Acts 12

Mbun Mat Pilpa Kelpa Urum

Ui ei kᵾn, king Erot ndi Got nga rapa tenda wamp mbᵾ minal, mbun mindil mbᵾ tᵾpa ngurum. Wu Jon ᵾngᵾn Jeims ni, Erot ndi, koiya ei ndi ropa, peng ei puⱡa rurum. Uⱡ itim ei nga, Jura wamp mbᵾ ndi kandᵾk, numan nguⱡina, Pita imp moⱡpa, tᵾpa kan ngurum. I etᵾng uⱡ ei, Isrel wamp, bret yis mundi namᵾndᵾk normin ui ei. Pita imp molk tᵾk kᵾn, kan manga ila tᵾk pendᵾtᵾng ila, el wu mou tᵾmbᵾkak ei nga wu tᵾmbᵾkak ku, mou tenda ila mormin kᵾⱡ ndi, Pita rᵾp etᵾng. Erot ndi, Jura wamp Pasopa rᵾng normin ui ei pora nangga kᵾn, Pita tᵾp, wamp nga kuimp keta ila kot indimp nimba pitim. Ei nga, Pita ni, tᵾk kan manga ila pendᵾtᵾng. Nila pepa murum ei kᵾn, wote Got nga rapa tenda wamp nimbᵾ ndi, Pita ni, Got ndi, tᵾpa rᵾpᵾndangga nᵾk, atinga ronduⱡ mundᵾk rorung.

Anggelo Ei Ndi, Pita Ni Kan Manga Ila Tᵾpa Ekit Ndurum

Utᵾma orunga, Erot ndi, Pita kot endᵾmba ei nga, akup rumbuldi ei mel ila, Pita ni, el wu raⱡ nga ruk ting ila pitim. Pita ni, kan sen ronduⱡ ralt ndi, kan ngᵾk penduⱡina, kan manga keta puⱡ pᵾⱡ rukᵾr ui ila, el wu mat rᵾp etᵾk morung. Tᵾngᵾnda mint, Nuim ei nga anggelo ti, omba anggilinga, Pita pitim manga nila, rᵾⱡang mam ti purum. Anggelo ni ndi, Pita nga pendᵾk ila ambuⱡpa, ropa rut ndupa, nimba mel, “Tᵾkrᵾk oⱡa moⱡa!” nitim. I nilinga, tᵾngᵾnda mint, kan sen ronduⱡ nimbᵾ, kuⱡimp ropa mana purum. Ni kᵾn, anggelo ei ndi, kundpa nimba mel, “Nim nga muⱡ kan ei, tᵾk gi ndukᵾn ralkᵾn, kᵾmp rᵾk kᵾⱡ, tᵾkᵾn mundi!” nitim. Pita uⱡ mbᵾ mel teng ndupa elinga, anggelo ni ndi, kundpa nimba mel, “Nim nga wal pᵾki ekit orunga kᵾⱡ pakᵾkᵾn, na kᵾn ui!” nitim. Ni kᵾn, Pita ni, anggelo ei pep ropa, kan manga ila omba, ekit purum. Pita elim anggelo ei ndi, itim uⱡ ei, pilpa kun iti nᵾtᵾtᵾm. Ei nambuⱡ emel, elim ni, uⱡ mbᵾ ur kᵾmp mel etᵾp, kant ku nimba pitim. 10 Wote okᵾⱡ, el wu rᵾp kerᵾng orunga rᵾp etmin kona ei, wak rokᵾⱡ, wote merᵾng orunga rᵾp etmin kona ei, wak rokᵾⱡ okᵾⱡ, kona peng ei nga paⱡa keta puⱡ pᵾⱡ ronduⱡ ila, ekit purᵾnggil. Kona ila ruk oⱡunggila, keta puⱡ pᵾⱡ ei, elim ndi, kumba titim ila ok, ekit purᵾnggil. Wote, anggelo ni ndi, Pita mepa, nombuⱡa ila mundpa, elim ni wei ai itim. 11 Ni kᵾn, Pita elim kᵾn itim uⱡ nimbᵾ, tᵾpa mondpa, nimba mel, “Nuim ei ndi, elim nga anggelo ei, tᵾpa munduⱡnga, King Erot kᵾn, Jura wamp na mbᵾ ndi, na kᵾn uⱡ kit mbᵾ itmin nᵾk eng ila, na etpa tᵾpa ekit ndunum. Ei, na akup pilip kun ent!” nitim. 12 Uⱡ itim kᵾⱡ pilpa kᵾn, wote Jon Mak mam, amp Mariya nga mang kona ila purum. Manga ila wamp minal tᵾk tenda etᵾk, atinga rok morung. 13 Pita omba, manga keta puⱡ pᵾⱡ ila ropa gep nduⱡnga, kongun ambuⱡa ti mbi tek Rota, nᵾtᵾng ei ndi, kumba tᵾmba urum. 14 Omba pitim ei, Pita nga ik ei, pilpa mbi ndupa, numan ndi koⱡpa, kumba ti natᵾpa, tᵾkrᵾpa kelpa int mba, wamp morung nimbᵾ kundpa nimba mel, “Pita omba manga kumba keta puⱡ puⱡ ila morum!” nitim. Ni kᵾn, wamp nimbᵾ ndi, ambuⱡa ei kundᵾk nᵾk mel, “Nim kekilip roⱡnga nᵾn ei?” nᵾtᵾng. Wote, ambuⱡa ni ndi, ronduⱡ mundpa, omba morum nilinga, wote wamp nimbᵾ ndi, punt rok, nᵾk mel, “Ei, elim nga anggelo ei, omba enim nda,” nᵾtᵾng. 16 Wote, Pita kumba ropa gep ndupa, moⱡmba ei nga moⱡnga, wote kumba tᵾk kandrung mel, Pita murum ila kandᵾk, min ngᵾn mundrung. 17 Wote, Pita elim nga ki ei, oⱡa ndupa, ik raka nᵾk morung, “Elim Nuim ei ndi, kan mang ila tᵾpa ekit ndurum uⱡ mbᵾ mel, wamp mbᵾ nimba ngurum. Ik nᵾnt kᵾⱡ, Jeims kᵾn, tᵾn nga mondpa pili wamp ᵾngᵾnᵾl mbᵾ pᵾi, kundᵾk nᵾi!” nitim. Ni kᵾn, elim wamp nimbᵾ, wak ropa pena omba, elpa ronggᵾt ku purum.

18 Wote, mᵾkᵾlmᵾ unt kona ranggᵾⱡnga, kan manga ila el nde wu nimbᵾ, Pita pi nᵾpᵾtᵾm ila kandᵾk, rut nᵾk etpa, em mel nant nda nᵾk, min ngᵾn mundᵾk morung. 19 Erot ndi, Pita kuruk kandᵾk, tᵾi nitim. Ei wote, Pita kandᵾk ti natᵾtᵾng. Ei nga, elim nga el wu mbᵾ waldᵾk pilik, wote rok kundᵾi nitim. Ei mel etpa, Juriya kona ei, wak ropa, Sesariya kona ila ui mat muⱡimp nimba purum.

Erot Ni Kurum

20 Wote Erot ni, Taiya kᵾn Sairon kona raⱡ ila nga wamp mbᵾ kᵾn, popᵾⱡ mam ti mundrum ila wamp nimbᵾ, tᵾk rak nduk, Erot kᵾning orung. Kuimp tek, wu mumuk ei, petᵾm manga nokundrum wu Blastas kᵾn, nᵾk tᵾk tenda etᵾng. Wote, Erot kᵾn numan tᵾpa tenda mundamin nᵾk, waldᵾk pᵾtᵾng. Ei nambuⱡ emel, Taiya kᵾn Sairon kona raⱡ nga wamp kᵾⱡ ok, wu king ei nga kona ila rᵾng tᵾtᵾng ei nga orung. 21 Erot ndi, ui ti tou ropa pinditim nila, elim nga muⱡ kai mbᵾ tᵾpa raⱡpa omba, elim nga morum nde pol nila moⱡpa, ik ronduⱡ kai mat, wamp mbᵾ kᵾn nimba ngurum. 22 Wote, wamp nimbᵾ ndi, ke nᵾk, “Ei wamp ti nga ik ti mon, got nga! Ik ti nᵾmp pᵾnmin,” nᵾtᵾng. 23 Ei kᵾn, tᵾngᵾnda mint, Nuim ei nga anggelo ei ndi, Erot ropa kundrum. Ei nambuⱡ emel, Got tᵾpa ou ndui nᵾndrᵾm ei nga, wu ni kimbuⱡa ⱡant mbᵾ ndi, nok kondrung.

24 Uⱡ mbᵾ pitim ku, wote Got nga ik kai ei, kona mbila tepa ndaip nimba purum. 25 Barnapas kᵾn Sol raⱡ, Got nga kongun mbᵾ, etkᵾⱡ pora ndukᵾⱡ, Jerusalem wak rokᵾⱡ yant orᵾnggil ila, Jon Mak kunda, tᵾk mek orᵾnggil.

Copyright information for `MED