Acts 20

Pol Masaroniya Kᵾn Grik Kona Raⱡ Ila Purum

Wote, Episis kona ila, ik pitim nimbᵾ, pora nilinga kᵾn, Pol ndi, mondpa pili wamp nimbᵾ, wi ropa ruk tᵾpa, ik mat nimba ronduⱡ mundpa, wote wamp mbᵾ, muⱡᵾi nimba mondpa, elim Masaroniya kona ila purum. Ni kᵾn, Pol ndi, kona ila mba kᵾn, wamp morung mbᵾ, ik nimba ronduⱡ mundpa, wote Grik kona ila ruk purum. Wote, Pol kona ila moⱡnga, kalimp raldika omba purum. Wote, nu sip tᵾpa, Siriya kona orunga, mbi nimba, tᵾpa kun etpa moⱡpa pitim ei, Jura wamp mbᵾ, elim ruing elingina, wote Masaroniya kona ila int purum. Beriya wu Sopater kangᵾm wu Pairus ni, Pol kᵾn kunda purᵾnggil. Wote, Tesalonaika wu Aristarkus, Sekundus raⱡ kᵾn, Derpi kona wu Geiyas kᵾn, Timoti kᵾn, Eisiya kona ou, wu Tikikus, Tropimus raⱡ kᵾn kunda, Pol kᵾn rᵾp rok purung. Wu ni kᵾⱡ, Trowas kona ila kuimp tek puk, nokundᵾk morung. Wote, bret ila, yis mundi namᵾndᵾk nurmᵾn ui ei, omba puⱡnga, Pilipai kona ila moⱡpᵾⱡ, nu sip ila rumbᵾⱡ 5 tᵾp mondpᵾⱡ, Trowas kona ila ruk purumbᵾⱡ. Kona ila wu kat, kandᵾp tᵾpᵾⱡ ila moⱡmina, rumbᵾⱡ 7 omba purum.

Ei kᵾn, kongun puⱡ mondᵾrmᵾn ui ei kᵾn, epindama tenda ila moⱡpᵾn, rᵾng nuimin ei nga mou rurmᵾn. Pol utᵾma orunga, mba pitim ei ndi, wamp mbᵾ kᵾn, ik nimba moⱡnga, ou rumbuldi itim. Manga kᵾkaⱡ oⱡa orunga, mou rurmᵾn kona ila, ndip kiya ou ndupa murum. Manga ila nga wu kang wu ti, mbi tek, Iyutikus nᵾtᵾng ei, manga rᵾⱡang murᵾk orum, kumba ila murum. Wote, Pol ik kokila nimba pelinga, Iyutikus mong raⱡ ila ur oⱡnga, ur pitim. Wote, ama kᵾmp kᵾm ur pitim ila, manga kᵾkaⱡ oⱡa orunga ila, ropa munduⱡnga omba, mana mᵾi ila rurum. Wote, kang ni ok, oⱡa tᵾk kandrung ei, koⱡpa pora ndurum. 10 Wote, Pol elim ndi, mana omba, kang wu on ni, tᵾpa kanggᵾⱡpa, wamp mbᵾ kundpa, nimba mel, “Mundmong iti nᵾtᵾi! Kang wu ei, kuⱡi naⱡᵾm,” nitim. 11 Wote, manga oⱡa orunga int mba, bret ni puk roⱡnga, wamp nimbᵾ kᵾn norung. Wote, Pol wamp mbᵾ kᵾn, ik nimba puⱡnga, ant kuimp oⱡnga kᵾn, kelpa purum. 12 Wamp nimbᵾ ndi, kang wu ni, kuⱡi nᵾkᵾrᵾm ni kandᵾk, mang kona mek puk, numan minal ngorung.

Pol Trowas Kona Ila Moⱡpa, Miletus Kona Ila Purum

13 Wote tᵾn ndi, Pol Asos kona ila, nu sip ila oⱡa timin ei nga, tᵾn nu sip tᵾpᵾn, kuimp titmin. Ei itmᵾn ei, nambuⱡ emel, Pol elim kᵾmp kongun etᵾp uimp nilinga, purmun. 14 Wote, Pol Asos kona ila omba kandpa tilinga, nu sip tᵾpᵾn, Mitilin kona ila purmun. 15 Wote, Mitilin kona ila moⱡpᵾn, nu sip tᵾpᵾn, Kiyos kona ila ruk purmun. Mᵾkᵾlmᵾ orunga, Samos kona ila ruk purmun. Utᵾma orunga, Miletus kona ila mbun ruk purmun. 16 Pol ndi, Pendikos ui ila kᵾn, Jerusalem kona ila mbi nimba, numan ronduⱡ pitim. Wote elim ndi, ant mong mat ou ndupa, Eisiya kona ou ila moⱡᵾp, tᵾp mundimp nimba, pili nᵾpᵾtᵾm. Wote Pol ndi, Episis kona peng ei, tᵾpa wak ropa, Jerusalem kona ila mbi nimba pitim.

Episis Atinga Manga Rᵾp Wu Mbᵾ, Pol Ndi, Memp Ik Kai Mbᵾ Ngurum

17 Pol ndi, Miletus kona ila moⱡpa kᵾn, ik rung mundpa, Episis atinga manga ila rᵾp etmᵾn wu mbᵾ, elim ok kᵾneing nitim. 18 Wote, ok ruk oⱡungina, Pol ndi, wu mbᵾ, kundpa nimba mel, “Enim pilik mormun ei, na unt enim kᵾn kuimp tep ur. Wote enim kᵾn, Eisiya kona ou ila moⱡᵾp, enim pilik mormun. 19 Jura wamp mbᵾ ndi, na mbun mam mbᵾ nguⱡngina, mindil nomp ka etᵾp, Nuim ei nga kongun wu ronduⱡ ti, mon nᵾmp pilip, na nga mbi mana omp, Nuim ei nga kongun ei ronduⱡ mundᵾp it. 20 Enim pilik mormun ei, pena ila kep, manga mbila kep, enim kᵾn ik nᵾmp, enim ik mbo rundᵾr ei kᵾn, enim tᵾpa rapᵾndᵾmba uⱡ mbᵾ, na ndi ambᵾⱡᵾp gi ndui nᵾndᵾr mon! 21 Jura kᵾn Grik wamp raⱡ pᵾi, man ngump, enim nga uⱡ kit mbᵾ wak rok, numan ropᵾl rok, Got kᵾn rukᵾr puk, Nuim Jisas mondᵾk pilᵾi, nit ku.

22 Wote, akup na mbi ont kona ila, na kᵾn pemba uⱡ mbᵾ, pili napᵾnt. Muⱡnga Wingti ei nga ik ei, teng ndup, na Jerusalem kona ila punt. 23 Wote, uⱡ tenda ti, na pᵾnt ei, kona peng elpa elpa mbila, na pur ei kᵾn, na kan nguing, muna mbun nguing uⱡ mbᵾ, na nokundpa tetᵾm ei, Muⱡnga Wingti ndi, kundpa nᵾtᵾm. 24 Na nanim nga kᵾng orunga, kont moⱡᵾp mbi uⱡ ei, ronduⱡ ti petᵾm, nᵾmp pili napᵾt. Nuim Jisas elim nga Rᵾnang Ik Kai ei nga nᵾmp, Got nga wamp pol ti uⱡ ei nga kindmant indeimp nimba, kongun ngurum uⱡ ei etᵾp, mbo pora nduimp nᵾmp pᵾnt.

25 Na enim wamp mbᵾ kᵾn andᵾp, Got nga wamp tᵾpa mumuk rui uⱡ ei nga ik puⱡ, nᵾmp ngump it. Wote, akup na pᵾnt ei, enim wamp ti ndi, na aldpa kᵾni nᵾkᵾning. 26 Ei nga, akup enim kᵾn nᵾmp mot ndunt ei, wamp ti uⱡ kit mbila, mana pum ndam, na nga ik puⱡ ti ila, pi napᵾmba. 27 Nambuⱡ emel, na ndi, enim ronduⱡ mundᵾp kundᵾp nit ni, Got nga numan ila pora, enim kundᵾp nit. 28 En enim rᵾp etᵾk muⱡᵾi! Wote, Muⱡnga Wingti ei ndi, enim nga wamp rᵾp iteing nimba ngurum mbᵾ, Got nokundᵾk kai mondᵾk. Ei nga, wamp mbᵾ, elim nga kangᵾm Jisas nga mema ei ndi, etpa titim. 29 Na pᵾnt ndam, mbuldung orunga, owa rakra mat ndi ok, wamp tek moⱡung mbᵾ, rok mbuⱡ mbaⱡ iting. 30 Ui ti kᵾn, enim nga ruk ting ila wu mat ndi, ik kol rok, mondpa pili wamp mbᵾ, en enim pep rok wᵾi ning. 31 Ei kᵾn, enim pilik kongundᵾk muⱡᵾi! Na pana raldika, enim kᵾn rumbuldi rᵾnggilmᵾ raⱡ, muⱡ ti natᵾp, ka etᵾp, enim ik mbo indᵾt ni, pilik munt muⱡᵾi! 32 Ei kᵾn, akup enim tᵾp, Got nga ki ila mondunt. Wote elim nga wamp poⱡ ti uⱡ ei kᵾn, rᵾnang ik kai ila kunda, tᵾp mondunt. Got elim ndi, enim etpa ronduⱡ mundpa, wote elim nga mel kai mat, elim nga wamp ngurum ei mel, enim ngumba. 33 Na ndi, wamp ti nga ku moni na, muⱡ mbal na, mel mbᵾ kandᵾp kum pindi nᵾpᵾndᵾt. 34 En enim pilik mormun ei, na nanim na nga kᵾng orunga rup itimp mel, na nga ki raⱡ ndi, kongun etᵾp, mel mbᵾ tᵾp, wote na nga kongun tenda ila etmin mbᵾ nga tᵾndᵾp ku it. 35 Na nga it uⱡ mbᵾ pora, enim ora ndup kᵾn, kongun ronduⱡ mundpᵾn etpᵾn, wamp ombil ek ni mbᵾ, tᵾp rᵾpᵾndmin nᵾmp it. I etᵾp it uⱡ ei, nambuⱡ emel, Jisas nga ik kat, tᵾn kundpa, nimba mel, ‘Enim pilik kun itᵾi! Mel yant tᵾn mbila mon, mel mok run ila numan kai ou ndupa, kandᵾk ting,’” nitim.

36 Pol ik mbᵾ, nimba pora nduⱡnga kᵾn, wamp morung mbᵾ ndi pora, mura koptᵾm rok monduⱡina, Pol atinga rurum. 37 Ei kᵾn, Pol kᵾmp kᵾm mba ei nga, wamp morung nimbᵾ, Pol kanggulk pendᵾk, ka etᵾk, keta nu rok nok etᵾng. 38 Pol aldpa ui tila yant omp, wamp kᵾⱡ kᵾni nᵾkᵾnimp nitim ik ei nga pilik, kont kurung. Wote wamp nimbᵾ, Pol kᵾn rᵾp rok puk, nu sip ila pangga nᵾk, mek int ndurung.

Copyright information for `MED