Galatians 6

Angmᵾn Wamp Mat Nga Mbun Koma Rundᵾmin

Angmᵾn, wamp nam ti ndi kᵾnangina, uⱡ ⱡawa na ti em ndam, enim Muⱡnga Wingti tek mormun wamp kᵾⱡ ndi, ⱡawa em wamp ei raka raka nᵾk, tᵾk kun mundᵾi! I etᵾk kᵾn, enim nga orunga oⱡa tᵾpa kᵾni uⱡ ila ruk ping ei nga, tᵾk mendᵾk muⱡᵾi! Enim ndi, wamp ti nga mbun tᵾm ila ruk puk tᵾk rᵾpᵾndᵾi! I eng uⱡ ei ndi, Kraist nga mi ik tepa nᵾtᵾm ik ei, omba kupa etmba. Wamp nam ti ndi, elim wamp nuim ti mor ku nimba pᵾtᵾm ni, mon. Wote, el elim ik kol ropa ngorum. Enim wamp tenda tenda ei, nim kongun etᵾn ei nga puⱡ orunga nim ninim pili! Wote, kai morᵾn ndam, numan kai tangga muⱡi! Wote, kai mᵾn uⱡ ei, wamp ti kᵾn kapⱡa mindi nᵾmᵾndi! Nambuⱡ emel, wamp tenda tenda nᵾk mbun mbᵾ, en enim koma rormᵾn.

Got nga ik pilpa ti wamp kᵾⱡ, enim nga mel kai mbᵾ, ik mbo wamp mbᵾ kᵾn mok rᵾi! En enim nga ik kol ei, pep rui nᵾrᵾi! Got ei, tᵾk ik kulding wu ti, muⱡi nambrᵾm. Wamp ti, rᵾng mbo mundrum ei, rᵾng mbo ei ku, oⱡa oⱡnga tᵾpa norum. Wamp nam ti ndi, elim nga kᵾng orunga minal pilpa, rᵾng mbo mundum ndam, rᵾng mong kandpa tᵾmba ei, wamp kui nga uⱡ ei, kandpa tᵾmba. Wote, wamp nam ti ndi, Muⱡnga Wingti nga ik ei pilpa, rᵾng mbo ou ndupa mundum ndam, ila rᵾng mong kai ropa ngumba. Ei kᵾn, uⱡ nga kᵾnt nga kont mba mul uⱡ ei, kandpa tᵾmba. Ei nga, tᵾn uⱡ kai itmin mbᵾ nga rᵾn kuⱡi naⱡpᵾn. Uⱡ kai mbᵾ etpᵾn mint muⱡmᵾn ndam, ui kupa ei, ekit om ei kᵾn, tᵾn nga uⱡ kai imᵾn mbᵾ mel, rᵾng mong kai mbᵾ, rangga kandᵾp timin. 10 Wote ui mbila, uⱡ kai mat tᵾn itmin mel em ndam, wamp mbᵾ kᵾn pora, iti uⱡ kai mbᵾ etpᵾn mbun, Nuim ei nga mondpa pili wamp kᵾⱡ kᵾn minal itᵾmin.

Rawe Ik Nimba Pora Ndurum

11 Mon ou kat, na nga ki mendpᵾⱡ ila ront kᵾⱡ, enim kᵾnᵾi! 12 Wu mat ndi, en enim nga kᵾng orunga, mek oⱡa puk enmin mbᵾ ndi, enim kᵾng kupti uⱡ ila, mek ruk ping enmin. I etᵾk enmin uⱡ puⱡ ei, Kraist nga nde peta koma rok mbun mindil ti, uⱡ ei ti nᵾtmin nᵾk etmin. 13 Kᵾng kupti uⱡ ila mormin wamp mbᵾ kep, mi ik mbᵾ pep rui narᵾrmin ku. Wote wamp mbᵾ ndi, enim Galesiya wamp mbᵾ, kᵾng kupti uⱡ ei tangina, ya uⱡ ei nga, en enim kaip ninding nᵾk etmin. 14 Wote, na ei mel mon. Nuim Jisas Kraist nga nde peta ei nga rom kaip mbᵾ, nindimp mint. Kraist nga nde peta ila, ya mᵾi kona uⱡ kai, na nga numan ila orum mbᵾ, koⱡpa pora ndurum. Wote, mᵾi kona wamp mbᵾ nga kuimp keta ila, na wamp kui mel mor. 15 Kᵾng kupti uⱡ ila moⱡung ndam kep, wote muⱡi nambᵾⱡmᵾn ndam kep, uⱡ ti pi iti napᵾmba. Got ndi, tᵾn etpa kont mundᵾmba uⱡ ei, tᵾn kᵾn kont mba pemba. 16 Wamp nam ti, ya ik nᵾnt kᵾⱡ, pep rok moⱡung ndam, Got nga moⱡpa kundi uⱡ ei kᵾn, kont kaimp kul uⱡ mbᵾ, kan piyangga! Wote, Got nga wamp mbᵾ pᵾkᵾ, uⱡ tenda ei ndi, tᵾpa tenda etangga! 17 Akup ui ei kᵾn, wote ui ila wamp ti, na kᵾn ik ti ni nanᵾmba! Nambuⱡ emel, na nga kᵾng ᵾrᵾⱡa kat petᵾm kᵾⱡ ndi, ora ndangga. Kandᵾk kᵾn, na Jisas nga kindmant wu kupa ei mor nᵾk piling. 18 Na nga angmᵾn, Nuim Jisas Kraist nga poⱡ ti uⱡ mbᵾ, enim kᵾn kan piyangga! Ei kupa.

Copyright information for `MED