Acts 26

Pol Ndi, King Agripa Nga Kuimp Keta Ila Pol Elim Nga Nimba Mot Ndurum

Wote, King Agripa ndi, Pol kundpa, nimba mel, “Nim ndi, akup nim ninim nga orunga nin ik mbᵾ ni,” nitim. Pol wu king ni kᵾn, ki oⱡa ndupa, rawe mel etpa, wote ik ei, nimba mel, “King Agripa, Jura wamp mbᵾ ndi, na kᵾn ik pendᵾnmᵾn uⱡ mbᵾ, ya nim nga kuimp keta ila moⱡᵾp, nanim nga orunga nᵾmp uⱡ ei, kapⱡa nᵾmp pᵾnt. Na ik kupa ei nᵾnt, nambuⱡ emel, nim ndi, Jura wamp nga mbo uⱡ etᵾk, wote namba ik mat tek rombulk nᵾk etmin mbᵾ pora, pilik ketᵾn. Ei nga, na ndi, nim waldᵾp kᵾn, na nga ik nᵾmp ent mbᵾ, kum tekᵾn pilkᵾn kai iti!

“Jura wamp mbᵾ pora, na kang kᵾn moⱡᵾp, andᵾp it uⱡ mbᵾ pora pᵾtmᵾn. Ama unt puⱡ mondpa, na nga mᵾi kᵾmp ila kep, Jerusalem kona ila kep, kang kᵾn moⱡᵾp, namba uⱡ it mbᵾ, pilik mormin. Unt en enim ndi, na pᵾtᵾng ni, enim kapⱡa nᵾk piling ndam, nᵾk para ndᵾi. Na unt tᵾn nga mbi paka rormin uⱡ ila, Perisi wu rᵾⱡaip kᵾⱡ kᵾn, rᵾp rop etᵾp ᵾndᵾr. Na akup ya ila, kot inding ei nga mor uⱡ ei nga puⱡ ei mel, Got ndi, tᵾn nga anda kouwᵾmᵾn kᵾⱡ kᵾn, unt uⱡ ti itimp nimba mᵾi rurum uⱡ ila, na keⱡ rondᵾp nokundᵾp mor ei nga, na kᵾn ik ninmin. Tᵾn nga, Jura wamp rᵾⱡaip kᵾⱡ nga nimp mᵾi rurmᵾn, ik ei mondᵾk pilik rumbuldi rᵾnggilmᵾ mbᵾ, Got kᵾn mbi paka rondᵾk keⱡ rondᵾk nokundᵾk etᵾk mormin. Wu nuim ye! Na uⱡ ila nga ku, akup Jura wamp kᵾⱡ ndi, tᵾk kot endinmin. Nambuⱡ emel, enim Jura wamp mat ndi, wamp korung mbᵾ, Got ndi, ⱡoporpa tᵾpa kont mundi namᵾndᵾmba nᵾk pᵾnmᵾn ei?

“Unt na nanim nga numan ei ndi, Nasaret nga Jisas mbi ei, rop mana nduimp pilip uⱡ elpa elpa mat it ku. 10 Ei kᵾn, na Jerusalem kona ila moⱡᵾp it. Wu pris kuimbal kᵾⱡ kᵾn ronduⱡ tᵾp moⱡᵾp, Got nga wamp mbᵾ, tᵾp kan manga ila mundᵾr. Wote, rok kondrung wamp mbᵾ na ndi, kapⱡa nilmba rok kondrung ku. 11 Ui ou ndupa, na ndi, wamp mat, atinga manga kel mbila wamp mbᵾ, etᵾp kit mondᵾp enim nga mondpa pili wak reing nᵾmp it. Na mondpa pili wamp mbᵾ kᵾn, popᵾⱡ minal mondᵾp ronduⱡ mondᵾp, wote kona peng ruⱡ etpa titim kona mat ila, mbo it ku.

Pol Elim Nuim Ei Ndi, Wi Rurum Ei Nga Nimba, Mot Ndurum

12 “Uⱡ mbᵾ nga, ronduⱡ tᵾp itimp pilip, wu pris kuimbal mbᵾ kᵾn, ik nᵾmp tep Damaskas kona ila mbi pilip pur. 13 Wu Nuim ye! Ou rᵾnggilmᵾ, na nombuⱡa mam ila mbᵾ kᵾndᵾr ei kᵾn, wi muⱡ ila rᵾⱡang ronduⱡ ti, ant nga rᵾⱡang ei mel mon. Rᵾⱡang elpa ti mel ropa omba, na kᵾn, wu rᵾp rop purmun kᵾⱡ kᵾn, kun urum. Wote, rᵾⱡang ei ndi, kona ila omba, tᵾn tᵾpa kum rurum. 14 Tᵾn pora, mᵾi ila ropa munduⱡnga, mbun pitmin. Wote, na pep pilimba, Ipru ik ila ik mong ti omba, na kundpa nimba mel, ‘Sol! Sol! Nambuⱡ emel, etᵾk kit mondᵾn ei? Nim ndi, rong morum ila kᵾmp pildᵾt rokᵾn, ninim mindil non ei ka!’ nitim. 15 Wote na ndi, nᵾmp mel, ‘Nuim ei! Nim nam nᵾmp wᵾldᵾt?’ nitim. Nuim ei ndi, na kundpa, nimba mel, ‘Na Jisas, nim ndi, etkᵾn kit mondᵾn ei ka! 16 Nim oⱡa molkᵾn, kᵾmp raⱡ kambilkᵾn, oⱡanggilikᵾn moⱡa! Nim na nga kindmant wu muⱡᵾn nᵾmp kᵾn, nim kᵾn ont. Akup kan uⱡ mbᵾ kᵾn, wote ora nduimp uⱡ mbᵾ pᵾi, wamp mbᵾ kundkᵾn nᵾn nᵾmp, nim rukᵾr tᵾnt. 17 Isrel wamp mbᵾ kᵾn, wamp rᵾⱡaip elpa moⱡᵾng ila, tᵾp mundimp ei nga mbun mat pem ndam, nim etᵾp timp nitim. 18 Nim ndi, wamp mbᵾ nga mong orunga, etᵾk makᵾndᵾkᵾn etana, rumbᵾⱡ ila moⱡung wamp mbᵾ, numan ropᵾl rok rᵾⱡang ila ekit weing. Wote, Seitan nga ronduⱡ ei, tᵾk mbuⱡ ngᵾk, Got kᵾn rukᵾr pangina, wote i etᵾk, na kᵾn mondᵾk piling ndam, en enim nga uⱡ kit mbᵾ, wak ramba. Wote ok, Got nga mondpa pili wamp mbᵾ kᵾn, wamp wingti tᵾpa mondrum kona ila, ruk muⱡeing.’” nitim.

Pol Elim Kongun Etᵾm Ei Mel Nitim

19 Pol ndi, nimba mel, “Ei kᵾn, King Agripa, ei nga nᵾmp kᵾn, na muⱡ kona ur kump it kᵾⱡ nga ik ti, tᵾp roi ndi, ni nᵾndᵾr mon! 20 Wote, kuimp tep Damaskas na, Jerusalem kona raⱡ ila pur. Wote, Jura wamp na, wamp rᵾⱡaip elpa na, mᵾi kᵾmp tetᵾm mbila pora mbᵾ, ik mbo endᵾp, uⱡ kit mbᵾ wak rok, Got kᵾn rukᵾr puk, uⱡ kai mbᵾ, pep ring nit. 21 Ni kᵾn, na uⱡ kᵾⱡ etᵾp mbo, manga wingti ou ila moⱡmba kᵾn, Jura wu kᵾⱡ ndi, na imp molk, wote rok kunding pilik etᵾng. 22 Wote ni kᵾn, Got ndi, na tᵾpa rap ndupa mepa oⱡnga, akup ya ila moⱡᵾp, enim wamp ou kel mbᵾ kᵾn pora, na kandᵾp, pilip it uⱡ mbᵾ, enim kᵾndᵾp nᵾnt. Na nᵾnt ik mbᵾ, unt ik painui wu mbᵾ kᵾn, Moses na mbᵾ ndi, etmba nᵾk ei mel nᵾtᵾng. 23 Nᵾk kᵾn, Kraist ei ndi, mindil nomba, wote wamp kui nga kona ila, kuimp tepa koⱡpa, ⱡoporpa oⱡa moⱡpa, etpa ti uⱡ ei nga ik rᵾⱡang pi ei, Jura wamp na, wamp rᵾⱡaip elpa na mbᵾ kᵾn, nimba ngumba,” nᵾtᵾng.

24 Wote Pol ndi, elim nga orunga ik ei mel nilinga kᵾn, wu Pestas ndi, ronduⱡ ke nimba, Pol kundpa, nimba mel, “Pol, nim wu kupᵾr wᵾlᵾ! Nim nga ik na, wote namba uⱡ pilik tᵾtᵾn mbᵾ ndi, nim ropa kupᵾr mundnum!” nitim. 25 Pol ndi, ik punt ropa, nimba mel, “Wu nuim ei, na wu kupᵾr ti mon! Na nga numan mbo kun ei, pilip ik kupa ei, kundᵾp nᵾnt,” nitim. 26 Pol ndi, nimba mel, “King Agripa, na nim kᵾn mundmong iti natᵾp. Ik nimp ei, nambuⱡ emel, na nᵾnt uⱡ mbᵾ nim ndi, pilkᵾn kandkᵾn itin ei nga, na pilip kᵾn nᵾnt. Na kupa pilip nᵾnt ei, na nᵾnt ik nimbᵾ, nim pilkᵾn moⱡina nᵾnt, na uⱡ mo ropa petᵾm ti nga, na ni nanᵾnt mon!

27 King Agripa, nim painui wu mbᵾ, mondᵾk pᵾtᵾn muna mon nda? Na nga numan ei ndi, nim mondᵾk pᵾtᵾn nimp pᵾnt!” nitim. 28 Wote Agripa ndi, Pol ni kundpa, nimba mel, “Akup ya ant mong onunga ila, nim ndi, na etkᵾn mondpa pili wamp mundimp nᵾkᵾn pᵾn ei?” nitim. 29 Pol ndi, ik punt ropa, nimba mel, “Ant mong punda kep, ruⱡ etpa kep, na Got kᵾn atinga ront ei nim kᵾn, wote wamp mbᵾ pora, ik kum tenmin mbᵾ pora ok, na mel mondpa pili wamp ralk muⱡeing nᵾmp nᵾnt. Ei nga wote, na kan ngorung ei nga nᵾmp ni nanᵾnt!” nitim.

30 Wote, wu king ei kᵾn, Pestas wote, amp Bernis kᵾn, wamp kᵾⱡ pora oⱡa molk, wote ok pena puk, ik nᵾk int yant etᵾk, nᵾk mel, “Wu ei rop kundmin muna, kan ngumbun itmin ei nga uⱡ ⱡawa tenda ti, kandᵾp ti natᵾnmᵾn ei ka!” nᵾtᵾng. 32 Wote Agripa ndi, Pestas kundpa, nimba mel “Rom wu nuim mumuk Sisa ei, kᵾnimp ni nandilinga ndam, kor wak roⱡmina,” nitim.

Copyright information for `MED