Ephesians 1

Pol Ndi, Episis Kona Ila Mon Ropa Ngurum

Na Pol, Got elim ndi, na etpa Kraist Jisas nga nombuⱡa rung wu mundrum. Mon ei rop, Got nga wamp mbᵾ, met Episis kona ila mormᵾn kᵾⱡ kᵾn ngunt. Wamp kᵾⱡ, en enim nga mul orunga, Kraist Jisas kᵾn minal pep rormin. Got tᵾn nga Wuta, wote Nuim Jisas Kraist kunda, enim kᵾn poⱡ ti uⱡ, moⱡpa kundi uⱡ mbᵾ ngurum.

Kraist Nga Mbi Ila Got Ndi, Tᵾn Memp Ngorum

Tᵾn nga Nuim Jisas Kraist Nga Tipam, wote Got morum ei kᵾn, angge namin! Tᵾn Jisas Kraist kᵾn rᵾmp ndupa moⱡmina, memp kai, wi muⱡ kona tetᵾm mbᵾ, tᵾn ngorum. Muⱡ mᵾi raⱡ mim iti nᵾti kᵾn, Got ndi, tᵾn elim nga nimba mbi ropa tᵾpa, Kraist kᵾn mundrum. Uⱡ ei ndi, tᵾn etpa wingti randpa, elim nga kuimp keta ila, ⱡawa iti natᵾpᵾn, wamp numan ngui uⱡ ila muⱡamin nimba itim. Got ndi, unt pilpa kᵾn, tᵾn wamp mbᵾ, Jisas Kraist kᵾn rukᵾr pamina, elim nga kangambuⱡa raⱡᵾp muⱡamin nimba itim. Ei kᵾn, elim nga numan ila, itimp nimba pᵾtᵾm ei mel itim. Got ndi, uⱡ kai wei ti etpa, elim nga kangᵾm tenda numan ngorum ei, tᵾn wamp mbᵾ nga nᵾndpa ngumba mundrᵾm. Ei nga, Got elim nga mbi paka rundamᵾn! Kraist kurum uⱡ ei ndi, tᵾn nga uⱡ kit mbᵾ, tinga ndupa, tᵾn etpa wei mundrum. Got nga wamp poⱡ ti uⱡ ei, oⱡa orunga tetᵾm ei, tᵾn ngurum. Ui mbila rᵾk rᵾk, tᵾn wamp mbᵾ, namba uⱡ mat, numan mondurmᵾn mbᵾ, pilpa pora ndurum. Unt puⱡ mondpa, Got elim numan kai pendpa, Kraist kᵾn itimp nimba etpa, mo rurum uⱡ ei, akup tᵾpa pena ila pendilinga, pilpᵾn mbi ndurmᵾn. 10 Got elim nga itimp nimba pitim uⱡ mbᵾ, etpa pora ndumba ei, elim ui ti, to ropa pinditim ila etmba. Ei kᵾn, muⱡ mᵾi raⱡ ila, etpa pinditim mel mbᵾ pora, tᵾpa tenda endpa, Kraist tᵾpa peng mumuk mondᵾmba.

11 Mel mbᵾ pora, Got elim nga numan pilpa ik nimba etᵾm uⱡ ila, ekit orung. Wote, Kraist kᵾn Got ndi, tᵾn wi ropa tᵾpa wamp, elim nga kᵾⱡ nitim. Ei nambuⱡ emel, elim unt puⱡ mondpa, uⱡ itimp nimba pitim ei mel, pep ropa etᵾm. 12 Ei nga, tᵾn pora, Kraist kᵾn, kuimp tepᵾn mondᵾp pitmᵾn. Got nga uⱡ eng nui kai itim ei nga, mbi paka rundamin! 13 Uⱡ ei, enim kunda ku, enim nombuⱡa rung ik kupa ei, pilik tᵾtᵾng ei, Rᵾnang Ik Kai ei ndi, enim etpa rukᵾr titim. Ei kᵾn, enim Kraist mondᵾk pilingina, Got ndi, enim wamp mbᵾ, elim nga kᵾⱡ nimba, Muⱡnga Wingti ei, enim ngurum. Elim nguimp nimba pitim mel ku ngurum. 14 Muⱡnga Wingti ei ndi, tᵾn etpa kapⱡa endangga. Tᵾn Got ndi, unt mbi tepa, nguimp nitim mel mbᵾ, kapⱡa timin. Wote Got ndi, tᵾn kᵾmp kᵾm etpa, tᵾpa wamp mbᵾ, elim nga kᵾⱡ nimba ei, Muⱡnga Wingti ei ndi, tᵾn etpa ndoimp rondᵾmba. Ei nga, tᵾn ndi, elim nga mbi ei paka rundamin.

Pol Nga Atinga Rurum Kᵾⱡ

15 Enim nga ik ti pit ei, enim Nuim Jisas Kraist mondᵾk pilik, wote Got nga wamp mbᵾ, numan nguk uⱡ kai mbᵾ etmin. 16 I etmin uⱡ ei nga, na enim nga orunga pilip numan wang nilinga, Got kᵾn angge rᵾk rᵾk nᵾt. Na nga atinga ror mbila, enim wak ruimp mel, kapⱡa iti natᵾtᵾm. 17 Na ndi, tᵾn nga Nuim Jisas Kraist nga Got Wuta wu eng nui ei kᵾn, atinga rop waldᵾp, enim Muⱡnga Wingti ngangga nᵾt. Ei ndi, enim etpa ndoimp rundangga, pilpa kungᵾndi tᵾk, Got nga morum puⱡ orunga, pilik mbi nduing. 18 Na ndi, atinga rop kᵾn, enim nga numan orunga kumba tangga, elim nga rᵾⱡang ei kandᵾk, wote enim wi ropa titim ei nga, uⱡ puⱡ ei, pilik mbi nduk iteing nᵾmp et. Elim nga wamp mbᵾ, memp kai nguimp nimba pinditim uⱡ mbᵾ, minal petᵾm. 19 Wote, elim nga ronduⱡ ei, tᵾn mondpa pili wamp mbᵾ kᵾn, wak roⱡnga, kongun enmin. Tᵾn nga rukᵾr orunga kongun enim ronduⱡ ou tenda ei ndi ku, Jisas Kraist on kona ila ⱡoporpa tᵾpa oⱡa mundpa, wi muⱡ kona ila tᵾpa, ki mbo orunga mundrum. 21 Kraist wi muⱡ kona ila wu nuim ronduⱡ ei morum. Wote, ronduⱡ ou kel mbᵾ, tᵾpa mana ndupa, oⱡa orunga morum. Wote, ya mᵾi kona ila mbi ou ronduⱡ, akup tenᵾm mbᵾ, tᵾpa mana ndupa, oⱡa orunga morum. Wote, ui mbila moⱡpa, mint mba. 22 Got ndi, mel mbᵾ pora, etpa tᵾpa, Kraist nga kump puⱡ ila tinditim. Wote, Got nga rapa tenda ila wamp mbᵾ kᵾn, wote namba mel rukᵾr tetᵾm mbᵾ pora, Kraist nga kᵾng ei morum. Kraist ei, mel mbᵾ nga rukᵾr orunga moⱡpa, kapⱡa endpa, etpa kapⱡa endᵾtᵾm.

Copyright information for `MED