Hebrews 7

Melkisendek Ni, Wu Pris Kuimbal Murum

Melkisendek ni wu ei, Salem kona ei nga, wu nuim mumuk ei moⱡpa, Got Oⱡa Orunga ei nga wu pris kuimbal moⱡpa itim. Aparam ndi, unt wu nuim mumuk tᵾmbᵾkak mbᵾ kᵾn, el ropa wote, wu mbᵾ ropa kondpa kᵾn, kelpa mang kona mbi nimba, mba nombuⱡa mam ila, wu Melkisendek kandpa tilinga, wu Melkisendek ndi, Aparam ni memp pinditim. Wote Aparam ndi, el etpa andpa, mepa urum mel nimbᵾ nga mat, kᵾmp tᵾpa, 10 endpa, tenda Melkisendek ngurum. Melkisendek nga mbi tek nᵾtᵾng, kuimp tepa puⱡ ei, “Uⱡ kᵾn kai mbᵾ nga wu nuim mumuk,” nᵾk, wote Salem kona ei nga wu nuim mumuk nᵾk etᵾng. Uⱡ ei, i ku etᵾk, ropᵾl rok kᵾn, “Numan wang ndui uⱡ ei nga wu nuim mumuk,” ei nᵾtᵾng. Melkisendek nga tipam mam ralt mon, anda kouwᵾ ti mon ku. Mam ndi, mitim ui ti mon. Wote, kurum ui ti mon. Wote, Melkisendek nga murum timan mbᵾ, tᵾn pi napᵾtmᵾn. Wu ei, Got Kangᵾm nga morum uⱡ ei mel, rᵾk rᵾk wu pris kuimbal morum.

Enim pilik kun itᵾi! Melkisendek ni, wu ei mbi murum. Tᵾn nga kaⱡpa titim anda kouwᵾ kuimbal Aparam ni, wu ei mbi murum ku. Wote Aparam ndi, el etpa andpa mel kai mat titim mbᵾ kᵾmp tᵾpa, 10 endpa, tenda Melkisendek ni ngurum. Wote, Lipai wamp mbᵾ nga kangᵾmᵾl mbᵾ, pris kongun ei mint etmin. Mi ik ei ndi, wamp mbᵾ kundpa, Isrel wamp mbᵾ nga mel 10 endpa, tenda kᵾmp tᵾk, Lipai wamp mbᵾ, ngᵾi mint nᵾtᵾm. Isrel wamp mbᵾ, Lipai wamp mbᵾ nga ᵾngᵾnᵾl mendpᵾⱡ mbᵾ. Aparam nga wamp kaⱡpa titim mbᵾ nga, wote Isrel wamp mbᵾ ndi, Lipai wamp ᵾngᵾnᵾl mbᵾ nga mel mbᵾ, kᵾmp tᵾk nguing mint, nᵾtᵾm. Melkisendek ni, wu ei, Lipai wamp rᵾⱡaip kᵾⱡ nga wu ti mon. Wote Aparam ei, Got nga memp minal titim wu ei ndi, mel 10 endpa, tenda kᵾmp tᵾpa ngurum mbᵾ tᵾpa, wote Aparam memp pinditim. Tᵾn pitmᵾn ei, wu ti memp pendᵾtᵾm ei, oⱡa orunga moⱡnga kᵾn, memp pendᵾtᵾm wamp mbᵾ, wu ei nga mana orunga mormin. Isrel wamp mbᵾ nga mel 10 endpa, tenda Lipai wamp mbᵾ ndi, tᵾtmᵾn uⱡ ei, wamp kormin mbᵾ nga mel mbᵾ tᵾtmin. Wote Melkisendek ndi, mel 10 endpa, tenda tᵾtᵾm. Wote, elim nga timan ei pᵾtmᵾn ei kᵾn, wu ei, rᵾk rᵾk kont mba morum.

Tᵾn ndi, kapⱡa ik ei mel nilimina ku, Lipai nga pundun mbᵾ ndi, Isrel wamp wei mbᵾ nga mel 10 endpa, tenda tᵾtmᵾn ku. Wote, unt Lipai mi nᵾmi kᵾn, elim nga anda kouwᵾ Aparam ndi, Melkisendek mel 10 endpa, tenda ngurum. Uⱡ ei ndi, pepa kᵾn, Lipai elim nga anda kouwᵾ Aparam nga mema rukᵾr ila murum. Ei nga, Melkisendek ndi, Aparam nombuⱡa mam ila kandpa titim ui kᵾn, Lipai ndi, mel 10 endpa, tenda ti ngurum ku nimbun pilmin.

Jisas Ni, Wu Pris Melkisendek Mel Kapⱡa

11 Isrel wamp mbᵾ, unt mi ik ei, pilik tᵾtᵾng ei ndi, wamp mbᵾ kundpa nimba, Lipai wamp mbᵾ pris kongun ei nga mint iteing nᵾtᵾm. Pris kongun etᵾng uⱡ ei ndi, wamp mbᵾ molk, kun kai monduⱡnga ndam, wote Got ndi, nambuⱡ emel, wu Eron mel ti, ngumba mundi namᵾndpa, aldpa Melkisendek mel wu ti, tᵾpa mundrum ei ka! 12 Wote, wu pris kont nga ti moⱡum ndam, mi ik kont nga ti ku pemba. 13 Wote, tᵾn nga Nuim ndi, wu ti ninim ei, Isrel wamp rᵾⱡaip elpa kat nga, wote wu ei nga rᵾⱡaip ila, wu ti rat pol ila moⱡmba. Unt wu pris kᵾⱡ, kongun etᵾng uⱡ ei mel iti natᵾmba. 14 Tᵾn pilip pora ndurmᵾn ni ka! Tᵾn nga Wu Nuim ei, Jura wamp rᵾⱡaip ila oⱡa urum. Wote, Jura wamp rᵾⱡaip ila, pris kongun ei iteing nimba, Moses ndi, ni nᵾndᵾtᵾm, mon! 15 Wote, akup tᵾn ndi, kandᵾp mbi ndunmᵾn ei, wu pris kont nga ti, oⱡa omba ei ndi, Melkisendek mel kapⱡa moⱡmba. Nambuⱡ emel, wu raⱡ Lipai nga rᵾⱡaip ila mon. 16 Wamp nga uⱡ etᵾk, mi ik ei, pep rok, wu pris tᵾk mondurmin ei mel mon. Wote, wamp rᵾk rᵾk kont puk muⱡing ei nga ronduⱡ ila, rᵾk rᵾk Kraist ei, Pris moⱡmba. 17 Nambuⱡ emel, Buk Wingti ei ndi, nimba mel,

“Nim Melkisendek Pris murum ei mel, Pris rᵾk rᵾk molkᵾn mint pᵾn,” nᵾtᵾm.
18 Ni kᵾn, mi ik unt nga pris molk kongun etᵾng nimbᵾ, Got ndi, tᵾpa ekit ndurum. Uⱡ ei nambuⱡ emel, mi ik unt nga ei ndi, tᵾn tᵾpa rapᵾndᵾmba uⱡ ei nga ronduⱡ ei, kapⱡa mon! 19 Nambuⱡ emel, mi ik unt nga kᵾⱡ ndi, wamp ti etpa kun kai mundi nᵾmᵾndrᵾm, mon. Wote akup, uⱡ kai ti pilmin ei, Kraist ndi, tᵾn etpa kun kai mundangga, Got kᵾn nondpa mbin.

20 Wote, i ku etpa, Got ndi, nimba mᵾi rurum ni, Kraist ei, Pris rᵾk rᵾk muⱡangga nitim. Wote, wu Pris mat, Got ndi, ei mel Pris muⱡeing nimba, mi ik iti, ti nᵾtᵾtᵾm mon! 21 Wote Jisas ni, Got nga mi ik ronduⱡ ila Pris murum. Buk Wingti ila nimba mel,

“Wu Nuim ei ndi, mi ik ronduⱡ ti, tepa nitim ik ei, wak rui narᵾmba. Nim rᵾk rᵾk Pris muⱡᵾn,” nᵾtᵾm.
22 Tᵾn ndi pilamin, ik ronduⱡ nimba pinditim ei, Jisas kᵾn omba pena ila pitim. Uⱡ ei ndi, mi ik ei ropa mana ndurum. Wote akup, tᵾn etpa kun kai mondᵾmba ei nga, rᵾk rᵾk nokundpa morum.

23 Wote i ku, unt nga wu pris puⱡi molk, kongun etᵾng mbᵾ korung. Ei nga wote, rᵾk rᵾk pris molk mint pi naprᵾng. 24 Wote, Jisas nga pris kongun ila, rᵾk rᵾk moⱡpa mint purum. Ei nga, wu ti ndi, koⱡ ila tᵾmba mel, kapⱡa mon! 25 Uⱡ ei nga, Jisas ndi, elim nga mbi ila, wamp mbᵾ mepa, Got kᵾn nondpa omba. Nambuⱡ emel, elim ndi, rᵾk rᵾk moⱡpa, wamp mbᵾ etpa tangga nimba, Got kᵾn ronduⱡ mundpa, waldpa atinga rondrum. 26 Jisas wu Pris Kuimbal ei ndi mint, tᵾn tᵾpa rapᵾndᵾmba. Wu ei nga, uⱡ ⱡawa ti mon! Wu wingti eng nui kai ei nga, wu mat uⱡ kit etmin ei mel, iti nᵾtᵾtᵾm mon! Got ndi, Wu ei, muⱡ kona ila mbi ou ngurum. 27 Unt nga wu pris morung mbᵾ ndi, rᵾk rᵾk Got kᵾn angge nᵾk, kalk tindiⱡim mundrᵾng. Wu pris mbᵾ ndi, en enim nga uⱡ kit etmin mbᵾ, nᵾk para nduk kᵾn, unt kalk tindiⱡim mundrᵾng. Wote, wamp mbᵾ nga endᵾtᵾng. Wote, Jisas uⱡ ei mel, iti nᵾtᵾtᵾm mon! Jisas el elim nga kᵾng kᵾⱡ kᵾn, min ei kᵾn, ui tenda mint, Got kᵾn angge nimba, kaⱡpa tindiⱡim mundrum. 28 Moses nga mi ik ei ndi, wu ti to ropa, pris kuimbal mundrum mbᵾ, kun kai muⱡi nambᵾrᵾng. Wote, Got nga mi ik ronduⱡ, akil tepa urum ei ndi, Got Kangᵾm kun ei mundrum. Wu pris kuimbal kun kai ei, rᵾk rᵾk moⱡpa mint mba, pris nga kongun itim.

Copyright information for `MED