Hebrews 1

Got Kangᵾm Ndi, Ik Nimba Tᵾn Ngurum

Unt kor nga, tᵾn nga anda kouwᵾmᵾn Jura wamp morung ui ei kᵾn, ui ou ndupa, Got ndi, ik mat painui wu mbᵾ nga keta ila nimba ekit nduⱡnga pᵾtᵾng. Wote akup, ui pora nimba enim ila, Got ndi, elim nga kangᵾm ei nga keta ila, ik nimba tᵾn ngonum. Wote, ui pora nim kᵾn, kangᵾm ei ndi, mel mbᵾ pora, elim rᵾp itangga nimba tᵾpa mundrum. Wote, kangᵾm ei ndi, muⱡ mᵾi raⱡ mim itim. Got nga uⱡ eng nui mbᵾ pora, kangᵾm kᵾn tepa rᵾⱡang purum. Uⱡ ei ndi, kangᵾm ei, Got nga uⱡ eng nui mbᵾ pora, elim kangᵾm morum ei mel, tᵾn tᵾpa ora ndonᵾm. Elim nga ik ei, ronduⱡ minal petᵾm ei ndi, mel mbᵾ pora, etpa ronduⱡ mundrum. Wote, tᵾn wamp mbᵾ nga uⱡ kit wak rui uⱡ ei, etpa pora ndupa, elim muⱡ kona Got wu ronduⱡ pi, ei nga ki mbo orunga, wu nuim mumuk oⱡa orunga ei morum.

Got Kangᵾm Ei Ndi, Anggelo Mbᵾ Pora Tᵾpa Mana Ndupa Morum

Got ndi, kangᵾm mbi ou kai ti ngurum. Uⱡ ei ndi, anggelo mbᵾ nga mbi mbᵾ ropa mana ndupa, elim oⱡa orunga Wu Nuim ei morum. Unt Got ndi, Jisas kundpa, nimba mel,

“Nim na nga Kangᵾm ei, akup na nim nga Tipanᵾm ei,” nitim.
Aldpa Got ndi, nimba mel,

“Na nim nga Tipam ei mor, nim na nga kangᵾm ei muⱡi,” nitim.
Ik ei, Got ndi, anggelo ti, kundpa ni nᵾndᵾtᵾm mon.
Wote Got ndi, elim nga kangᵾm kumina tenda ei, mᵾi kona ila ngumba mana ndupa, nimba mel,

“Got nga Anggelo mormin mbᵾ ndi pora, wu ei nga mint mbi paka rundeing,” nitim.
Wote Got ndi, elim nga anggelo mbᵾ kundpa, nimba mel,

“Kona kᵾpkᵾ mel nimba, wote elim nga kongun kindmant wamp mbᵾ kundpa, ndip anmbil mel kapⱡa,” nitim.
Wote Got ndi, kangᵾm kundpa, nimba mel,

“Nuim Got Wu Nuim Mumuk ei, rᵾk rᵾk molkᵾn mint pukᵾn! Nim nga wamp tᵾpa mumuk rui uⱡ ei kᵾn, uⱡ kᵾn kai mbᵾ kᵾn, nokundkᵾn moⱡᵾn mint pin,” nitim.
Wote Got ndi, kangᵾm kundpa, nimba mel,

“Nim uⱡ kun kai mbᵾ numan ngukᵾn, uⱡ kit mbᵾ numan ngui nganggᵾrᵾn. Ei nga, Got ei, nim nga Got ei ndi, wamp wei mbᵾ kelpa, nim mbi ropa tᵾpa ambuⱡpa pᵾl kopung ei, nim kᵾn oi ndurum,” nitim.
10 Aldpa Got ndi, kangᵾm kundpa, nimba mel,

“Wu Nuim ye! Unt kuimp tepa nim ndi, mᵾi mim itin. Wote, nim nga ki raⱡ ndi, muⱡ ei itin.
11 Muⱡ mᵾi raⱡ pora ninggil, wote nim rᵾk rᵾk molkᵾn mint pin, muⱡ mbal na, ti ping norum ni mel, muⱡ mᵾi raⱡ ping nomba. 12 Nim ndi, kᵾnᵾng mat na ti, ambulk mᵾkᵾp rorᵾn uⱡ ni mel, muⱡ mᵾi raⱡ ambulkᵾn mᵾkᵾp ruin. Wal pᵾki unt nga na kat, mundᵾk kelik, kont kat yant tᵾk etmin. Uⱡ ni mel, nim ndi, muⱡ mᵾi raⱡ i ku itin. Wote, nim rᵾk rᵾk molkᵾn mint pin. Nim nga ui ti pora ni nanᵾmba, mon,” nitim.
13 Unt Got ndi, kangᵾm kundpa, nimba mel,

“Nim tᵾp na nga ki mbo orunga mundamba kᵾn, nim nga el rui wamp mbᵾ, nim nga kᵾmp puⱡ ila muⱡeing,” nitim.

Wote Got ndi, elim nga anggelo tenda ti, ik ei mel kundpa, ni nᵾndᵾtᵾm mon.
14 Anggelo mbᵾ namba mel? Muⱡnga ei ndi, anggelo mbᵾ nga, Got elim kindmant kongun endᵾtmᵾn. Got ndi, wamp mat etpa rukᵾr tᵾtᵾm wamp mbᵾ, tᵾk rapᵾndᵾk etmin.

Copyright information for `MED