾn kᵾn urum ei nga mint, tᵾn etpa numan wang ndui nᵾndrᵾm mon. Enim ndi, Taitas etᵾk numan kai pendᵾtᵾng uⱡ ei, Taitas ndi, tᵾn kundpa nitim. Wote enim ndi, na kᵾning ei nga munt mindil tᵾk, ka etᵾk, wote tᵾk rapᵾndᵾk itmin nᵾk, mormin nitim ku. Uⱡ etmin ei nga, na numan minal enim.

Ei kᵾn, na nga mon rop enim ngur ei, kandᵾk mbun tᵾtᵾng ei nga, na ndi, enim kᵾn kont itim. Wote, akup kont iti natᵾnᵾm. Nambuⱡ emel, na nga mon ei ndi, enim etpa mbun ngurum ndam, na pᵾnt ei, ui onunga kot ila mint mbun ngurum. Wote, akup na numan kai pᵾnt ei, enim numan mbun pᵾtᵾng ei nga mon. Enim mbun tᵾtᵾng ei ndi, enim etpa numan ropᵾl rundrum ei nga, na numan enim. Nambuⱡ emel, Got elim ndi, enim mbun ei ngumba kᵾn, enim etpa numan ropᵾl rundrum. Ei nga, na nga mon rᵾr ik ei ndi, mbun ngui ngᵾnggᵾrᵾm mon. 10 Got ndi, tᵾn mbun ngumba kᵾn, wote etpa numan ropᵾl rondpa, etpa rukᵾr tᵾtᵾm. Ei kᵾn, tᵾn numan ropᵾl ruimin ei nga, mbun ti nᵾtᵾmᵾn. Wote ya mᵾi kona uⱡ mbᵾ nga mbun tᵾtmᵾn mbᵾ ndi, wamp ropa kondrum. 11 Got ndi, enim mbun ngurum uⱡ ila, namba uⱡ mat enim kᵾn etpa mot ndurum uⱡ mbᵾ, en enim kandᵾk kai itᵾi! Uⱡ ei ndi, enim nga numan orunga, ropa rut nduⱡnga, enim nga uⱡ kit etmin mbᵾ wak rok, uⱡ kun kai mbᵾ iting ei nga, numan nguk etmin. Mbun tᵾtᵾng ei nga, popᵾⱡ kulk, wote omba nᵾk, mundmong etmin. I elinga, enim ndi na ok kᵾning ei nga, numan nguk, wote na tᵾk rapᵾndᵾk kᵾn, uⱡ ⱡawa orum mbᵾ, tᵾk mana ndurmᵾn. Uⱡ mbᵾ ndi, ora ndupa, mbun tᵾtᵾng uⱡ ei, enim nga uⱡ ti mon. 12 Ei nga, na ndi, mon rop enim ngur uⱡ ei, wamp ti nga uⱡ ⱡawa itim ila, muna wamp ti, uⱡ ⱡawa elinga, kandᵾp mon rop ngui ngᵾnggᵾr, mon! Wote na ndi, mon rop, enim ngur uⱡ ei, enim pilik kun iteing nimp, Got nga kuimp keta ila etᵾk kᵾn, tᵾn numan minal ngᵾk iteing nᵾmp it. Uⱡ ei nga mint, na ndi, enim mon rop ngur.

13 Uⱡ ei ndi, enim nga uⱡ etmin kᵾⱡ ndi, tᵾn etᵾk numan kai pendᵾtmᵾn. Tᵾn numan kai pilpᵾn, ambᵾⱡᵾp paⱡpᵾn etmᵾn. Ei nambuⱡ emel, enim ndi, Taitas etᵾk numan kai pendᵾtᵾng. Wote, enim ndi pora, Taitas nga numan orunga elingina, ambuⱡpa paⱡpa murum. Tᵾn tᵾpa rapundpa itim uⱡ ei nga, kandpᵾn kai pilpᵾn, ambᵾⱡᵾp paⱡᵾp itmᵾn. 14 Unt na ndi, enim nga uⱡ etmin mel, Taitas kundᵾp nᵾmp, enim nga mbi mundurmᵾn uⱡ ei nga, na pipil kuⱡi nᵾkᵾr, mon! Enim nga uⱡ etmin mbᵾ mel, tᵾn ndi, nᵾtmᵾn ik ei, kupa mint. Akup Taitas pilpa morum. Tᵾn ndi, enim nga mbi mundurmᵾn ik ei, kupa mint. 15 Wote, Taitas enim kᵾn urum ei nga, enim ndi, rawe etᵾk tᵾk, enim mundmong etᵾng. Uⱡ ei nga, Taitas ndi pilpa, nim ik ei, enim pora pilik, pep rangina kᵾn, Taitas ndi, enim kᵾn numan minal ngumba, ronduⱡ mundpa itim. 16 Akup na numan enim. Ei nambuⱡ emel, uⱡ kai mbᵾ pora, enim ndi, rᵾk rᵾk iting ei nga, na pᵾnt ei, kupa iting.

Copyright information for `MED