Acts 16

Timoti Ni, Pol Kᵾn Omba Kup Itim

Wote Pol ni, Derpi kᵾn Listra kona raⱡ ila, purum kona ila, mondpa pili wu Timoti ni, ti murum. Wu ei nga mam ei, Jura amp mondpa pili amp ei. Wote tipam ei, Grik wu ei. Listra, Aikoniyum kona raⱡ nga ᵾngᵾnᵾl wamp mbᵾ ndi, Timoti nga kaip nᵾndᵾtᵾng. Pol ndi, Timoti mep mbi nimba pitim ei nga, Jura wamp kᵾng kupti uⱡ ei nga inditim. Ei nambuⱡ emel, Jura wamp kᵾng kupti uⱡ ei nga, ei mel morunggil kona ila, Jura wamp petmin mbᵾ ndi, Timoti nga tipam Grik wu ei, pilik pora ndurung. Wu kᵾⱡ, kona peng mbila puk kᵾn, mi ik mat, unt Jerusalem kona ila nombuⱡa rᵾng wu na, rᵾp wu na mbᵾ mou rok molk, nᵾk pendᵾtmᵾn ik mbᵾ, mondpa pili wamp mbᵾ, pep rᵾi nᵾtᵾng. I elingina, rapa tenda wamp mbᵾ nga mondpa pili mbᵾ ronduⱡ puⱡnga, wote wamp kont nga rᵾk rᵾk oⱡungina, wamp rᵾⱡaip ei, mam itim.

Trowas Kona Ila Pol Ur Kump Mel Etpa Kᵾndrᵾm

Pergiya kᵾn Galesiya kona raⱡ nga ruk ting ila puⱡina, Muⱡnga Wingti ei ndi, Eisiya kona ila nga ik mbo indi nᵾndᵾi, mon nitim. Wu kᵾⱡ, Misiya nga mᵾi oi ila ruk oⱡina, wote Jisas nga Muⱡnga ei ndi, Bitiniya kona ila pi nᵾpᵾi, mon nitim. Wote, Misiya kona ila ok, nombuⱡa mam ila kun puk, Trowas ekit purung. Ei kᵾn rumbuldi, Pol ur kump mel etpa kᵾndrᵾm. Masaroniya wu ti, Pol kᵾn kont kaimp ik ranggᵾpa, nimba mel, “Nim num kuta puⱡa rokᵾn, Masaroniya kona ila okᵾn, tᵾn tᵾkᵾn rᵾpᵾndᵾn ka!” nitim. 10 Pol ur kump mel, etpa kanduⱡnga kᵾn, tᵾn Masaroniya kona ila mbin ei nga, tᵾkrᵾp tᵾp kun itmᵾn. Ei nambuⱡ emel, Got ndi, tᵾn met kona ila, Rᵾnang Ik Kai ei, nᵾmp ngᵾmin nimba, tᵾn wi rurum.

Pilipai Kona Ila Amp Litiya Numan Ropᵾl Rurum

11 Tᵾn Trowas kona ila moⱡpᵾn, nu sip tᵾpᵾn kun puⱡa ropᵾn, Samotres kona ila purmun. Wote utᵾma orunga, Niyapolis kona ila purmᵾn. 12 Wote, tᵾn kona ei, wak ropᵾn, Pilipai kona peng ila purmun. Kona peng ei, Rom kona ila gapman ei ndi, rup itim. Wote, Masaroniya mᵾi kona ou ei nga kona peng ou ei, kona ila moⱡpᵾn, ui mat tᵾp mundurmᵾn. 13 Wote, mowi kor ei kᵾn, kona peng ei, wak ropᵾn ekit mbun. Nu wᵾr orunga, ekit mbun. Wote, Jura wamp atinga rormin kona ila tetᵾm, nᵾmp pilpᵾn kurᵾp purmᵾn. Ei kᵾn, amp mat, nu ᵾldᵾ ila, mou rok morung kandᵾp tᵾpᵾn, ik mat nᵾtmᵾn. 14 Ei kᵾn, amp ik kum tetᵾng kᵾⱡ nga amp ti, Taiyataira kona peng ila amp, Litiya nᵾtmᵾn. Amp ei, muⱡ mbᵾnᵾng mbᵾ, rarᵾp ropa etᵾm. Wote, Got nga mbi paka ropa itim ku. Ei kᵾn, Nuim ei ndi, amp ei nga numan orunga kumba tilinga, Pol nga ik nitim nimbᵾ, kum titim. 15 Wote, amp ei kᵾn, elim nga manga tenda wamp mbᵾ, nu tᵾtᵾng. Wote tᵾn kundpa, nimba mel, “Enim na Nuim ei kᵾn, kupa mondᵾp pᵾt nᵾk piling ndam, na nga mang kona muⱡamin wᵾi!” nitim. Nimba kᵾn, ama ronduⱡ mundpa nilinga, tᵾn teng ndup purmun.

Pol Kᵾn Sailas Raⱡ, Pilipai Kona Ila Tᵾk Kan Ngurung

16 Ui ti kᵾn, atinga rormin kona nila puⱡmina, nombuⱡa mana ila, kindmant amp wendᵾp ti, rukᵾr orunga, kur kit ti ndi moⱡpa, uⱡ wote, pemba mbᵾ nga kandpa nimba etᵾm amp ni, tᵾn kandpa nitim. Amp wendᵾp ei ndi, uⱡ mbᵾ mel elinga, elim rᵾp etmin wu mbᵾ, ku moni minal tᵾtmᵾn. 17 Ambuⱡa ei, tᵾn Pol min purmun ila, akil tepa omba, ke nimba mel, “Wu kᵾⱡ, Got Oⱡa Kupa morum ei nga, kongun wu mbᵾ! Wu mbᵾ ndi, enim wamp mbᵾ, Got ndi, etpa tᵾmba ei nga, nᵾk nguing onmᵾn!” nitim. 18 Ambuⱡa ei ndi, ik ei mel nilinga, ui ou ndupa, omba purum ila, Pol run kuⱡpa tᵾpa, ropᵾl ropa, kur kit ni kundpa, nimba mel, “Jisas Kraist nga mbi ila, na nim kundᵾp nᵾnt. Ambuⱡa ei, wak rokᵾn, kelik ekit pa!” nitim. I nilinga, kur kit ni ndi, ambuⱡa ni, wak ropa omba, ekit purum. 19 Ambuⱡa ei, rᵾt etmin puⱡ wu nimbᵾ, kandrung ei, en enim nga ku moni tᵾtmᵾn nombuⱡa mam ei, etpa kumba pendᵾtᵾng ila, popᵾⱡ kulk, Pol kᵾn Sailas raⱡ, imp molk, kunt kundi mek, wamp minal morung kona ila, kot pᵾtmᵾn wu ou mbᵾ kᵾn purung. 20 Mek puk, kot pᵾtmᵾn wu mbᵾ kᵾn mondᵾk, nᵾk mel, “Jura wu raⱡ ndi, tᵾn nga kona peng ila etkᵾⱡ, mong pindinggil enmbil. 21 Wu raⱡ ndi, tᵾn Rom kona ila wamp mbᵾ, mi pendᵾtmᵾn uⱡ mbᵾ, mbo endᵾnmbil uⱡ mbᵾ, kapⱡa tᵾn pilip tᵾpᵾn, pep ruimin mel mon!” nᵾtᵾng. 22 Wamp minal morung nimbᵾ ndi, Pol kᵾn Sailas raⱡ, ik mura nguk, wote kot pᵾtᵾng wu nimbᵾ ndi, wu raⱡ nga muⱡ mbal mbᵾ, potᵾk mundᵾk, tᵾmbᵾⱡ ndi rᵾi nᵾtᵾng. 23 Wu raⱡ tᵾmbᵾⱡ ndi, ambulk pilik rok, wote tᵾk kan manga ila pendᵾk, kan manga rᵾp etᵾm wu ni kundᵾk, rᵾp ronduⱡ mundkᵾn iti nᵾtᵾng. 24 Kan manga rᵾp wu ni ndi, ik ronduⱡ mundᵾk nᵾtᵾng ni pilpa, wu raⱡ manga kᵾkaⱡ rukᵾr orunga ila, tᵾpa ruk ndupa, wu raⱡ nga kᵾmp kᵾⱡ tᵾpa, nde plang ronduⱡ ila kan ngumba pinditim. 25 Wote, ou rumbuldi ei kᵾn, Pol Sailas raⱡ, Got kᵾn kinan atinga raⱡ elinggila, kan manga ila rᵾp rok petᵾng wu nimbᵾ, kum tek pᵾtᵾng. 26 Ei kᵾn, tᵾngᵾnda mint, kona kilimbᵾmp ambuⱡpa pilpa etpa, kan manga ni, akpa ᵾⱡmbᵾⱡ nimba itim. Ni kᵾn, tᵾngᵾnda mint, kan manga keta puⱡ puⱡ nimbᵾ, elim kumba tilinga, wote kan ngurung wamp nimbᵾ nga kan sen mbᵾ, elim ndi potpa omba mana purum. 27 Ni kᵾn, kan manga rᵾp etᵾm wu ni, rᵾt nimba kᵾndrᵾm ei, manga kumba nimbᵾ, wei titim ila, kan manga petᵾng wu nimbᵾ, nᵾng nᵾk pung nimba pitim. Pilpa kᵾn, elim nga koiya ou pinditim ni, ekit tᵾpa, elim ropa kondᵾmba itim. 28 I etmba elinga, Pol ndi, ronduⱡ wi ropa, nimba mel, “Tᵾn pora mormᵾn kᵾn, nim ninim rokᵾn kundi nᵾkᵾndi mon!” nitim.

29 Ni kᵾn, kan manga rᵾp wu ni ndi, kiya kandᵾk, mek wᵾiya nimba, elim ni mundmong etpa, tᵾkrᵾpa mba, Pol Sailas raⱡ nga kᵾmp puⱡ ila rumᵾⱡi pitim. 30 Wote, wu raⱡ tᵾpa mepa, pena mba waldpa, nimba mel, “Wu nuim raⱡ ye! Na namba uⱡ ti itamba kᵾn, Got ndi, na etpa tᵾmba nda?” nitim.

31 Wote, wu raⱡ ndi, punt rokᵾⱡ, nᵾkᵾⱡ mel, “Nim ndi, Nuim Jisas mondkᵾn pilana kᵾn, Got ndi, nim etpa tᵾpa, wote nim nga wamp mbo kᵾⱡ pora etpa tᵾmba ku!” nᵾtᵾnggil. 32 Wote, wu raⱡ ndi, Nuim ei nga Rᵾnang Ik Kai ei, wu ei kᵾn, elim nga wamp mbo kᵾⱡ kᵾn, kᵾndᵾk nᵾtᵾnggil. 33 Ei kᵾn, ant tenda ila rumbuldi, rᵾp wu ni ndi, wu raⱡ nga kip mondrᵾnggil kona nimbᵾ mepa mba, ⱡumᵾi rundrum. Wote elim kᵾn, elim nga wamp mbo nimbᵾ kᵾn, pᵾi nu tᵾtᵾng. 34 Wote, wu raⱡ mepa mba, elim nga manga kᵾkaⱡ oⱡa orunga ila, mondpa rᵾng inditim. Wu ni elim kᵾn, elim nga wamp mbo kᵾⱡ kᵾn, pᵾi numan kai pilik morung. Nambuⱡ emel, en enim Got kᵾn mondᵾk pᵾtᵾng ei nga etᵾng.

35 Wote mᵾkᵾlmᵾ unt, kot pᵾtᵾng wu nimbᵾ ndi, Rom kona ila el wu mat tᵾk mundᵾk, kan manga rᵾp wu ni kundᵾk, nᵾk mel, “Wu raⱡ tᵾkᵾn ekit mundi!” nᵾtᵾng. 36 Wote, kan manga nokundrum wu ni ndi, Pol kundpa, nimba mel, “Kot pᵾtmᵾn wu nimbᵾ ndi, nim kᵾn Sailas raⱡ, tᵾk ekit ndui nᵾnmin. Ei kᵾn, enmbil numan wang ndukᵾⱡ pᵾl!” nitim.

37 Ni wote, Pol ndi, el wu kᵾⱡ kundpa, nimba mel, “Tᵾl Rom mᵾi puⱡ wu raⱡ! Tᵾl mong tᵾtᵾmbᵾⱡ ei nga puⱡ ti, kandᵾk ti natᵾk, kai kandᵾk wamp morung pena ila kanda rok, wote tᵾk kan manga ila pendᵾtᵾng. Wote, akup uⱡ ei, kamblik pendᵾk, tᵾl mo rok, tᵾk ekit nduing enmin ei? Ei kapⱡa mon! Rom gapman nga kot pᵾtmᵾn wu kᵾⱡ ndi, en enim ok, tᵾl tᵾk ekit ndeing weing!” nitim.

38 Wote, el wu ni kᵾⱡ, ik nitim kᵾⱡ mek int puk, kot pᵾtmᵾn wu ni kᵾⱡ, kundᵾk nᵾtᵾng. Wote, Pol Sailas raⱡ, Rom mᵾi puⱡ wu raⱡ nilingina, kot pᵾtmᵾn wu ni kᵾⱡ, ik ei pilik mundmong etᵾng. 39 Wote, kot pᵾtᵾng wu nimbᵾ puk, wu raⱡ kᵾn, ⱡawa itmin nᵾk, kont kulk, ⱡawa itmin wu raⱡ kan manga ila, tᵾk mek ekit puk, kona peng ni, wak rokᵾⱡ, kelik pᵾl nᵾtᵾng. 40 Ni kᵾn, Pol Sailas raⱡ, kan manga ni, wak rokᵾⱡ, amp Litiya nga mang kona purᵾnggil. Kona ila nga mondpa pili wamp morung nimbᵾ, ik kai mbᵾ nᵾkᵾⱡ, ndoimp rondkᵾⱡ kᵾn, wote kona ei, wak rokᵾⱡ purᵾnggil.

Copyright information for `MED