Acts 3

Pita Ndi, Elkᵾna Rumbil Wu Ti Etpa Titim

Ui ti kᵾn, Pita kᵾn Jon raⱡ, manga wingti ila, ant 3 kilok atinga rormᵾn ui ei elinga, purᵾnggil. Manga wingti keta puⱡ puⱡ ila nondpa, wu ti mam ndi, mitim ei kᵾn, kᵾmp elkᵾna rumbrᵾm, wu ni murum. Manga wingti ei nga keta puⱡ ti, mbi tek, ‘Mon Pi,’ nᵾtmᵾn. Rᵾk rᵾk mek puk, kai wei keta puⱡ puⱡ ila monduⱡina, wamp manga wingti ila ok, murᵾk purmin mbᵾ kᵾn, ku moni mawa etᵾm. Wu ni, Pita Jon raⱡ okᵾⱡ, mukᵾr pinggil orᵾnggil. Ni kᵾn kandpa, ku moni na mel mat, ngᵾnggil nimba mawa itim. Pita, Jon raⱡ ndi, elkᵾna rᵾmbrᵾm wu ni, kandkᵾⱡ kᵾn, Pita ndi, nimba mel, “Tᵾl kᵾni!” nitim. Wote, wu ni raⱡ ndi, mel mat nguinggil, nimba pilpa kundrum mel. Pita ndi, wu ni kundpa, nimba mel, “Na ku ti mon. Wote, na mel ti, nim nguimp ent ei, Nasaret Wu Jisas Kraist nga mbi ila, nim oⱡa anggilkᵾn pi!” nitim. Wote Pita ndi, wu ni nga ki mbo orunga ambuⱡpa tᵾpa, oⱡa munduⱡnga, wu ni nga kᵾmp elkᵾna ni raⱡ, omba kᵾn puⱡnga, wu ni, puka ropa, oⱡa anggilpa, nombuⱡa andpa kᵾn, wu raⱡ kᵾn rup rok, manga wingti ila purung. Ei kᵾn, wu ni puka ropa, oⱡa mana etpa, numan kai pilpa, Got nga mbi paka rundrum. Wamp minal ndi, wu ni puka ropa, oⱡa mana elinga, kandᵾk moⱡnga kᵾn, numan kai pilpa, Got nga mbi paka rundrum. 10 Wote, wamp nimbᵾ ndi, wu ei, manga wingti ei nga keta puⱡ puⱡ, ‘Mon Pi,’ ila mel mbᵾ, mawa etpa murum wu ei, kandᵾk mbi nduk, uⱡ itim ei nga kandᵾk, min ngᵾn mundrung.

Pita Ndi, Manga Wingti Ou Ila Ik Nitim

11 Wu ni ndi, manga wingti ei nga keta puⱡ puⱡ ti, mbi tek, ‘Solomon nga kᵾpkᵾ titim nᵾtmin kona ila,’ Pita kᵾn, Jon raⱡ nga ki raⱡ ambuⱡpa moⱡnga, wamp mbᵾ ndi kandᵾk, min ngᵾn mundᵾk, tᵾkrᵾk orung. 12 Pita ndi, ni uⱡ kandpa, wamp nimbᵾ kundpa, nimba mel, “Enim Is-rael wamp mbᵾ ye! Nambuⱡ emel, uⱡ ei nga numan ou nduk pilik, tᵾl kᵾn mong ronduⱡ kandᵾk mormin? Tᵾl nga ronduⱡ tila, kang wu ei etᵾp, ti natᵾmbᵾⱡ mon! Tᵾl nambuⱡ emel, mong ronduⱡ kandᵾk mormin? 13 Got nga wu Aparam, Aisak, Jekop kᵾn, tᵾn nga anda kouwᵾmᵾn kᵾⱡ nga Got. Ei ndi, elim nga kongun kindmant wu Jisas ni, mbi ou ti, uⱡ ei ngurum. Wu ei ya, enim ndi, el rui wu kᵾⱡ nga ki ila tᵾndᵾtᵾng. Wu Pailot ei ndi, wak rop mundimp nitim ni. Wote enim ndi, tᵾk mbuⱡ ngorung. 14 Wote Wu Wingti Kun Kai ei, tᵾk mbuⱡ ngᵾk, enim ndi, wu Pailot ni kundᵾk, wu ti wamp ropa kundrum wu ni, wak rok mundi nᵾtᵾng. 15 Wamp kont mbun muⱡmin kona ei, tᵾpa orunga ndurum wu kai ei Jisas, enim ndi rok kondrung. Wote Got ndi, wu ei, ⱡoporpa tᵾpa, oⱡa kont mundrum ei nga, tᵾl ndi, nᵾmp para ndunmbᵾⱡ. 16 Tᵾl, Jisas nga mbi ronduⱡ ila mondpa pili uⱡ, Jisas nga mbi ila, nᵾtmbᵾⱡ. Wu ei, enim kandᵾrmin wu ni, etᵾp tᵾnmbᵾⱡ, Jisas elim ndi, tᵾl nga mondpa pili ei etpa, ronduⱡ munduⱡnga, mondpa pili uⱡ ei ndi, ronduⱡ nguⱡnga, enim kanmin.

17 Ei kᵾn, akup angmᵾn! Na pᵾnt ei, enim pilik kun iti natᵾk, etᵾng uⱡ mbᵾ ndi, Jisas rok rondrung. Ei mel ku, enim nga rᵾp wu mbᵾ ndi, uⱡ ei mel ku etᵾng. 18 Unt Got ndi, elim nga kangᵾm ei kᵾn, etmba uⱡ mbᵾ numan ila, pilpa pora ndupa, painui wu kᵾⱡ, ronduⱡ nguⱡnga, wu Kraist ei, mindil minal nomba nᵾtᵾng ei, kupa enim. 19 Ei kᵾn akup, enim nga uⱡ kit mbᵾ, wak rok, numan ropᵾl rangina, Got ndi, enim nga uⱡ kit etᵾng mbᵾ, wak rangga! Wote, uⱡ ei mel eng ndam, Got ndi, enim ronduⱡ kont mbᵾ rᵾk rᵾk ngumba. Ei, enim nga unt, Got ndi, mbi ropa ngurum wu ei nga mbi Jisas. 21 Akup, elim muⱡ kona muⱡangga nitim ei mel morum. Wote Got ndi, to ropa pinditim ui ila, mel kont nga mat ngumba. Uⱡ ei, elim ndi, unt painui wu wingti mbᵾ, ronduⱡ nguⱡnga, pai nok nᵾtᵾng ei mel ngumba. 22 Ei nambuⱡ emel, Moses ndi, nimba mel,

‘Got enim nga Nuim ei ndi, enim painui wu ti ngumba ei, elim enim ngurum ei mel ku. Painui wu ei, enim nga rᵾⱡaip tenda ila ku, ti kandpa tᵾpa ngumba. Enim wamp mbᵾ pora, wu ei nga ik nimbᵾ, kum tek pilᵾi!
23 Wote, wamp nam ti, painui wu ei nga ik kum ti natᵾm wamp ei, Got ndi, wamp ei ropa kondᵾmba. Wote wamp mbᵾ, Israel wamp rᵾⱡaip ila, muⱡi nᵾmbᵾⱡing ku,’ nitim.
24 Wote, Samuwel kᵾn, painui wu mat unt nga mbᵾ ndi, pai nok nᵾtᵾng. Akil tek orung, painui wu mbᵾ ndi, akup nga etmba uⱡ mbᵾ mel nᵾtᵾng. 25 Enim painui wu kᵾⱡ nga kangambuⱡa mbᵾ mormin. Enim nga anda kouwᵾmin wu nimbᵾ kᵾn, Got ndi, tᵾp tenda itimp nimba, Aparam ni kundpa, nimba mel,

‘Nim nga mekᵾn tin mbᵾ ndi, kona mbila wamp mbᵾ, memp kai mbᵾ ngangga!’ nitim.
26 Wote Got ndi, elim nga kindmant wu ni, ⱡoporpa tᵾpa, oⱡa mondpa, kuimp tepa enim kᵾn omba. Wote, enim nga uⱡ kit mbᵾ, tᵾk mbᵾⱡ ngeing nimba itim. Enim tenda tenda nimba, tᵾpa yant ndupa, memp pindangga kᵾn, uⱡ kit mbᵾ, wak reing nimba itim,” nitim.

Copyright information for `MED