Galatians 2

Pol Kᵾn, Nombuⱡa Rung Wu Kᵾⱡ

Pana 14 omba puⱡnga, na aldpa Jerusalem kona ila wu Barnapas kᵾn, Taitas raⱡ kunda tᵾp mep yant ur. Na pur ei, nambuⱡ emel, Got ndi, na peimp nimba ora ndurum. Ni kᵾn, na ndi, Rᵾnang Ik Kai ei, mbo wamp rᵾⱡaip elpa mbᵾ kᵾn, nᵾmp ngur ei mel, wu Nuim mbᵾ kᵾn epᵾndi mou rormᵾn ila nᵾmp ngur. Unt kep, akup kep, na nga kongun et ei, muⱡ pemba, muna pei mba nda, nᵾmp uⱡ ei mel it. Na nga tᵾpa rᵾpᵾndi wu Taitas, Grik wu itim ndam kep, kᵾng kupti uⱡ ei nga tangga nᵾk, mou rurmᵾn ila ronduⱡ mundᵾk ni nandᵾtᵾng. Ni wote, wu mat ᵾngᵾnᵾl mul kᵾmp ralk, mou ambrung ila, kiyang nᵾk ruk ok molk kᵾn, Taitas kᵾng kupti uⱡ ei tangga nᵾtᵾng. Wu kᵾⱡ kᵾndᵾp wamp mel ralk, ya tᵾn Kraist Jisas ndi, mi ik ila kan pilinga ndurum uⱡ ei nga, etᵾp kᵾnmin nᵾk orung. Tᵾn aldpa etᵾk tᵾk, mi ik ila kan ngangga muⱡmin nᵾk orung. Wu kᵾⱡ ndi, Taitas kᵾng kupti uⱡ ei, tangga nᵾtᵾng ei, tᵾn ndi ik ei nga neing nimbun, kandᵾp kont iti nᵾtᵾtmᵾn. I itmin uⱡ ei ndi, enim Rᵾnang Ik Kupa ei, pilik teing nimbun itmin. Wote, wu mat nuim mul kᵾmp rarmin mbᵾ, na ndi, mbᵾ tᵾp mel wei randᵾnt. Got ndi, wamp nga kᵾng ekit orunga kᵾni nakᵾndrᵾm. Wu nuim nimbᵾ, na nga ik nᵾmp ngur mbᵾ nga ik ti, tᵾk mendᵾk kᵾn, ik kont nga mat pendᵾp namin ni nandᵾtᵾng ku.

Ei kelik molk, tᵾk mendᵾk pᵾtᵾng ei, Got ndi, Pita Jura wamp mbᵾ kᵾn, elim nga Rᵾnang Ik Kai nangga nitim ei mel, na wamp rᵾⱡaip elpa kᵾⱡ kᵾn, Rᵾnang Ik Kai ei, nᵾmp nguimp uⱡ ei pᵾtᵾng. Got nga ronduⱡ ila Pita etpa, Jura wamp kᵾⱡ nga nombuⱡa rung wu mundrum ei mel, na wamp rᵾⱡaip elpa kᵾⱡ nga nombuⱡa rung wu mundrum. Jeims, Pita kᵾn Jon na wu kᵾⱡ, wu Nuim morung ei ndi, na Got ndi, kongun ronduⱡ ngurum ei, tᵾk mendᵾk kᵾn, na kᵾn Barnapas raⱡ, ok ki tᵾtᵾng. Wote tᵾn pora, numan tenda puⱡnga, tᵾl wamp rᵾⱡaip elpa kᵾⱡ kᵾn, kongun tambuⱡa, en enim Jura wamp kᵾⱡ kᵾn, kongun itmin nᵾtᵾng. 10 Ik tenda ti, tᵾn kᵾn nᵾk ngurung ei, wamp kurpa mbᵾ nga tᵾp rᵾpᵾndᵾmᵾn nᵾtᵾng. Ei na nga numan ila ronduⱡ mundᵾp elimba, nᵾmp pᵾt uⱡ ei.

Pol Ndi Pita Andiyok Kona Ila Ik Ngurum

11 Pita Andiyok kona ila urum ni kᵾn, na ndi, elim ⱡawa itim uⱡ ei nga pilip kᵾn, keta ila kun nont ndup ik mura ngur. 12 Jeims nga wu kat tᵾpa mundrum kᵾⱡ, ya kona ila ok ruk ui nᵾwi kᵾn, Pita mbo wamp rᵾⱡaip kᵾⱡ kᵾn, kup etpa rᵾng nurum. Wote, Jeims nga wamp kᵾⱡ orung ei kᵾn, Pita kᵾn kup etᵾk morung wamp kᵾⱡ wak rurum. Ei nambuⱡ emel, orung wamp kᵾⱡ nga kat kᵾng kupti uⱡ ei nga etmin. Mbo wamp mbᵾ pora, iteing nᵾk minal pᵾtmin ei nga, Pita ndi, pilpa mundmong etpa, mbo wamp kᵾⱡ wak rurum. 13 Ni kᵾn, Jura wamp kat Pita nga ik kol ropa itim uⱡ ila kunda etᵾng. Uⱡ etᵾng ei ndi, Barnapas omba tilinga, wamp kᵾⱡ kᵾn omba kup itim. 14 Na ndi, kᵾndᵾr mel, rᵾnang ik kai ei nga nombuⱡa mam kupa ei, wak roⱡmina kandᵾp, wu kᵾⱡ pora kandᵾk moⱡina, Pita kundᵾp nᵾnt mel, “Nim Jura wu ei, wote mbo wamp kᵾⱡ mel pek morᵾn, Jura wamp etmin ei mel mon. Namba uⱡ etkᵾn nim ndi, mbo wamp kᵾⱡ etkᵾn, Jura wamp rᵾndᵾn en?” nᵾnt.

Mondpa Pili Uⱡ Ila Mint Got Ndi, Wamp Pora Etpa Tᵾmba

15 Kupa, tᵾn Jura wamp mendpᵾⱡ kᵾⱡ, wote mbo wamp uⱡ kit etmin mbᵾ mel mon. 16 Tᵾn pora pᵾtmᵾn ni, wamp ti, mi ik ila pilpa pep ropa, Got nga mong waⱡ ila, kun kai muⱡi nambrᵾm mon. Wote, Jisas Kraist kᵾn mondpa pili uⱡ ila, kun kai moⱡmba. Tᵾn kunda ku, Jisas Kraist kᵾn mondpa pili uⱡ ila, Got kᵾn kun kai mormun ei, Kraist Jisas kᵾn mondpa pili uⱡ ila etᵾm. Wote, mi ik ila nᵾtᵾm ei mel mon. Mi ik pep rui uⱡ ila, wamp ti, Got nga mong waⱡ ila kun kai muⱡi nambᵾⱡᵾmba. 17 Wote, tᵾn Kraist ndi, etpa tᵾmba nimbun mondᵾp pᵾtmᵾn. Ei kᵾn, Jura wamp mbᵾ nga mong waⱡ tᵾn uⱡ ⱡawa ti etmin. Ei mbo wamp mbᵾ, mi ik pep rui narᵾrᵾmᵾn ei mel, tᵾn i ku etmin. I elimina ndam, Kraist ei, uⱡ kit mbᵾ nga paka rondrum ku nilimina. Ei ama mon!

18 Wote na ndi, mel ti rokᵾtᵾp mana tit ei, aldpa oⱡa tᵾp rᵾkimp int ndam, uⱡ ei ndi, ora ndupa, na mi ik ei rop puⱡa ror. 19 Mi ik ei ndi, na ropa kondpa pora ndurum. I itim uⱡ ei ndi, na akup Got nga nᵾmp kont mbo mor. 20 Na kunda, Kraist kᵾn nde peta ila rorung. Ei nga, akup na kont mor uⱡ ei, nanim muⱡi nambᵾr mon. Kraist ei na nga rukᵾr orunga moⱡnga mor. Akup ui ila, kᵾng orunga kont mor uⱡ ei, na nga mondpa pili ila mendpᵾⱡ mor. Na Got nga kangᵾm kᵾn mondᵾp pilip et uⱡ ei, na numan ngumba. Wote, elim nga kᵾng orunga, wak ropa na nga nimba kurum. 21 Got nga wamp poⱡ ti uⱡ ei, wak rui narᵾnt. Mi ik mbᵾ ndi, uⱡ kun kai mbᵾ, etpa oⱡa tᵾtᵾm ndam, Kraist ei wei kai kandpa kurum.

Copyright information for `MED