Acts 1

Aposel Kᵾⱡ Kongun Etᵾng Ei Nga Timan

Wu Tiyopilus ye! Na ik mong kuimp tep mon rur kᵾⱡ ila, Jisas ndi, kongun puⱡ mondpa etpa, wote wamp ik mbo endpa kᵾn, wote muⱡ kona oⱡa purum ei mel rur. Muⱡ kona oⱡa pi nᵾpi kᵾn, Muⱡnga Wingti nga ronduⱡ ila, elim nga kitip kᵾni wu, unt kᵾmp ropa titim. Nimbᵾ, kongun iting mbᵾ mel, mbo rondpa nimba, ndoimp rundrum. Wote, elim nde peta ila rorung, wote ⱡoporpa omba purum. Ei kᵾn, akil tepa, elim nga kitip kᵾni wu mbᵾ kᵾn, elim kont mor ei kandᵾk, poⱡ ndeing nimba, tᵾpa mot ndurum. I etpa, elim tᵾpa mot ndupa, Got nga wamp tᵾpa mumuk rui uⱡ ei nga, mbo endpa. I elinga, rumbᵾⱡ 40 omba purum. Ui ti kᵾn, Jisas elim nga kᵾmp ropa titim wu ni kᵾⱡ kᵾn moⱡpa, nimba mel, “Enim Jerusalem kona wak rui nᵾrᵾi! Wuta ndi, enim mel ti nguimp nitim nᵾmp, na enim kundᵾp nit ni mel ngumba, ei nga nokundᵾk muⱡᵾi! Jon ndi, wamp mbᵾ nu mendpᵾⱡ ila, nu tinditim. Wote, enim rumbᵾⱡ onunga, ralt omba pangga, Muⱡnga Wingti ei ndi, enim nu tᵾndᵾmba,” nitim.

Jisas Mepa Muⱡ Kona Oⱡa Purum

Ui ti kᵾn, Jisas kᵾn, elim nga kitip kᵾni wu nimbᵾ kᵾn, ok tᵾk tenda etᵾk morung ei kᵾn, wu nimbᵾ ndi, Jisas waldᵾk nᵾk mel, “Nuim ye! Akup nim ndi, Isrel wamp mbᵾ, tᵾkᵾn tenda etkᵾn tᵾkᵾn, mumuk ruin muna mon nda?” nᵾtᵾng. Wote Jisas ndi, nimba mel, “Uⱡ ei, enim nga piling ui ti mon. Wuta ndi, kanggᵾp ambuⱡpa pinditim ui ei, elim nga ronduⱡ ila pilpa morum. Wote, Muⱡnga Wingti ei, mana om ei kᵾn, enim ronduⱡ ting. Tᵾk kᵾn, Jerusalem kona ila kᵾn, Juriya kona ila kᵾn, Sameriya kona na, wote muⱡ uⱡ kona mbila pora, na nga ik ei nᵾk, para nduing,” nitim. Ik ei mel nimba moⱡnga, kandrung mel, Jisas ni, tᵾpa mepa oⱡa purum. Wote, kopa kat ndi omba, peta rurum ila, elim ni kᵾni nakᵾndᵾng.

10 Wote, purum ni mel kandᵾk, mint morung ei kᵾn, wu muⱡ kurᵾmᵾⱡᵾ rᵾⱡi ralt okᵾⱡ, wu kᵾⱡ nga wung ila anggilikᵾⱡ wu raⱡ ndi, nᵾkᵾⱡ mel, “Enim Galili kona wu mbᵾ ye! Nambuⱡ emel, enim muⱡ ila, tᵾk oⱡa nduk, kandᵾk mormᵾn? Wu Jisas ndi, enim wak ropa, muⱡ kona oⱡa punum. Wote, i ku etpa, muⱡ kona punum ei mel, wote yant omba!” nᵾtᵾnggil.

Wu Juras Nga Koⱡ Ila Wu Ti Kandᵾk Tᵾtᵾng

12 Wote, Jisas nga kitip kᵾni wu ni kᵾⱡ, Olip Komnga wak rok, Jerusalem kona ila purung. 13 Jerusalem kona ila puk kᵾn, wote en enim nga petᵾng manga nila, oⱡa orunga purung. Wu Pita, Jon, Jeims, Andru, Pilip, Tomas, Bartolomiyu kᵾn, Matyu kᵾn, Wu Alpiyas kangᵾm Jeims kᵾn, omba Saimon Selot kᵾn, Jeims kangᵾm Juras kᵾn. 14 Wu kᵾⱡ ila molk, numan tᵾk tenda mondᵾk, atinga rᵾk rᵾk rok morung. Wote ila ku, amp mat kᵾn, Jisas nga mam, amp Mariya kᵾn, wote Jisas nga ᵾngᵾnᵾl nimbᵾ kᵾn kunda, atinga rok morung.

15 Wote, rumbᵾⱡ mat omba puⱡnga, Nuim ei, mondᵾk pᵾtᵾng wamp nimbᵾ, mou ti rurung. Mou ila, wamp 120 mel morung. Ei kᵾn, Pita ndi, oⱡa anggilpa, nimba mel, “Angmᵾn! Buk Wingti ila ik mong ti petᵾm. Unt Muⱡnga Wingti ei ndi, Depit ronduⱡ nguⱡnga nitim ik ei, omba kupa enim. Ik ei, wu Juras ndi, Jisas rᵾk moⱡnga, Jisas imp molk, tᵾk kan ngorung ni mel nᵾtᵾm. 17 Wu Juras ni, unt tᵾn kᵾn murum. Wote, kongun tᵾn kunda itᵾmᵾn nimba, kᵾmp ropa titim,” nitim.

18 (Wu Juras ndi, Jisas rᵾk murum uⱡ nila, ku mong mat ngorung. Ku nimbᵾ ndi, mᵾi mam ti, rop ropa titim. Wote mᵾi ila, Juras ropa mundrum ila, mba pelinga, kitim nimbᵾ, ruⱡᵾp ropa, ekit oⱡnga kurum.

19 Jerusalem kona ila petᵾng wamp nimbᵾ ndi, Juras kurum ei mel, pilik pora ndurᵾng. Wamp nimbᵾ ndi, mᵾi ei mbi tek, ‘Akeldama,’ nᵾtmᵾn. Akeldama nga ik puⱡ ei, “Mema mᵾi.”)

20 Wote Pita ndi, nimba mel, “Buk Sam ila, ik mong ti ndi, ei mel nᵾtᵾm,

‘Wu ei nga kona ei, wapra tiyangga! Wamp ti koⱡ ila, muⱡi nᵾmbᵾⱡangga! Wote, elim nga koⱡ ila, wamp elpa ti ndi, kongun etangga!’ nᵾtᵾm.
21 Ei kᵾn, akup tᵾn ndi, wu ti tou ruimin. Wu ei, tᵾn Nuim Jisas kᵾn, rᵾp ropᵾn andᵾrmᵾn. Wote, wu ti ku, Jon kongun etpa, wamp nu tindpa itim. Wote, Jisas kongun itim ui ei kᵾn omba, akup Jisas muⱡ kona purum. Ei mel, wu ei ndi, tᵾn kᵾn numan tenda pangga, Jisas koⱡpa, ⱡoporpa omba purum ei nga, para ndup nᵾmᵾn,” nitim. 23 I nᵾk kᵾn, wu raⱡ tou rorung. Wu ti, Josep mbi tek, ‘Barsapas,’ nᵾtmᵾn ei nga tipam, Jastas. Omba wu ti nga mbi ei, Matiyas. 24 Ei kᵾn, wamp nimbᵾ, atinga rok nᵾk mel, “Nuim ye! Nim wamp nga numan rukᵾr orunga, kandrun ei nga, wu raⱡ nga nam ti, nim ndi, tou run ei, tᵾk orunga ndana! Wu ei ndi, Juras ni, wu elim nga mbi nimba, pitim kona ila piraim purum. Wu ei nga kok ila tᵾpa, kitip kᵾni wu raⱡpa, kongun etangga!” nᵾtᵾng. 26 Ni kᵾn, wu kᵾⱡ ndi, wu raⱡ nga el mong purung ila, Matiyas kᵾn omba tilinga, Matiyas ni omba, kitip kᵾni wu ni kᵾⱡ kᵾn, kup itim.

Copyright information for `MED