Acts 25

Pol Elim Nga Ik Ei, Rom Nga Wu Peng Mumuk Ei Pilangga Nitim.

Rumbuldi raldika omba puⱡnga, wu Pestas ni, kona ou ila moⱡpa, Sesariya kona ni waka ropa, wote Jerusalem purum. Ila nga, Jura wu nuim mbᵾ kᵾn, wu pris kuimbal mbᵾ kᵾn, ruk puk molk, Pol kᵾn kot iting ik mbᵾ nᵾk, wu Pestas ngurung. Wu Pestas ni, kunt kan etᵾk, Pol Jerusalem wangga nᵾtᵾng. Ei nambuⱡ emel, Pol nombuⱡa mam paka ila molk, rok kunding pilik, ik mo rok nᵾtᵾng. Wote, wu Pestas ndi, ik punt ropa, nimba mel, “Pol met Sesariya kona ila kan ngurung ei mel petᵾm. Wote na nanim, met kona ila mana mbi ui ei, nondpa enim. Enim nga wu nuim mbᵾ, na kᵾn rᵾp rop pamina, wote wu ei, uⱡ ⱡawa mat itim ndam, kapⱡa tep ik nᵾmᵾn,” nitim.

Wu Pestas ni, Jura wamp kona ila moⱡpa, rumbᵾⱡ 8 muna 10 ei mel moⱡpa, wote Sesariya kona ila purum. Mᵾkᵾlmᵾ orunga wu ni, kot etmin kona ila moⱡpa kᵾn, Pol mek mana wei, nitim. Wote, Pol ekit oⱡnga, Jura wu Jerusa-lem molk, orung wu nimbᵾ ruk ok, Pol tᵾk pok etᵾk, Pol kᵾn ik ronduⱡ minal mbᵾ ngok nᵾtᵾng, wote ik ei nga puⱡ ti mon. Wote, Pol elim nga orunga nimba mel, “Jura wamp nga mi Ik kᵾⱡ kep, manga wingti ou ei kep, Rom nga wu nuim mumuk Sisa ei kᵾn kep, uⱡ ti na ndi, etᵾp uⱡ ⱡawa mundi nᵾmᵾndᵾr mon!” nitim. Ni kᵾn, wu Pestas ni, Jura wu kᵾⱡ nga, orunga mba kunt kan etpa, Pol waldpa, nimba mel, “Nim kapⱡa Jerusa-lem ila rᵾp rop mbun, wote nim nga ik ei, kona ila mbo kᵾn pilimp?” nitim. 10 Wote, Pol ndi kundpa, nimba mel, “Na ya Rom nga wu nuim mumuk Sisa ei nga kot pᵾtᵾm kona ila mor, na mek kona nᵾl ping. Nim pilkᵾn morun ei, na Jura wamp kᵾⱡ kᵾn, uⱡ ⱡawa mat iti nᵾtᵾt. 11 Wote, na ya ik nᵾnt ei ndi, nᵾmp kᵾn, mi ik kᵾⱡ nga ti rop puⱡa rop, wote wamp rok kundi uⱡ ila kuⱡimp ei nga mundmong etᵾp, ik ti ni nanᵾnt, mon! Wote, na kᵾn ik nᵾnmin ei nga puⱡ ti, kandᵾk ti natᵾng ndam, wamp ti ndi, kapⱡa na kun tᵾpa, Jura wu kᵾⱡ ngui ngangᵾmba mon! Rom wu nuim mumuk Sisa ei ndi, na nga ik ei pilangga, nᵾmp nᵾnt!” nitim. 12 Ni kᵾn, Pestas elim nga ik man ngui wu mbᵾ kᵾn, ik nimba moⱡpa, wote Pol kundpa, nimba mel, “Nim Rom nga wu nuim mumuk Sisa ei kᵾn, mbi nᵾn ei mel kapⱡa pi!” nitim.

King Pestas Ndi, Pol Nga Puⱡ Ei Agripa Kundpa Nitim

13 Rumbᵾⱡ mat omba puⱡnga, King Agripa kᵾn, elim nga kimin amp Bernis raⱡ, wu Pestas kokila tᵾk kongun ou ila mondrung ei nga, rawe itinggil pilkᵾⱡ, Sesariya kona ila purᵾnggil. 14 Wamp raⱡ pukᵾⱡ, Sesariya kona ila rumbᵾⱡ mat, ou ndupa moⱡunggila kᵾn, wu Pestas ndi, Pol nga uⱡ etᵾng mbᵾ mel, ik timan ropa, King Agripa ngurum, nimba mel, “Wu Pol ni, ya kan manga ila petᵾm ei, wu Piliks ndi, na wu ei nga ik pileimp nimba, pendpa kelpa purum. 15 Unt, na Jerusalem pur ei kᵾn, Jura wu pris kuimbal mbᵾ kᵾn, manga wingti rᵾp wu mbᵾ pᵾi, na kᵾn ok waldᵾk, ya kan manga ila petᵾm wu ei, mbun mat ngump, etᵾp kit mundeimp nᵾk ik mat nᵾtᵾng. 16 Wote na ndi, wu mbᵾ kundᵾp, tᵾn Rom wamp mbᵾ ndi, punt tᵾtᵾm wamp ti kun tᵾpᵾn, mbun ngui uⱡ ei nga iti natᵾtmᵾn. Mong tᵾtᵾm wamp ei, unt ekit tᵾpᵾn, wamp mbᵾ nga kuimp keta ila, elim ndi, nimba para ndangga nᵾmp, wak rormᵾn. 17 Wote, Jura wu mbᵾ, ya orung ei kᵾn, na ndi, ui ti tᵾp keri mundi namᵾndᵾp, utᵾma orunga, kot etmin kona ila moⱡᵾp wu ei, tᵾk mek wᵾi nit. 18 Ei kᵾn, Jura wu orung kᵾⱡ ndi, wu ei mong titim nᵾk, ik ti ning nᵾmp pit ei kᵾn, wote ik ti ni nandᵾtᵾm mon! Wote, ik elpa mat nᵾtᵾng. 19 En enim nga mbi paka rormᵾn puⱡ orunga nga ik mat nᵾk, wote Jisas ni, wu ti kurum nilingina, Pol ndi, kont morum nilinga etᵾng. 20 Na wote, ik nᵾtᵾng puⱡ ei nga ti pilip kun iti natᵾp kᵾn, wote Pol waldᵾp, nᵾmp mel, Jerusalem mbun kᵾn, nim nga ik ei, nᵾmp kun itᵾmin. 21 Ni kᵾn, Pol elim ndi waldpa nimba mel, ‘Na kan manga ila piyamba, wote Rom wu nuim mumuk Sisa ndi, na nga ik ei pilangga,’ nitim. I nilinga kᵾn, na ndi, kapⱡa kan manga ila piyangga. Rom wu nuim mumᵾk Sisa ei kᵾn mba, ui ila tᵾp mundeimp,” nit. 22 Wote, king Agripa ndi, Pestas kundpa, nimba mel, “Wu ei nga ik ei, na nanim ndi pilimp!” nitim. Pestas ndi, ik punt ropa, nimba mel, “Nim utᵾma kapⱡa ik ei pᵾlᵾn!” nitim.

23 Mᵾkᵾlmᵾ orunga, Agripa Bernis raⱡ, muⱡ kai mbᵾ ralkᵾⱡ, mou rormin manga kukaⱡ orunga orᵾnggil. Ei kᵾn, el wu kuimbal mbᵾ kᵾn, wote kona ila wu nuim mbᵾ pora, mel kai mbᵾ ralk ok, tenda ila moⱡᵾngina, Pestas ndi, Pol mek ekit wᵾi nilinga, tᵾk mek ekit orung. 24 Wote, wu Pestas ndi, kundpa nimba mel, “King Agripa nim kᵾn, wote ya wamp mormin mbᵾ pora, enim ya wu ei kᵾnᵾi! Jura wamp ya mormin, wote Jerusalem mormin mbᵾ ndi, kᵾmp kᵾm kundᵾk, ya wu ei kuⱡangga mint nᵾtᵾng. 25 Wote na ndi, wu ei, rok kunding nᵾtᵾng ei nga koⱡmba ik puⱡ ti, kandᵾp ti nᵾtᵾnt. Wote, wu elim ndi, wu nuim mumuk Sisa ei, kᵾnimp nim ei nga, na pilip kᵾn, wu ei tᵾp mundunt. 26 Wote, uⱡ ei mel pilinga kandᵾp kᵾn, na mon ti rop pendᵾp, tᵾn nga Rom wu nuim mumuk Sisa ei kᵾn, ngump mundimp ei nga mel ti mon. Akup king Agripa nim kᵾn, wote wamp wei mormin mbᵾ pora molk, ik ⱡawa mat, Pol kᵾn kandᵾk tᵾng ndam, kapⱡa na mon ti rop, tᵾn nga wu nuim mumuk Sisa ei ngeimp. 27 Na nanim ndi, Pol nga, uⱡ ⱡawa kat kandᵾp ti natᵾp, wote Rom wu nuim mumᵾk Sisa ei kᵾn, wei ngump mundimp uⱡ ei, kapⱡa iti natᵾnᵾm mon,” nitim.

Copyright information for `MED