Ephesians 6

Kangambuⱡa Na, Tipam Mamᵾl Na Mbᵾ Nga Man IK

Enim kangambuⱡa mbᵾ, Jisas nga mbi ila tipanᵾm manᵾmᵾl mbᵾ nga ik teng ndᵾi! Ei, uⱡ kun kai ei iting. Buk Wingti ila nimba mel,

Tipanᵾm manᵾmᵾl tᵾk ou ndᵾi!”
nᵾtᵾm. Ik ei, mi ik mbᵾ nga ik kuimbal ei. Wote, uⱡ ei mel eng ndam, uⱡ kai ti, indimp nimba, pendpa ngurum ei,
“Nim nga mul orunga kupᵾn mba, kai tangga kᵾn mᵾi kona ui ruⱡ etkᵾn muⱡin,” nᵾtᵾm.
Wote, enim wamp tipam mamᵾl mbᵾ ndi, kangambuⱡa mbᵾ etᵾk, numan kit pendᵾk etᵾk popᵾⱡ kundi nᵾkᵾndᵾi! Uⱡ ei kelik, Got nga ik ila mbo endᵾk, man nguk etᵾk ou indᵾi!

Kongun Kindmant Wu Mbᵾ Kᵾn, En Enim Nga Wu Nuim Mbᵾ Kᵾn

Enim kongun kindmant wamp mbᵾ pilik, enim nga wu ou mbᵾ nga mundmong endᵾk, tᵾk ou nduk, Kraist kᵾn inding ei mel itᵾi! Enim nga wu ou mbᵾ ndi, kandᵾk neing nᵾk uⱡ ti iti nᵾtᵾi! Wote, muⱡi nambᵾⱡᵾm ndam kep, enim numan wang nduk, Got nga numan pᵾtᵾm ei mel, Kraist nga kongun kindmant wamp mel itᵾi! Ei wamp nga uⱡ ti, endinmin nᵾk pili nᵾpᵾlᵾi! Nuim ei nga kindmant endinmin nᵾk pora, numan orunga nguk itᵾi! Enim pᵾtmin ni, kindmant indi wamp, wei mormin wamp mbᵾ pora, Nuim ei ndi, yant omba mel kai mat punt ropa ngumba ei, kongun kai eng tou ila ku ngumba.

Enim wu nuim mbᵾ, uⱡ tou tenda ila ku, enim nga kongun kindmant wu mbᵾ kᵾn itᵾi! Pundma rok etᵾk, mundmong indi nᵾndᵾi! Enim pᵾtmin ni, enim kᵾn enim nga kongun kindmant wu kᵾⱡ kᵾn pora, wi muⱡ kona Wu Ou tenda ei nga mint mormin. Ei ndi moⱡpa, wamp mbᵾ pora, tou tenda ila mint rᵾp etᵾm.

Seitan Kᵾn El Ruimin Mel

10 Nuim ei nga ronduⱡ minal tetᵾm uⱡ ila, enim Nuim ei kᵾn, ronduⱡ mundᵾk mormun nᵾk muⱡᵾi! 11 El itmin ei nga, Got ndi, mel ngorum mbᵾ, tᵾp rᵾmp ndupᵾn, ronduⱡ mbun anggilpᵾn, Seitan nga mo ropa, kunt kan etᵾm uⱡ kit mbᵾ, rok mana ndeing. 12 Ei nambuⱡ emel, tᵾn wamp kᵾn mendpᵾⱡ, el rui narᵾnmᵾn, mon! Tᵾn muⱡnga kit elpa elpa mbᵾ kᵾn, el roⱡmina mel enim. Ei, wu nuim na kongun kuimbal mormin, wote ya mᵾi kona ila uⱡ rumbᵾⱡ muⱡi mbᵾ nga nokᵾndᵾrmin muⱡnga kit peng mumuk mbᵾ kᵾn, el ronmᵾn. 13 Ei nga, akup Got ndi, nim el ruin mel ngurum kᵾⱡ tᵾkᵾn rᵾmp ndukᵾn, ui kit ei om kᵾn, ronduⱡ mundᵾk anggilkᵾn, el etᵾk int pendᵾk, en enim nga mᵾi ila molk mint ping. 14 Ei nga, anggilik tᵾk kun etᵾk muⱡᵾi! Ik kupa ei, kan mel tᵾk gi nduk ralk, uⱡ kun kai mbᵾ tᵾk pakᵾk, wote numan wang ni, Rᵾnang Ik Kai ei, tᵾk kun etᵾk ninding ei, kᵾmp rᵾk mel tᵾk mundᵾi! 16 Ui mbila rᵾk rᵾk mondpa pili uⱡ ei, kumba ripa mel rapᵾk mint muⱡᵾi! I etᵾk moⱡᵾng ei kᵾn, wu kit ei nga, el mong ndip pendpa rom mbᵾ, rok pei munding. 17 Wote, numan kai pendᵾk wamp, Etpa Ti Uⱡ ei tᵾk, peng wuna kapa mel mana tᵾk pakᵾk, wote Muⱡnga Wingti ei ndi, Got nga ik mong nimba ngum mbᵾ, tᵾk koiya ruⱡ nengina norum ni mel ᵾmbᵾⱡᵾi! 18 Muⱡnga Wingti nga ronduⱡ ila uⱡ mbᵾ, iting ei nga, Got ndi, tᵾpa rᵾpᵾndangga nᵾk, atinga rᵾk rᵾk rok mint muⱡᵾi! Mana ping ei nga, nokundᵾk tᵾk mendᵾk mint muⱡᵾi! Wote rᵾk rᵾk, Got nga wamp mbᵾ nga nᵾndᵾk, atinga rᵾndᵾi mint.

19 Wote, na nga orunga nᵾndᵾk atinga rundᵾi ku! Na Got nga ik nindimp ei kᵾn, na tᵾpa rᵾpᵾndangga, mundmong iti natᵾp, ronduⱡ mundᵾp, Rᵾnang Ik Kai ronduⱡ mo ropa tetᵾm mbᵾ, nᵾmp ekit ndeimp. 20 Na Got nga Rᵾnang Ik Kai nᵾndᵾt, uⱡ puⱡ ila nga, na kan manga ila pet. Na Rᵾnang Ik Kai kᵾⱡ ronduⱡ mundᵾp, neimp mint nᵾk atinga rundᵾi!

Memp Ik Kai Mat

21 Tikikas tᵾn nga ᵾngᵾn wu kai ei, wote Nuim ei nga kongun mbila, numan ngumba etᵾm. Wu ei ndi, na etᵾp mor mel nant ei nga ik puⱡ mbᵾ, enim nimba ngangga piling. 22 Wu ei, enim kᵾn tᵾp mundᵾnt ei, tᵾl nga morumbᵾⱡ puⱡ orunga, enim timan ropa ngangga, pilik ronduⱡ teing nᵾmp tᵾp mundᵾnt.

23 Got Tipam, wote Nuim Jisas Kraist raⱡ ndi, moⱡpa kundi uⱡ, wamp numan ngui uⱡ mbᵾ, enim mondpa pili angmᵾn mbᵾ kᵾn wangga! 24 Got nga wamp poⱡ ti uⱡ ei, Nuim Jisas Kraist numan minal ngurmin wamp kᵾⱡ kᵾn omba, tepa mint pangga!

Copyright information for `MED