Acts 21

Pol Jerusalem Purum

Wamp mbᵾ, muⱡᵾi nᵾmp mondpᵾn, tᵾn nu sip tᵾpᵾn kun mbun, Kos nᵾtmᵾn kona ila ruk purmun. Utᵾma orunga, Rots nᵾtmᵾn kona ila ruk urmᵾn. Kona ila moⱡpᵾn, int mbun Patara kona ila purmun. Ni kᵾn, kona ila nga nu sip kat, Ponisiya kona ila mbi nimba titim nila, oⱡa mbun purmun. Wote tᵾn mbun, Saipras kona ei, ruⱡ etᵾp kandᵾp pendpᵾn, nu sip nila kun mbun, Siriya kona ila ruk purmun. Taiya kona ila nu sip kᵾⱡ mel mat, wak romba itim ei nga, tᵾn kona ila kelip, mana mbun, Taiya kona ila purmun. Ni kᵾn, tᵾn ndi, kona ila nga mondpa pili wamp mat, kandᵾp tᵾpᵾn moⱡmina, rumbᵾⱡ 7 omba purum. Wote, Muⱡnga Wingti ei nga ronduⱡ ei ndi, wamp mbᵾ kundpa nilinga, Pol Jerusalem pi nᵾpangga nᵾtᵾng. I etᵾk nᵾtᵾng ni, wote tᵾn muⱡmᵾn nitmᵾn ui ei pora nilinga, tᵾn mbin urmᵾn kona ila purmun. Mbin puⱡmina, amp kangambuⱡa wamp mbᵾ, tᵾn kᵾn ok, kup elingina, kona peng ou ei, wak ropᵾn, ekit orunga urmᵾn. Wote, nu ᵾldᵾ, ku ok tetᵾm kona ila, wamp pora, mura koptᵾm rop mondpᵾn, atinga rurmᵾn. Wote wamp nimbᵾ, muⱡᵾi nimbun, rawe etpᵾn pora ndupᵾn, tᵾn nu sip ila oⱡa puⱡmina, wamp nimbᵾ, en enim mang kona purung.

Tᵾn Taiya kona ei, wak ropᵾn ombun, Tolimais kona ila ruk oⱡmina, tᵾn nga wamp ᵾngᵾnᵾl mat, kandᵾk tᵾpᵾn moⱡmina, rumbᵾⱡ ti omba purum. Utᵾma orunga, kona ei wak ropᵾn, Sesariya kona ila ruk purmun. Kona ila, Got nga Rᵾnang Ik Kai nᵾndᵾtᵾm wu, Pilip nga mang kona mbun, wu ei kᵾn, rᵾp ropᵾn murmᵾn. Jerusa-lem kona ila wu 7 kᵾⱡ, kᵾmp rok tᵾtᵾng, kᵾⱡ nga ti Pilip. Wu ei nga amp wendᵾp 4 kat, wu pi napᵾrmᵾn kᵾⱡ morung. Amp ni kᵾⱡ, Got nga ik ei, paka rondᵾk nundᵾk etmin.

10 Tᵾn kona ila moⱡmina, rumbᵾⱡ mat ou ndupa, omba puⱡnga kᵾn, ik painui wu Akapas, Juriya kona ila moⱡpa urum. 11 Wu ei, tᵾn kᵾn omba moⱡpa, Pol nga kan rarᵾm ei tᵾpa, elim nga kᵾmp ki mbᵾ kan ngumba. Wote elim ndi, kundpa nimba mel, “Muⱡnga Wingti ei ndi, ik ei mel ninim, ‘Kan ei nga puⱡ wu ei, Jerusa-lem mormin Jura wamp mbᵾ ndi, kan ngᵾk pendᵾk, wote wamp rᵾⱡaip elpa mbᵾ nga ki ila, nguk ruk nduing,’” nitim.

12 Wote tᵾn ndi, ik ei pilpᵾn, wote tᵾn wamp rᵾp rop murmᵾn nimbᵾ kᵾn moⱡpᵾn, Pol Jerusalem kona ila pi nᵾpangga nimbun, ronduⱡ mundpᵾn, mon nitmin. 13 Wote Pol ndi punt ropa nimba mel, “Enim nambuⱡ emel, uⱡ ei mel etᵾk, ka elingina, na nga mundmong ei mindil enim? Na Jerusalem kona ila kan nguing uⱡ ei nga mendpᵾⱡ mon, Nuim Jisas nga nᵾndᵾp kᵾn na nanim kuⱡimp ei nga tᵾp kun etᵾp mor,” nitim. 14 Wote, Pol nga numan orunga ronduⱡ puⱡnga kᵾn, tᵾn mbᵾ pilpa ti nᵾtᵾtᵾm ila, wak ropᵾn, elim kundpᵾn, nimbun mel, “Nuim ei nga pilim uⱡ mbᵾ, nim kᵾn tangga!” ninmᵾn.

15 Wote, kona nila ui mat moⱡᵾp, tᵾp mundpᵾn, tᵾn nga mel mbᵾ, tᵾp kun etpᵾn, Jerusalem kona ila mbin purmun. 16 Sesariya kona ila kitip kᵾni wu mat, tᵾn kᵾn rᵾp rop urmᵾn, wote tᵾn Nason ni, wu ti nga mang kona ila muⱡamin nᵾk, mek purung. Nason ni, Saipras kona ei nga mᵾi puⱡ wu ei, unt ui mbila, mondpa pili wu ronduⱡ ti, moⱡpa urum, wote akup morum ku.

Pol Jerusalem Kona Ila Ruk Purum

17 Tᵾn Jerusalem kona ila ruk puⱡmina, mondpa pili wamp ᵾngᵾnᵾl morung nimbᵾ ndi, tᵾn numan nguk, rawe etᵾk tᵾtᵾng. 18 Wote utᵾma orunga, tᵾn Jeims kᵾnmin ei nga, Pol kᵾn kunda rᵾp rop purmun. Wote, rapa tenda ila manga rᵾp etmin wu mbᵾ pora, kona ila ok morung. 19 Pol ndi, wamp nimbᵾ, rawe etpa, wote elim wamp rᵾⱡaip elpa mbᵾ kᵾn, kongun elinga, Got ndi, tᵾpa rapundpa itim uⱡ mbᵾ, wamp mbᵾ pora nimba ngurum.

20 Wote, Pol nga ik mbᵾ pilik pora nduk kᵾn, Got nga rom kaip mbᵾ nᵾndᵾtᵾng. Wote, wamp nimbᵾ ndi, Pol kundᵾk, nᵾk mel, “Ana ye! Nim kandrᵾn ni, Jura wamp puⱡi, mondpa pili uⱡ ila ruk orung. Wote wamp mbᵾ, mi ik ei ronduⱡ mundᵾk, pep rormᵾn ku. 21 Ei nga, ya Jura wamp mbᵾ ndi, nim nga ik mbo endᵾtᵾn uⱡ mbᵾ, mel kundᵾk nᵾtᵾng. Wote, wamp rᵾⱡaip elpa mbᵾ nga mᵾi ila, Jura wamp mormin mbᵾ nga, Pol ndi, ik mbo rondpa, Moses nga mi ik kᵾⱡ, wak rok, kangambuⱡa mbᵾ kᵾng kupti uⱡ ei nga, indi nandᵾk, Jura wamp nga mbo uⱡ etmin mbᵾ wak ruing. 22 Ei kᵾn, nim ya un uⱡ ei nga pilik mormin. Ei nga, akup tᵾn namba uⱡ ti itimin? 23 Tᵾn nᵾnmᵾn uⱡ ei mel iti! Wu tᵾmbᵾkak kat, uⱡ ti itmin nᵾk, Got kᵾn nᵾk ronduⱡ mundrung. 24 Nim wu kᵾⱡ kᵾn, rᵾp rok pukᵾn, etpa kai mundi uⱡ ila peng ndi purᵾk eng uⱡ ila, nim ndi, ruk ila molkᵾn, wu kᵾⱡ nga ku moni ngui! Ei kᵾn, wamp ndi, nim nga ik nᵾndᵾk eng uⱡ mbᵾ omba, ik kol piyangga! Wote, wamp mbᵾ ndi pilik, Moses nga mi ik ei, nim pep rorᵾn ku nᵾk piling. 25 Ei nga, wamp rᵾⱡaip elpa mondpa pili kᵾⱡ, tᵾn ndi, mon ti ropᵾn iting uⱡ mbᵾ mel, kundᵾp nimᵾn ei ka! Wote, kur kit atinga rok rᵾng kaⱡing mbᵾ, nui nandᵾk, mema moⱡum kng mbᵾ nui nandᵾk, nuim kan ambulk kint ngᵾk eng mel mbᵾ, nui nandᵾk, wote amp kᵾn roldᵾnga undi uⱡ mbila iti nᵾtᵾi!” nᵾtᵾng. 26 Wote utᵾma orunga, Pol wu kat kᵾn, rᵾp ropa mba, etᵾp kai mundi uⱡ etmin ila kunda etᵾng. Ei kᵾn, manga wingti ou ila wu kuimbal mbᵾ puk kandᵾk, en enim nant kᵾn uⱡ etᵾng mbᵾ, etᵾk pora nduk, wote Got kᵾn angge nᵾk, mel mat elpa elpa nguing ei mel, puk kundᵾk nᵾtᵾng.

Pol Ni, Manga Wingti Ou Ila Imp Morung

27 Wote, rumbᵾⱡ 7 kat, omba mba elinga, Eisiya kona peng ila, Jura wamp mat ndi, Pol manga wingti ila murum ni kandᵾk, mbi nduk nilingina, wamp minal morung mbᵾ ndi, Pol imp morung. 28 Ni kᵾn, wamp nimbᵾ ndi, ronduⱡ ke nᵾk mel, “Isrel wamp mbᵾ ye! Tᵾn tᵾk rᵾpᵾndᵾiya! Wu ei ndi, Isrel wamp mbᵾ nga mbo uⱡ etmin, wote Moses nga mi ik na, wote manga wingti na mbila pora andpa, wamp mbᵾ ik mbo rondpa, uⱡ tᵾn nga etmin mbᵾ nga nimba kit mondrum. Wote akup, Grik wamp mat, mepa omba, manga wingti ila om uⱡ ei ndi, kona wingti ei etpa ⱡar mondum!” nᵾtᵾng. 29 ( Wote, Ik nᵾtᵾng ei, nambuⱡ emel, Episis kona ou ila, wu Tropimus, Pol kᵾn rᵾp ropa, manga wingti ou ila murum ni, tᵾk imp molk, rok kunt kundi pena tᵾtᵾng. I elingina, manga wingti ou ila murᵾk purᵾnggil.) 30 Ni kᵾn, Jerusalem kona peng ila wamp pora, ik ei pilik rut nᵾk, tᵾkrᵾk puk, Pol manga wingti ou ila murum ni, tᵾk imp molk, rok kunt kundi pena tᵾtᵾng. I elingina, manga wingti ou ei nga kumba mbᵾ angᵾndᵾtᵾng. 31 Wamp mbᵾ ndi, Pol rok kunding elingina, wote wamp ti ndi, Jerusalem kona pᵾi mong penim nimba pilpa, Rom kona ila el wu kuimbal morum wu ei kᵾn, rung mundrum. 32 Wote tᵾngᵾnda mint, el wu kuimbal ni ndi, elim nga el wu ou mat kᵾn, merᵾng orunga mat kᵾn, tᵾpa mepa wamp num pitim kona ila mepa purum. Ni kᵾn, wamp nimbᵾ ndi, el wu mbᵾ oⱡungina kandᵾk, Pol rui narᵾk wak rorung. 33 Wote, el wu kuimbal ni ndi, Pol murum ila mba, imp moⱡpa kᵾn, wu ei ndi, nimba mel, “Kan sen ralt ndi, tᵾk ki raⱡ kan ngᵾi!” nitim. Wote, Rom kona ila el wu kuimbal ei ndi, wamp mbᵾ, waldpa nimba mel, “Wu ei nam, namba uⱡ em?” nitim. 34 Ei kᵾn, wamp num pitim nila, wamp ke nᵾk ik elpa elpa nᵾtᵾng ila, el wu kuimbal ni ndi, ik puⱡ ei pilpa kun iti natᵾpa kᵾn, elim nga el wu mbᵾ kundpa nimba mel, “Pol tᵾk mek, el wu petmᵾn kona ila mek pᵾi!” nitim. 35 Wote, el wu nimbᵾ ndi, Pol tᵾk mek, en enim nga nde pol ila oⱡa puⱡᵾngina, wamp minal morung mbᵾ ndi, Pol ruimin nᵾk, ombil minal petᵾng. Ni kandᵾk, wote Pol tᵾk, koma rok, pol pol etᵾk mek purung. 36 Wamp pora, akil tek, rombulk ok, ke nᵾk mel, “Wu ei, rok kundᵾi mint!” nᵾtᵾng.

Pol Elim Nga Orunga Nimba Mot Ndurum

37 Pol tᵾk mek, el kona ila nondpa puⱡᵾngina, Pol ndi, el wu kuimbal ei, kundpa nimba mel, “Na ik ti, kapⱡa nim kundᵾp namp muna mon?” nitim. Wote, el wu ei ndi, elim waldpa, nimba mel, “Nim Grik ik nᵾtᵾn ei?” nitim. 38 “Na pᵾnt ei, nim Isip wu ti gapman kᵾn, el rokᵾn wu 4,000 tᵾk mekᵾn, kona kui waka ila purᵾn nᵾk etmin ni, nim wu waⱡᵾm ei?” nitim. 39 Wote Pol ndi, ik punt ropa, nimba mel, “Na Jura wu ei, Silisiya kona ei nga, Tarsus nᵾtmᵾn kona ila metᵾng. Na nga kona peng ei, mbi purum. Nim ndi, na wak rana, wamp mbᵾ ik mat kundᵾp namp!” nitim. 40 Wote, el wu kuimbal ni ndi, kapⱡa nilinga, Pol ni ndi, pol ila oⱡa mba moⱡpa, ki oⱡa nduⱡnga, wamp nimbᵾ kandᵾk, raka nᵾk moⱡᵾngina, Pol ndi, Ipru ik tepa, wamp mbᵾ, kundpa nimba mel,

Copyright information for `MED