Acts 9

Sol Ni, Numan Ropul Rurum

Wote, ruk ui nimbila ku, Sol ndi, Nuim ei nga kitip kᵾni wamp mbᵾ, rop kondᵾp mint, wang nduimp nimba pilpa omba, wu pris mbᵾ nga wu kuimbal ei, murum kona ila mba, elim waldpa, mon ti ropa, Damaskas kona ila atinga manga mbila pora ndangga, kona mbila wamp mat kᵾnamba, Jisas nga ik nᵾtᵾm ei mel, pep rong ndam, wamp mbᵾ imp moⱡᵾp, tᵾp mep, Jerusalem yant uimp nitim. Ei mel nimba, Damaskas ni kona ila, nondpa puⱡnga, ama tᵾngᵾnda mint, Sol urum kona ila, rᵾⱡang mam ti, muⱡ kona ila ropa mana urum. Rᵾⱡang ei ndi, Sol ropa monduⱡnga mba, mᵾi ila pepa pitim mel, ik ti ndi, elim mbi tepa, nimba mel, “Sol, Sol! Nambuⱡ emel, na rok kongundᵾn?” nitim. Sol ndi, punt ropa nimba mel, “Nuim ei nim nam?” nitim. Wote, ik urum ei ndi, punt ropa nimba mel, “Na Jisas nim ndi, rok kongundun wu ei ka! Ei nga, nim oⱡa molkᵾn, Damaskas kona peng ila rukᵾr pi! Kona ila, nim namba uⱡ itin mbᵾ mel, kundᵾk ning,” nitim. Sol kᵾn rup rok purung wu nimbᵾ, ik ti ni nandᵾk morung ik ei pᵾtᵾng. Ei wote, wamp ti, kᵾni nakᵾndrᵾng. Wote, Sol oⱡa moⱡpa, mong raⱡ ndi, kona kᵾnimp nimba itim ni, kapⱡa iti nᵾtᵾtᵾm. I elinga, ki ambulk mek, Damaskas kona ila purung. Ui ei kᵾn, Sol nga mong raⱡ ropa tilinga, rᵾng nu raⱡ, nᵾi nandpa pelinga, rumbᵾⱡ raldika omba purum. 10 Got nga kitip kᵾni wu ti mbi tek, Ananaiyas nᵾtᵾng ni, Damaskas ni, kona ila murum. Wu ei ur kump etpa kᵾndrᵾm ei, Nuim ndi, elim kundpa nimba mel, “Ananaiyas!” nitim. Ik punt ropa nimba mel, “Nuim ye! Na ya mor ei ka!” nitim. 11 Wote, Nuim ei ndi, kundpa nimba mel, “Nim tᵾkᵾn kun etkᵾn met, Nombuⱡa Kun nᵾtmᵾn kona ila pukᵾn, wu Judas nga manga ila, Tarsas kona ila, wu ti mbi tek, Sol, nᵾtmᵾn wu ei, omba morum nᵾkᵾn waldᵾkᵾn pili! Wu ei atinga ropa morum. Wu ei, ur kump etpa kanum ei, Ananaiyas ni wu ti, mukᵾr omba, elim nga mong ei, piral nangga nimba, ki raⱡ ndi, peng ila ambuⱡmba ei, unt ur kump etᵾp kanim,” nitim. 13 Ananaiyas ndi, punt ropa nimba mel, “Nuim ye! Wamp mbᵾ ndi, na kundᵾk wu ei ndi, nim nga mondpa pili wamp met, Jerusalem mormin mbᵾ, etpa kit mondrum nᵾtᵾng, pit. 14 Wote akup, wu pris kuimbal kᵾⱡ kᵾn, nimba kun mundpa tepa, ya Damaskas kona ila, nim nga mbi paka rondᵾrmin wamp mbᵾ, tᵾpa kan ngumba pilpa om,” nitim. 15 Wote, Nuim ei ndi, Ananaiyas kundpa, nimba mel, “Nim pa! Na ndi, wu ei to rop tint wu ei, na nga kongun wu moⱡmba. Wu ei ndi, na nga mbi ei, wamp rᵾⱡaip elpa na, wote wu king na, Israel wamp mbᵾ kᵾn, na nga mbi ei, tᵾpa pena ila pendpa nimba. 16 Wote, na nga mbi ila, mindil nomba mbᵾ, nanim ndi, tᵾp ora nduim,” nitim. 17 Wote Ananaiyas mba, manga ila murᵾk mba, elim nga ki raⱡ tᵾpa, Sol nga peng ila ambuⱡpa, Sol kundpa, nimba mel, “Ana Sol! Nuim Jisas ndi, elim nim ya uimp nᵾkᵾn urum ila, nim nombuⱡa paka ila kundrum. Wu Nuim ei ndi, na tᵾpa mundum. Wu ei ndi, nim aldpa mong raⱡ piral nangga, kᵾnᵾn nitim. Wote nim, Muⱡnga Wingti ei ndi, peka rangga nimba, na tᵾpa munduⱡnga ont,” nitim. 18 Ama tᵾngᵾnda mint, Sol nga mong raⱡ ila, oma kundun na ni mel mat, ndiⱡimp nimba, mana puⱡnga, wu ei nga mong raⱡ piral nilinga, kona mbᵾ aldpa kundrum. Wote oⱡa anggilinga, nu tinditim. 19 Wote, rᵾng nomba elinga, elim nga ronduⱡ ei, yant urum.

Sol Ei Ndi, Nuim Ei Nga Ik Ei, Damaskas Wamp Mbᵾ, Nimba Ngurum

Sol ndi, Damaskas kona ila, mondpa pili wamp mat kᵾn, rumbᵾⱡ mat moⱡpa kᵾn, atinga manga mbila mba, ik pᵾⱡ mat nimba, mot ndupa, Jisas ei, Got nga Kangᵾm ei nitim.
21 Ni kᵾn, ik pᵾtᵾng wamp mbᵾ ndi, min ngᵾn mondᵾk waldᵾk, nᵾk mel, “Jerusalem kona ila wu ei ndi, Jisas nga mbi paka rondᵾk etᵾng wamp mbᵾ, ropa kundpa itim wu waⱡᵾm ei, nᵾmp kanmin ei, muna mon? Wote akup, ya Damaskas kona ila wamp kan ngumba, mepa Pris kuimbal kᵾⱡ kᵾn, pi napᵾmba om nda?” nᵾtᵾng.

22 Wote, Sol nga ik ei, ama ronduⱡ puⱡnga, Jisas ei, wu Got ngurum wu Kraist nitim. Ei nga, Jura wamp Damaskas moⱡung mbᵾ ndi, Sol nga ik ei, punt rok ning mel iti nᵾtᵾtᵾm.

23 Wote, rumbᵾⱡ mat ou ndupa omba puⱡnga kᵾn, Jura wu nimbᵾ, ik nᵾk pendᵾk, nombuⱡa mam ti kandᵾk tᵾk, Sol rop kundmin nᵾtᵾng. 24 Wote, Sol wu kᵾⱡ nga ik nᵾk pendᵾtᵾng ei pitim. Rumbuldi rᵾnggilmᵾ mbᵾ, Sol rop kundmin nᵾk, kona ou ei nga, keta puⱡ puⱡ ila nokᵾndrᵾng. 25 Wote, i elingina rumbᵾⱡ tila, Sol nga ik pep rorung wu nimbᵾ ndi, Sol ku paⱡa etᵾng nila, kelwa wal kat ila, Sol rukᵾr mba moⱡnga, kan kulk, kan punt raⱡ ambulk molk, raka raka nᵾk, wak rok paⱡa ekit orunga mundrung.

Sol Mba Jerusalem Kona Ila Murum.

26 Wote, Sol Jerusalem kona ila mba, kitip kᵾni wamp mbᵾ kᵾn, kup itimp nimba pitim ni, wote wamp nimbᵾ, Sol nga mundmong etᵾk, wu ei, nuim ei nga kitip kᵾni wu kupa ti, nᵾk pili napᵾtᵾng. 27 Wote i elinga, Barnapas omba, Sol tᵾpa rapundpa mepa mba, Jisas nga nombuⱡa rung wu kᵾⱡ kᵾn purum. Mba Sol, nuim ei nombuⱡa mam ila, Nuim ei kandpa, ik ranggᵾpa itim ni mel, ik timan mbᵾ ropa, nombuⱡa rᵾng wu kᵾⱡ ngurum. Wote Sol, Damaskas kona ila, Nuim ei nga ik ei ronduⱡ mondpa nimba itim uⱡ mbᵾ, Barnapas ndi, timan rurum ku. 28 I etpa nilinga, Sol ni, rukᵾr tilingina, Jerusa-lem tetᵾm kona mbila pora mba, Nuim ei nga mbi ila, ik puⱡ mbᵾ ronduⱡ mundpa, mbo inditim. Sol ik ronduⱡ mundpa, nimba mba kᵾn, Grik ik nᵾtmᵾn Jura wamp mbᵾ kᵾn, ik mel itim ila, wamp mbᵾ ndi, rok kunding pilik etᵾng. Ni kᵾn, mondpa pili wamp mbᵾ, etᵾk tᵾk mendᵾk kᵾn, wote Sol ni, Sesariya kona ila mek puk, Tarsus kona ila, tᵾk munduⱡina purum. 31 Ei kᵾn, Juriya, Galilee, Sameriya mbi paka rormin kona nimbᵾ pora, moⱡpa kundi ui kai ti kandᵾk tᵾtᵾng. Ni kᵾn, kona ila wamp mbᵾ, Muⱡnga Wingti ndi, etpa ronduⱡ munduⱡnga, Nuim ei nga mundmong etᵾk, mana orunga moⱡᵾngina, wamp puⱡi ruk ok, mbi paka rorung.

Pita, Lira Kᵾn, Jopa Kona Raⱡ Ila Purum.

32 Pita ik mbo endpa, kona mbila pora ᵾndrᵾm. Tᵾnggᵾt kᵾn, Got nga wamp met Lira morung kᵾⱡ kanᵾmba purum. 33 Kona ila mba kᵾn, Einiyas ni, wu ti kᵾndrᵾm. Wu ei nga kᵾng mbᵾ, moiya rurum ila, rupⱡaima ila mint pelinga, pana 8 omba purum. 34 Wote Pita ndi, wu ei kundpa, nimba mel, “Einiyas, Jisas Kraist ndi, nim aldpa etpa kai mondnum. Oⱡa molkᵾn, nim nga rupⱡaima kᵾⱡ tᵾkᵾn kun iti!” nitim. Tᵾngᵾnda mint, Einiyas oⱡa murum. 35 Wote Lira, Saron kona raⱡ ila, pᵾtmᵾn wamp mbᵾ, wu ei kandᵾk kᵾn, numan ropᵾl rok, Nuim ei kᵾn, rukᵾr purung.

36 Wote Jopa ni, kona ila mondpa pili amp ti, mbi tek, Tabita, nᵾtᵾng ei murum. (Wote, Grik ik ila, mbi tek, Dokas, nᵾtᵾng). Amp ei, uⱡ kai mbᵾ rᵾk rᵾk etpa, wamp kurpa mbᵾ, tᵾpa rapundpa itim. 37 Ui ei kᵾn, amp ni kui kandpa, tᵾpa kurum. On ei, nu tendᵾk mek, manga kᵾkaⱡ oⱡa orunga, tila tetᵾng. Jopa ni kona ei, Lira kᵾn, nondpa mel titim. Wote, Jopa mondpa pili wamp kᵾⱡ, Pita omba, Lira ni kona ila murum ei, pilik kᵾn, wu raⱡ tᵾk nombuⱡa rung mundᵾk ei mel waldᵾk, nᵾk mel, “Pᵾt pᵾt, ama akilma, ya tᵾn mormin ila ui!” nᵾtᵾng. Pita nombuⱡa rung ik ei, pilpa tᵾpa kᵾn, elim tᵾpa kun etpa, wu raⱡ kᵾn purum. Pita kona ila mba, ruk puⱡnga, tᵾk mek manga kᵾkaⱡ oⱡa orunga ila purung. Ei kᵾn, amp wiya ou ndupa, Pita murum nila molk, pok etᵾk, ka etᵾk mel, amp Dokas kont moⱡpa kᵾn, wal pᵾki ou kel mim itim nimbᵾ, Pita tᵾk ora nduk etᵾng. Wamp nimbᵾ, Pita ndi, tᵾpa pena ndupa, elim mura koptᵾm ropa mondpa, atinga rurum. Wote, tᵾpa ropᵾl ropa, amp on ei, kundpa nimba mel, “Tapita, nim oⱡa moⱡa!” nitim. I nilinga, amp ni, mong raⱡ makilpa, wote Pita kandpa kᵾn, amp ei oⱡa murum. 41 Pita ndi, amp ei, ki ambuⱡpa tᵾpa, oⱡa mundrum. Wote amp ni, etpa kont mondpa kᵾn, mondpa pili wamp na, amp wiya na nimbᵾ, wi ropa rukᵾr tᵾpa, etpa kont titim amp ni, en enim ngurum. Uⱡ itim ni nga, timan ik ei, Jopa kona ila tepa ndaip nitim ila, wamp mbᵾ pora, Nuim ei kᵾn, mondᵾk pᵾtᵾng. Jopa kona ila, Pita ni, Saimon, nᵾtmᵾn wu ti, kng kau kᵾng mim etᵾm wu ni kᵾn, pepa moⱡnga, rumbᵾⱡ ou ndupa omba purum.

Copyright information for `MED