James 4

Mᵾi Kona Ila Mel Mbᵾ, Numan Ngorum Ti, Got Nga El Rui Wamp Mel Morum

Enim kᵾn, el iti uⱡ na, ik rop mundi uⱡ mbᵾ, nant ila pepa orum? Kandpa kum pindi uⱡ kit mbila, enim nga kᵾmp ki na mbᵾ kᵾn, el kongundpa enim kᵾn, el pindi napᵾndᵾtᵾm nda? Enim mel elpa elpa mbᵾ numan ngurmᵾn ei, wote mel mbᵾ ti natᵾtmᵾn. Ei nga, enim ndi, wamp mat rop kondᵾk kum mek mel mbᵾ, timin nᵾk pᵾtmᵾn. Enim wamp mat nga mel mbᵾ kandᵾk, kum pendᵾtmᵾn uⱡ ei ndi, mel mbᵾ kandᵾk, ti natᵾtmᵾn. Ei kᵾn, enim popᵾⱡ minal mondᵾk el etmin. Enim mel mbᵾ, ti natᵾtmin. Nambuⱡ emel, enim Got kᵾn atinga rok, mawa iti natᵾtmin ei mel ku, ti natᵾtmin. Enim mawa etmin ei, wote ti natᵾtmin. Ei nambuⱡ emel, enim nga numan ei, kun pi napᵾⱡnga, Got kᵾn mawa etmin. Wote mel mbᵾ tᵾk etᵾk, ge nduing ei nga mendpᵾⱡ pilik, atinga rormᵾn.

Enim wapra wamp mbᵾ ye! Wamp nam ti ndi, ya mᵾi kona ila, mel mbᵾ kandpa, kum pendᵾm ndam, Got kᵾn el rui wamp mel raⱡpa morum. Buk Wingti ila ik kupa ti, petᵾm ei ndi, nimba mel,

“Got nga Muⱡnga tᵾn kᵾn rukᵾr orunga pinditim ei ndi, Got elim mendpᵾⱡ mbi paka rundangga!” nᵾtᵾm.
Enim ndi, ik ei tᵾk pei mundᵾrmᵾn an?
Ei kᵾn, wote Got nga wamp pol ti uⱡ ei, tᵾn kᵾn pilpa kelpa ngurum. Ei nga Buk Wingti ei ndi, nimba mel,

“Kᵾng orunga paka rormin wamp mbᵾ, Got ndi, mepa mana purum. Kᵾng orunga mek mana pᵾk mormin wamp mbᵾ, Got ndi, poⱡ tᵾpa etpa titim,” nᵾtᵾm.
Ei kᵾn, enim nga min kᵾng raⱡ, Got ngᵾi! Wote, Seitan kᵾn el ranggina, Seitan enim wak ropa nung nimba mba. Enim Got kᵾn nondpa wanggina kᵾn, Got enim kᵾn nondpa omba. Enim uⱡ kit iti wamp mbᵾ, enim nga ki ⱡumᵾi rok. Enim nga numan orunga ⱡumᵾi rok, Got tᵾk mundangina enim etpa, elim nga mendpᵾⱡ randᵾmba. Enim numan raⱡ etpa pindi wamp mbᵾ ye! Enim nga uⱡ kit ei nga, enim kont kulk, ka ronduⱡ itᵾi! Akup enim oi enmin wamp mbᵾ, wak rok, ka ronduⱡ itᵾi! Wote, numan kai pᵾnmin wamp mbᵾ, wak rok numan kit pilᵾi! 10 Nuim ei nga kuimp keta ila, en enim nga orunga, mek mana puk moⱡᵾng ndam, wote Nuim ei ndi, enim mepa oⱡa mba.

Enim Nga Rapa Tenda Wamp Ʉngᵾnᵾl Mbᵾ Kᵾmp Ti Nᵾtᵾi!

11 Na nga angmᵾn, wamp mat nga nᵾk kit mundi nᵾmᵾndᵾi! Wamp ti ndi, wamp ᵾngᵾn ti nga nimba kit mondpa kᵾmp tᵾpa em ndam, wamp ei, mi ik ei nimba kit mondpa, kᵾmp tᵾpa etmba. Ei kᵾn, nim mi ik ei, kᵾmp tin ndam, nim mi ik ei, pep rui narᵾrᵾn mon! Nim mi ik ei, kᵾmp tetᵾn. 12 Ei kᵾn, Got wu tenda ei ndi, mi ik kᵾⱡ ngumba, wote wamp kᵾmp tᵾpa etmba. Wote, wu tenda ei ndi ku, wamp etpa peng kont tᵾpa, etpa kit mondpa etmba. Ei kᵾn, nim nam nᵾkᵾn pilkᵾn, angᵾna ti kᵾmp tin? 13 Akup kum tek pilᵾi! Enim wu mat ndi, ei mel nᵾk, “Akup muna utᵾma, tᵾn kona peng ya, muna nᵾi ila mbun, pana tenda ti moⱡpᵾn, kongun mat etpᵾn, mel rarᵾp ropᵾn, ku moni minal yant tᵾmin,” nᵾtmᵾn. 14 Ei wote, enim nga kont mul uⱡ ei, utᵾma orunga ila, nambuⱡ ti etmba ei, enim pili napilik mormin. Ei kᵾn, enim ndip ikil oⱡa omba, wote wei ai etᵾm ni mel, enim nga kont mul uⱡ ei, ei mel kapⱡa. 15 Ei kᵾn, enim ndi, ei mel nung ndam, kapⱡa etmba, “Tᵾn Nuim ei ndi, kapⱡa nimba pilim ndam, tᵾn kont moⱡpᵾn uⱡ mbᵾ, muna mbᵾ etᵾp muⱡmin,” nᵾtmin. 16 Wotem akup enim ambulk palk, kᵾng orunga mek oⱡa puk enmin. Kᵾng orunga mek oⱡa puk, en enim nga mbi paka rok, iti natilingina mel enmin. 17 Ei nga, wamp ti ndi, uⱡ kun kai ei, etmba ei nga, pilpa kelpa iti natᵾm ndam, wamp ei uⱡ kit mbᵾ etmba.

Copyright information for `MED