Acts 7

Stipen Ik Nitim

Wote, wu pris kuimbal ni ndi, Stipen waldpa, nimba mel, “Ik kupa ei?” nitim. Ni kᵾn, Stipen ndi, punt ropa, nimba mel, “Wutamᵾn, angmᵾn! Na nga ik ei, kum tek pilᵾiya! Unt tᵾn nga anda kouwᵾ Aparam ni, Eran kona ila pi nᵾpi kᵾn, Mesopotemiya kona ila pepa moⱡnga, Got wu eng nui ei ndi, Aparam pepa murum kona ila urum. Omba kᵾn, Aparam kundpa, nimba mel, ‘Nim nga mᵾi na, ᵾngᵾnᵾl na mbᵾ, wak rokᵾn, na ndi, nim kona ti, ora nduimp ila pukᵾn, muⱡi!’ nitim. Ei kᵾn, elim nga Kaldiya mᵾi kona ei, wak ropa mba, Eran ni kona ila mba pitim. Wote, Aparam nga tipam ni koⱡnga kᵾn, Got ndi, Aparam tᵾpa mepa omba, akup enim pek mormin kona ila pinditim. Got ndi, mᵾi ei, Aparam elim nga mendpᵾⱡ, nimba to ropa ngui ngᵾnggᵾrᵾm, mon! Aparam elim nga kangambuⱡa ti, mon ku! Wote Got ndi, mᵾi ei elim kᵾn, elim nga mepa tem mbᵾ kᵾn, wote mbᵾ nga mek teng mbᵾ kᵾn, nguimp nimba mᵾi ropa nitim. Got ndi, Aparam ik ei mel kun kundpa nimba mel, ‘Nim nga kangambuⱡa mek tin mbᵾ, muⱡ kᵾmp elpa ronggᵾt ku muⱡing. Wote, kona ila nga wamp mbᵾ ndi, tek kan ngᵾk, kongun kindmant endᵾk iteing nᵾk etᵾk, mindil kit mbᵾ nguing. I etᵾk pangina, pana 400 omba mba. Wote na ndi, nim nga kangambuⱡa mbᵾ, kongun kindmant ngong wamp mbᵾ etᵾp, mindil kundamba kᵾn, kangambuⱡa mbᵾ, kona elpa ei, wak rok, wote yant ok, ya kona ila molk kᵾn, na nga mbi paka runding,’ Got ndi nitim. Wote Got ndi, kᵾng kupti uⱡ ei nga Aparam itangga nimba kᵾn, nimba mᵾi ropa pinditim. Ei nga wote, Eiparam ndi, wu Aisak mitim ei kᵾn, rumbᵾⱡ 8 omba puⱡnga kᵾn, Aisak nga kᵾng ei kup tᵾtᵾm. Wote, wu Aisak ni, Jekop nga kᵾng ei, kup tᵾtᵾm ku. Wote Jekop ndi, wu 12 kᵾⱡ nga kᵾng kᵾⱡ, kup tᵾtᵾm ku.

“Jekop nga kangᵾmᵾl wu mat ndi, en enim nga ᵾngᵾn akil, Josep kᵾn, wᵾlᵾk rok, Isip kona ila, Josep wu mat kᵾn, kindmant wamp mel raⱡpa muⱡangga nᵾk, rarᵾp rok ku moni tᵾtᵾng. Ni kᵾn wote, Got ndi, Josep wak rui nᵾrᵾrᵾm. 10 Wote, Josep nga uⱡ mbun urum mbila, Got ndi, ki kaimp pendpa mepa purum. Wote Josep ni, Got ndi, pilpa kungᵾndi kai mbᵾ ngumba, Isip kona ila nga wu king kᵾndrᵾm ei, wu king Pero nga kuimp keta ila uⱡ mbᵾ, etpa kai mundrum. Wote Pero ndi, Josep ni tᵾpa wu nuim kuimbal ei, monduⱡnga moⱡpa, Isip kona ila mel mbᵾ pora, rᵾp itim. 11 Wote, ui ti kᵾn, Isip kᵾn Keinen kona raⱡ ila, kump kun mam ti titim. Wote, tᵾn nga anda kouwᵾ tipamᵾl mbᵾ, rᵾng kandᵾk tᵾk nuing kona mbᵾ, pilik rundrung. 12 Ni kᵾn, Jekop moⱡpa pitim mel, Isip kona ila rᵾng minal tetᵾm nᵾtᵾng ei pilpa, elim nga kangᵾmᵾl ni kᵾⱡ, tᵾpa mundrung, unt pi napᵾrmᵾn kona ila purung. 13 Wote, ui mat omba puⱡnga, aldpa pᵾi nitim. Purung ui ei kᵾn, wu Josep elim nga ᵾngᵾnᵾl kᵾⱡ kᵾn, elim nga puⱡ ei, nimba mot ndurum. Wote, Isip kona ila wu king Pero ni ndi, Josep nga wamp mema kᵾⱡ, pilpa pora ndurum. 14 Ei kᵾn, Josep ndi, elim nga tipam Jekop kᵾn, elim nga wamp mbᵾ, 75 morung ni kᵾⱡ pora, Isip kona ila weing nimba, rung mundrum. 15 Wote Jekop kᵾn, tᵾn nga anda kouwᵾmᵾn kᵾⱡ kᵾn, Isip kona ila puk pek molk, wote korung. 16 Wu korung kᵾⱡ nga ombil kᵾⱡ, tᵾk mek puk, Sekim kona ila angᵾndᵾtᵾng. Kona ei, Aparam ndi, unt Amor kangᵾmᵾl wu rᵾⱡaip kᵾⱡ kᵾn, ku moni ndi, rop ropa titim.

17 “Unt Got ndi, Aparam kᵾn nimba mᵾi rurum uⱡ mbᵾ mel etmba ei nga nitim ei, etpa nondpa elinga, Isip kona ila Isrel wamp minal kalk tᵾtᵾng. 18 Wote ei kᵾn, Isip kona ila, wu king kont ti oⱡa urum. Wu ei ndi, Josep ni pilpa kun, iti nᵾtᵾtᵾm. 19 Wu nuim ei ndi, tᵾn nga wamp minal kalk tᵾtᵾng mbᵾ, etpa mindil kundpa, wamp kᵾⱡ nga kangambuⱡa nana, kokila meng mbᵾ, pena tek kilangina, tek puk kuⱡeing nitim. 20 Ui ni kᵾn, Moses ni, kang mon wei ei, mam ndi mitim. Wote, mam tipam raⱡ ndi, kang ni, mo rok tek moⱡunggila, kalimp raldika omba purum. 21 Wote, tek pena ndurung ila, wu king Pero nga mbuⱡam ni ndi, Moses kandpa tᵾpa, kang ni tᵾpa, elim nga kangᵾm mel randpa, etpa ou inditim. 22 Wote Moses ni, Isip wamp nga uⱡ pilpa kungᵾndi mbᵾ, mbo endᵾⱡina, kongun na, ik na, uⱡ mbᵾ nga wu nuim murum.

23 Wote Moses ni, pana 40 elinga, elim nga Isrel wamp mbᵾ, mbo kᵾnimp nimba pitim. 24 Wote tᵾnggᵾt kᵾn, Moses ni, moⱡpa kᵾndrᵾm mel, Isip wu ti ndi, Isrel wu ti, etpa kit mundrum ila mba, Isrel wu ni tᵾpa rapundpa, Isip wu ni, ropa kundrum. 25 Moses ndi pilpa, Got ndi, elim kᵾn moⱡpa, Isrel wamp mbᵾ, etpa tᵾmba nᵾk pileing nimba itim. Uⱡ ei, wamp mbᵾ ndi, pilik kun iti natᵾtᵾng. 26 Wote utᵾma orunga, Isrel wu raⱡ el elinggila, Moses ndi kandpa, wu raⱡ nga nᵾmp kun mundimp nimba mel, ‘Ik ei kum tiyᵾl! Enmbil wu ᵾngᵾn ᵾngᵾn raⱡ, nambuⱡ emel, el enmbil?’ nitim. 27 Wote, el ruimp nimba itim wu ni ndi, Moses punt ropa kundpa, nimba mel, ‘Nim nam ndi, tᵾpa nuim mondpa uⱡ mbᵾ nga tᵾk kun iti nitim? 28 Nim ukᵾ nga Isip wu ti, rok kundun ni mel, akup na i ku etᵾp rop kundimp nᵾk pilkᵾn nᵾn ei?’ nitim. 29 Wote, Moses ik ni pilpa, Isip kona ni, wak ropa, nung nimba mba, Mirian kona ila purum. Kona ila mba moⱡpa kᵾn, amp ti tᵾpa, kang raⱡ mitim.

30 “Wote, pana 40 omba puⱡnga, Moses ni, Sainai komnga ei nga, wur kui waka ila moⱡpa kundrum ei, nde kat ndip nomba pitim kona ila, Got nga anggelo ti moⱡnga kundrum. 31 Uⱡ itim ni, Moses kandpa min ngᵾn mundpa kᵾn, kandᵾp kai itimp nimba, nondpa purum. Ei kᵾn, Got nga ik ei, mel nitim, ‘Na nim nga anda kouwᵾ Eiparam, Aisak na, Jekop unt morung kᵾⱡ nga Got ei,’ nitim. I nilinga, Moses nga kᵾmp ki nimbᵾ, pur pur roⱡnga, kona ei kanᵾmba ei nga mundmong itim. 33 Wote Got ndi, Moses kundpa, nimba mel, ‘Nim nga kᵾmp rᵾk mel kᵾⱡ potkᵾn mundi! Nim int, anggilkᵾn morun kona ei, mᵾi wingti ila morun. 34 Na kant ei, Isip kona ila, na nga wamp mormin mbᵾ, mindil minal nok mormin. Wamp kᵾⱡ nga ka enmin ei pilip kᵾn, na mana omp, wamp kᵾⱡ nga mbun ila etᵾp timp ont. Akup nim wana! Na ndi, nim Isip kona ila, tip mundamba pᵾn!’ nitim.

35 “Moses ni, wu ei, Isrel wamp mbᵾ ndi, tᵾk pei mondᵾk nᵾk mel, ‘Nim nam ndi, nuim molkᵾn, tᵾn wamp mbᵾ kundi nᵾkᵾndi?’ nᵾtᵾng. Got ndi, Moses ni, tᵾp wu nuim mondpa, elim nga wamp mbᵾ, kan tinga ndupa tangga nitim. Got nga Anggelo unt kona kui waka ila ndip mel noⱡnga, kᵾndrᵾm ni ndi, Moses ni, tᵾpa rapundᵾⱡnga uⱡ mbᵾ itim. 36 Moses ndi, Isrel wamp nimbᵾ, Isip kona ei, wak ropa, mepa ekit urum ei kep, wote Num Kuta Kunt ei, puⱡa rok, noi orunga ekit purung ei kep, wote kona kui waka ila uⱡ rᵾpᵾndi ou ndupa, wengᵾndupa etpa, mepa puⱡnga, pana 40 omba purum. 37 Moses ndi, Isrel wamp nimbᵾ, kundpa nimba mel, ‘Got ndi painui wu na, mel ti enim nga ruk ting ila, kandpa tᵾpa ngumba. 38 Moses ni, unt Isrel wamp mbᵾ kᵾn, kona kui waka ila rᵾp rok purung. Wote wu ei ndi ku, tᵾn nga anda kouwᵾ mbᵾ kᵾn, kunda rᵾp rok purung. Wote, Sainai komnga ila, Got nga Anggelo ei kᵾn, ik ranggᵾⱡnga, Got ndi, elim nga kont mba mul uⱡ ei nga ik ei, tᵾn kundpa nangga nimba, Moses ni ngurum.

39 Wote, tᵾn nga anda kouwᵾmᵾn nimbᵾ ndi, Moses nga nitim ik ni, teng ndui nandrᵾng. Moses ni, rok pint panda etᵾk, Isip kona ila aldpa kelik, int mbin nᵾk, numan ila pᵾtᵾng. 40 Pilik kᵾn, Eron ni kundᵾk, nᵾk mel, ‘Tᵾn nga got mat mim itana! Got mbᵾ ndi, tᵾn rᵾp etᵾk mek peing,’ nᵾtᵾng. ‘Moses ni, wu tᵾn Isip kona ila mepa ekit urum wu ni, nant ila pum nda, tᵾn pili napᵾnmᵾn,’ nᵾtᵾng. 41 Ei kᵾn ku, kng kau pela mel ti, mim etᵾk mondᵾk, numan minal nguk, kng rung mat kalk tindiⱡim mundᵾk ngᵾk mel ni kᵾn, atinga rorung. 42 I etᵾng ni nga, wote Got ndi, wamp nimbᵾ, tᵾpa mbuⱡ nguⱡnga, oⱡa muⱡ ila mipil na, mel mbᵾ nga atinga rundeing nimba wak rurum. Uⱡ ei, ya unt painui wu morung nimbᵾ mbᵾ ndi, mon rok pendᵾtᵾng ni mel, kupa itim,

‘Enim Isrel wamp mbᵾ ye! Enim unt pana 40 kona kui waka ila na kᵾn, kng rung mel mbᵾ kalk tindiⱡim mundᵾk etᵾng ni, na kᵾn iti natᵾtᵾng mon! Enim ik kol got Molek nga muⱡ manga kᵾⱡ mek, omba enim nga got Repan ei nga mipil ei, enim nga got ei nᵾk, mim etᵾng mel ei mek purung. Ei nga, na ndi, enim akup Bapilon kona ei nga mbuldung orunga tᵾp mundamba, kongun kindmant wamp ralk muⱡing,’ nᵾtᵾng.

44 “Tᵾn nga anda kouwᵾmᵾn mbᵾ, kona kui waka ila morung ei kᵾn, Got nga muⱡ manga kᵾⱡ, Got ndi, Moses kundpa nimba, ora ndurum ni mel ku, tou ila mim etᵾng. 45 Ui mat omba puⱡnga, tᵾn nga anda kouwᵾmᵾn mbᵾ, Got nga atinga muⱡ manga ei, en enim nga tipamᵾl ndi, ngurung nimbᵾ mek, Josuwa kᵾn puk, Got ndi, wamp ropa mundrum mᵾi nimbila morung. Wote, mul manga kᵾⱡ kona ila angindᵾk mondᵾk moⱡᵾngina, wote Depit ni oⱡa urum. 46 Got ndi, Depit kᵾn numan minal ngumba memp pendilinga kᵾn, Depit ndi, Got waldpa wu Jekop nga Got ei nga manga wingti ronduⱡ ti rᵾkᵾndimp, nitim. 47 Wote, manga wingti ni rakᵾndimp nitim ni, wote Solomon ndi rukundrum. 48 Wote, Got Ama Oⱡa Nuim ei, wamp ndi, manga rakurmin ila muⱡi nambᵾrᵾm. Ik ei, painui wu Eimos ndi, pai nomba nimba mel,

49 “Nuim ndi, nimba mel, ‘Mul kona ei na nga rᵾpᵾndi pol ei nimba. Wote, mᵾi kona ei na nga kᵾmp raⱡ tetᵾm kona ei nᵾtᵾm. Enim ndi, na nga namba manga ti rᵾkᵾndangina, na muⱡ tᵾp muⱡimp nda?’ nᵾtᵾm. 50 ‘Mel mbᵾ pora, na nga ki raⱡ ndi, mim iti nᵾtᵾt ei?’” nᵾtᵾm.
51 “Enim ik tᵾk roi nduk, Got nga ik ei, kum ti natᵾk etmin wamp mbᵾ ye! Unt enim nga anda kouwᵾ mbᵾ mel ku ralk, Muⱡnga Wingti ei nga ik ei, kum ti natᵾtmᵾn. 52 Unt painui wu ti tenda na ti, enim nga anda kouwᵾ mbᵾ ndi, mbun mat tᵾk ngui nganggᵾrᵾng ei? Ei mon! Enim nga anda kouwᵾ mbᵾ ndi, wu kun kai ei omba, ei nga pai nok nᵾtᵾng wu mbᵾ, rok kondrung ku. Wote, akup enim ndi, wu kun kai ei urum ei kᵾn, ruk molk, wote rok kondrung. 53 Enim ndi, Got nga mi ik ronduⱡ kᵾⱡ anggelo kᵾⱡ ndi, ambulk nguⱡina tᵾtᵾng. Ei kᵾn, enim ndi, ik kᵾⱡ pep rui narᵾrmᵾn ku,” nitim.

Stipen Ni, Ku Ndi Rorung

54 Wote, Stipen nga nitim ik nimbᵾ, rᵾp wu mbᵾ ndi, ik ei pilik, ama popᵾⱡ ndi kolk, gu mbᵾ konggilingina puk rurum. 55 Wote, Muⱡnga Wingti ei ndi, Stipen kᵾn peka rurum ila, Stipen muⱡ kona tᵾpa oⱡa ndupa, Muⱡᵾl Wu Kupa kᵾndrᵾm mel, Got nga rᵾⱡang kai ila, Jisas ni, Got nga ki mbo orunga anggilpa murum. 56 Wote Stipen ndi, wu nimbᵾ, kundpa nimba mel, “Kᵾnᵾiya! Na muⱡ kona ei, kumba tᵾpa telinga kant ei, Got nga ki mbo orunga anggilpa morum kant!” nitim. 57 Wu nimbᵾ pora, ronduⱡ ke nᵾk, en enim nga kum nombuⱡa mbᵾ rou rok, tᵾkrᵾk ok, Stipen ni imp molk kona nila rok, tᵾk pena nduk, ku ndi rorung. Stipen rorung kandrung wu nimbᵾ ndi, en enim nga wal pᵾki pakrung mbᵾ, kang wu Sol ni ti, murum nila potᵾk tetᵾng. 59 Wu ni kᵾⱡ ndi, Stipen ku ndi roⱡina mel, Stipen ndi, atinga ropa nimba mel, “Nuim Jisas ye! Na nga Muⱡnga ei, nim ndi oⱡa tiyo!” nitim. 60 Wote Stipen ndi, mura ropa mondpa, atinga ronduⱡ ropa nimba mel, “Nuim ye! Wu kᵾⱡ nga uⱡ kit enmin ei, wak rundi!” nimba kᵾn kurum.

Copyright information for `MED