Hebrews 2

Got Ndi, Tᵾn Rukᵾr Titim Ei, Uⱡ Mam Ti Itim

Uⱡ ei nga, tᵾn ik kupa pitmᵾn kᵾⱡ, ambuⱡpᵾn gi ndupᵾn pep rᵾmin. Tᵾpa kawa ndangga, ik kᵾⱡ pep ruimin uⱡ ei, wak ruimin. Unt Got ndi, anggelo mbᵾ, ik mbo rundrᵾm ila, tᵾn nga anda kouwᵾmᵾn mbᵾ ndi, nᵾtᵾng ik ei, ronduⱡ mba petᵾm. Ik ei, tᵾk roi nduk etᵾng wamp mbᵾ, en enim nga uⱡ kit etᵾng mbila, Got ndi, punt ropa mbun ngurᵾm. Akup Got ndi, tᵾn rukᵾr titim uⱡ ei, kongun mam ti itim. Got nga kongun em uⱡ ei, tᵾpᵾn mbuⱡ ngumᵾn ndam, wote tᵾn ndi, Got nga popᵾⱡ mbᵾ, nambuⱡ ti etpᵾn kᵾn, mondpᵾn mbin. Ei kapⱡa mon! Unt Got elim ndi, tᵾn rukᵾr tᵾmba itim ei kᵾn, Nuim elim nga ik ei, pᵾtᵾng wamp mbᵾ ndi, tᵾn kundᵾk nᵾk mel, ik ei ama kupa mint nᵾtᵾng. Ei kᵾn, Got nga Rᵾnang Ik Kai ei, kupa nimba ronduⱡ mundpa. Wote, uⱡ rᵾpndi elpa elpa mat etpa, Muⱡnga Wingti nga gem ngui uⱡ ei, wamp mbᵾ kᵾmp tᵾpa, elim nga numan ila pᵾtᵾm ei mel ngurum.

Wamp Etpa Ti Uⱡ Ei Nga, Kuimbal Morum Ei, Jisas Kraist

Mᵾi kont ti, wote wengᵾndupa ekit omba enim ei nga, tᵾn akup ninmᵾn. Got ndi, anggelo mbᵾ kundpa, mᵾi ei rᵾp itᵾi ni nanᵾmba mon! Wote, Buk Wingti ila ik ti ndi, nimba mel,

“Got ye! Tᵾn wamp mbᵾ, namba mel ti nᵾkᵾn pᵾtᵾn? Wu ei nga kangᵾm ei, namba mel ti nᵾkᵾn, nim ndi, rᵾp etᵾn.
Ui onunga etpa ila nim ndi, wu ei tᵾkᵾn, anggelo mbᵾ nga mana orunga mondkᵾn, uⱡ eng nui mbᵾ ngukᵾn, mbi ou ngukᵾn etᵾn. Mᵾi kona mel mbᵾ pora, etpa wamp ei nga, mana orunga tinditim. Got ndi, mel mbᵾ pora, etpa titim uⱡ ei, wamp ndi, rᵾp etᵾk nokundᵾk tangina kᵾn, mel mat nᵾwᵾ ti nᵾtangga!” nᵾtᵾm.
Wote, akup mel mbᵾ pora, wamp ndi, rᵾp enmin nᵾmp kᵾni nakᵾnmᵾn.
Wote, tᵾn Jisas kanmᵾn ei, unt ui onunga kot ila, anggelo mbᵾ nga mana orunga moⱡpa, Got nga wamp poⱡ ti uⱡ ila, wamp mbᵾ nga nindpa mindil nomba kurum. Uⱡ ei nga, Got ndi, elim nga mbi paka rondpa, uⱡ eng nui mbᵾ ngumba, mbi ou ti ngurum.

10 Mel mbᵾ nga puⱡ ei, Got morum. Got elim nga wamp mbᵾ, mepa wi muⱡ kona pangga kᵾn, Kraist nga mon pi uⱡ ngumba ei nga itim. Nambuⱡ emel, Got ndi, Jisas mindil nangga nitim uⱡ ei, wamp mbᵾ nga tᵾpa rak ndupa, kuimbal moⱡpa, wamp mbᵾ etpa rukᵾr tᵾmba uⱡ ei nga itim. Got nga uⱡ itim ei, kun mint purum. 11 Kraist ei ndi, tᵾn wamp mbᵾ, uⱡ kit mbila, etpa tᵾpa kun kai mundrum. Wote, Jisas kᵾn wamp namin mat, etpa kun kai mondrum mbᵾ kᵾn, tᵾn nga tipam rak ndupa wu tenda ei, Got elim morum. Ei nga, Jisas ndi, tᵾn wamp mbᵾ tᵾpa elim nga ᵾngᵾnᵾl randᵾmba. Ei nga, Jisas pipil ti, kuⱡi naⱡᵾmba mon! 12 Nambuⱡ emel, Jisas elim ndi, nimba mel,

“Got nim nga mbi ei, wamp ᵾngᵾnᵾl mbᵾ kᵾn nᵾmp nguimp. Wote, wamp mou rong kona ila, na ndi, nim nga mbi ei, paka rondᵾp nindimp,” nᵾtᵾm.
13 Wote, aldpa nimba mel,

“Na nga mondpa pili ei, Got kᵾn timp.”
Aldpa nimba mel,

“Got ndi, na nga kangambuⱡa ngurum mbᵾ kᵾn, kunda rᵾp rop mormin,” nᵾtᵾm.

Jisas Ni Omba, Wamp Raⱡpa Moⱡpa, Tᵾn Tᵾpa Rᵾpᵾndrᵾm

14 Jisas ndi, kangambuⱡa mbᵾ kundpa, kᵾng ila mema pi wamp mbᵾ nitim. Wote Jisas elim tᵾn wamp mbᵾ mel, kᵾng na mema na mbᵾ mel ku kᵾng kᵾrᵾm. I itim uⱡ ei ndi, elim mindil nomp koⱡᵾp kᵾn, wamp kui nga ronduⱡ ei, Seitan tepa morum ei, rop mana nduimp nimba itim. 15 Jisas ndi, i etpa kᵾn, wamp mat wamp kui nga uⱡ ei ndi, etpa mundmong endilinga, kindmant wamp ralk morung mbᵾ, kan tinga ndupa titim. 16 Jisas ndi, uⱡ itim ei, anggelo mbᵾ tᵾpa rᵾpᵾndi napᵾndrᵾm mon. Aparam nga wamp pundᵾn mbᵾ tᵾpa rapᵾndrᵾm. 17 Uⱡ ei nga puⱡ ila, Jisas nga ik nimba uⱡ itim mbᵾ pora, elim nga wamp ᵾngᵾnᵾl mbᵾ, etmin uⱡ mbᵾ mel itim. I itim uⱡ ei ndi, Wu Pris Kuimbal moⱡpa, Got nga kongun endpa, kai mondpa, wamp kont kuⱡᵾp itamba. Got ndi, wamp mbᵾ nga uⱡ kit mbᵾ, pendpa kilangga nimba itim. 18 Nambuⱡ emel, elim mbun urum mbᵾ, koma ropa mindil nomba itim. Uⱡ ei mel, akup wamp mbᵾ nga mbun tᵾk, mindil normin uⱡ mbᵾ, kapⱡa tᵾpa rapᵾndᵾmba ku.

Copyright information for `MED