Acts 22

“Angmᵾn, tamᵾn! Na enim kᵾn, ik punt rop nguimp ent ei, kum tek pilᵾi!” nitim. Pol ndi, Ipru ik ila nitim ni pilik kᵾn, wamp nimbᵾ pora, ik ni kum tetᵾng.

Wote Pol ndi, nimba mel, “Na Jura wu ei, Silisiya kona peng Tarsus ila, metᵾng. Wote, ya Jerusalem kona ila wu Gamaliyel ndi, ik mbo rundrum mbᵾ, pilip tᵾp moⱡᵾp kᵾn, en enim ei mel, tᵾn nga anda kouwᵾmᵾn mbᵾ nga mi ik pep rok, wote mbo uⱡ etᵾng mbᵾ nga ronduⱡ pilip, Got kᵾn nondpa akup mor. Wote, i etᵾp moⱡᵾp kᵾn, Got nga mbi paka rok andrᵾng wamp mbᵾ, imp moⱡᵾp rop kondᵾp it. Wu, amp mbᵾ, imp moⱡᵾp tᵾp kan ngur. Wu pris kuimbal ei kᵾn, kaunsil wu kᵾⱡ kᵾn pᵾi, na nga ik ei kupa ning. Wu kᵾⱡ ndi, na mon ti rok ngᵾk, met Damaskas kona ila Jura wamp morum mbᵾ nga mondpa pili imp wamp mbᵾ molkᵾn, mek wana, ya Jerusalem etᵾp, kit mundmin,” nitim.

Nuim Ei Ndi, Pol Rukᵾr Titim Mel Timan Rurum

“Wote, na Damaskas kona ila nondpa puⱡmba, ou rᵾnggilmᵾ mel, wi muⱡ ila rᵾⱡang mam ti, na mur nila omba, tepa pok itim. Na ropa munduⱡnga, mᵾi ila mbᵾ, pep pilmba, ik ti omba, na kundpa, nimba mel, ‘Sol, Sol! Na nambuⱡ emel, etᵾk kit mondᵾn?’ nitim. Wote na ndi, ik int ndup waldᵾp, nᵾmp mel, ‘Nuim ye! Nim nam?’ Nilmba kᵾn, wote na kundpa, nimba mel, ‘Na Nasaret wu Jisas, nim ndi, na etᵾk kit mondᵾn ei ka!’ nitim. Ni kᵾn, na kᵾn kunda purmun wu nimbᵾ, rᵾⱡang ei kandrung. Wote, na kᵾn ik nitim wamp ei nga ik ei, pili napᵾtᵾng. 10 Nuim ei wote, na ndi, namba uⱡ ti tamp nᵾmp waldilimba kᵾn, na kundpa, nimba mel, ‘Nim oⱡa molkᵾn, Damaskas kona ila pana kᵾn, Got ndi, nim elim nga uⱡ indᵾn mbᵾ mel, kundpa nimba,’ nitim. 11 Ni kᵾn, rᵾⱡang mam ni ndi, na nga mong raⱡ, ropa titim ila, na kᵾn rᵾp rop urmᵾn wu kᵾⱡ ndi, na ki ambulk mek Damaskas purung.

12 Ananaiyas nimba wu ti, Damaskas kona ila murum. Wu ei, Got mondpa pilpa, wote mi ik mbᵾ, teng ndupa itim ila, wote Jura wamp kᵾn morung mbᵾ ndi, tᵾk ou nduk etmin. 13 Na mur kona ila, wu ei omba anggilpa, na kundpa, nimba mel, ‘Ana Sol! Nim aldpa kona mbᵾ kᵾni!’ nitim. Ei kᵾn, tᵾngᵾnda mint, na kona mbᵾ kandᵾp, wote wu ei, elim kᵾndᵾr. 14 Ni kᵾn, na kundpa, nimba mel, ‘Tᵾn nga anda kouwᵾmᵾn mbᵾ nga, Got ei ndi, nim kᵾmp ropa tᵾpa, elim nga numan ei pilik mbi ndukᵾn, Kindmant Wu kun kai ei kandkᵾn, wote elim ik nim ei, pᵾlᵾn nimba em, nitim. 15 Wote nim ndi, elim nga ik ei kandkᵾn pilkᵾn in ei mel, wamp pora nim ndi, wamp mbᵾ kundkᵾn ni! 16 Wote akup, nambuⱡ ei nokundᵾnmbᵾⱡ? Oⱡa molkᵾn, elim nga mbi tek angᵾndkᵾn, nu tana, nim nga uⱡ kit etᵾn mbᵾ, ᵾlki rundangga,’” nitim.

Got Ndi, Pol Wamp Rᵾⱡaip Elpa Mbᵾ Kᵾn Tᵾpa Mundrum

17 “Wote, na Jerusalem kelip int mbo manga wingti ou ila, atinga rop moⱡᵾp kᵾn, ur kump mel etᵾp kᵾndᵾr ei, Nuim ei ndi, na kundpa, nimba mel, ‘Nim Jerusalem tᵾkᵾrkᵾn wak rui! Nambuⱡ emel, ya wamp mormin mbᵾ ndi, na nga ik nindin mbᵾ, pilik ti nᵾting,’ nitim. 19 Wote na ndi, ik punt rop nᵾmp mel, ‘Nuim ye! Wamp mbᵾ pora, na pᵾtmᵾn ei, atinga manga kel mbila mbo, nim mondᵾk pᵾtᵾng wamp mbᵾ, imp moⱡᵾp rop it ei, wamp pora pilik mormin, nitim. 20 Wote, nim nga ik para ndupa ninditim, wu Stipen rok kondᵾk, etᵾng uⱡ ei, na ruk ila moⱡmba rorung. Wote, Stipen rorung wu mbᵾ nga mul mbᵾ na rᵾp it,’ nitim. 21 Ni kᵾn, Nuim ei ndi, na kundpa, nimba mel, ‘Nim pi! Nambuⱡ emel, na ndi, nim tᵾp, kona ruⱡ wamp elpa kat kᵾn, tᵾp mundimp,’” nitim.

22 I nilingina, wamp minal pilik morung nimbᵾ ndi, Pol nga ik ei kum tek molk, pᵾtᵾng mel, ya ik kᵾⱡ pilik kᵾn, popᵾⱡ kulk, ronduⱡ ke nᵾk mel, ‘Wu ei kuⱡangga mint!’ nᵾtᵾng. 23 Wamp nimbᵾ, ke nᵾk, muⱡ mbᵾ ambulk oⱡa nduk, mᵾi kᵾnggᵾpᵾn rok oⱡa nduk etᵾng. 24 Ni kᵾn, Rom kona ila el wu kuimbal murum ei ndi, elim nga wu rᵾⱡaip kᵾⱡ ndi, Pol tᵾk mek, en enim nga petmin kona ila mek puk, kan pilda ndi rok, Jura wamp elim kᵾn ik pendinmin. Ei nambuⱡ emel, nᵾnmᵾn nda, waldᵾk pilᵾi! nitim. 25 Wote, Pol tᵾk kan ngᵾk pendᵾk, kan pilda ndi ruing elingina, Pol ndi, el wu ti anggilpa murum ei kundpa, nimba mel, “Rom kona ila mᵾi puⱡ wamp ti, ⱡawa ei kandᵾk ti natᵾk, kai kandᵾk, kan pilda ndi rormin ei?” nitim. 26 Wote, el wu ni, ik ei pilpa mba, elim nga wu kuimbal morum ni kundpa, nimba mel “Nim en uⱡ ei, tᵾkᵾn mendkᵾn en ei? Wu Rom nga mᵾi puⱡ wu ei ka!” nitim. 27 Wote, el wu kuimbal ei, Pol murum ila mba waldpa, nimba mel, “Na kundkᵾn na, nim Rom mᵾi puⱡ wu ei?” nitim. Pol ndi, ik punt ropa, nimba mel, “Wote ka!” nitim. 28 Wote, el wu kuimbal ei ndi kundpa, nimba mel, “Na ku moni puⱡi ngump kᵾn omp, Rom wu mor,” nitim. Ni wote, Pol ndi kundpa, nimba mel, “Na wote, Rom kona ila rukᵾr metᵾng ei ka!” nitim. 29 Ei kᵾn, wu kat, Pol ik wuldᵾng morung ni kᵾⱡ, aldpa ropᵾl rok int purung. El wu kuimbal ni, mundmong itim. Ei nambuⱡ emel, Pol ei Rom kona ila mᵾi puⱡ wu mendpᵾⱡ ni, tᵾpa kan ngum ei nga.

Pol Ni, Wu Kaunsil Mbᵾ Nga Kuimp Keta Ila Ʉnggᵾtᵾm

30 Utᵾma orunga, el wu kuimbal nimbᵾ ndi, Jura wamp ndi, Pol ik mura ngᵾk etᵾng uⱡ nimbᵾ, pilip kai itimp nimba. Wote utᵾma orunga, Pol nga ki kan rorung mbᵾ, potᵾk mundeing nimba, wu pris kuimbal na, wu kaunsil morung nimbᵾ pora, ok mou rᵾi, nitim. Wote, Pol ekit tᵾpa, wu mou rok morung nimbᵾ nga kuimp keta ila, tᵾpa oⱡa ᵾngᵾndᵾtᵾm.

Copyright information for `MED