Acts 27

Pol Nu Sip Tᵾpa, Rom Purum

Ik ei nᵾk pendᵾk kᵾn, tᵾn nu sip tᵾpᵾn, Itali kona ou ila peing, nᵾtᵾng. Wote ei kᵾn, Pol kᵾn kan wu mat kᵾn, tᵾk kup endᵾk puk, Rom kona ila nga el wu 100 nokundrum wu Juliyas ni ngurung. Wu Juliyas nga el wu rᵾⱡaip kᵾⱡ, wu nuim mumuk Sisa nga wu kᵾⱡ. Tᵾn Atramitiyum kona ei nga nu sip kat, Eisiya kona mbila, mbi nimba omba titim nu kᵾⱡ ila, omba oⱡa purmun. Ei kᵾn, Tesalonaika kona ei nga, Masaroniya wu Aristakus tᵾn kᵾn oⱡnga, kunda purmun. Utᵾma orunga, Sairon kona ila mbun, ruk purmun. Ei kᵾn, el wu kuimbal Juliyas ndi, Pol urum ei nga numan kai pendpa, Pol elim nga wamp mat kandpa tᵾpa, rᵾng na mat ngeing nimba, pangga nilinga purum. Wote, Sairon kona ei, wak ropᵾn, Saipras kona ei nga, mbuldung orunga purmun. Ei nambuⱡ emel, kona kᵾpkᵾ mam ti rurum ei ndi, nu sip kᵾⱡ ropa, yant ndurum. Wote Silisiya kᵾn, Pampiliya kona ou raⱡ ila, ruk num kuta morum ei, puⱡa ropᵾn mbᵾ, Lisiya kona ou ei nga, Maira kona peng ila ruk purmun. Kona ila ruk puⱡmina, el wu kuimbal murum ei ndi, Aliksendriya kona ei nga nu sip kat, Itali kona ou ei mba, pilpa titim ni kᵾⱡ, kandpa tᵾpa kᵾn, tᵾn tᵾpa, nu sip nila oⱡa ndurum. Wote, kona peng ei, wak ropᵾn, num kuta ila raka raka nimbun puⱡmina, rumbᵾⱡ ralt omba purum. Ei wote, Snidus ni, kona ila omp ruk ui nᵾwᵾrmᵾn. Mbin purmun nombuⱡa ei, kona kᵾpkᵾ ei ndi, imp moⱡnga, Salmone kona ei, tᵾp yant ndupᵾn, Krit kona ila purmun. Ni kᵾn, tᵾn mindil tᵾpᵾn, num ᵾldᵾ orunga mint mbun, kona ti mbi tek, ‘Muⱡ Ti Kona Kai,’ nᵾtᵾng kona ila ruk urmᵾn. Kona ei, Laseiya kona peng ila nondpa itim.

Num kuta ni ndi, ropa kara puⱡnga kona ei, wak rop mbin mel, iti natilinga moⱡmina, rumbᵾⱡ mat ou ndupa, omba purum. Wote, Jura wamp nga rᵾng mi rormᵾn ui ni, omba purum ku. Ei kᵾn, Pol ndi, wu mbᵾ kundpa, nimba mel, “Kang wu kᵾⱡ ye! Na kant ei, tᵾn akup ei kᵾn mbun ndam, tᵾn mbun kandᵾp timin. Ei kᵾn, nu sip kᵾⱡ kep, rukᵾr orunga mel wal tetᵾm mbᵾ kep, wote tᵾn wamp mbᵾ, pᵾi kit muⱡᵾmin,” nitim. 11 Wote, el wu kuimbal murum ni ndi, nu sip kᵾⱡ nga tipam ei kᵾn, nu sip kᵾⱡ kongun etᵾm wu ei nga ik ei, kum tepa, Pol nga ik ei, kum ti nᵾtᵾtᵾm. 12 Ei nambuⱡ emel, nu sip kᵾⱡ titim kona ei, kona kᵾpkᵾ mam omba ui ei kᵾn, ropa kit mondᵾmba ei nga. I elinga kᵾn, wu puⱡi ik nᵾk pendᵾk kona ei, wak rop pamin nᵾtᵾng. Mbun Piniks kona ila moⱡpᵾn, kᵾpkᵾ mam orum ui ei, tᵾp mundmin nᵾtᵾng. Piniks kona ei, Krit kona ou mᵾi kᵾmp ei nga nu sip, puk tetmin kona ila kapⱡa moⱡpᵾn, kᵾpkᵾ ui kit ei, tᵾp mundmin nᵾk pᵾtᵾng.

Kona Kᵾpkᵾ Mam Ti Ropa, Num Kuta Ei Kit Murum

13 Kᵾpkᵾ kel kai ti met, wunt rurum ila, wu ni kᵾⱡ, en enim nga nᵾtᵾng ik mbᵾ mel pemba nᵾk pilik, nu sip kan ngurung mel kᵾⱡ oⱡa tᵾk, Krit kona ei nga num kuta ᵾldᵾ orunga purung. 14 Wote kokila puⱡmina, kᵾpkᵾ ronduⱡ ti mbi tek, ‘Wi Alt,’ nᵾtmin kᵾpkᵾ ei, Krit mᵾi kᵾmp ila ropa mana urum. 15 Ei kᵾn, kᵾpkᵾ ei ndi, nu sip kᵾⱡ ropa, noi ya itim ila ronduⱡ mundpa, kᵾpkᵾ urum ila mba mel, kapⱡa iti nᵾtᵾtᵾm. Wote ni kᵾn, mbin mel, iti nᵾtᵾtᵾm ila, kᵾpkᵾ ei ndi, ropa mepa pangga nimbun, nu sip kᵾⱡ, wak rurum ila kᵾpkᵾ ndi, mepa purum. 16 Tᵾn mᵾi kel kot, mbi tek Kaura nᵾtᵾng. Ei nga, mbuldung orunga mbun, nu sip mep urmᵾn kᵾⱡ, ropa kit mondᵾmba elinga, kan kᵾⱡpᵾn, gi ndup pinditmᵾn. 17 Wote, nu sip kᵾⱡ ila, kᵾⱡ oⱡa tᵾk, kan rok pendᵾk kᵾn, wote nu sip kᵾⱡ, kᵾpkᵾ ndi, ropa mepa mba, Lipiya kona ku morum mbila mba nᵾk, mundmong etᵾk, nu sip kᵾⱡ nga muⱡ manga rakurmin mbᵾ, potᵾk mana tᵾk, ruk ila monduⱡᵾngina, kᵾpkᵾ elim ndi, nu sip kᵾⱡ mepa purum. 18 Kona kᵾpkᵾ kit ni pilpa, kelpa rurum ila, utᵾma orunga, nu sip ila mel wal titim nimbᵾ, rok tᵾk nu ila mana ndurung. Wote utᵾma orunga, nu sip kᵾⱡ nga tepa kongun etᵾm mel mbᵾ, en enim nga ki raⱡ ndi, ambulk tᵾk rok, nu ila mana ndurung. 20 Ni kᵾn, rumbᵾⱡ ou ndupa omba puⱡnga, kona ant, mipil rangᵾnt mbᵾ, kᵾni nᵾkᵾndᵾrmᵾn. Wote, kona kᵾpkᵾ ei, pilpa kelpa romba ei nga mint rurum ila, kona mat ila mbin nᵾmp pitmin. Ei wote, tᵾn nga numan orunga pilpᵾn, tᵾn akup kont pi nᵾpᵾmᵾn, nᵾmp pitmin. 21 Wu mbᵾ, rumbᵾⱡ ui ou ndupa, rᵾng na ti, nui nandrᵾng ei nga, Pol ndi anggilpa, wu kᵾⱡ kundpa, nimba mel, “Kang wu mbᵾ, na unt nit ik ni kum tek, Krit kona ei, wak rui narᵾⱡᵾmina ndam, akup ya mel kit moⱡpa mbun, enim uⱡ mbᵾ kandᵾp tᵾp enmin uⱡ mbᵾ, iti natᵾlmina. 22 Wote, akup na ndi, enim kundᵾp nᵾnt. Enim numan wang nduk, ronduⱡ muⱡᵾi! Nambuⱡ emel, tᵾn wu kᵾⱡ ti kᵾⱡi nᵾⱡmin. Nu sip kᵾⱡ mint, etpa kit moⱡmba. 23 Ukᵾ rumbuldi, na nga mbi paka rondᵾr Wu Got ei nga anggelo ti, na munt ila omba kundpa, nimba mel, ‘Pol, mundmong iti nᵾti! Nim nuim mumuk Sisa nga kuimp keta ila ᵾnggᵾlᵾn. Wote Got, elim nga uⱡ kai mbᵾ etᵾn ni mel ku, nim kᵾn rᵾp rok, nu sip ila ong wu kᵾⱡ, pora nim kᵾn, nomba rukᵾr ndonum,’ nitim. 25 Ei nga, enim wu kᵾⱡ, mundmong iti natᵾk muⱡᵾi! Ei nambuⱡ emel, na Got kᵾn mondᵾp pᵾnt ei, na kᵾn itimp ninim uⱡ mbᵾ kupa etmba. 26 Ei nga, tᵾn mᵾi kel tem ti nga nu ᵾldᵾ tila, ropa oⱡa ndumba mint,” nitim.

27 Ei kᵾn, rumbᵾⱡ 14 elinga, tᵾn kᵾpkᵾ mam ei ndi, ropa mepa mba, num Eitriyatik ila purmun. Wote, ou rumbuldi mel, nu sip kongun wu kᵾⱡ ndi, mᵾi tila nondpa onmᵾn nᵾk pᵾtᵾng. 28 Wote, ila nga puk kᵾn, kan ti, nu ila rok mana nduk, wote oⱡa tᵾk tou rok kandrung ei, nu ei, 40 mita mel mandpa titim. Wote, ui onunga kot molk ok, uⱡ tenda ei ku etᵾk, tou rorung ei, 30 mita mel mandpa titim. 29 Wote, wu kᵾⱡ ndi, nu sip kᵾⱡ mba, nu ku mbila romba nᵾk mundmong etᵾk, sip imp morum angka tᵾmbᵾkak, sip tip orunga rok mana nduk, kona tᵾkrᵾpa rᵾnangga ka nᵾk, atinga rorung. 30 Ei kᵾn, sip kongun wu kᵾⱡ, nung nᵾk, ping pilik kep nok, nu kanu kat kan pilinga nduk, mana tᵾk molk, sip imp morum angka kat, sip kuimp orunga mana nduimin enmᵾn nᵾtᵾng. 31 Wote Pol ndi, uⱡ etᵾng ni tᵾpa mendpa, el wu kuimbal ei kᵾn, elim nga el wu rᵾⱡaip mbᵾ kᵾn kundpa, nimba mel, “Sip kongun wu kᵾⱡ, tᵾn wak rok pung ndam, tᵾn kont pi nᵾpᵾmᵾn ei ka!” nitim. 32 El wu ni kᵾⱡ ndi, nu kanu kan kulk pendᵾtᵾng ei nga kan ei, rok puⱡa roⱡina, nu kanu kᵾⱡ mepa purum.

33 Wote, kona rangimba elinga, Pol ndi, wamp nimbᵾ, ropa rut ndupa nimba mel, “Rᵾng mat nᵾi!” nitim. Wote wamp nimbᵾ, kundpa nimba mel, “Tᵾn nga kitim mbᵾ kit elinga, rᵾng nandᵾp oⱡmina, rumbᵾⱡ 14 omba pum. 34 Ei kᵾn, na ndi, akup enim rᵾng mat, nᵾi nᵾmp ronduⱡ mundᵾp nᵾnt. Enim rᵾng ti, etᵾk nong ndam, kont muⱡing. Enim wu kᵾⱡ nga peng ndi tenda kot kep, mana pi napᵾmba mon ku,” nitim. 35 Pol ik ei mel nimba pora ndupa kᵾn, wu morung nimbᵾ nga kuip keta ila bret mat tᵾpa, Got kᵾn angge nimba, pok ropa, wote nurum. 36 Wote, wu wei nimbᵾ, uⱡ ei kandᵾk ronduⱡ puⱡnga, rᵾng mat tᵾk norung ku. 37 Tᵾn wamp tᵾpa rak ndupa, 276 mel nu sip ila murmᵾn. 38 Wote, wu nimbᵾ pora, rᵾng nok kapⱡa endilingina, wit mana titim nimbᵾ rok, nu ila mana ndurung. I etᵾng, ei nambuⱡ emel, sip kᵾⱡ piya nangga nᵾk etᵾng.

Nu Sip Kᵾⱡ Etpa Kit Murum

39 Wote, kona ranggᵾpa mana nduⱡnga, sip ila kongun etᵾng wu kᵾⱡ ndi, mᵾi titim ei kandrung. Ei wote, mᵾi ei nga mbi ei, pilik kun iti natᵾtᵾng. Wote, nu moⱡpa mba, mᵾi nit ila rukᵾr mba etᵾm, kona ku ok, kona kai ei kandᵾk kᵾn, nu sip kᵾⱡ ila kapⱡa mek, nu ᵾldᵾ ila mbin nᵾk pᵾtᵾng. 40 I nᵾk kᵾn, sip angka kan nimbᵾ, rok puⱡa roⱡina, nu ila mana purum. Wote, sip kongun etᵾm mel kan kurung nimbᵾ pilinga nduk, sip muⱡ pendᵾtmᵾn ni kᵾⱡ, potᵾk kuimp orunga oⱡa nduⱡina, kona kᵾpkᵾ ei ndi, nu sip kᵾⱡ ropa mepa, nu ᵾldᵾ ila mba purum. 41 I etᵾk purung ni kᵾn, sip kuimp orunga mba, ku nengina murum kat ila roⱡnga, gi nimba telinga, sip nga tᵾp orunga, num kuta ei ndi, ropa pungaⱡ nduⱡnga, sip kᵾⱡ ropa, mbuldpa elpa elpa purum. 42 El wu kᵾⱡ ndi, kan ngurung wu kᵾⱡ, nu tek nung nᵾk pi nᵾk, wu pora rop kundamin nᵾk ol tetᵾng. 43 El wu kuimbal murum ni ndi, Pol tᵾp rᵾpᵾndimp nimba pitim ei ndi, elim nga el wu kᵾⱡ kundpa, uⱡ ei mel iti nᵾtᵾi mon nitim. “Nu tek kᵾni wu mbᵾ, unt nu ila puka rok, mana puk nu tek puk, nu ᵾldᵾ ila muⱡᵾi!” nitim. Wote wu mat, sip ᵾmbᵾldrᵾm nde koⱡmung na mbᵾ ambulk, nu tek purung. Uⱡ ei mel, etpᵾn kᵾn, tᵾn urmᵾn wu kᵾⱡ pora, nu tepᵾn mbun nu, ᵾldᵾ ila ekit purmun.

Copyright information for `MED