2 Thessalonians 1

Pol Nga Mon Akil Tepa Ropa, Tesalonaika Wamp Kᵾⱡ Ngurum

Tᵾn, Pol Sailas kᵾn Timoti kunda moⱡpᵾn, mon ropᵾn, enim Got Tipam ei kᵾn, Nuim Jisas Kraist raⱡ nga wamp met Tesalonaika Got nga rapa tenda ila mormin wamp mbᵾ kᵾn, mon rop ngunmᵾn. Tᵾn nga Tipam Got ei kᵾn, Nuim Jisas Kraist raⱡ nga wamp poⱡ ti uⱡ na, moⱡpa kundi uⱡ kai mbᵾ, enim kᵾn piyangga!

Jisas Yant Omba Wamp Kᵾmp Tᵾmba

Angmᵾn, ui mbila rᵾk rᵾk, enim nga nimbun Got kᵾn angge nimin mint i itmin ei, tᵾn kapⱡa itmin mint. Nambuⱡ emel, enim nga mondpa pili orunga kanmin ei, ronduⱡ puⱡnga, wote wamp numan ngui uⱡ ei, enim wamp tenda tenda nimba ei kᵾn tepa oⱡa omba ou ndunᵾm. Ei nga nimbun, tᵾn ndi, Got nga rapa tenda ila wamp mbila enim nga kaip nᵾndᵾtmin. Ei, enim akup ui mbila rᵾk rᵾk, uⱡ kit onum mbᵾ, wangga nᵾk pilik kelik, mindil tᵾk mondpa pili uⱡ ei, ronduⱡ mundᵾk amᵾnmᵾn. Ei nga, tᵾn ndi, enim nga kaip nᵾndᵾnmᵾn.

Enim nga enmin uⱡ kᵾⱡ, Got ndi, tᵾn orunga mel ndupa, elim ndi, tᵾn apᵾrpa tᵾpa, uⱡ kun mbila mint tᵾpa mundrum. Enim mindil tᵾk, wote Got nga mbi paka rondᵾnmin uⱡ ei ndi, enim elim nga wamp tᵾpa mumuk rui uⱡ mbᵾ enim ngomba ei nga, enim etpa mura mondnᵾm. Got ndi, uⱡ kun kai ti etmba ei, enim mindil ngung wamp mbᵾ, Got ndi, wamp mbᵾ, punt ropa mindil ku ngumba. Wote, enim nga kep, tᵾn nga kep, mbun tᵾtmᵾn uⱡ mbᵾ tᵾpa mundpa, numan kai mbᵾ ngumba. I etmba uⱡ ei, tᵾnggᵾt Nuim Jisas, elim nga anggelo ronduⱡ pi mbᵾ kᵾn, muⱡ kona molk, ekit wangina, ndip anmbil mam ti ndi omba, Got mondᵾk pili napᵾtmᵾn wamp mbᵾ kᵾn, omba Nuim Jisas nga Rᵾnang Ik Kai ei, teng ndui nandᵾrmin wamp mbᵾ, ndip ndi nangga, mindil mint nok muⱡing. Mindil ting ei, uⱡ nga kᵾnt nga pepa mint mba. Nuim ei nga rᵾngaⱡ ronduⱡ pi tem ila nondpa, muⱡi nᵾmbᵾⱡing. 10 Nuim Jisas yant omba, Got nga wamp mbᵾ kᵾn, mbi ou tᵾmba om ei kᵾn, elim nga mbi paka runding, mondpa pili wamp mbᵾ, numan kai pilik ambulk palk muⱡing. Enim kunda ila muⱡing ku, nambuⱡ emel, tᵾn ndi, Rᵾnang Ik Kai nimbun ngurmᵾn kᵾⱡ, mondᵾk pilik pep rorung ei nga.

11 Ei nga, nimbun enim nga rᵾk rᵾk atinga mint rondᵾrmin. Got ndi, enim wi ropa titim ei, elim ndi, enim pek molk, kai mundeing nimba pitim ei mel pek muⱡᵾi! Elim nga ronduⱡ ila, enim uⱡ kai mbᵾ, itmin nᵾk pilik, numan ngurmin uⱡ mbᵾ, elim ndi, etpa ronduⱡ mundangga. Wote, enim Nuim Jisas kᵾn mondᵾk pilik, uⱡ mat itmin nᵾk pilᵾng mbᵾ, elim ndi, etpa kapⱡa indangga iteing. 12 I etᵾk eng uⱡ ei ndi, enim Jisas nga mbi paka rundangina, wote elim ndi, enim i ku etmba. Tᵾn nga Got kᵾn Nuim Jisas Kraist raⱡ nga wamp poⱡ ti uⱡ mbᵾ, enim kᵾn kan piyangga!

Copyright information for `MED