Acts 23

Wamp Mou Pitim Ila Pol Ndi Ik Nitim

Pol ndi, wu kaunsil nimbᵾ, nim nim kandpa nimba mel, “Angmᵾn! Got nga kuimp keta ila, na nanim nga numan orunga unt kun titim ei mel, akup i ku elinga mor,” nitim. Ei mel nilinga, wu pris kuimbal Ananaiyas ndi, wu kat Pol kᵾn nondpa morung wu ni kᵾⱡ, kundpa nimba mel, “Pol nga keta mᵾn ila, ki raka ndi rᵾi!” nitim. Wote Pol ndi, wu ei kundpa, nimba mel, “Nim nde plang kit mel, ekit orunga kopung kai kandᵾrmin ei mel kapⱡa, Got ndi, nim romba. Nim Mi Ik kᵾⱡ, pep ront nᵾkᵾn, nim ila molkᵾn, na kᵾmp tᵾn ei, wote ninim ndi, Mi Ik ei, rok puⱡa rokᵾn, na rᵾi nᵾn ei ka!” nitim. Wote, wu mat nondpa anggilik morung ni kᵾⱡ ndi, Pol kundᵾk, nᵾk mel, “Nim ndi, Got nga wu pris kuimbal ei, ik mura ngᵾn ei ka!” nᵾtᵾng. Pol ndi, wu kᵾⱡ nga ik ni, punt ropa, nimba mel, “Na nga angmᵾn! Wu ei Got nga wu pris kuimbal morum ni, na pili napilip nint. Got nga Buk Wingti ila nimba mel, ‘Enim nga wu nuim mbᵾ, ik mura ngᵾi ngᵾngᵾi,’ nitim ei, na pᵾt,” nitim.

Ni kᵾn, Sarusi wamp mat, Perisi wu kᵾⱡ kᵾn ok morung ni, Pol ndi kandpa kᵾn, ronduⱡ wi ropa, nimba mel, “Na nga angmᵾn! Na Perisi wu ei, Perisi wu mbo kᵾⱡ nga kangᵾm ei. Na kupa ronduⱡ mondᵾp pᵾt ei, wamp korung mbᵾ, ⱡoprᵾk kont muⱡing nᵾt ik ei nga, akup enim ndi, na tᵾk kot inding pilik enmin,” nitim. Wote Pol ndi, ik kᵾⱡ nimba pora nduⱡnga kᵾn, tᵾk rᵾk Sarusi wu kᵾⱡ kᵾn, Perisi wu kᵾⱡ kᵾn, en enim ruk ila ik palk ok, elpa elpa purung. (Sarusi wu rᵾⱡaip kᵾⱡ ndi, wamp korung mbᵾ, ⱡoprᵾk kont muⱡing nᵾk pili napᵾtmᵾn. Wu anggelo na, muⱡnga na mbᵾ mormin nᵾk pili napᵾtmᵾn. Wote, Perisi wu mbᵾ ndi, uⱡ raldika kᵾⱡ kupa nᵾk pᵾtmᵾn.) Ni kᵾn, wi ama ronduⱡ rok elingina, Perisi wu kᵾⱡ nga Mi Ik mbo wu kat ndi, ronduⱡ mondᵾk, nᵾk mel, “Tᵾn ndi, wu ei kᵾn ⱡawa ti, kandᵾp ti natᵾnmᵾn! Anggelo, muna muⱡnga ti ndam, omba moⱡpa, elim kᵾn ik nᵾm!” nᵾtᵾng.

10 Ik mura etᵾk rombulk ik nᵾtᵾng nimba ronduⱡ puⱡnga, el wu kuimbal ni ndi, Pol rok kunding enmᵾn nimba pilpa, mundmong itim. Wote, elim nga el wu mbᵾ, kundpa, nimba mel, “Enim wu mormᵾn kona ila mana puk, Pol ekit tᵾk mek, el wu petmᵾn kona ila mek rukrᵾng pᵾi!” nitim.

11 Wote utᵾma rumbuldi, Nuim ei omba, Pol nga pitim kona ila nondpa anggilpa moⱡpa, Pol kundpa, nimba mel, “Ronduⱡ pukᵾn muⱡi! Ya Jerusalem kona ila, na nga ik ei, ronduⱡ mundkᵾn nᵾndi! Ei mel ku, met Rom kona ila pukᵾn, uⱡ tenda ei ku iti!” nitim.

Pol Rok Kunding Pilik Etᵾng

12 Wote mᵾkᵾlmᵾ orunga, Jura wu mat ok tenda etᵾk, Pol ruing pilik, ik mat nᵾtᵾng. Wote, nᵾk ronduⱡ mundᵾk, nu na, rᵾng na mbᵾ, nui nandpᵾn kᵾn, mbun Pol rop kundmᵾn, nᵾtᵾng. 13 Wu 40 mel ok, ik ronduⱡ mundᵾk nᵾk, Pol ruimᵾn nᵾk, mᵾi rorung. 14 Wu kᵾⱡ puk, en enim nga wu pris kuimbal na, rᵾp wu na mbᵾ kundᵾk, nᵾk mel, “Tᵾn ndi, nimbun mᵾi ropᵾn rᵾng nui nandpᵾn, Pol rop kondpᵾn kᵾn, rᵾng nuimᵾn, nᵾtᵾng. Ei kᵾn, akup enim kᵾn, kaunsil wu mbᵾ kᵾn, rak nduk molk, Rom nga el wu kuimbal morum ei kᵾn, rundi kᵾmp ralk, nᵾk mel, Pol enim kᵾn mana wangga! Pol nga ik nᵾtᵾm mbᵾ nimba, kai itangga, pilᵾmin nᵾk tᵾk mundᵾi! Wote tᵾn ndi, nombuⱡa mam paka ila moⱡpᵾn, Pol rop kundmin,” nᵾtᵾng.

16 Wote, Pol ruimᵾn nᵾk nᵾtᵾng ik ni, Pol nga pam kang ei, moⱡpa pitim. Wote, el wu petmᵾn kona nila mba, pam Pol kandpa ik mbᵾ, kundpa nitim. 17 Wote Pol ndi, el wu ti, wi rop tᵾpa, nimba mel, “Ya kang wu ei, el wu kuimbal ei kᵾn, ik ti kundpa nimba, ei nga mekᵾn pi!” nitim. 18 Ni kᵾn, el wu ni ndi, Pol nga pam kang ni, tᵾpa mepa mba, el wu kuimbal murum ni kᵾn, mepa mba mondpa, nimba mel, “Kan ngumᵾn wu, Pol ndi, na wi ropa tᵾpa, ya kang wu ei, nim kᵾn ik ti kundpa nimp nilinga, na mep ont,” nitim. 19 Wote, el wu kuimbal ni ndi, kang wu ni, ki ambuⱡpa mepa, kona waka tila mondpa, kang wu ni waldpa, nimba mel, “Nim na kᵾn namba ik ei, nin on?” nitim. 20 Wote, kang wu ni ndi, el wu kuimbal ei kundpa, nimba mel, “Jura wu kaunsil mormᵾn mbᵾ ndi, ik kanggᵾp etᵾk, utᵾma orunga, pili nᵾpili kump ralk ombun, nim kᵾn waldpᵾn, Pol wak rana, en enim ik mat nangga pilmin nᵾk nᵾng. 21 Wote nim ndi, ik ei kum ti nᵾti! Nambuⱡ emel, wu 40 mel nombuⱡa paka ila mo rok molk, Pol rok kundmin nᵾk nokundᵾk mormin. Ik nᵾk, mᵾi rok nu na, rᵾng na mel mbᵾ, nui nandᵾk mi tek, Pol rop kondᵾp mint, wang nduimin nᵾng. Akup iting ei nga kor tᵾk kun eng ei nga, akup nim nga ik ting ei nga nokundᵾk mormin,” nitim. 22 Wote, el wu kuimbal ni ndi, kang wu ni kundpa, nimba mel, “Ik ei, na ndi, kundᵾp nint nᵾkᵾn, wamp ti kundkᵾn ni nᵾni mon!” nitim. Ei mel nimba kᵾn, kang wu ni, kelik pi nitim.

Pol Tᵾk Gapman Wu Peng Piliks Kᵾn Tᵾk Mundrung

23 Wote, el wu kuimbal ni ndi, elim nga el wu ou raⱡ, wi ropa kundpa, nimba mel, “Enmbil ndi pukᵾⱡ, el wu 200 tᵾkᵾⱡ kun etkᵾⱡ, wote kng os mbuⱡ ila mormᵾn wu 70, wote el kupanda metmᵾn wu 200 mbᵾ pora, rumbuldi 9 kilok Sesariya kona ping ei nga tᵾk kun itᵾi! 24 Wote enim ndi, Pol nga kng os ralt, tᵾk kun endᵾk, wote rᵾp etᵾk kai mondᵾk mek puk, Gapman wu peng mumuk Piliks kᵾn, tᵾk mundᵾi!” nitim. 25 Wote, el wu kuimbal ni ndi, mon ti ropa, ei mel nitim, “Na Klautiyas Lisiyas ndi, numan kai pilip, gapman nga wu peng mumuk Piliks kᵾn, mon ti rop ngunt. 27 Jura wu mbᵾ ndi, wu ei rok kunding pilik etᵾng. Wote na ndi, wu ei, tᵾn nga Rom mᵾi puⱡ wu ti, nᵾmp pilip kᵾn, na nga el wu mbᵾ tᵾp munduⱡmba puk, imp molk tᵾk mek orung. 28 Wote, Jura wu mbᵾ ndi, nambuⱡ emel, wu ei kᵾn ik nᵾng ndam, na etᵾp pilimp nᵾmp kᵾn, wu ei mep kaunsil wu mbᵾ, mou rorung ila mep pur. 29 Wote, na ila mbᵾ kᵾndᵾr ei, wu ei rok kondᵾk ei kᵾn, kan nguing ei nga ⱡawa ti, kandᵾp ti nᵾtᵾt. Wote Jura wamp, en enim nga mi ik mbᵾ nga wᵾldi ik mat nga nᵾk, wu ei kᵾn kot etᵾng. 30 Wote na kundᵾk, Jura wu mat ndi, wu ei, mo rok rop kundmin, nilmina pilip, na ndi, wu ei, tᵾkrᵾp tᵾp nim kᵾn mundunt. Jura wu mbᵾ kundᵾp, namba ik ti, wu ei kᵾn ning ndam, nim kᵾn ping,” nint.

31 Wote, el wu ni kᵾⱡ ndi, ik mbᵾ kum tek, Pol rumbuldi tᵾk mek, Antipatris kona ila purung. 32 Utᵾma orunga, el wu mana mᵾi ila andurmin wu kᵾⱡ, mang kona yant oⱡungina, wote kng os mbuⱡ ila mormin wu kᵾⱡ ndi, Pol rᵾp etᵾk mek purung. 33 Wote, Pol ni mek puk, Sesariya kona ila ruk puk kᵾn, mon ni Gapman wu peng mumuk ni nguk, wote Pol ni kunda gapman wu peng ni ngurung ku. 34 Wote, Gapman wu peng mumuk ni ndi, mon ni, kᵾmp ropa pora ndupa kᵾn, wote Pol waldpa, nimba mel, “Nim nga mᵾi kona ei, nant ila nga tetᵾm?” nitim. Wote, etpa pitim ei, Pol nga kona ei, Silisiya tetᵾm wu peng mumuk ni ndi, Pol kundpa, nimba mel, “Nim kᵾn ik nᵾndᵾk eng wu mbᵾ wangina kᵾn, nim nga ik mbᵾ, ei na pileimp!” nitim. Wote, wu ei ndi, Pol tᵾk nuim mumuk Erot nga mang kona ila kan ngᵾk rᵾp itᵾi, nilinga etᵾng.

Copyright information for `MED