Hebrews 6

Tᵾn Nga Mondpa Pili Ronduⱡ Ei, Ambuⱡpᵾn Gi Ndᵾmin

Wote, tᵾn Kraist nga ik kuimp tepᵾn pitmin mbo rondrᵾng ik ei ndi, nimba mel, numan ropᵾl rok uⱡ kont pi napᵾrᵾm mbᵾ, wak rok uⱡ wamp nu tindi uⱡ, wamp ambulk atinga rundi uⱡ, wamp koⱡpa kont pi uⱡ, wote Got nga wamp kᵾmp ti uⱡ ei, rᵾk rᵾk pepa mint mba ei nga pᵾtmᵾn. Ik mbᵾ nga wote, int mbun ni nᵾnmᵾn mon. Akup ei kᵾn, Got nga ik mong ronduⱡ mbᵾ, pilip tᵾpᵾn ronduⱡ mbun pep rᵾmin. Got ndi, elim nga ik ila ronduⱡ puk, pep rui nilinga ndam, tᵾn kapⱡa pep roⱡmina ku.

Unt wamp mat, Got ndi, wamp mbᵾ nga numan orunga kumba tindilinga kᵾn, elim nga ik ei pilik mbi ndurᵾng. Got nga gem ngui ei, muⱡ kona mana urum ei tᵾk, Muⱡnga Wingti tᵾk etᵾng. Wote, Got nga ik ei, pilik kai pᵾtᵾng. Got nga tᵾpa mumuk rui uⱡ ronduⱡ omba ei, pilik pora ndurᵾng. Uⱡ i etᵾk, wote uⱡ kit ila pung ndam, Got tᵾk mbuⱡ nguk iting. Wote yant ok, numan ropᵾl rok iting ei nga nombuⱡa mam ti, ti natᵾtᵾm, mon. Nambuⱡ emel, en enim nga uⱡ kit etmin mbᵾ ndi, ropᵾl rok, Got nga kangᵾm ei, nde peta ila aldpa nil rok, mint muⱡing. Wote, wamp mat ndi kandᵾk, Got nga kangᵾm tᵾk mbuⱡ ngᵾk, ik mbuldung nundᵾk etmin.

Uⱡ ei mel ku, ui mbila, kona ndamᵾng rorum ei kᵾn, mᵾi mbᵾ nu pepa, pana rᵾng kai mat oⱡa oⱡnga kᵾn, wamp pana rᵾng rarmin mᵾi ei, Got ndi, etpa kai mondrum. Wote mᵾi ti, goimbun rong na, eta oⱡa omba etᵾm ei, mᵾi kai ti mon. Mᵾi ei kit moⱡpa, pora ndurum. Ei nga wote, Got ndi, etpa kit mundangga kᵾn, ndip ndi, nomba pora ndumba.

Wamp mᵾn mul kᵾⱡ ye! Wote, tᵾn ik i etpᵾn nimin uⱡ ei, Got ndi, enim memp pendpa, etpa rukᵾr tᵾmba uⱡ ei nga pilpᵾn nᵾnmᵾn. 10 Enim nga kongun etmin, wote Got nga wamp mbᵾ kᵾn, numan ngok uⱡ kai etᵾng. Uⱡ ei, etᵾk ku mormin. Got ei, wu kun kai morum ei ndi, enim tᵾpa apra ndui nandpa, punt romba mint. 11 Wote, tᵾn numan ei ndi, enim kᵾn ronduⱡ mundpᵾn pᵾnmin uⱡ ei, enim ndi, wamp numan nguk, uⱡ kai etmin uⱡ mbᵾ, etᵾk mint pangina kᵾn, enim nga ui ei pora nangga. Wote Got ndi, enim mel kai mat nokᵾndmᵾn mbᵾ, punt ropa ngumba. 12 Wote tᵾn ndi, pᵾnmin ei, enim enimp mundi namᵾndᵾk, wote wamp mat nga mondᵾk pᵾtmᵾn uⱡ mbᵾ kᵾn, nokᵾndmᵾn mel mbᵾ kandᵾk, enim pep rong ndam, Got ndi, nguimp nimba mᵾi rurum mel mbᵾ, kapⱡa ting.

Got Ndi, Nimba Mᵾi Ropa Nitim Ik Ei, Tᵾn Mondᵾp Pilamin

13 Unt Got ndi, Aparam kᵾn nimba mᵾi ropa nitim ik ei, wamp nuim elpa, ti nga mbi tepa angᵾndpa ni nᵾndᵾtᵾm ei mon. Nambuⱡ emel, nuim wu ti, i etpa muⱡi nambᵾrᵾm ei nga, Got elim nga mbi ila tepa angᵾndpa, ronduⱡ mundpa nimba mᵾi ropa nitim. 14 Got ndi, nimba mel, “Na ik kupa ei nᵾnt. Na ndi, nim memp mam ti nguimp. Wote, nim nga wamp pundᵾn minal kalk ting,” nitim. 15 Got ndi, Aparam kundpa nitim ik ni pilpa kᵾn, enimp kuⱡi naⱡᵾpa nokundpa moⱡnga, nitim ik nimbᵾ, omba kupa itim.

16 Ni kᵾn, wamp nam ti ndi, nimba mᵾi ropa ik nᵾtᵾm ei kᵾn, elim nga ik ei kupa itangga nimba kᵾn, wu nuim ou ti nga nimba, mbi ropa angᵾndpa nilinga, pᵾtmin wamp mbᵾ ndi, elim nga ik ei, kupa nᵾk pᵾtmᵾn. 17 Unt Got ndi, tᵾn Aparam nga wamp rᵾⱡaip mbᵾ kᵾn, nimba mᵾi ropa, enim tᵾp nguimp nitim. Nitim uⱡ ei mel akup, tᵾn kᵾn kupa etᵾm. Elim nga nimba mᵾi ropa nitim ik ei, ronduⱡ purum. 18 Ei nga, Got nga ik raⱡ nimba pinditim ei mel petᵾm. Nambuⱡ emel, Got ndi, ik raⱡ kol ropa ni nᵾndᵾtᵾm mon. Uⱡ ei ndi, tᵾn wamp nga mundmong orunga etpa, ronduⱡ mundangga kᵾn, tᵾkᵾrpᵾn mbun, Got kᵾn nondpa mou ruimin. Wote, tᵾn nga numan orunga, Got ndi, nguimp nitim mel mbᵾ, ambuⱡpᵾn gi ndupᵾn nokᵾndamᵾn! 19 Got ndi, mel kat, tᵾn nokundᵾk muⱡᵾi nitim kᵾⱡ, wamp kont mul uⱡ ei, tᵾn nga mundmong ila, gi nimba muⱡangga kᵾn, manga kᵾkaⱡ wingti, ila muⱡ mbal mam ti, kuipa rok mondᵾrmin ila rukᵾr mbin. 20 Jisas ndi, tᵾn tᵾpa rapundpa kᵾn, unt elim rukᵾr purum. Wu Pris Kuimbal Melkisendek nga murum uⱡ ei mel, rᵾk rᵾk moⱡmba purum.

Copyright information for `MED