2 Timothy 4

Got Nga Ik Ei Ronduⱡ Mundkᵾn Nindi

Got kᵾn, Kraist Jisas raⱡ nga kuimp keta ila, na nim kᵾn ronduⱡ mundᵾp nᵾnt. Ei nambuⱡ emel, Kraist Jisas ndi omba, wamp kui kont mbᵾ pora, kᵾmp tᵾmba. Ei kᵾn, Jisas elim kᵾn, elim nga tᵾpa mumuk rui uⱡ ei nondpa omba, mot nimba enim. Ei nga, nim kᵾn ronduⱡ mundᵾp nᵾnt. Rᵾnang Ik Kai ei, wamp piling moⱡung mbila kep, wei kep, ronduⱡ mundkᵾn nᵾkᵾn mint muⱡi! Koma pou raⱡ tekᵾn man ngukᵾn, uⱡ ⱡawa eng mbila, ik mura iti natkᵾn, raka raka nᵾkᵾn, tᵾkᵾn kun mundi! Ui ti ekit omba ila, wamp ou ndupa ik kupa ei, tᵾk roi nduk, en enim nga kᵾng orunga minal pilik, ik mbo wu ou ndupa kandᵾk tangina, wu mbᵾ ndi, wamp mbᵾ ik elpa mat mbo ndangina, ik mbᵾ kum tek piling. Wamp mbᵾ ndi, ik kupa ei wak rok, mbo ik nᵾmᵾ mbᵾ nga ou ndupa piling Wote, nim uⱡ mbᵾ nga tᵾk mendkᵾn molkᵾn, mbun om uⱡ mbᵾ koma rokᵾn, Rᵾnang Ik Kai ei, nin ei nga ronduⱡ mundkᵾn ni! Namba kongun mat in mbila, Got nga kongun kindmant wamp mel ralkᵾn muⱡi!

Na Nga Kongun Ei, Akup Pora Nimba Enim

Na nᵾkᵾn pin ndam, na nga moⱡᵾp mbi ui mbᵾ, omba nondpa enim, kᵾng orunga kont mul uⱡ ei, mbun mindil ngangina, mᵾi kona wak ruimp ui ei, nondpa enim. Na nombuⱡa pᵾn ni uⱡ ila, omp kai mundᵾr. Pᵾn nᵾtmin to ila, omp pit ka ndup mor. Ei na nga mondpa pili uⱡ ei, ambᵾⱡᵾp gi ndur. Ei nga, na mel kai ti timp ei, nok ndupa tetᵾm ei, uⱡ kun kai mbᵾ nga peng wᵾna mundimp ei. Uⱡ mbᵾ nga tepa kᵾmp tᵾtᵾm, Wu Nuim ei, yant om ui ou ila, na ngumba. Wote, na mendpᵾⱡ mon, wamp mat, Nuim ei omba kᵾnmin nᵾk, numan kai pendᵾk nokundᵾk mormin mbᵾ, kunda ngumba.

Man Ik Koⱡmung Mat

Nim tᵾkᵾrkᵾn na okᵾn na kᵾni! 10 Dimas ni, mᵾi kona uⱡ mbᵾ numan mondpa, na wak ropa, Tesalonaika kona ila mba, wote Kresens mba, wote Galeisiya kona purum. Wote Taitas, Delmeisiya kona ila purum ku. 11 Luk mendpᵾⱡ na kᵾn morum. Nim wu Mak tᵾk mekᵾn ui! Nambuⱡ emel, wu ei ndi, na nga kongun et ila tᵾpa rapᵾndᵾmba. 12 Na ndi, Tikikus, Episis kona ila tᵾp mundᵾr. 13 Nim uin etkᵾn, na nga wal pᵾki ruⱡ kᵾⱡ, Trowas kona wu Karpas nga manga ila tep kelip ur kᵾⱡ mendkᵾn ui! Buk tetᵾm mbᵾ kunda, wote kᵾn kᵾng ila buk mel tetᵾm mbᵾ kunda ku. 14 Ain kongun etᵾm wu Aleksanda ndi, na minal etpa kit mondum mbᵾ nga, na ik ti, ni nᵾnimp. Nuim ei ndi, em uⱡ mbᵾ mel elim ndi, punt ropa ngangga. 15 Nim wu ei nga tᵾk mendkᵾn muⱡi! Nambuⱡ emel, wu ei ndi, tᵾn nga ik nᵾtmᵾn mbᵾ, tᵾpa roi ndupa ropa akpa etᵾm.

16 Na ik ei nga nᵾmp kun itimp nᵾmp, wamp nga kuimp keta ila kot it ei kᵾn, wamp ti ndi, na tᵾpa rᵾpᵾndi nᵾpᵾndrᵾm mon! Na mel wei mel wak rorung. Got kᵾn atinga rop nᵾnt ei, wamp kᵾⱡ uⱡ etᵾng ei nga pili nᵾpᵾlangga nᵾnt! 17 Wote Nuim ei, na kᵾn omba moⱡpa, ronduⱡ ngurum uⱡ ei ndi, na etpa elim nga nombuⱡa rung ik ei neimp nilinga, ronduⱡ mundᵾp nilimba, wamp rᵾⱡaip elpa mbᵾ pora, ik ei pilik tᵾtᵾng, kui laiyon nga keta min ila, na ekit titim. 18 Wote Nuim ei ndi, na uⱡ kit mbila ok, poⱡpa oⱡa tᵾpa mepa, muⱡ kona tᵾpa mumuk rui kona ila tᵾpa mondᵾmba. Mbi ou oⱡa orunga ei, elim kᵾn uⱡ nga kᵾnt nga pepa mint pangga! Ei kupa.

Rawe Ik Kai Mbᵾ

19 Na nga rawe ik kai mbᵾ nᵾmp Prisila, Akuila kᵾn, wote Onisiporas kᵾn, elim nga manga tenda wamp kᵾⱡ kᵾn nᵾmp mundunt. 20 Erastas Korin kona ila moⱡnga, na ndi, Tropimas, Miletus kona ila mondᵾp kelip ur. Ei nambuⱡ emel, wu ei, kui kandpa titim. 21 Kona kᵾpkᵾ, ui kit orum ui ei, akil tiyangga, nim kuimp tekᵾn ui! Yubilus, Purens, Linus kᵾn Klautiya kᵾⱡ, ya molk, nim kᵾn rawe ik kai mbᵾ nᵾk mundunmᵾn, wote ᵾngᵾnᵾl kat kunda ku nᵾnmin. 22 Nuim ei omba, nim nga muⱡnga orunga poⱡpa kan tangga! Got nga wamp poⱡ ti uⱡ ei, enim kᵾn kan piyangga!

Copyright information for `MED