Acts 14

Pol, Barnapas Raⱡ Aikoniyum Kona Ila Kongun Etᵾnggil

Aikoniyum kona ila uⱡ tenda ei ku etᵾnggil, Pol Barnapas raⱡ, atinga manga kel ila etᵾnggil, ni mel mukᵾr pukᵾⱡ, Got nga ik puⱡ mbᵾ nᵾk kai monduⱡunggila, Jura wamp na, wamp rᵾⱡaip elpa na, Got kᵾn mondᵾk pᵾtᵾng. Wamp rᵾⱡaip elpa minal ik pilik, tᵾk mondᵾk pᵾtᵾng. Wote, Jura wamp mat, mondᵾk pili napᵾtᵾng nimbᵾ ndi, wamp rᵾⱡaip elpa mbᵾ kunt roⱡungina, wu ni raⱡ etᵾk, numan kit pendᵾtᵾng. Ni kᵾn, Pol kᵾn Barnapas raⱡ ila molkᵾⱡ, ui roⱡ etᵾk tᵾk mundkᵾⱡ, Nuim ei nga ik ronduⱡ mundkᵾⱡ nᵾtᵾnggil. I elinggila kᵾn, Nuim ndi, elim ei nga wamp poⱡ ti uⱡ ei, kupa nimba, wu raⱡ ronduⱡ nguⱡnga, uⱡ rᵾpndi min ngᵾn pi mbᵾ etᵾnggil. I elinggila, kona peng ila wamp nimbᵾ palk, orung orung etᵾk, wamp mat puk, Jura wamp mbᵾ kᵾn kup etᵾng, wote wamp mat, wu raⱡ kᵾn kup etᵾng.

Ni kᵾn, wamp rᵾⱡaip elpa mbᵾ kᵾn, wote Jura wamp mbᵾ kᵾn, enim nga rᵾp wu mbᵾ kᵾn, nᵾk pendᵾk, wu ni raⱡ, ku ndi rop kundamin nᵾtᵾng. Wote, wu raⱡ uⱡ ei tᵾk mundkᵾⱡ, nung nᵾkᵾⱡ, Laikoniya kona ei nga kona peng ou, Derpi kᵾn, Listra raⱡ ila kᵾn, wote mᵾi kᵾmp ila nga nondpa titim mbila purᵾnggil. Kona mbila, Rᵾnang Ik Kai ei, wamp mbᵾ kundᵾk nᵾtᵾnggil.

Wu Raⱡ, Derpi, Kᵾn Listra Kona Raⱡ Ila Kongun Etᵾnggil

Listra kona ila, elkᵾna rumbrᵾm wu ti murum. Wu ei, mam ndi, mitim ui ei kᵾn i elinga, nombuⱡa mam ᵾndi nᵾndrᵾm. Wu ei ndi, kona ila moⱡpa, Pol nga ik nitim ni, kum tepa murum. Pol ndi, wu ei, mong ronduⱡ kandpa kundrum ei, wu ei nga mondpa pili ei, ronduⱡ purum. Uⱡ ei ndi, elim nga kᵾmp kit murum ei omba, kai etmba nimba pitim. 10 Wote Pol ndi, ik oⱡa ndupa, nimba mel, “Nim oⱡa molkᵾn kᵾmp kambila,” nitim. I nilinga, tᵾngᵾnda mint wu ni, oⱡa moⱡpa, kᵾmp kambilpa purum. 11 Wamp rᵾⱡaip mam ti, Pol itim uⱡ ni kandᵾk, enim nga Laikoniya ik ila ronduⱡ wi rok, nᵾk mel, “Tᵾn nga got nᵾtmᵾn nimbᵾ, mᵾi kona ila mana ok, akup wamp mel ralk, tᵾn kᵾn ong,” nᵾtᵾng. 12 Wamp mbᵾ ndi, Barnapas mbi tek, Sus nᵾk, wote Pol ik puⱡ pendpa nitim ei nga mbi tek, Ermis nᵾtᵾng. 13 Ei kᵾn, Sus got ei nga manga wingti ou ei, kona ila nondpa ᵾnggᵾtᵾm. Ei nga, wu pris kona ila morum ei ndi mba, kng kau pela mat kᵾn, plawa kuk mat kᵾn ranggᵾpa, ot ropa mepa omba, kona peng ou ei nga keta puⱡ puⱡ nila urum. Ei nambuⱡ emel, wamp mbᵾ kᵾn elim kᵾn, nombuⱡa rᵾng wu raⱡ got nᵾk pilik mel mbᵾ, kaⱡᵾp tindiⱡim mundmin nᵾk etᵾng. 14 Wote, Pol kᵾn Barnapas raⱡ, wamp uⱡ iting pilik etᵾng ni pilkᵾⱡ kᵾn, en enmbil nga muⱡ mbal nimbᵾ, ambulk ondkᵾⱡ, wamp mou morung nila, tᵾkrᵾk pukᵾⱡ, wi rokᵾⱡ, nᵾkᵾⱡ mel, “Enim wu mat ndi, uⱡ ei nambuⱡ emel enmin? Tᵾl enim wamp mormin ei mel ku, kapⱡa mormbᵾⱡ ei ka! Tᵾl enim kᵾn, Rᵾnang Ik Kai ei, nᵾmp nguimbil! Ei ndi, enim etpa rukᵾr tangga, uⱡ kurpa enmin mbᵾ, tᵾk mbuⱡ ngᵾk, Got kont morum, muⱡ mᵾi na, num kuta kᵾn mel kᵾⱡ nga, rukrᵾng orunga tetᵾm mbᵾ nga Puⱡ Wu Got, ei kᵾn rukᵾr peing! 16 Unt kor nga ei kᵾn, Got ndi, wamp mbᵾ kandpa kont elinga, en enim nga numan pᵾtmᵾn mbᵾ mel pep rok andᵾrmᵾn. 17 Wote, Got elim ni, pili nᵾpileing nimba mba, mo rui nᵾrᵾrᵾm. Tᵾn wamp mbᵾ kᵾn, uⱡ kai mbᵾ etpa, muⱡ kona ila mana nduⱡnga, enim kᵾn orung oⱡnga, rᵾng kai mbᵾ oⱡa orum. Wote rᵾng mbᵾ, kapⱡa etpa nguⱡnga, enim numan ngᵾk ambulk parmin,” nitim. 18 Wu ni raⱡ, ik mbᵾ nᵾtᵾnggil ku. Ei wote, wamp rᵾⱡaip mam ni, en enim nga mel mbᵾ, kaⱡᵾp tindiⱡim mundmin nᵾk pek kont etᵾng.

19 Wote, Andiyok kᵾn Aikoniyum kona raⱡ nga Jura wamp mat ok, wamp morung nimbᵾ nga mat nga numan orunga kunt rok nilingina, Pol ku ndi rok, wote konum nᵾk pilik, kunt kundi mek, kona peng ei nga, ekit orunga purung. 20 Kurum nᵾk pᵾtᵾng ni, wote, mondpa pili wamp nimbᵾ ndi, tᵾk pok elingina, Pol ni, oⱡa moⱡpa, kona peng ila aldpa rukᵾr purum. Wote utᵾma orunga, elim kᵾn Barnapas raⱡ, Derpi kona ila purᵾnggil.

Wu Raⱡ Siriya Nga Kona Peng Andiyok Ila Purᵾnggil

21 Pol, Barnapas raⱡ, Derpi kona ila, Rᵾnang Ik Kai ei nilinggila, kitip kᵾni wamp minal rukᵾr orung. Wote aldpa, Listra, Aikoniyum, Andiyok kona kᵾⱡ ila int purᵾnggil. 22 Kona kᵾⱡ ila pukᵾⱡ, mondpa pili wamp mbᵾ, nᵾkᵾⱡ ronduⱡ mundkᵾⱡ, man ngukᵾⱡ, en enim nga mondpa pili ei, ronduⱡ mundᵾk, tek muⱡᵾi nᵾkᵾⱡ mel, “Tᵾn mbun mindil mbᵾ tᵾpᵾn, wote Got nga wamp tᵾpa mumuk rui uⱡ ila rukᵾr mbin,” nᵾtᵾnggil. 23 Pol Barnapas wu raⱡ ndi, Got nga rapa tenda ila wamp elpa elpa titim mbila, rᵾp wu mbᵾ tᵾk mondkᵾⱡ. Wote, en enmbil rᵾng mowi pekᵾⱡ, atinga rokᵾⱡ, Nuim ei kun mondᵾk pᵾtᵾng rᵾp wu nimbᵾ tᵾkᵾⱡ, Nuim ei nga ki ila tendᵾtᵾnggil.

24 Wote, Pisiriya kona ila andᵾk, uⱡ pora ndukᵾⱡ kᵾn, Pampiliya kona ila orᵾnggil. 25 Wote, kona ila pukᵾⱡ, Purga kona peng ila Rᵾnang Ik Kai ei, nᵾk ngukᵾⱡ, wote Ataliya kona peng ila mana purᵾnggil. 26 Wote, Ataliya molkᵾⱡ kᵾn, nu sip tᵾkᵾⱡ, Andiyok int purᵾnggil. Kona ila nga wu raⱡ, Got nga wamp poⱡ ti uⱡ ila, Got ndi, rukᵾr tᵾpa, kongun itinggil nitim ei mel, akup etᵾk pora ndukᵾⱡ, rukᵾr orᵾnggil. 27 Wu ni raⱡ, Andiyok ruk okᵾⱡ kᵾn, Got nga rapa tenda wamp nimbᵾ tᵾk mou rokᵾⱡ, Got ndi, en enmbil kongun ila tᵾpa rᵾpᵾndrᵾm ei nga puⱡ ei, nᵾk mot ndukᵾⱡ, wote wamp rᵾⱡaip elpa mondᵾk pileing nimba, Got ndi, kumba tᵾpa titim uⱡ mbᵾ mel, timan rok ngorᵾnggil. 28 Wote, kona ila nga kitip kᵾni wamp mbᵾ kᵾn, rᵾp rok moⱡina, ui minal omba purum.

Copyright information for `MED