James 2

Wamp Pora Tᵾpa Ou Ndui Uⱡ

Na nga angmᵾn! Tᵾn nga Nuim Jisas Kraist wu eng nui ei mondᵾk pilᵾi! Enim wamp ik kondᵾk ni uⱡ ila, elpa elpa pi nᵾpangga! Wote, kᵾng orunga mint kandkᵾn, ni nᵾnᵾi mon! Wote, wu mel pi ti, ki ring gol ti mondpa, muⱡ eng nui kai mat raⱡpa, mou tila wangga kᵾn, wote wu kurpa ti mel kit mbᵾ raⱡpa omba ku. Wote nim ndi, wu mel pi ti mel kai raⱡᵾm wu ei kundkᵾn, “Ya kona kai ila okᵾn muⱡi,” nᵾkᵾn. Wote wu kurpa ei kundkᵾn, “Int ila anggilkᵾn mon,” muna, “Ya manga rᵾkᵾ kᵾmp pᵾⱡ ila muⱡi,” ning. Wote enim ndi, uⱡ ei mel eng ndam, wote enim ndi, wamp kᵾmp ting mel kapⱡa mon. Enim nga numan ila pilpa kit pili uⱡ ei pendᵾk kᵾn, wamp mbᵾ kᵾmp tᵾtmᵾn.

Na nga angmᵾn pinmin ye! Got ndi, Ya mᵾi kona ila wamp kurpa norum, mbᵾ mondpa pili uⱡ ila mel piyangga kᵾn, Got ndi, nimba mᵾi ropa kᵾn, wamp tᵾpa mumuk rᵾi uⱡ ei, Got numan ngormᵾn wamp ei, nguimp nitim. Wote enim ndi, wamp kurpa mbᵾ, etᵾk pipil kundᵾrmᵾn. Wote, enim pᵾtmᵾn ni, wamp mel pi mbᵾ ndi, enim tᵾk mana nduk, mek puk kot endᵾtmin. Got ndi, Kraist nga mbi kai ei, tᵾpa enim kᵾn pinditim ei, wamp mbᵾ ndi, mbi kai ei, nᵾk kit mondᵾrmin.

Enim uⱡ kun kai mbᵾ etᵾk, Got nga mi ik kᵾⱡ pep ruing, Buk Wingti ei ndi, nimba mel,

“En enim numan ngurmin ei mel ku, nim nga mang keta kup wamp mbᵾ, i ku etkᵾn numan ngui!” nitim.
Wote enim ndi, wamp mat numan ngok wamp mat tᵾk mbuⱡ nguk eng ndam, enim mi ik ei, rok puⱡa rok etmin. Uⱡ ei ndi, enim uⱡ kit mbᵾ etmin! 10 Wamp nam ti ndi, mi ik mbᵾ pᵾi, pep ropa moⱡpa, mi ik tenda ti pep rui narᵾm ndam, wamp ei ndi, mi ik mbᵾ pora, ropa puⱡa rorum. 11 Ei nga, Got nga mi ik ti ndi, nimba mel, “Wu ti nga ei amp ti nᵾti!” nᵾtᵾm. Wote, “Wamp na ti rui nᵾri!” nᵾtᵾm. Wote, wamp na ti rokᵾn kondkᵾn, wu ti nga amp ei ti nᵾtᵾn ndam, nim ndi, Got nga mi ik mbᵾ pora rokᵾn puⱡa rorᵾn mint.

12 Enim ik nᵾk kun kai mul mel ralk uⱡ mbᵾ, etᵾk ᵾndangina kandᵾk, wamp mat kan manga ila, wei wak rormin ei mel etangga. 13 Nambuⱡ emel, wamp nam ti ndi, wamp ti kont kaimp kuⱡi naⱡᵾm ndam, Got ndi, wamp ei, kont kaimp kuⱡi naⱡᵾmba. Wote, kont kaimp kul uⱡ ei ndi, wamp kᵾmp tᵾmba uⱡ ei, tᵾpa mana ndurum.

Mondpa Pilpa Uⱡ Ei Kᵾn, Uⱡ Kai Ei Kᵾn

14 Na nga angmᵾn! Wamp ti ndi, elim mondᵾp pilip mor nimba, wote elim uⱡ kai mat iti natᵾm ndam, elim nga mondpa pili uⱡ ei ndi, elim etpa tᵾmba nda? 15 Wote wu ᵾngᵾn ti, muna amp ti, wal pᵾki na mat mon ndangga, wote rᵾng mat nomba ei nga ti nᵾtangga, wote nim ndi, ik kai mat kondkᵾn nᵾkᵾn, “Got ndi, nim memp pindangga nᵾkᵾn, rᵾng mbᵾ nᵾi nᵾkᵾn, wote nim ndi, wal pᵾki na rᵾng mat ngui ngᵾngᵾn ndam,” kapⱡa etmba mel? 17 Wote mondpa pili uⱡ ei, ei mel ku mondpa pili uⱡ ei kongun iti natᵾn ndam, mondpa pili uⱡ ei korum.

18 Wote wamp ti ndi, nimba mel, “Nim mondkᵾn pᵾtᵾn ei, na uⱡ kai mbᵾ et,” nimba. Wote, na ndi, punt rop nᵾmp mel, “Nim nga mondpa pili ei, uⱡ mat iti natᵾtᵾn ei, na tᵾkᵾn ora ndun. Ei nga, na ndi, na nga mondpa pili et uⱡ ei, nim tᵾp ora nduimp,” nᵾnt. 19 Nim Got tenda morum ei, mondkᵾn pᵾtᵾn ei? Ei kapⱡa! Wote, kur kit mbᵾ ndi, i ku etᵾk, Got tenda morum ei nga mondᵾk pilik kᵾn, mundmong etᵾk rut nᵾtmin.

20 Nim wu wᵾlᵾ ti kant! Nim mondkᵾn pilkᵾn, wote nim uⱡ kai mat iti natᵾtᵾn ndam, nim nga mondpa pili ei nga ronduⱡ ti mon! 21 Tᵾn nga anda kouwᵾ Aparam ndi, elim nga kangᵾm Aisak ei, Got kᵾn angge nimba, rat pol ila, kaⱡpa tindiⱡim mundrum. Ei nga, Got ndi, kandpa, Aparam kundpa, “Wu kun kai!” ei nitim. 22 Uⱡ ei nim pᵾn ei? Elim nga mondpa pili uⱡ ei kᵾn, elim nga uⱡ itim ei kᵾn, tenda mint purum. Uⱡ ila, elim nga mondpa pili uⱡ ei, kun purum. 23 Buk Wingti ei ndi, nitim ik ei, omba kupa itim. Nimba mel,

“Aparam ndi, Got mondpa pitim,” nᵾtᵾm.

Ei nga, elim nga mondpa pili uⱡ ei ndi elinga, Got ndi, Aparam kundpa, nimba mel,
“Wu kun kai ei,” nᵾtᵾm.
24 Enim kᵾnᵾi! Wamp ti, Got ndi, wu kun kai nᵾtᵾm ei, mondpa pili uⱡ ei, mendpᵾⱡ mon! Elim nga uⱡ etᵾm mbᵾ kunda.

25 Wote ei mel ku, wapra amp Reiyap ni ndi, Jura nombuⱡa rung wu raⱡ, rawe etpa tᵾpa, wote nombuⱡa mam elpa ronggᵾt mo rokᵾⱡ, mang kona pᵾl nitim. Ni kᵾn, Got ndi, amp ni kundpa, “Kun kai ei,” nitim. 26 Ei mel ku, muⱡnga ei ndi, wamp ti wak rom ndam, wamp ei koⱡmba. Ei mel ku, mondpa pili uⱡ ei, kongun iti natᵾtᵾm ndam, mondpa pili ei korum.

Copyright information for `MED