2 Corinthians 9

Got Nga Wamp Mbᵾ, Tᵾk Rapᵾndrᵾng

Pol ndi, Korin wamp mbᵾ kundpa, Got nga Jura wamp mbun tᵾk mormin ei nga, tᵾpa rᵾpᵾndi uⱡ ei, enim pilik pora nduk mormin. Enim ndi, kongun ei, numan nguk etmin uⱡ ei, na ndi, pilip pora ndup kᵾn, na ndi, enim nga mbi, Masaroniya wamp mbᵾ nga kuimp keta mbila rᵾk rᵾk paka rondᵾr. Wote na ndi, wamp mbᵾ kundᵾp nimp mel, unt pana ila, Grik wamp mbᵾ ndi, kongun ei puⱡ mondᵾk iting pilik, tᵾk minal etᵾng. Enim kongun ronduⱡ mundᵾk etᵾng uⱡ ei, pilik kᵾn, Masaroniya wamp minal ndi, kongun ei, numan nguk etᵾng. Pol ndi, nimba mel, “Tᵾn ndi, enim nga mbi paka ropᵾn ninmᵾn ik ei, rok wei ai indi nᵾndᵾi mon! Wote, enim tᵾk kun etᵾk, nokundᵾk muⱡangina kᵾn, kang wu Taitas kᵾn ᵾngᵾn ralt enim kᵾn uinggil ei nga nᵾnt,” nitim. Tᵾn ndi, pᵾnmin ei, enim ndi, wamp tᵾpa rᵾpᵾndi uⱡ ei, kapⱡa iting mel enim. Ei nga, enim ndi, wamp tᵾpa rᵾpᵾndi uⱡ ei, tᵾk kun iti natᵾk muⱡangina kᵾn, wote Masaroniya wamp mat, na kᵾn kunda enim kᵾn ᵾmᵾn ndam, enim kᵾn, tᵾn kᵾn, kunda pipil kuⱡmin. Uⱡ i etmba ei nga, na punt ei, na ndi, kang wu Taitas kᵾn ᵾngᵾn ralt tᵾp mundamba kuimp tek, enim kᵾn ok molk, enim nga wamp tᵾpa rᵾpᵾndi mel nguimin nᵾk, mᵾi ronmᵾn mel mbᵾ, tᵾk kun etᵾk muⱡᵾi! Wote, na unt ei kᵾn, enim ndi, wamp tᵾpa rᵾpᵾndi uⱡ kupa ei tangina, wamp mbᵾ ndi kᵾneing. Enim wamp pilik kai itᵾi! Wamp nam ti, kongun ou ndupa etᵾm ni ndi, rᵾng ou ndupa tᵾpa norum. Wote, kongun onunga etpa etᵾm ni ndi, rᵾng onunga etpa tᵾpa norum. Enim ndi, wamp mbᵾ, tᵾk rᵾpᵾndᵾk nguing uⱡ ei, ei mel unt enim nga numan orunga pilik kai etᵾk kᵾn, wote mel mbᵾ ngᵾi! Wamp ti ndi, mbun tᵾpa mel mat ngui ngᵾngimp nimba pilangga kᵾn, wamp ndi, kalk ngui nᵾng uⱡ ei, kapⱡa mon. Nambuⱡ emel, wamp namin mat, numan kai pendᵾk ngurmᵾn mbᵾ, Got ndi, numan ngorum. Got ndi, mel puⱡi enim wamp mbᵾ, tᵾpa rapundpa ngurum ila, enim wamp mbᵾ kapⱡa etᵾm. Ui mbila pora, enim mel mbᵾ kapⱡa etᵾm. Ei nga, mel mbᵾ ndi, wamp mat tᵾk rapᵾndᵾk kongun kai mat ou nduk itᵾi! Buk Wingti ei ndi, nimba mel,

“Wamp nam ti ndi, mel ou ndupa, wamp kurpa mbᵾ, tᵾpa rapundpa ngurum uⱡ kun kai ni, elim kᵾn tepa mint mba,” nᵾtᵾm.
10 Got ndi, rᵾng mong puⱡi wamp mbo rᵾⱡeing nimba ngumba, rᵾng elpa elpa mbᵾ, neing nimba ngumba etᵾm. Wote, tᵾk rapᵾndᵾk nguk iteing nimba etᵾm uⱡ ei ndi, wamp nam ti ndi, rᵾng mong raⱡnga kᵾn, wote rᵾng ou ndupa oⱡa omba rorum ni mel, enim nga uⱡ kun kai eng mbᵾ pora, tepa mint mba. 11 Got ndi, enim mel puⱡi ngurum uⱡ ei, enim ndi, wamp mbᵾ mel puⱡi ku ngeing nimba etᵾm. Tᵾn nga kongun enmin uⱡ ei nga, enim kundᵾp ninmin. Enim nga wamp tᵾpa rᵾpᵾndi uⱡ mbᵾ tangina kᵾn, wamp mbᵾ ndi, Got kᵾn angge neing. 12 Enim ndi, kongun ei etᵾk kᵾn, Got nga wamp mat mel mbᵾ nga mon ndum mbᵾ, tᵾk rapᵾndᵾk, wamp mbᵾ nguk kapⱡa indᵾi! Wote, enim uⱡ eng ei ndi, wamp mbᵾ, Got kᵾn angge minal neing. 13 Enim ndi, wamp tᵾpa rᵾpᵾndi uⱡ mbᵾ eng ndam, uⱡ kai mbᵾ, wamp mbᵾ ndi, kandᵾk pilik iting. Enim ndi, Got nga uⱡ kun kai mbᵾ pep rok kᵾn, Kraist nga Rᵾnang Ik Kai mbᵾ nᵾk etmin ei ka! Nᵾk pilik kᵾn, wamp mbᵾ ndi piling. Wote enim ndi, wamp mbᵾ tᵾk rapᵾndᵾk mel mat, wamp mbᵾ nguk, wote wamp elpa mat ngᵾk tangina kandᵾk kᵾn, wamp mbᵾ ndi, Got nga mbi ei paka runding ku. 14 Wote, Got nga wamp numan ngui uⱡ ei, enim kᵾn petᵾm ei ndi, enim numan minal nguk etmin. Wote, Got nga wamp poⱡ ti uⱡ ei, enim kᵾn pindangga nᵾk, atinga rondᵾk iting. 15 Got ndi, tᵾn wamp mbᵾ, Etpa Ti Wu ei, wei gem ngurum. Ei nga, tᵾn ndi, ik puⱡ ei kapⱡa ni nᵾmᵾn mon! Wote tᵾn ndi, Got kᵾn angge mint nᵾmin.

Copyright information for `MED