Acts 4

Pita Kᵾn Jon Raⱡ, Tᵾk Kan Ngorung

Pita kᵾn Jon raⱡ wamp mbᵾ, ik mbo endᵾk moⱡᵾnggila, wu pris mat kᵾn, manga wingti ou ila rᵾp wu kuimbal mbᵾ kᵾn, wote Sarusi wu mat kunda orung. Wu orung nimbᵾ, popᵾⱡ kurung. Ei nambuⱡ emel, wu raⱡ ndi, wamp mbᵾ ik mbo endᵾkᵾⱡ, Jisas ⱡoporpa oⱡa murum nᵾtᵾnggil. Wote, tᵾn wamp kui mbᵾ, aldpa ⱡoporpᵾn, oⱡa muⱡmin, nᵾtᵾnggil. Ni nga, en enim pilik kit pᵾtᵾng. Wote ant ei, mana puⱡnga, wu ni raⱡ, imp molk, tᵾk kan manga ila pendᵾtᵾng. Wote, mᵾkᵾlmᵾ orunga nᵾmin nᵾtᵾng. Wote, wamp minal ndi, wu raⱡ nga ik nᵾtᵾnggil nimbᵾ, kupa nᵾk mondᵾk pᵾtᵾng. I etᵾng uⱡ ei ndi, wu 5000 mel itim.

Ni kᵾn, utᵾma orunga, Jura wu nuim mbᵾ kᵾn, manga wingti rᵾp wu mat kᵾn, mi ik mbo wu nimbᵾ kᵾn pᵾi ok, Jerusalem kona ila mou rorung. Kona ila ku, pris kuimbal murum wu Anas kᵾn, Kaiyapas kᵾn, wote wu Jon, Aleksanda kᵾn, wu pris kuimbal ei nga wamp mbo mbᵾ ok, kandᵾk tᵾtᵾng. Wu rᵾⱡaip nimbᵾ ndi, kitip kᵾni wu ni raⱡ, tᵾk mek ok, oⱡa angᵾndᵾk, waldᵾk nᵾk mel, “Enmbil nambuⱡ ti enggil? Wote, namba ronduⱡ ti tek mormbil, muna nam nga mbi ila tek ninimbil?” nᵾtᵾng. Ni kᵾn, Muⱡnga Wingti ei ndi, Pita kᵾn peka ropa moⱡnga, ik ni punt ropa, nimba mel, “Enim wamp nga wu nuim mbᵾ kᵾn, manga wingti rup wu mbᵾ kᵾn, tᵾl ndi, elkᵾna rumbᵾⱡ wu ei, tᵾp rᵾpᵾndᵾmbᵾⱡ ei nga wu ei, etpa kai em mel nant, nᵾk waldᵾnmᵾn? 10 Ei kᵾn, enim wamp pora ila mormin kᵾⱡ kep, wote Isrel wamp pora, wu anggᵾtᵾm ei, Nasaret kona wu Jisas Kraist nga mbi ronduⱡ ila, wu ei etpa kai mundum. Ei nga, enim kundᵾp nimp ei nga, pilip kai pᵾnt. Jisas ni wu ei, enim ndi, nde peta ila roⱡᵾngina, wote Got ndi, wamp kui nga kona ila, ⱡoporpa tᵾpa, kont mundrum. 11 Buk Wingti unt nga ila, nimba mel,

‘Ku mam ti, enim manga rakrᵾmᵾn wu mbᵾ ndi, ku kit nᵾk mundᵾk ketᵾng ni, aldpa omba ku wei mbᵾ nga rungina nde mel petᵾm,’ nitim.
12 Ya mul kump tetᵾm kona mbila nga mbi elpa ti ndi, tᵾn etpa tᵾmba mel mon. Wamp etpa ti uⱡ ei nga Puⱡ Wu ei, Jisas morum,” nitim.

13 Pita kᵾn Jon raⱡ, skul ti kep mon. Wote mbo wu mendpᵾⱡ raⱡ, ik ama ronduⱡ mbᵾ nᵾtᵾnggil ila wu nimbᵾ, pilik min ngᵾn mondᵾk, wu raⱡ Jisas kᵾn, unt rᵾp rok andrᵾng nᵾk pᵾtᵾng. 14 Ei kᵾn, kump elkᵾna kai itim wu ni, Pita kᵾn Jon raⱡ morung. Ei nga nila, kunda anggilik morunggil ik ti, nᵾk int nduk pinding ik ti, pilik rundrung. 15 Wote, wu morung nimba ndi, Pita kᵾn Jon raⱡ ok, pena pᵾl nᵾk, en enim mou rok molk, ik mat nᵾtᵾng. 16 Nᵾk mel, “Wu raⱡ kᵾn, etᵾp itmin mel nant? Ya Jerusalem kona ila, wu raⱡ ndi, elkᵾna rumbuⱡ wu ei, etᵾk kai monduⱡunggila, wamp nimbᵾ kandᵾk pora ndung. Ei nga tᵾn ndi, uⱡ ei, iti natᵾnggil nimbun mel, kapⱡa mon. 17 Wote, wamp mbᵾ kᵾn, uⱡ ei nᵾk mek int int pi nᵾpeing nᵾmp pilmin ndam, wu raⱡ kᵾn ronduⱡ mondpᵾn, Jisas nga mbi ila wamp ti kᵾn, aldpa uⱡ ti iti nᵾtᵾnggil nᵾmin,” nᵾtᵾng. 18 Ei mel nᵾk pendᵾk, wu raⱡ aldpa wi rok yant tᵾk, nᵾk mel, “Wote, kᵾni nakᵾndkᵾⱡ aldpa, Jisas nga mbi ila uⱡ ti etkᵾⱡ, ik mbo endkᵾⱡ, iti nᵾtᵾl mon!” nᵾtᵾng.

19 Wote, Pita kᵾn Jon raⱡ ndi, ik punt rokᵾⱡ, nᵾkᵾⱡ mel, “En enim kᵾmp tᵾk pilᵾi! Enim nga ik ei, kum tek pep ruing, muna Got nga kuimp keta ila Got elim pep ruing? 20 Ei kᵾn, tᵾl nga keta ei, rou ruimbil mel, kapⱡa mon! Tᵾl uⱡ kandpᵾⱡ pilpᵾⱡ, itimbᵾⱡ mbᵾ mel, nimbuⱡ mot nduimbil mint,” nᵾtᵾnggil. 21 Wote, wu nuim morung nimbᵾ ndi, ama pilik kelik, ik ronduⱡ mondᵾk, wu raⱡ kondᵾk, Jisas nga mbi ila uⱡ mat iti nᵾtᵾl nᵾk, wote wu ni raⱡ, wak rok mundrung. Wu raⱡ, kan nguing ei nga uⱡ puⱡ ti kandᵾk ti natᵾtᵾng. Ei nambuⱡ emel, wamp mbᵾ ndi, wu ei kᵾn, uⱡ itim ni kandᵾk, Got nga mbi paka rondrung. 22 Elkᵾna rumbrum wu, etkᵾⱡ tᵾtᵾnggil wu ni, pana 40 omba purum.

Mondpa Pili Wamp Ronduⱡ Ting Pilik Atinga Rorung

23 Wote, Pita kᵾn Jon raⱡ, nondpa wak rok mondrung ni kᵾn, yant okᵾⱡ, en enmbil nga wamp nimbᵾ, wu pris kuimbal mbᵾ kᵾn, wote manga wingti wu ronduⱡ mbᵾ ndi, niting ik nimbᵾ kondᵾk nᵾtᵾnggil. 24 Wote, mondpa pili wamp nimbᵾ, ik ei pᵾtᵾng ei kᵾn, numan ei omba tenda puⱡnga, Got kᵾn atinga rok, nᵾk mel, “Nuim Got! Nim muⱡ mᵾi raⱡ kᵾn, num kuta ei kᵾn, mel mbᵾ mim itᵾn Puⱡ Wu ei! 25 Unt, nim nga Muⱡnga Wingti ei, tᵾn nga anda kouwᵾ Depit, nim nga kongun wu ei nga keta ila omba moⱡpa, nimba mel,

‘Nambuⱡ emel, wamp rᵾⱡaip elpa mbᵾ, popᵾⱡ mondunmin. Nambuⱡ emel, wamp mbᵾ, kanggᵾp kai kandᵾk ronmin? Muⱡ kump mbila, nga wu nuim mumuk mbᵾ kᵾn, wote Nuim kuimbal mat kᵾn, ik kanggᵾp ambulk, Nuim kᵾn, Elim Nga Ngurum Wu Kraist raⱡ rop mana nduimin nᵾk etᵾng,’ nitim.
27 Ni kᵾn, ama kupa, Erot kᵾn, Pontas Pailot kᵾn, wamp rᵾⱡaip elpa ekit orunga mbᵾ kᵾn, wote ya Isrel wamp mbᵾ, kᵾmp kᵾm ya kona peng ou ila, kanggᵾp ambulk, Jisas nim nga kongun Wu Wingti nim ndi etkᵾn, ya mul kona ila Got nga ngurum wu Kraist muⱡangga nitin ni, kanggᵾp ambulk wamp nimbᵾ ndi, Jisas nga ik ni tᵾk pei mundrum. Jisas kᵾn ik pendᵾtᵾng. 28 Wamp mbᵾ, mou rok etᵾng, uⱡ mbᵾ pora, nim nga numan ronduⱡ ila, to rokᵾn pinditim mel ku, kupa tangga nᵾk etᵾng. 29 Nuim ei! Nim akup, wu mbᵾ nga numan kit, wote uⱡ kit enmin mbᵾ pilkᵾn molkᵾn, wote tᵾn nim nga kongun wu mbᵾ, tekᵾn rapᵾndana, nim nga ik ei, ronduⱡ mondpᵾn nimin. 30 Nim nga ki ei, rᵾna ndukᵾn, wamp kui peng em wamp mbᵾ, etkᵾn tana uⱡ rᵾpᵾndi na, kont paka mat itᵾi! Nim nga kindmant wu Wingti Jisas ei nga mbi ila itᵾmin,” nᵾtᵾng.

31 Wote wu kᵾⱡ, atinga rok pora nduⱡina, manga morung ni, rowa rowa nitim. Ei mel etpa, wu nimbᵾ, Muⱡnga Wingti ndi, peka roⱡnga, Got nga ik puⱡ mondᵾk, mundmong iti natᵾk nᵾtᵾng.

Nuim Ei Mondᵾk Pᵾtᵾng Wamp Mbᵾ Numan Tenda Purum

32 Nuim ei, mondᵾk pᵾtᵾng wamp nimbᵾ ndi, numan ei tenda puⱡnga, wamp ti nga mel mbᵾ, el elim nga mendpᵾⱡ nimba pili nᵾpᵾtᵾm. Wote mel mbᵾ, tᵾn nga rak ndupa, mint nᵾk pᵾtᵾng. 33 Jisas nga nombuⱡa rung wu kᵾⱡ, ronduⱡ mam ti tᵾk, Nuim Jisas ni koⱡpa, ⱡoporpa oⱡa murum wu ni nga ik ni, ronduⱡ mundᵾk nᵾtᵾnggil. Got ndi, memp pinditim ila, ik nilingina, wamp ou nduk, wu kᵾⱡ pep rorung. 34 Wamp mbᵾ nga ti, kurpa nui nᵾndrᵾm mon! Ni kᵾn, manga na, mᵾi na, mel ou nduk tek morung. Wamp nimbᵾ ndi, mel nimbᵾ wamp mat kᵾn, ku moni tᵾtᵾng. Wote, ku moni nimbᵾ, ku moni tᵾk mek ok kᵾn, wote nombuⱡa rung wu kᵾⱡ ngurung. Wote, wu kᵾⱡ ndi, tᵾk mok rok, wamp kurpa nurum wamp nimbᵾ, mok rok ngurung.

36 Ei kᵾn, Lipai wu ti, Saipras kona ila metᵾng ei, mbi tek, Josep nᵾtᵾng. Wote, nombuⱡa rung wu kᵾⱡ ndi, Barnapas nᵾtᵾng. (Mbi Barnapas nga puⱡ ei, ‘Nimba ndoimp rundi wu.’) 37 Wu ei ndi, elim nga mᵾi ti, wu mat kᵾn, ku moni tᵾpa ku mbᵾ, mepa omba, nombuⱡa rung wu kᵾⱡ nga ki ila tinditim.

Copyright information for `MED