Hebrews 9

Mᵾi Kona Wamp Mbᵾ Ndi, Got Nga Mbi Paka Rondrᵾng

Got nga nimba mᵾi rᵾrᵾm uⱡ unt nga ila, elim nga mbi paka runding ei mel, ya mᵾi kona ila to ropa ngurum. Wote, wamp mbᵾ ndi, muⱡ manga ti rakᵾk kᵾn, manga kᵾkaⱡ kuimbal ila nga rat pol na, bret na, kiya kandᵾk, Got nga kuimp keta ila, mek puk tek etmin. Kona ei kundᵾk, Manga Kᵾkaⱡ Wingti, nᵾtmin. Manga Kukaⱡ rukᵾr orunga tila, muⱡ mbal ti, ku kuipa rok mondᵾrmin. Kona ei mbi tek, Manga Kᵾkaⱡ Wingti Kupa, ei nᵾtmᵾn. Rukᵾr orunga kona ila, tindiⱡim kai purum rat pol tetᵾm kᵾⱡ, gol ndi, mim etᵾk, eng nondrᵾng kᵾⱡ, tetᵾm ku. Wote, nimba mᵾi rui ik ei nga nde kes kᵾⱡ nga rukᵾr orunga ila, rᵾng ‘Mana,’ unt norung ei nga petᵾm, gol ming ti, titim ku. Wote, wu Eron nga ᵾpᵾⱡ ila, nde kit kit mat, unt oⱡa urum. Wote, Got nga mi ik mon ropa ngurum ku roⱡiya raⱡ, petᵾm ku. Wote, anggelo mel raⱡ to rok, etᵾk ou nduk, nde kes punt oⱡa orunga mondᵾrmin raⱡ ndi, to ropa mel, Got nga uⱡ eng nui mbᵾ, ila tetᵾm. Anggelo mel raⱡ nga mana orunga ila, nde kes pip rormᵾn kona ila, wamp nga uⱡ kit mbᵾ, wak rundangga nᵾk, etᵾng kona ei titim. Wote, akup tᵾn ndi, uⱡ ei nga pora, para ndup ni nᵾnmin.

Wu pris mbᵾ ndi, uⱡ mbᵾ mel etmin, rᵾk rᵾk ui mbila puk, muⱡ manga kᵾkaⱡ ekit orunga ila, mukᵾr puk, en enim nga kongun mbᵾ etmin. Wote, Wu Pris Kuimbal tenda ei mint, mbi paka manga kᵾkaⱡ wingti kupa ila mukᵾr purum. Uⱡ ei, pana tenda ila, mukᵾr mba tenda ku etᵾm. Wei nᵾwᵾ mukᵾr pi napᵾrᵾm, mon! Kng mema kuⱡpa mepa mba kᵾn, elim nga uⱡ kit etᵾm mbᵾ kᵾn, wote wamp mbᵾ nga uⱡ kit etmin mbᵾ, pili napilik etmin mbᵾ, Got ndi, etpa tangga nᵾk, kalk tindiⱡim mundrum. Uⱡ ei nga, akup Muⱡnga Wingti ei ndi, tᵾn tᵾpa ora ndupa mel, mbi paka manga kᵾkaⱡ kuimbal ei, pris kongun etᵾk mint mormin. Ei nga, mbi paka Manga Kukaⱡ Wingti Kupa ei nga, mukᵾr mbin nombuⱡa mam ila, tᵾn kapⱡa pi nᵾpᵾmᵾn mon. Uⱡ etᵾk ormᵾn mbᵾ, akup ui ei nga to rondᵾk etmin. Unt kng meme na mat, Got kᵾn angge nᵾk nguk, kalk tindiⱡim mundᵾk etᵾng. Wote, mel mbᵾ ndi, mbi paka rorung wamp mbᵾ nga numan orunga, tᵾpa kun kai mundi nᵾmᵾndrᵾm mon. 10 Uⱡ etmin ei nga, unt kᵾng orunga tᵾn kun mundᵾk muⱡing ei nga mi ik mat nguⱡnga, wamp mbᵾ ndi, rᵾng nok, nu nok, kᵾmp ki ᵾlki rok, rᵾng nuing ei nga ui mat pendᵾtmᵾn. Wote ui tila, Got ndi, mbi paka rui uⱡ ei nga etpa kai mondᵾmba.

Kraist Jisas Nga Mema Ei

11 Wote, akup mbi paka rui uⱡ ei, omba kun kai enim. Ei nambuⱡ emel, Kraist ei, wi mul kona ila nga, mbi paka manga kupa ingk ila murᵾk mba, Pris Kuimbal moⱡpa, kongun elinga enim. Mul kona mbi paka manga ei, wamp nga ki ila rᵾki nᵾkᵾrᵾng. Wote, mᵾi kona ila mbi paka manga ti mon ku. 12 Kraist ndi, kng meme na, kau waⱡ na mbᵾ nga mema mbᵾ ndi, Got kᵾn angge nimba, kaⱡpa tindiⱡim mundpa tepa, Got nga Manga Kukaⱡ Wingti Kupa ila, mukᵾr pi nᵾpᵾrᵾm, mon! Jisas elim nga mema ei, tᵾngᵾnda mint oi ndupa kᵾn, kona wingti kupa ila rukᵾr mba, Kraist nga wamp etpa ti uⱡ nga kᵾnt nga kont mul uⱡ ei, tᵾn nga nimba nombuⱡa ei tᵾpa titim. 13 Unt wamp mbᵾ ndi, kng meme na, kng kau na mbᵾ nga mema mbᵾ tᵾk, wote kng kau waⱡ rok ndip karᵾng, ndip tap mbᵾ kᵾn, tᵾk wamp mbᵾ nga kᵾng orunga, eng nangga nᵾk, oi nduk ndanda ndurᵾng. 14 Uⱡ etᵾng mbᵾ, Kraist nga mema oi ndurum uⱡ ei ndi, ropa mana ndurum. Kraist nga uⱡ kit ti iti nᵾtᵾtᵾm, ama mon! Muⱡnga Wingti rᵾk rᵾk kont morum ei ndi, Jisas nga kont mul uⱡ ei, Got kᵾn angge nimba kaⱡpa tindiⱡim mundrum. Jisas elim nga mema oi ndurum uⱡ ei ndi, tᵾn nga numan orunga mint ⱡumᵾi rui nᵾrᵾrᵾm mon. Tᵾn nga numan orunga uⱡ kit etmᵾn mbᵾ, kunda ⱡumᵾi roⱡnga kᵾn, tᵾn ndi uⱡ kit mbᵾ wak ropᵾn, Got rᵾk rᵾk kont morum ei nga kongun endmin. 15 Uⱡ puⱡ ila nga, Kraist ei, wamp kᵾn, Got kᵾn, rᵾk ting ila moⱡpa, nimba mᵾi rui uⱡ kont ei, etpa ronduⱡ mundrum. I elinga, wamp namin mat, Got ndi, wi ropa titim wamp mbᵾ, uⱡ nga kᵾnt nga kont mul uⱡ ei nga memp teing nimba, mᵾi rurum ei ting. Uⱡ ei mel pemba. Ei nambuⱡ emel, Kraist kurum uⱡ ei ndi, wamp mbᵾ nimba mᵾi rui uⱡ unt nga ila molk, uⱡ kit etᵾng mbᵾ, kil ngumba tᵾpa mundrum.

16 Wu ti ndi, nimba kᵾn, na kunt ndam, na nga moiya mel mbᵾ nam tᵾmba. Mon ropa pendpa nimba mᵾi rorum. Wote, tipam korum kᵾn, kangᵾm ndi, tipam nga nimba mᵾi rorum ik ei, pep ropa kᵾn, tipam nga moiya mel mbᵾ tᵾtᵾm. 17 Wote, wu ei korum ei kᵾn mint, elim nga nimba mᵾi rorum ik ei ronduⱡ purum. Nimba mᵾi rorum wu ei, kont morum ndam, nimba mᵾi rorum ik ei nga, ronduⱡ ti mon. 18 Uⱡ ei mel ku, kng mbᵾ rok kondᵾk kᵾn, mema mbᵾ kulk, tᵾk oi ndurmin ila nga, nimba mᵾi rui uⱡ unt nga, ei ronduⱡ purum. 19 Unt kuimp tepa Moses ndi, mi ik mbᵾ, wamp mbᵾ kᵾn, mbo endpa pora ndupa kᵾn, wote kng meme, na kng kau waⱡ nga mema mbᵾ, kuⱡpa tᵾpa mbo nu ila, tᵾpa tenda etpa oi ndupa, nde Isop puⱡa ila nga, kng sipsip ndi mbᵾ tᵾpa, kan ropa mondpa kᵾn, kng mema ming ila mana ndupa, wote oⱡa tᵾpa buk na, wamp morung kona mbila, kopung kᵾⱡeing nimba ropa mundrum. 20 Wote Moses ndi, kng mema ei ropa mundpa, nimba mel, “Got nga nimba mᵾi rurum ik, enim pep ruing nitim ni, akup kng mema ei ndi, etpa ronduⱡ mundnᵾm,” nitim. 21 Wote Moses ndi, kng mema kuⱡpa tᵾpa manga wingti ei kᵾn, wote rukᵾr orunga tetᵾm mel mbᵾ kᵾn pora, ropa mundpa nimba mel, mel mbᵾ pora mema ei ndi, mint etpa eng nondᵾmba. 22 Mi ik ei, kng mema rok mundrᵾng ila mel mbᵾ pora, omba kai etmba. Wote, mel ti kuⱡi naⱡᵾpa mema oi ni nanim ndam, Got ndi, wamp mbᵾ nga uⱡ kit mbᵾ, wak rundi nandᵾmba.

Kraist Nga Mema Ei Ndi, Tᵾn Etpa Titim

23 Ya mᵾi kona ila manga wingti ei kᵾn, mel rukᵾr orunga tetᵾm ei mbᵾ pora, muⱡ kona ila mel tetᵾm mbᵾ nga, to rondpa telinga, Moses ndi, kaⱡpa tinditim mundi uⱡ itim mel mbᵾ ndi, etpa eng nᵾndrᵾm. Wote, muⱡ kona ila mel mbᵾ, etpa eng nondᵾmba uⱡ ei, muⱡ kona ila kaⱡpa tindiⱡim mundi uⱡ ronduⱡ, elim ti ndi, ku etmba. 24 Tᵾn pᵾtmin ei, Kraist ni, wamp ndi, muⱡ kona mel ei nga to tᵾndᵾk, manga wingti rakrᵾng tila, murᵾk pi nᵾpᵾrᵾm mon! Ei elim muⱡ kona ila, kun mba, tᵾn tᵾpa rapᵾndᵾmba ei nga, Got nga kuimp keta ila morum. 25 Pana ui mbila rᵾk rᵾk, Jura wu pris kuimbal mbᵾ ndi, kng mema kulk tᵾk, Got kᵾn kaⱡpa tindiⱡim mundᵾnmᵾn nᵾk, Got nga Manga Kᵾkaⱡ Wingti Kupa ila, mek purmin. Kng mema ei, en enim nga mema ti mon! Wote Jisas ndi, uⱡ etᵾng ei mel iti nᵾtᵾtᵾm, mon! Jisas el elim Got kᵾn angge nimba ngumba purum. Angge nimba ui mat ou ndupa, ngui ngᵾnggᵾrᵾm mon! 26 Muna ei mel elinga ndam, Got ndi, muⱡ mᵾi raⱡ puⱡ mondpa itim ei kᵾn, mindil pepa mint oⱡnga. Wote, uⱡ ei kelpa, akup ui pora nimba elinga, tᵾngᵾnda mint mᵾi kona ila mana omba, wamp nga uⱡ kit mbᵾ, pendᵾp kilimp nimba, elim nga kᵾng kᵾⱡ uⱡ kᵾrᵾm. 27 Wamp mbᵾ pora, kolk raⱡ indi nᵾnding mon! Tᵾngᵾnda mint kuⱡangina, wote Got ndi, wamp mbᵾ pora, kᵾmp tᵾmba. 28 Uⱡ ei mel ku, Kraist ndi, elim nga kᵾng kᵾⱡ, wamp minal nga, uⱡ kit etmin mbᵾ, pendᵾp kilimp nimba, Got kᵾn tᵾngᵾnda mint, kaⱡpa tindiⱡim mundrum. Kraist aldpa yant omba ei, uⱡ kit mbᵾ nga nimba ui nawᵾmba mon! Wamp elim nokundᵾk mormin mbᵾ, etpa tᵾmba ei nga omba.

Copyright information for `MED