James 1

Jeims Nga Mon Ti Rurum Ei

Na Jeims ei, Got kᵾn Nuim Jisas Kraist raⱡ nga kindmant wu ei mor. Enim Isrel wamp rᵾⱡaip 12 kᵾⱡ, mbuⱡ mbaⱡ nᵾk puk, kona mbila elpa elpa pek andᵾk mormun kᵾⱡ nga, rawe etᵾp mon ei, rop ngont.

Oⱡa Tᵾpa Kᵾni Uⱡ Ei Ndi, Mondpa Pili Uⱡ Ei, Etpa Ronduⱡ Mundrum

Na nga angmᵾn! Oⱡa tᵾpa kᵾni uⱡ elpa elpa mat, enim kᵾn om ndam, enim ambulk palk muⱡᵾi! Nambuⱡ uⱡ emel, enim nᵾk punmᵾn enim. Oⱡa tᵾpa kᵾni uⱡ mat, enim kᵾn om ndam, enim nga mondpa pili ei, etpa ronduⱡ mundᵾmba ei nga, enim nᵾk pilik ronduⱡ puk, mbun mbᵾ koma rok muⱡᵾi! Wote, enim ui mbila nga rᵾk rᵾk ronduⱡ mundᵾk molk, mbun koma rᵾi! I eng uⱡ ei ndi, uⱡ kun kai mbᵾ, enim kᵾn pemba. Wote, Got nga uⱡ kun kai mbᵾ, enim kᵾn kurpa nui nanᵾmba mon. Enim kapⱡa itangga uⱡ kun kai mbᵾ, etᵾk mint muⱡing. Wote, wamp nam ti, pilpa kungᵾndi uⱡ ei, pili napilim ndam, Got kᵾn atinga ropa mawa etangga kᵾn, elim ndi ngumba. Nambuⱡ emel, Got ndi pilpa kungᵾndi uⱡ ei, wamp mbᵾ pora wei ngorum. Ei nga, wamp ei, mondpa pilpa, Got kᵾn atinga rangga. Numan ᵾkpᵾk ti nᵾtangga! Numan ᵾkpᵾk tᵾm ndam, kona kᵾpkᵾ ropa, num kuta noipᵾp naipᵾp nᵾtᵾm ei mel, kapⱡa etmba. Wamp ei nga, numan raⱡ etpa pendpa uⱡ etᵾm mbᵾ, omba tenda ila pi napᵾrᵾm mon! Wote, wamp i etmin mbᵾ, Nuim ei ndi, ngumba nᵾk pili nᵾpili.

Wamp Mel Pi Mbᵾ Kᵾn, Wamp Kurpa Mbᵾ Kᵾn

Wote wu ᵾngᵾn kurpa norum, ti Got ndi, mbi mepa oⱡa purum ei nga, ambuⱡpa paⱡpa muⱡangga. 10 Ei kᵾn, wu mel pi ti, Got ndi, mepa mana omba mondrum ei nga, ambuⱡpa paⱡpa morum. Nambuⱡ emel, wamp ei mepa mana omba ei, nde kuk na ti oⱡᵾl tepa mana purum ni mel, kapⱡa morum. 11 Kona ant ei ropa ronduⱡ mba morum ei kᵾn, nde kuk mbᵾ oⱡᵾl tetᵾm. Kuk kai nimbᵾ kit morum. Ei mel ku, wu mel pi ti, mel mbᵾ nga numan tᵾpa mundpa moⱡpa, wote korum.

Oⱡa Tᵾpa Kᵾni Uⱡ Ei Nga Ik

12 Wamp nam ti ndi, oⱡa tᵾpa kᵾni uⱡ mbᵾ nga mbun koma rom ndam, ei ambuⱡpa paⱡpa moⱡangga! Mbun koma ropa pora ndum ndam, wote Got ndi, kont mul uⱡ kai ti ngumba. Got ndi, nimba mᵾi ropa nimba mel, “Na numan ngum wamp ti, uⱡ nga kunt nga kont mul uⱡ ei nguimp,” nitim.

13 Wamp ti ndi, oⱡa tᵾpa kᵾni uⱡ ila uⱡ kit mbᵾ em ndam, “Na Got ndi, mepa mba uⱡ mbᵾ, mbo rondnᵾm,” ni nᵾnangga mon! Nambuⱡ emel, uⱡ kit ei ndi, Got kundpa ti natᵾtᵾm. Wote, Got elim ndi, wamp ti uⱡ kit iti nᵾtangga mon. 14 Ei kᵾn, wamp ti nga kandpa kum pi ndi uⱡ ei ndi, elim nga numan ila kunt ropa elim tᵾpa kan nguⱡnga, nombuⱡa mam kupa ei, wak rorum. 15 Wote, wamp ei nga kandpa kum pi ndi, numan kit ei ndi elinga, uⱡ kit mbᵾ etᵾm. Wote, akil tepa uⱡ kit ei ndi elinga kᵾn, wamp kui nga, uⱡ ei ngorum.

16 Na nga angmᵾn! Uⱡ ei ndi, enim ik kol ropa ngui ngᵾngangga. 17 Mel kai mbᵾ, muⱡ ila mana urum mbᵾ, Got ndi, tᵾn rᵾk rᵾk wei gem ngumba pendᵾtᵾm ei, rᵾⱡang pi kona ei nga Wuta ei ndi etᵾm. Elim unt murum, akup morum, wote moⱡpa mint mba ei nga rᵾⱡang nga Puⱡ Wu ei ndi etᵾm. 18 Got elim nga numan ndi pilpa, elim nga ik kupa ei ndi, tᵾn wamp mbᵾ mim itim. Ei nga, tᵾn mel mbᵾ nga kuimbal muⱡᵾmin nimba itim.

Pilpᵾn Kun Etpᵾn Pep Ruimin

19 Angmᵾn ye! Enim pilik kun itᵾi! Enim wamp mbᵾ pora ik ei, tᵾk rᵾk pilik tᵾk, wote wang nduk nᵾi! Wote popᵾⱡ tᵾk rᵾk mundi nᵾmᵾndᵾi! 20 Ei nambuⱡ emel, wamp nga popᵾⱡ mundi uⱡ ei ndi, Got nga uⱡ kun kai mbᵾ, etᵾk kai mundi namᵾndᵾrmᵾn. 21 Ei nga, enim uⱡ kit mbᵾ, pendᵾk kelik, wote enim Got nga ik mbo inditmᵾn ik ei pilik tᵾk, enim nga numan ila pindᵾi! Ik ei ndi, enim nga min ei, etpa tᵾmba. 22 Wote enim ndi, en enim ik kol rok nguk, Got nga ik ei kum ei ndi, mint pili nᵾpilᵾi mon! Enim ik ei pilik tᵾk kᵾn, wote ik nitim ei mel, pep rok itᵾi! 23 Wamp nam ti ndi, Got nga ik ei, kum ei ndi mint pilpa, wote tᵾpa apra ndupa ik nᵾtᵾm ei mel iti natᵾtᵾm. Wamp ei kiraipa ila, elim nga kuimp keta ei kandpa, wote tᵾpa apra ndurum ei mel kapⱡa. 25 Ei kᵾn, wamp nam ti ndi, wamp uⱡ kit etmin ila, etpa wei mondrum mi ik kun kai kᵾⱡ pilpa tᵾpa kᵾn, tᵾpa apra ndui nandpa, wote pep ropa em wamp ei, elim nga namba uⱡ mat em mbᵾ, Got ndi, memp pendᵾmba. 26 Wamp ti ndi nimba mel, “Na mondpa pili wamp ei!” nimba. Wote, el elim nga keta anmbil ei, rᵾp iti natᵾm ndam, el elim nga mondpa pili uⱡ ei nga, muⱡ ti mon! Ei nga, elim ndi, el elim ik kol ropa ngorum. 27 Tᵾn nga mondᵾp petmᵾn uⱡ ei, Got Tipam ei ndi kundpa, eng nui kai mbᵾ kᵾn, ik kupa mint nimba ei, ya uⱡ ei mel itamin. Kangambuⱡa etpa mbᵾ rᵾp etpᵾn, amp wiya na mbᵾ, mbun tᵾng mbila, tᵾp rapundpᵾn, wote mᵾi kona uⱡ kit mbᵾ, minda ndui nᵾndᵾmin.

Copyright information for `MED