John 1

Jisas Ni, Got Nga Ik Ei

Unt kor nga Got ndi, muⱡ mᵾi raⱡ mim iti nᵾti kᵾn, Ik ei titim. Ik ei, Got kᵾn murum. Omba Ik ei, elim Got. Ama unt kor nga puⱡ mondpa, Ik ei, Got kᵾn murum. Ik ila mendpᵾⱡ, Got ndi, mel mbᵾ pora itim. Mel mbᵾ nga ti, nombuⱡa mam elpa tila, oⱡa ui nawᵾrᵾm, mon! Ik ei, el elim kont mba mul uⱡ ei nga Puⱡ Wu ei. Wote, kont mba mul uⱡ ei, tepa omba, tᵾn wamp mbᵾ rᵾⱡang ngurum. Rᵾⱡang ei ndi omba, rumbᵾⱡ ila rᵾⱡang ngurum. Wote, rumbᵾⱡ ei nga ronduⱡ ei ndi, rᵾⱡang ei, ropa mana ndui nandrᵾm. Got ndi, elim nga nombuⱡa rung wu ti, tᵾpa mundrum. Wu ni nga mbi ei, Jon. Wu ni ndi, rᵾⱡang ei nga pora ndupa nangga. Wamp mbᵾ ndi, ik ei pilik mondᵾk, pileing nimba, tᵾpa mundrum. Jon elim ni, rᵾⱡang ei mon. Wote elim ndi, rᵾⱡang ei, mat ndumba nimba, mat ndumba ei nga urum. Rᵾⱡang kupa ei, mᵾi kona mana omba, wamp mbᵾ pora, rᵾⱡang ngurum. 10 Got nga ik ni, mᵾi kona ila mana urum. Got elim moⱡpa, muⱡ mᵾi mbᵾ pora itim. Wote, wamp mbᵾ ndi, elim kandᵾk, mbi ndui nandrᵾng. 11 Elim nga mᵾi ila rukᵾr urum. Wote, elim nga wamp nimbᵾ ndi, elim rawe etᵾk, ti natᵾtᵾng. 12 Wote, wamp mat ndi, elim rawe etᵾk tᵾk, elim mondᵾk pilik etᵾng nimbᵾ, ronduⱡ nguⱡnga, Got nga kangambuⱡa rarᵾng. 13 Got nga kangambuⱡa rarᵾng mbᵾ, wamp mema ei ndi, mon! Wamp nga numan ei ndi, mon ku! Wote, Got elim ndi itim. 14 Ik ei, wamp raⱡpa, tᵾn kᵾn omba pitim. Elim eng noⱡnga, kᵾndᵾrmᵾn. Elim nga Tipam kᵾn moⱡpa, mana urum kangᵾm kang ei, eng nurum. Wamp poⱡ ti uⱡ ei kᵾn, ik kupa ei kᵾn, elim kᵾn pitim.

15 Jon ndi, wu ei nga para ndupa, nimba mel, “Wu ei nga kundᵾp nit ni, Wu Nuim akil tepa onum. Ei ndi, na tᵾpa mana ndumba. Nambuⱡ emel, na muⱡi nᵾmbᵾr kᵾn, elim ni, unt murum,” nitim. 16 Nambuⱡ emel, elim nga poⱡ ti uⱡ ei nga mur ila, tᵾn memp titmin. Wote, pol ila aldpa, memp tᵾpᵾn ku etmin. 17 Nambuⱡ emel, Got nga mi ik kᵾⱡ, Moses kᵾn pilpᵾn titmin. Wote, wamp poⱡ ti uⱡ ei kᵾn, ik kupa ei kᵾn, uⱡ raⱡ Jisas Kraist kᵾn tᵾtmᵾn. 18 Wamp ti ndi, Got kᵾni nakᵾndrᵾm. Elim nga kangᵾm mendpᵾⱡ ei ndi, Tipam kᵾn nondpa moⱡpa, Tipam nga puⱡ ei nimba, mot ndurum.

Wamp Nu Tindi Wu, Jon Ndi Ik Mbᵾ Nimba Mot Ndurum

19 Jerusalem, kona ila Jura wu morung nimbᵾ ndi, wu Pris na, Lipai wu kat, tᵾk mundᵾⱡina ok, Jon waldᵾk nᵾk mel, “Nim wu nam?” nᵾtᵾng. 20 Jon elim ndi, nimba mot ndupa, “Na Kraist mon!” nitim. 21 Ama minal waldᵾk nᵾk mel, “Nim wu nam? Nim Ilaija muna? Nilingina, “Mon ku!” nitim. “Muna, nim painui wu ei?” Nᵾk waldᵾlingina, “Mon ku!” nitim. 22 “Wote nim wu nam? Tᵾn kundkᵾn ni! Wote, tᵾn tᵾk mundung wu mbᵾ, int mbun kundpᵾn nimin,” nᵾtᵾng. 23 Jon ndi, ik punt ropa nimba mel, “Painui wu Aisaiya nga ik ti, unt nimba pinditim. Ik ei ndi, ei mel nitim,

“Kona kui waka ila wamp ti, wi ronum ei, na Nuim ei, omba ei nga nombuⱡa mam ei, rok tᵾk kun mundangina, wu Nuim ei wangga!” nitim.
24 Perisi wu nimbᵾ, tᵾk mundrᵾng wu ni kᵾⱡ ndi, Jon waldᵾk nᵾk mel, “Nim Kraist ei mon. Ilaija kep, mon ku. Painui wu ti kep, mon ku ndam, wote nambuⱡ emel, wamp nu tᵾndᵾn?” nᵾtᵾng. 26 Ei mel nilingina, Jon ndi, punt ropa nimba mel, “Na ndi, wamp mbᵾ, nu ila mint nu tᵾndᵾnt. Wote, enim nga rᵾk ting ila, wu kᵾni nᵾkᵾni ti morum. Wu ei, na nga mbuldung orunga, akil tepa onum. Wu ei nga kᵾmp rᵾk kan ei, na ndi pilinga, nduimp mel kapⱡa mon!” nitim. 28 Uⱡ etᵾng nimbᵾ pora nilinga, Betani kona ila, ekit oⱡungina, nu Joran al orunga, Jon wamp nu tinditim kona nila itim.

Jisas Ni, Got Nga Kng Sipsip Waⱡ Mel

29 Wote, mᵾkᵾlmᵾ orunga, Jisas ni, Jon murum nila, oⱡnga kandpa, nimba mel, “Got nga kng sipsip waⱡ, mᵾi kona ila wamp mbᵾ nga uⱡ kit mbᵾ, pendpa kelmba ei nga onum kᵾnᵾi! 30 Enim wu ei nga kundᵾp nit ni, wu akil tepa omba ei, wu oⱡa orunga mel ti, na kᵾn kapⱡa mon. Nambuⱡ emel, na mi nᵾmi kᵾn, elim ni, kump kor nga murum. 31 Na ndi, elim pili nᵾpᵾt mon. Wote na ndi, Isrel wamp mbᵾ, wu ei nga kandᵾk, pilik poⱡ ndeing nᵾmp kᵾn omp, wamp nu tindint,” nitim. 32 Wote ni kᵾn, Jon ndi, ekit ndupa nimba mel, “Muⱡnga Wingti ei, muⱡ ila, kᵾi imil mel raⱡpa, mana omba, elim kᵾn moⱡnga, kundung nitim. 33 Na elim pili nᵾpᵾt, mon ku. Wote Got ndi, na wamp nu tᵾndeimp nimba, tᵾpa mundrum ei ndi, na ndoimp rondpa, nimba mel, ‘Muⱡnga Wingti ei kinana, mana omba, wu ti kᵾn moⱡum ndam, wu ei ndi wamp mbᵾ, Muⱡnga Wingti kᵾn pendpa, nu tᵾndᵾmba,’ nitim. 34 Nitim ei mel, na ndi, kᵾndᵾr ei mel, enim kundᵾp namp, “Wu ni, Got nga kangᵾm waⱡᵾm ei,” nitim.

Jisas Ndi, Elim Nga Kitip Kᵾni Wu Kuimp Tepa Rukᵾr Titim Kᵾⱡ

35 Ni kᵾn, mᵾkᵾlmᵾ orunga, Jon elim nga kitip kᵾni wu raⱡ kᵾn kunda moⱡᵾngina, Jisas ni omba puⱡnga, Jon ndi kandpa, nimba mel, “Got nga Sipsip Waⱡ ei kᵾnᵾi!” nitim. 37 Kitip kᵾni wu ni raⱡ, ik nitim ni pilkᵾⱡ, Jisas purum ni mel, akil tekᵾⱡ, pep rokᵾⱡ purᵾnggil. 38 Jisas ndi, tᵾpa ropᵾl ropa kundrum ni kᵾn, wu ni raⱡ orᵾnggil ila, waldpa nimba mel, “Namba mel ei, kurkᵾⱡ onmbil?” nitim. Wote wu ni raⱡ ndi, punt rokᵾⱡ nᵾkᵾⱡ mel, “Ik mbo wu ye! Nim kona nant ila pun?” nᵾtᵾnggil. 39 Wote Jisas ndi, nimba mel, “Okᵾⱡ kunᵾnggil wᵾl!” nitim. Ant mong ni, tᵾmbᵾkak elinga, rᵾp rok puk pitim kona ni, kandkᵾⱡ elim kᵾn rᵾp rok, ant ei kᵾn morung. 40 Jon ndi, ik nitim ni pilkᵾⱡ, Jisas purum mel, akil tekᵾⱡ purᵾnggil. Wote, wu ni raⱡ nga ᵾngᵾn, Saimon Pita nga ᵾngᵾn wu Andru ni, ant tenda ila mba, ᵾngᵾn Saimon ni kandpa, tᵾpa nimba mel, “Mesaiya, Kraist, nᵾtmin wu ni raⱡ ndi, kandᵾp tᵾmbᵾⱡ,” nitim. 42 Wote Andru ndi, Saimon tᵾpa mepa, Jisas kᵾn purum. Jisas ndi kandpa, nimba mel, “Nim Jon kangᵾm wu Saimon. Nim mbi tep Sipas, nᵾnt ropᵾl ropᵾn, Pita nimin.

Jisas Ndi, Pilip Kᵾn Nataniyel Raⱡ Wi Ropa Rukᵾr Titim

43 Wote mᵾkᵾlmᵾ orunga, Jisas ni, Galili orunga purum. Wote, wu Pilip ni kandpa tᵾpa nimba mel, “Na pep rokᵾn ui!” nitim. 44 Pilip, Andru kᵾn, Pita kᵾⱡ nga mᵾi mang kona ei nga, kona peng ei, Betseita. 45 Pilip ni mba, Nataniyel kurpa kandpa, tᵾpa kundpa, nimba mel, “Moses ndi, wu ti nga nᵾndpa mi ik ila, mon rurum. Wote, painui wu mbᵾ ndi, rorung wu ni, tᵾn ndi, kandᵾp timᵾn. Wu ni, Nasaret kona ila wu Jisas, Josep nga kangᵾm”, nitim. 46 Wote Nataniyel ndi, waldpa nimba mel, “Nasaret kona ila, namba uⱡ kai ti ekit omba nda?” nitim. Nimba waldilinga, Pilip ndi nimba mel, “Okᵾn kᵾni!” nitim. 47 Jisas ndi, Nataniyel ni oⱡnga, kandpa nimba mel, “Wu ei, Isrel nga wu kupa ei. Ik kep nui uⱡ ti, wu ei kᵾn pi napᵾtᵾm,” nitim. 48 Ei mel nilinga, Nataniyel ndi, Jisas waldpa nimba mel, “Nim na nga puⱡi etkᵾn, pilkᵾn nin mel nant?” nitim. Wote Jisas ndi, int ndupa, nimba mel, “Nim Pilip ndi, wi ropa ti nᵾti kᵾn, nde ui puⱡ ila moⱡina, kant ni ka!” nitim. 49 Nataniyel ndi, ik int ndupa, nimba mel, “Nim ik mbo wu ye! Nim Got nga kangᵾm ei, Isrel wamp mbᵾ nga Wu Nuim Mumuk ei!” nitim. 50 Jisas ndi, nimba mel, “Nim nde ᵾi puⱡ ila, mᵾn nᵾnt ik kᵾⱡ nga mendpᵾⱡ, mondkᵾn pilkᵾn nᵾn nda? Uⱡ ou mat, wote kᵾnin an!” nitim. 51 Wote Jisas ndi, nimba mel, “Na ndi, ik kupa ei, enim kundᵾp nᵾnt. Muⱡ ei, kumba tᵾpa tiyangga kᵾn, Got nga anggelo mbᵾ ndi, Muⱡᵾl Wu Kupa ei kᵾn, oⱡa mana etᵾk endangina, kᵾning!” nitim.

Copyright information for `MED