Acts 11

Pita Ndi, Elim Kongun Itim Mbᵾ Nga Timan Rurum

Nombuⱡa rung wu na, mondpa pili wamp Jura kona mbila pora petmin nimbᵾ ndi, wamp rᵾⱡaip elpa minal, Got nga ik ei, pilik tᵾnmin nᵾtᵾng ik timan ni, pilik kapⱡa endᵾtᵾng. Ei kᵾn, Pita ndi, Jerusalem purum mel, Jura wu mat ndi, mondpa pili rᵾⱡaip elpa wamp mbᵾ nga kᵾng kuptᵾmin nᵾk pilik morung wu nimbᵾ ndi, Pita ik mura nguk nᵾk mel, “Nim wamp rᵾⱡaip elpa mbᵾ nga kᵾng kupti nᵾpti mbᵾ nga mang kona pukᵾn, rᵾng nokᵾn in ei ka!” nᵾtᵾng. Ei kᵾn, Pita ndi, uⱡ puⱡ mondpa itim ni mel puⱡ mondpa, nimba mel, “Na Jopa kona peng ila atinga rop moⱡᵾp, ur kᵾmp mel kandᵾp kundᵾr ei, muⱡ kona kumba tilinga, muⱡ mbal na ni mel ti, muⱡ punt tᵾmbᵾkak ila moⱡpa, mana nduⱡnga omba, na mur ᵾldᵾ ila titim. Muⱡ ei nga rukᵾr orunga kᵾndᵾr ei, kimbuⱡa na, kng na, kui kᵾi mel rakra mbᵾ, pitim. Wote, ik ti ndi, nimba mel, ‘Pita, oⱡa molkᵾn, mel mbᵾ rokᵾn, nun ka!’ nitim. Wote na ndi, punt rop, nᵾmp mel, ‘Nuim ei na ndi, uⱡ ei mel, kapⱡa iti nᵾtimp. Ei nambuⱡ emel, na nga keta ila mel ⱡar muⱡ na, kit mbᵾ, nui nandᵾr mon, ni ka!’ nit. Wote, muⱡ kona ik pit ni ndi, wote na kundpa, nimba mel, ‘Got ndi, mel mbᵾ kai nᵾtᵾm mbᵾ, nim ndi, ⱡar morum ni nᵾni mon!’ nitim. 10 Uⱡ ei mel etpa raldika elinga, wote mel ni, muⱡ kona ila oⱡa titim. 11 Uⱡ ei, kandᵾp pora ndup moⱡmba, Sesariya kona ila wu raldika kat, na kᵾn tᵾk mundrung wu ni kᵾⱡ ok, na pep mur manga nila ruk orung. 12 Wote, Muⱡnga Wingti ei ndi, na kundpa, nimba mel, ‘Nim numan ou ndukᵾn, pili napilkᵾn, wu kᵾⱡ kᵾn pi!’ nitim. Ei pilip kᵾn, ya Jopa kona ila mondpa pili wu 6 ni kᵾⱡ kᵾn, Sesariya kona ila rᵾp ropᵾn, Koniliyas nga mang kona purmun. 13 Wote, puⱡmina, Koniliyas ndi, tᵾn kundpa, elim Anggelo ti ndi, na nga mang kona omba, na ku, ndpa nimba mel, ‘Wamp mat tᵾkᵾn nombuⱡa rung mundana, met Jopa kona peng ila wu ti, mbi tek, Saimon Pita nᵾtmin ei wangga ni! 14 Wu ei ndi, ik kai mat, nim kundpa nangga, ‘Nim kᵾn nim nga wamp mbo mbᵾ kᵾn pora, Got ndi, enim etpa peng kont tᵾmba!’ nitim. 15 Wote, na puⱡ mondᵾp, Koniliyas nga manga ila ik nilmba kᵾn, Muⱡnga Wingti ndi, wamp kᵾⱡ kᵾn mana urum. Ei kᵾn, tᵾn kitip kᵾni wu kᵾⱡ kᵾn, kuimp tepa urum uⱡ ni mel ku, akup wamp ni kᵾⱡ kun onum. 16 Wote, i elingina mel, Nuim ei nga ik ti nitim ei, tᵾp mendᵾp pit. Ei na nga numan ila omba rundrum ei ndi, nimba kᵾn, ‘Jon wamp nu tinditim ei, nu ila mint titim. Wote, enim Muⱡnga Wingti ila nu ting,’ nitim. 17 Akup pilip pora ndonmᵾn ei, tᵾn unt Nuim Jisas Kraist kᵾn mondᵾp puⱡmina, Got ndi, tᵾn elim nga mel ronduⱡ ei, wei gem ngurum. Ei wote, akup mbo wamp mbᵾ, mel tenda i ku tᵾnmᵾn. Ei kᵾn, na wu nam ei ndi, Got nga kongun ei mon nimp?” nitim. 18 Wote, wamp mbᵾ pora, Pita nga ik ei, pilik kᵾn, ik mura etᵾng nimbᵾ kelik, aldpa Got nga mbi paka ronduⱡ rok ei nᵾk mel, “Ei kᵾn, akup kanmin ei, wamp rᵾⱡaip elpa mbᵾ, Got ndi, etpa numan ropᵾl rondpa, etpa kont tᵾnᵾm.” nᵾtᵾng.

Andiyok Kona Ila Rapa Tenda Wamp

19 Unt Stipen ni, rok kondrung ni kᵾn, mbun mam ti oⱡnga kᵾn, mondpa pili wamp nimbᵾ, mbuⱡ mbaⱡ nᵾk, elpa elpa purung. Mondpa pili wamp nimbᵾ, puk kona elpa elpa, Ponisiya, Saipras kᵾn Andiyok ni, kona kᵾⱡ ila puk, Got nga rᵾnang ik kai ei, Jura wamp kᵾⱡ kᵾn, mendpᵾⱡ nᵾk ngurung. 20 Wote, mondpa pili wu mat, Saipras kᵾn Sairin ni kona raⱡ, ila nga wu mbo mat nga kat, Andiyok kona ila puk kᵾn, Grik wamp mbᵾ kᵾn, Nuim Jisas nga Rᵾnang ik kai mbᵾ, nᵾk ngurung. 21 Nuim ei nga ronduⱡ ei omba, wu kᵾⱡ kᵾn telinga, wamp puⱡi numan ropᵾl rok, Nuim ei kᵾn rukrᵾng orung.

22 Andiyok kona ila, uⱡ pitim mbᵾ nga timan ik ei, Jerusalem rapa tenda wamp mbᵾ kᵾn puⱡnga, Barnapas ni, tᵾk Andiyok kona ila mundrung. 23 Ruk mba kᵾndrᵾm ei, Got ndi, wamp mbᵾ, memp minal pinditim ei kandpa, numan ndi koⱡpa wamp mbᵾ, nimba ronduⱡ mundpa, Nuim ei, tᵾk enim nga mundmong ila mondᵾk, Nuim ei, rᵾk rᵾk ambulk gi nduk muⱡᵾi nitim. 24 Barnapas ni, wu kai ei nga, Muⱡnga Wingti ei ndi, peka ropa moⱡnga, mondpa pili ronduⱡ puⱡnga, wamp minal Nuim ei kᵾn rukrᵾng orung. 25 Wote Barnapas ni, Sol kurpa, Tarsus ni kona ila purum. 26 Barnapas ni, Sol kandpa tᵾpa kᵾn, mepa Andiyok urum. Wu raⱡ molkᵾⱡ, pana ti tᵾk mundkᵾⱡ, ropa tenda wamp mbᵾ, ik mbo endkᵾⱡ, wamp minal etᵾk rukrᵾng tᵾtᵾnggil. Andiyok kona ila kitip kᵾni wu nimbᵾ, mbi kont tek, “Kristen” nᵾtᵾng. 27 Ui ei kᵾn, painui wu mat, Jerusalem molk, Andiyok kona ila purung. 28 Wu kᵾⱡ nga ti, mbi tek, Akapas, nᵾtᵾng wu ni, Muⱡnga Wingti ei ndi, ronduⱡ nguⱡnga, oⱡa anggilpa, nimba mel, “Kump kun kan kit ti, ya Rom nga mᵾi kᵾmp mbila pora, nondpa ekit omba,” nitim. (Ui ei, Rom kona ila nga wu nuim mumuk Klotiyas ni, nuim murum ei kᵾn ekit urum). 29 Kitip kᵾni wu nimbᵾ elpa elpa, en enim nga ku na, mel tᵾtᵾng mbᵾ, mondpa pili wamp ᵾngᵾnᵾl mat, met Juriya kona ila morung nimbᵾ, tᵾp rᵾpᵾndmin nᵾk, ik nᵾk pilik, tᵾk tenda itmin nᵾk, pilik tᵾk kun etᵾng. 30 I etᵾk kᵾn, en enim nga ku moni nimbᵾ tᵾk, Got nga rapa tenda wamp mbᵾ nga rᵾp wu mbᵾ nguimin nᵾk, Barnapas kᵾn Sol raⱡ nguⱡngina, mek pukᵾⱡ, rup wu mbᵾ ngurᵾnggil.

Copyright information for `MED