Colossians 3

Got ndi, enim Kraist kᵾn tᵾpa kup endpa, ⱡoporpa tᵾpa oⱡa mundrum. Ei nga, enim nga numan orunga mek puk, wi muⱡ kona tetᵾm mel mbᵾ kᵾn tiyangga. Kona ila Kraist Got nga ki mbo orunga, wu nuim mumuk morum. Enim nga numan ei, wi mul kona ila nga tetᵾm mel mbᵾ nga mint pilᵾi! Enim mᵾi kona mel kanmᵾn mbᵾ mon! Enim korung ei nga, wote enim nga muⱡnga kont ei, Got nga rukᵾr orunga, wu Kraist kᵾn mo ropa morum. Kraist ei tᵾn nga muⱡnga kont tep mormun ei nga Puⱡ Wu ei morum. Wote, Kraist omba, mot nim ui ei kᵾn, enim kunda rup rok, elim nga rᵾⱡang eng nui ila ekit uing.

Uⱡ Unt Nga Uⱡ Kont Nga

Enim ya mᵾi kona ila nga uⱡ kit mbᵾ nga, enim nga numan rukᵾr orunga, mbo rondnᵾm uⱡ mbᵾ rok kundᵾi! Ei wapra rui uⱡ, uⱡ ⱡar mul uⱡ, popᵾⱡ kandpa ti uⱡ, wamp ti nga mel kandpa kum pindi uⱡ, uⱡ ei (ik kol got ei nga, mbi paka rui uⱡ ei). Nambuⱡ emel, Got nga popᵾⱡ ei, uⱡ kit mbᵾ nga eng wamp mbᵾ kᵾn omba. Unt molk orung ni mbila, uⱡ kit mbᵾ ndi, enim tᵾpa kum roⱡnga, ⱡawa minal etᵾng. Akup ei kᵾn, popᵾⱡ kuⱡi uⱡ, popᵾⱡ tᵾkrᵾpa mundi uⱡ, wote pilpa kit pili uⱡ mbᵾ, wak rok pendᵾk kilᵾi! Ik mbuldung orunga nundᵾk, ik kit nᵾk etmin uⱡ ei nga, enim nga keta ila, ekit ui nᵾwangga mon! Wamp ti kᵾn, ik kol rok ngui uⱡ ei wak rᵾi! Nambuⱡ emel, enim uⱡ kit mbᵾ, wak rok, akup kᵾng ti nga tᵾk, wamp kont kᵾⱡ mormin. Mel mbᵾ pora iti wu Got ei ndi, uⱡ mbᵾ mel endpa, enim rᵾk rᵾk etpa kont mundpa, enim etpa mepa mba, elim morum ei nga pilpa kungᵾndi ei, ting nimba etᵾm. 11 Uⱡ mbᵾ ekit oⱡnga, wamp rᵾⱡaip elpa mbᵾ kep, Jura wamp mbᵾ kep, kᵾng kupti wamp mbᵾ kep, kᵾng kupti nᵾpti wamp mbᵾ kep, kona roⱡ wamp mbᵾ kep, pilpa kun iti nᵾti wamp kep, kindmant wamp mbᵾ kep, wei muⱡi wamp mbᵾ kep, wamp mbᵾ pora, Kraist nga mint, Kraist ei, wamp mbᵾ kᵾn pora morum.

12 Enim Got nga wamp kᵾⱡ, elim ndi, enim numan ngumba wamp mbᵾ, elim nga nimba mbi ropa titim. Ei nga, wamp mbᵾ pora kont kulk, uⱡ kai mbᵾ mint itᵾi! Enim ndi, en enim nga numan orunga mana nduk, wamp mbᵾ kᵾn, uⱡ kun mbᵾ mint itᵾi! 13 Enim nga ruk ila wamp ti kᵾn, min mondᵾk, wamp ti nim kᵾn, uⱡ ti ⱡawa int nim ndam, Kraist ndi, nim nga ⱡawa wak rundrum ei mel ⱡawa ei, wak rundi ku. 14 Uⱡ kai mbᵾ etkᵾn, wote wamp numan ngui uⱡ ei pendkᵾn iti! Wote, wamp numan ngui uⱡ ei ndi, uⱡ mbᵾ pora, tᵾpa tenda endᵾtᵾm.

15 Kraist ndi, enim moⱡpa kundi uⱡ ngurum ei, enim nga numan orunga nombuⱡa mam ping ei nga rᵾp etᵾm. Ei nga, enim Got ndi, moⱡpa kundi uⱡ ila moⱡina kandpa, enim wi ropa tᵾpa tenda etpa, kᵾng tenda kundrum. Ei nga, numan wang nduk angge nᵾi! 16 Kraist nga nombuⱡa rung ik puⱡ mbᵾ, enim nga mundmong rukᵾr orunga, kont mba piyangga! Wamp ti ndi, ti pilpa kungᵾndi ronduⱡ pili uⱡ mbᵾ nga mbo rondᵾk, man nguk itᵾi! Got kᵾn angge nᵾk, rom kaip nᵾndᵾk, kinan mat nᵾk, numan kai pilik itᵾi! 17 Enim uⱡ namba uⱡ etᵾk, ik namba ik nᵾk eng mbᵾ pora, Nuim Jisas nga mbi ila etᵾk, Got Wuta kᵾn angge nᵾi!

Wu Amp Na Kangambuⱡa Na Mbᵾ Nga Ik

18 Enim amp mbᵾ wanᵾmᵾl mbᵾ nga mana orunga muⱡᵾi! Nuim ei nga kuimp keta ila, uⱡ kun kai mbᵾ nimba kandrum.

19 Enim wu mbᵾ ndi, ambᵾnᵾmᵾl mbᵾ, numan nguk, numan orunga etᵾk kit mundi nᵾmᵾndᵾi!

20 Enim kangambuⱡa mbᵾ ndi, tipanᵾm manᵾmᵾl mbᵾ nga rᵾk rᵾk ik teng ndᵾi! Uⱡ ei mel, eng ndam, Got etᵾk, numan wang nduing.

21 Enim wamp tipam mamᵾl mbᵾ ndi, enim nga kangambuⱡa mbᵾ etᵾk, popᵾⱡ kundi nᵾkᵾndᵾi! I eng ndam, kangambuⱡa mbᵾ, pilik kit piling.

22 Enim kongun wu mbᵾ, enim nga mᵾi kona wu nuim mbᵾ nga namba uⱡ itᵾi nᵾng mbᵾ pora, teng ndᵾi! Kandᵾk mormin ei kᵾn kongun etmin. Wote, kᵾni nakᵾndrᵾmin ei kᵾn, kongun iti natᵾtmin. Ei nga, Oⱡa Wu Nuim ei ndi, kandpa morum nᵾk pilik itᵾi! 23 Enim namba kongun eng mbᵾ, wamp ti nga enmin nᵾk pili napilik, Oⱡa Nuim ei nga endinmᵾn nᵾk pilik itᵾi! 24 Pilik muⱡᵾi! Nuim ei ndi, enim kongun etmin ei mel, numan wang ndui mel mat ngumba. Kraist ei, wu Nuim kupa ei nga, enim kongun endᵾtmᵾn. 25 Wote, ⱡawa eng wamp mbᵾ, uⱡ eng ei mel ku punt ropa ngumba. Nambuⱡ emel, Got ndi, wamp mbᵾ, to tenda ila mint kᵾmp tᵾmba.

Copyright information for `MED