Acts 19

Pol Episis Kona Ila Purum

Apolus ni wu ei, Korin kona ila moⱡnga kᵾn, Pol ni, kona ei nga ruk ting komnga titim kona nimbila mba ui, Episis kona ila ruk purum. Kona ila nga kitip kᵾni wu mat kandpa, tᵾpa waldpa, nimba mel, “Enim mondᵾk pᵾtᵾng ni kᵾn, Muⱡnga Wingti enim tᵾtᵾng muna mon?” nitim. Wamp kᵾⱡ ndi, punt rok, nᵾk mel, “Tᵾn Muⱡnga Wingti ei, pili napᵾtmᵾn ei ka!” nᵾtᵾng. Ni kᵾn, Pol ndi waldpa nimba mel, “Enim nu nant ei nga tᵾtᵾng?” nitim. Wamp kᵾⱡ ndi, punt rok nᵾk mel, “Tᵾn Jon nga wamp nu tinditim uⱡ ila, nu tᵾtmin,” nᵾtᵾng. Pol ndi kundpa, nimba mel, “Jon nga wamp nu tinditim uⱡ ei, uⱡ kit mbᵾ, tᵾk mbᵾⱡ ngeing nimba itim. Wote, Isrel wamp mbᵾ kundpa, elim nga mbuldung orunga omba, wu ei mondᵾk pilᵾi wu ei, Jisas,” nitim. Wamp nimbᵾ, ik ei pilik tᵾk kᵾn, wote Nuim Jisas nga mbi ila nu tᵾtᵾng. Wote, Pol elim nga ki raⱡ ndi, wamp kᵾⱡ nga peng mbila ambuⱡnga kᵾn, Muⱡnga Wingti mana omba, wamp kᵾⱡ kᵾn moⱡnga, ik nuim kan elpa elpa mbila, ik pai nok nᵾtᵾng. Wote, Got nga uⱡ etᵾm mbᵾ nga nᵾtᵾng ku. Wamp 12 mel molk, uⱡ mbᵾ nᵾtᵾng.

Kalimp raldika mel, Pol atinga manga kel ila wamp mbᵾ kᵾn moⱡpa, ik ronduⱡ mundpa nimba. Got nga wamp tᵾpa mumuk rui uⱡ ei nga wamp mbᵾ nga numan orunga nimba, piral ndupa kondpa nitim. Wote wamp mat, numan ruwik nilinga, mondᵾk pili nᵾpili wamp mbᵾ morung, kuimp keta ila, Nuim ei nga ‘Nombuⱡa Mam’ orunga, ik kit mbᵾ nᵾtᵾng. I elingina, Pol ndi, wamp nimbᵾ, wak ropa, kitip kᵾni wu kᵾⱡ tᵾpa, mepa ekit purum. Wote, ui mbila rᵾk rᵾk, Tairaniyus nga ik mbo manga ila, Pol ndi, wamp mbᵾ, ik mbo endpa murum. 10 Pol ndi, wamp ik mbo endpa puⱡnga, pana raⱡ omba purum. I elinga, Eisiya kona ila Jura wamp na, Grik wamp na mbᵾ pora, Nuim ei nga ik ei, pilik tᵾtᵾng.

Wu Skipa Nga Kangᵾmᵾl Kᵾⱡ

11 Got ndi, tᵾpa rapundᵾⱡnga, Pol ni, uⱡ rᵾpndi kᵾni nᵾkᵾni mat, minal itim. 12 Wote, wamp mbᵾ ndi, muⱡ mbal punt mat mek ok, Pol nga kᵾng ila minda nduk, wote mek int puk, kui wamp mbᵾ, minda nduⱡungina kᵾn, kui pitim mbᵾ pora nilinga, kur kit morung mbᵾ, ok ekit purung.

13 Ei kᵾn, Jura wamp mat andᵾk, kur kit murum mbᵾ, tᵾk mundᵾk, mel mat tᵾk etmin mbᵾ ndi, Nuim Jisas nga mbi oⱡa tᵾk angᵾndᵾk, kur kit murum wamp mbᵾ kundᵾk, nᵾk mel, “Wu Nuim Jisas nga mbi ila, Pol ndi, nᵾndᵾtᵾm ei nga, enim kᵾn ronduⱡ mundᵾp nᵾnt,” nitim. 14 Ei kᵾn ku, Jura wu pris kuimbal ti, mbi tek, Skipa nᵾtᵾng. Ei nga, kangᵾmᵾl wu 7 kat ndi molk, uⱡ mbᵾ ku etᵾng. 15 I elinga, kur kit ei ndi, wu kᵾⱡ kundpa, nimba mel, “Jisas ei na pᵾt, wote Pol ei, na pᵾt ku, wote enim wu namin?” nitim. 16 Wote, kur kit rukᵾr mundrum wu ni ndi, puka ropa oⱡa omba, wu kᵾⱡ tᵾpa, rak ndupa rurum. Wote, muⱡ rarᵾng mbᵾ, ropa ou ndupa, etᵾp kit mundrum. Ni kᵾn, wu ni kᵾⱡ, manga ei, wak rok, nung nᵾk purung.

17 Wote, Episis kona ila Jura wamp na, wamp rᵾⱡaip elpa na mat, pek morung mbᵾ ndi pora, uⱡ itim ni pilik, mundmong mam ti etᵾng. Ei kᵾn, Nuim Jisas nga mbi ei, tᵾk ou ndurung. 18 Wamp morung mou mbila, mondpa pili wamp ou ndupa ekit ok, en enim uⱡ mbᵾ mel, itmin nᵾk para ndurung. 19 Kurmᵾn rok etᵾng wamp mbᵾ, en enim nga buk mbᵾ mek, wamp morung mbila ekit ok, ndip karᵾng. Buk mbᵾ nga ku moni purum mel, tᵾp rak ndupa, ku 50,000 kina itim. 20 Uⱡ i etpa pelinga kᵾn, Nuim ei nga ik ei, oⱡa omba, ronduⱡ puⱡnga, kona mbila pora, tepa ndaip nimba purum.

Episis Wamp Kᵾⱡ, Pol Kᵾn El Ruing Etᵾng

21 Uⱡ mbᵾ mel, etᵾk pora nduⱡungina kᵾn, Muⱡnga Wingti ndi, Pol numan mbo ti nguⱡnga kᵾn, Masaroniya kᵾn Grik kona raⱡ ila mbo, wote Jerusalem puⱡmba ku nimba pitim. “Kona raⱡ ila mba kᵾn, wote Rom kona ila mbo, kᵾnimp nimba,” pitim ku. 22 Ei mel nimba kᵾn, elim Eisiya kona ila, ui ou ndupa moⱡmba etpa kᵾn, Timoti kᵾn Erastas kᵾn wu raⱡ, elim nga tᵾpa rᵾpᵾndi wu raⱡ tᵾpa, Masaroniya kona ila tᵾpa mundrum. 23 Ui ei kᵾn ku, Episis kona ila ik mam ti pitim. Ei nambuⱡ emel, Nuim ei nga, ‘Nombuⱡa Mam’ ni, rorung uⱡ ei nga. 24 Ni kᵾn, wu Dimitriyus ni wu ti, ku silpa ila mel kai mat got kep nui, Artemas nga mel to tendpa itim. Uⱡ ei etpa kᵾn, ku moni minal rukᵾr tᵾpa, wote elim nga kongun wu mbᵾ ngumba itim. 25 Ei kᵾn, elim nga kongun wu na, wote kongun tenda ei nga etmin wu mat pᵾi, wi ropa ruk tᵾpa, mondpa nimba mel, “Wu kᵾⱡ, enim pora pilik mormin. Tᵾn mel kai kandᵾp tᵾnmᵾn mbᵾ, ya tᵾn nga kongun enmin ila ekit onum. 26 Pol ni, enim uⱡ ei, en enim kandᵾk pilik pora ndonmun. Wu ei ndi, nimba mel, ‘Wamp nga got mim enmᵾn mbᵾ, got kupa mat mon!’ I nilinga, wamp puⱡi ya Episis kona ila kep, Eisiya kona mbila pora, wamp minal nimba rukᵾr tᵾnᵾm. 27 Wote, Pol uⱡ i enim ei ndi, tᵾn nga kongun kai etmᵾn ei nga mbi ei, etpa kit mondnum. Wote, uⱡ ei mendpᵾⱡ mon, uⱡ ti kit moⱡmba ei, ya got (kol ropa morum) Artemas nga manga ou ei, wamp mbᵾ ndi, tᵾk manga wei nuwa randᵾk tangina, wote elim nga mbi oⱡa orunga tᵾtᵾm uⱡ ei, etᵾk kit munding. Ei, Eisiya kona kᵾn, wote muⱡ kᵾmp tepa purum kona mbila pora, got (kol ropa morum), Artemas nga mbi ei, etpa kit, Pol ndi, mondnum,” nitim.

28 Wamp minal morung nimbᵾ, ik kᵾⱡ pilik, popᵾⱡ mondᵾk, ronduⱡ kei nᵾk mel, “Episis kona ei nga got (kol ropa morum) Artemas ei, oⱡa orunga morum!” nᵾtᵾng. 29 Uⱡ ei etᵾk kᵾn, kona peng ou ei, pᵾi etᵾk ik pendᵾtᵾng. Ik pendᵾtᵾng wamp nimbᵾ ndi ok, Pol nga tᵾpa rᵾpᵾndi wu Geiyas kᵾn Aristakus raⱡ, tᵾk imp morung. Masaroniya wu raⱡ, tᵾk imp molk, kot etmin manga ila mek purung. 30 Pol elim wamp uⱡ i etᵾng mbᵾ nga ruk ting ila mbi nimba elinga, wote mondpa pili wamp mbᵾ ndi, mon nᵾtᵾng. 31 Ei kᵾn, Eisiya kona ila gapman wu kuimbal mat, Pol kᵾn puⱡ pitim mbᵾ ndi, Pol kundᵾk, kot kona ila ekit ui nᵾwangga nᵾk, rung mundᵾk, mon nᵾtᵾng.

32 Ui ni kᵾn, wamp minal mou rorung kona nila, ik tek rumbulk nᵾtᵾng. Wamp mat ndi, ik ku nilmina mat ndi, ik elpa elpa kat ku nᵾk etᵾng. Ei nambuⱡ emel, wamp minal, en enim ok, mᵾk rorung uⱡ puⱡ ei, pili napᵾtᵾng. 33 Ik ou ndupa pitim ni, Jura wamp mat ndi, wu Aleksanda ik mbᵾ, kapⱡa punt rondᵾmba nᵾk pilik nimba, ik puⱡ mat mbo rondᵾk, wote tᵾk wamp nga mou ila tᵾk kuimbal mundrung. Wote, Aleksanda elim nga ki oⱡa ndupa, wamp ik nᵾtᵾng mbᵾ nga punt ruimp nimba itim. Ni wote, mᵾi puⱡ wamp ndi, kandrung ei, Aleksanda ei Jura wu mel itim ila wamp pora, unt kei nᵾk nᵾtᵾng ik ni kᵾⱡ, aldpa tᵾk tenda mondᵾk, ambulk oⱡa tᵾk, nᵾk mel, “Episis kona ei nga got (kol ropa morum) Artemas ei, oⱡa orunga morum!” nitim. I nilingina, ant mong ui raⱡ omba purum. 35 Ik ou ndupa nᵾtᵾng ni, wote kona peng ou ei nga wamp mbi titim wu ni ndi, ik nilinga, wamp nimbᵾ, raka nᵾk morung. Wote, wamp mbᵾ kundpa, nimba mel, “Enim Episis wamp mbᵾ ye! Wamp pora pᵾtmᵾn ei, ya Episis kona peng ou ei ndi, nuim Artemas nga manga ou ei, tᵾk ou nduk, wote ku muⱡ kona ila mana urum ku ei, rup etmin ni, pili napᵾtmᵾn ei? 36 Ei nga, wamp ti ndi, ik kᵾⱡ tᵾpa, roi ndui nᵾndᵾi! Enim raka nᵾk molk mel ti, etᵾk kit mundmin nᵾk iti nᵾtᵾi! 37 Enim ndi, ya mek ong wu raⱡ, tᵾn nga got ei nga atinga manga ou ila mel ti, kindᵾp nokᵾⱡ, wote ik ti nᵾkᵾⱡ kit mondkᵾⱡ iti nᵾtᵾnggil. 38 Wote, Dimitriyus kᵾn, elim nga kongun wu kᵾⱡ kᵾn, wamp na ti kᵾn, ik nimp nimba pilim ndam, kot etmin ui mbila mba kᵾn, kot nitmin wu kᵾⱡ kᵾn pangga! Ik mat nᵾk, int yant iting ndam, ila puk neing. 39 Wote, enim ik elpa mat ning pem ndam, wamp mou amburmin ui ila mendpᵾⱡ weing. 40 Tᵾn akup ant ila, el etpᵾn ik mat, nimbun imᵾn uⱡ mbᵾ nga, tᵾn mong timᵾn mel enim. Ik puⱡ tila, uⱡ kᵾⱡ iti nᵾtᵾtmᵾn ei nga, tᵾn waldᵾk eng ei kᵾn, ik puⱡ ti, kandᵾp tᵾpᵾn nimin mel mon!” nitim. 41 Kona peng ou ei nga, wamp mbi titim wu ni ndi, ik kᵾⱡ nimba ngumba, kelik pᵾi nilinga, elpa elpa purung.

Copyright information for `MED