Acts 15

Rapa Tenda Ila Wamp Jerusalem Kona Ila Mou Rorung

Wote, Juriya kona ila wu mat, Andiyok kona ila mana ok, mondpa pili wamp ᵾngᵾnᵾl nimbᵾ, ik mbo endᵾk, nᵾk mel, “Enim Moses nga mi ik ila, kᵾng kuptᵾi nᵾtᵾm ei mel iti natᵾng ndam, Got ndi, enim etpa rukᵾr ti natᵾmba,” nᵾtᵾng. I nᵾtᵾng uⱡ ila, Pol kᵾn, Barnapas raⱡ, ik ei pilkᵾⱡ, popᵾⱡ kulkᵾⱡ, wu kᵾⱡ kᵾn ik palk, ik mura mel mam ti etᵾng. Ei kᵾn, Pol, Barnapas raⱡ kᵾn, Andiyok kona ila mondpa pili wamp mat kapⱡa to rok, Jerusalem oⱡa puk, nombuⱡa rung wu kᵾⱡ kᵾn, rᵾp wu mbᵾ kᵾn, ik ei nga nᵾk tᵾk, kun iteing pᵾi nᵾtᵾng. Got nga rapa tenda wamp kᵾⱡ ndi, wu kᵾⱡ tᵾk munduⱡina purung. Wote wu kᵾⱡ puk, Ponisiya kᵾn Sameriya kona mbᵾ nga rᵾk ila puk, wamp rᵾⱡaip elpa numan ropᵾl rok, Got kᵾn rukᵾr orung mbᵾ mel, timan rok ngurung. Ik mbᵾ timan rok, wamp morung mbᵾ nᵾk ngᵾⱡᵾngina, mondpa pili wamp ᵾngᵾnᵾl morung nimbᵾ, numan kai pᵾtᵾng. Jerusalem ruk puⱡina, rᵾp wu na, nombuⱡa rung wu na, wote Got nga rapa tenda wamp na mbᵾ ndi molk, rawe etᵾk tᵾtᵾng. Wote kona ila nga, Got ndi, en enim kᵾn kongun itim uⱡ mbᵾ mel timan rok, wamp mbᵾ ngorᵾnggil. Wote, mondpa pili wamp mat, wu Perisi kᵾⱡ nga rᵾⱡaip ila morung kᵾⱡ ndi, oⱡa anggilik nᵾk mel, “Enim ndi, wamp rᵾⱡaip elpa kᵾⱡ, kᵾng kuptᵾi nᵾk, wote Moses nga mi ik kᵾⱡ, pep reing mint, nᵾk mbo indᵾi!” nᵾtᵾng.

Ik ei nga, nombuⱡa rung wu mbᵾ kᵾn, rᵾp wu na mbᵾ kᵾn, nᵾmp tᵾp kun mundmin nᵾk mou rorung. Ik minal nᵾk pora nduk, Pita ndi, oⱡa anggilpa nimba mel, “Wamp angmᵾn! Enim pᵾnmin ei, unt kor nga Got ndi, enim nga ruk ting ila, na mbi ropa tᵾpa, elim nga Rᵾnang Ik Kai ei, wamp rᵾⱡaip elpa mbᵾ, nᵾmp nguⱡmba, wamp mbᵾ ik ei pilik tᵾk, elim kᵾn mondᵾk pileing nimba, na rukᵾr titim. Wote, Got tᵾn nga numan mbᵾ pora, kandrum wu ei ndi, wamp rᵾⱡaip elpa mbᵾ, elim nga ku nimba, Muⱡnga Wingti ei, tᵾn ngurum ni mel wamp mbᵾ ngurum. Got ndi, tᵾn Jura wamp mbᵾ kᵾn, wote wamp rᵾⱡaip elpa mbᵾ kᵾn, ruk ila oi kan ti, etpa pindi napᵾndᵾtᵾm. Wote, wamp mbᵾ nga mondᵾk pᵾtᵾng uⱡ ei ndi, en enim nga numan mbo ei, etpa piral ndurum. 10 Uⱡ ei ndi, Got oⱡa tᵾk kanmin ek ka! Ei nga wote, enim ndi, uⱡ mbun iti ei, Got nga rapa tenda wamp kᵾⱡ kᵾn koma rondunmᵾn. Tᵾn kep, tᵾn nga anda kouwᵾmᵾn mbᵾ kep, mbun ei mel ti, kapⱡa koma rui nᵾrᵾmᵾn. 11 Ei mon! Tᵾn mondᵾp pilamina, Nuim Jisas nga wamp poⱡ ti uⱡ ila, tᵾn etpa titim ei mel, wamp rᵾⱡaip elpa kᵾⱡ, Got nga wamp poⱡ ti uⱡ ila, i ku etpa tᵾmba,” nitim.

12 Wote, Pol Barnapas raⱡ, kongun etᵾk andrᵾnggil ruk ting ila, Got ndi, uⱡ rᵾpndi mat, wamp rᵾⱡaip elpa mbᵾ kᵾn, itim nimbᵾ mel timan rokᵾⱡ, wamp mbᵾ kundᵾk nilinggila, wamp mbᵾ pilik raka nᵾk morung. 13 Wote wu raⱡ, ik nᵾkᵾⱡ pora nduⱡunggila, Jeims ndi, oⱡa ndupa, nimba mel, “Angmᵾn! Na ik nimp ent ei, kum tek pilᵾiya!

14 Saimon ndi, enim unt kundpa, wamp rᵾⱡaip elpa kᵾⱡ nga ruk ting ila, Got ndi, elim nga wamp morung kᵾⱡ, ekit tᵾpa, elim nga rapa tenda wamp mundrum. 15 Uⱡ ei, painui wu kᵾⱡ nga unt nᵾtᵾng ik kᵾⱡ kᵾn, omba tenda purum. Buk Wingti ila rok, Nuim ei ndi, nimba mel,

‘Wote na yant omp, Depit nga manga ᵾⱡmbᵾⱡ nimba petᵾm ei, na ndi rakᵾp oⱡa timp. Manga ila mukᵾr etpa kit murum mel mbᵾ, na ndi, kont mim etᵾp, tᵾp oⱡa mundimp.
17 Ei mel itamba kᵾn, wamp rᵾⱡaip elpa mbᵾ ndi pora, Nuim ei kuruk uing, ei, mbo wamp kᵾⱡ nga, nanim ndi na nga mbi ila tit wamp kᵾⱡ mendpᵾⱡ. 18 Nuim ei ndi, uⱡ kᵾⱡ itimp nimba kor nga,’ nitim.
19 “Ik ei mel petᵾm ei nga, na nanim numan ei ndi, pᵾnt ei, mbo wamp Got kᵾn numan ropᵾl rok, Got kᵾn rukᵾr ping enmin kᵾⱡ, etᵾp mbun ngui ngᵾngᵾmin. 20 Wamp kᵾⱡ kᵾn, mon ti ropᵾn, ngumbun nimbun mel, kur kit mbᵾ nga mbi paka rondᵾk, rᵾng kaⱡing mbᵾ nui nandᵾk, wapra uⱡ mbila ok tᵾk, kui kᵾi mel ti ambulk nuim kan kint ngᵾk eng ei, nui nandᵾk, wote mema mbᵾ mendpᵾⱡ nui nᵾnᵾi! 21 Ei, uⱡ kont paka ti mon. Moses nga Mi Ik kᵾⱡ kor nga, ik mbo wu mbᵾ ndi, kona peng mbila, atinga manga kel tetᵾm mbila ik mbᵾ, mowi kor ei kᵾn, nᵾk ngᵾⱡᵾngina, pᵾtmᵾn ni ka!” nitim.

Wamp Rᵾⱡaip Elpa Mondpa Pili Wamp Kᵾⱡ Kᵾn, Mon Ti Rok Ngurung

22 Wote, rᵾp wu na, nombuⱡa rung wu na, Got nga rapa tenda ila wamp na mbᵾ mou rok, wu mat kᵾmp rok tᵾk, Pol kᵾn Barnapas raⱡ kᵾn, Andiyok kona ila rup rok, pᵾi nᵾk tᵾk mondrung. Wote, mondpa pili wamp nimbᵾ nga wu kuimbal tᵾk ou ndurmᵾn. Wote, wu ni raⱡ nga ti, Juras mbi tek, Barsapas nᵾtmin, omba wu ti Sailas nᵾtmᵾn. 23 Mon ti, wu raⱡ kᵾn ngᵾk mundrung. Mon rok, nᵾk mel, “Tᵾn enim nga ᵾngᵾnᵾl, nombuⱡa rung wu, wote rᵾp wu na mbᵾ pora moⱡpᵾn, rawe ik kai mbᵾ nimbun, enim Andiyok kᵾn Siriya kᵾn Silisiya kona kᵾⱡ ila nga wamp rᵾⱡaip elpa kᵾⱡ nga ruk ting ila mondpa pili wamp mormin kᵾⱡ kᵾn, ei mel nᵾnmᵾn. 24 Tᵾn pilmin ei, tᵾn nga wu kat, enim kᵾn ok, ik ⱡawa elingina, enim kit pᵾtᵾng. Uⱡ ei, tᵾn ndi, mbo rondpᵾn neing ni nᵾndᵾtmᵾn mon. 25 Ei nga, tᵾn Jerusalem kona ila, Got nga rapa tenda wamp mbᵾ, numan omba tenda puⱡnga, wu mat to ropᵾn, tᵾn nga wu mᵾn mul wu kai raⱡ, Pol kᵾn Barnapas raⱡ kᵾn, rᵾp rop tᵾp mundunmᵾn. 26 Pol kᵾn Barnapas raⱡ, en enmbil nga mul uⱡ ei, wak rokᵾⱡ, kᵾⱡᵾnggil ei nga pili napilkᵾⱡ, kongun etᵾnggil. Uⱡ ei ndi, tᵾn nga Wu Nuim Jisas Kraist nga mbi ei, paka rondrᵾnggil. 27 Tᵾn ndi, Sailas kᵾn Juras raⱡ tᵾp mundunmᵾn. Wu raⱡ nga keta ila, ik ekit om mbᵾ, ik ei, tᵾn ndi, mon ronmᵾn ik mbᵾ ninggil. 28 Muⱡnga Wingti ei kᵾn, tᵾn kᵾn numan tenda puⱡnga, uⱡ mbᵾ pep rok iteing nimbun, mon rok pun ngᵾnmᵾn. Wote, uⱡ mbun mat elpa, enim nguimin nᵾmp pili napᵾnmᵾn. Ei nga, kurmun rok rᵾng ngᵾng mbᵾ, nui nᵾnᵾi mon! Mema nui nᵾnᵾi mon! Wapra rui uⱡ mbila ok tᵾk muⱡᵾi! Kui kᵾi mel mat ambulk mema mondung mbᵾ, nui nᵾnᵾi mon! Enim uⱡ kᵾⱡ pilik pep rong ndam, enim kapⱡa muⱡing. Kapⱡa molk, kai mundᵾiyo!” nᵾtᵾng.

30 Wote, nombuⱡa rung wu ni raⱡ, Andiyok kona ila ruk pukᵾⱡ, mondpa pili wamp nimbᵾ, tᵾk mᵾk rok mondkᵾⱡ, mon ni ngorunggil. 31 Wamp nimbᵾ, mon ni, kᵾmp rok pᵾtᵾng mel, enim nga numan orunga nimbᵾ, ronduⱡ ngui ik mat murum ila, numan kai pilik, ambulk palk morung. 32 Sailas kᵾn Juras raⱡ enmbil, ik pai nok etmbil wu raⱡ ndi, molkᵾⱡ kᵾn, wamp mbᵾ ambulk pilkᵾⱡ, mbo endkᵾⱡ, etᵾk ronduⱡ mundᵾk etᵾnggil. 33 Andiyok kona ila ui mat molkᵾⱡ, tᵾk mundkᵾⱡ kᵾn, wote mondpa pili wamp ᵾngᵾnᵾl mbᵾ ndi, ki tᵾk, etᵾk kai etᵾk munduⱡina, enmbil molk, orᵾnggil kona ila wamp nimbᵾ kᵾn, int purᵾnggil. 34 Wote, Sailas elim nga numan ei ndi, kona ila muⱡimp nimba pitim. 35 Pol kᵾn Barnapas raⱡ, ui ou ndupa, Andiyok kona ila wamp mat kᵾn, pᵾi molk kᵾn, Nuim ei nga Rᵾnang Ik Kai ei, nᵾk ngukᵾⱡ, ik mbo endᵾk etᵾnggil.

Pol Kᵾn Barnapas Raⱡ, Ik Polkᵾⱡ, Elpa Elpa Purᵾnggil

36 Ui mat omba puⱡnga, Pol ndi, Barnapas kundpa, nimba mel, “Nuim ei nga rᵾnang ik ei, nᵾmp ngurumbᵾⱡ kona peng nimbila, wamp mbᵾ etᵾk mormin mel nant ei, kᵾnᵾmbil yant pambuⱡ,” nitim. 37 Ei kᵾn, Barnapas ndi, wu Jon mbi ti tek, Mak nᵾtmin ei, tᵾp mep mbi nimba pitim. Wote Pol ndi, mon nimba pitim ei, nambuⱡ emel, wu ei ndi, en enmbil Pampiliya kona ila, wak ropa mondpa, kelpa purum. Ei nga, tᵾl ndi, wu ei, tᵾp mep pi nᵾpᵾmbil, nitim. 39 Ik puⱡ ila, wu raⱡ ik polkᵾⱡ, elpa elpa purᵾnggil. Barnapas ndi, Jon Mak tᵾpa mepa nu sip tᵾpa, Saipras puⱡnga, wote Pol ndi, Sailas tᵾpa, mepa purum. Mondpa pili wamp mbᵾ ndi, Nuim ei nga wamp poⱡ ti uⱡ ila pᵾl, nᵾtᵾng. 41 Wote Pol ni, Siriya kᵾn Silisiya kona raⱡ nga rapa tenda wamp mbᵾ kᵾn, Got nga ik ei, wote nimba, ndoimp rondpa purum.

Copyright information for `MED