John 10

Kng Sipsip Rᵾp Wu Ti Nga Ik Ek

Jisas ndi, nimba mel, “Na ik kupa ei nᵾnt. Wu ti ndi, kng sipsip petmin kona ila nga keta puⱡ puⱡ ila rukᵾr pi napᵾpa, kona elpa tila ku rukᵾr pum ndam, ei kᵾndᵾp wu, ei mba. Wote wu ti, kumba keta puⱡ puⱡ kupa ila kun rukᵾr pum ei, kng sip sip rᵾp wu mendpᵾⱡ ei mba. Wote kumba keta puⱡ puⱡ rᵾp wu ei ndi, kumba tᵾpa telinga, rᵾp wu ei ndi, kng sipsip mbᵾ, mbi telinga, ik ei pilik mbi nduk, wote akil tek purmᵾn. Wote, mepa pena omba, elim kuimp telinga, kng sipsip mbᵾ, elim pep rok akil tetmᵾn. Ei nambuⱡ emel, en enim nga rᵾp wu ei nga ik ei, pilik mbi ndurmᵾn. Wu elpa ti kᵾn, pep rok pi napᵾk, nung nᵾk, elpa elpa ping. Ei nambuⱡ emel, wu ei nga ik ei pilik, mbi ndui nandᵾrmᵾn,” nitim.

Jisas ndi, ik ek ropa nitim ik ei, pilik kun iti natᵾtᵾng.

Jisas Ni, Kng Sipsip Rᵾp Wu Kai Ei

Jisas ndi, aldpa nimba mel, “Na ik kupa ei, enim kundᵾp nᵾnt. Na ei, sipsip nga kumba keta puⱡ puⱡ ei mor. Na tᵾk akil nduk, unt kuimp tek orung wu nimbᵾ, kᵾndᵾp wu mbᵾ orung. Wote, kng sipsip mbᵾ ndi, wu mbᵾ nga ik nᵾtᵾng ei pilik, teng ndui nandrᵾng. Kumba keta puⱡ puⱡ ei, na mor. Ei nga, wamp nam ti, keta puⱡ puⱡ ila rukᵾr om ndam, etᵾp timp. Wote, keta puⱡ puⱡ ila ku, pena manga etpa, rᵾng kai mbᵾ, kandpa tᵾpa nomba. 10 Kᵾndᵾp wu ei ndi, kng sipsip mbᵾ kᵾndᵾp nomba, ropa kondpa, pora ndumba ei nga mint orum. Wote, na mana ur ei, wamp kont molk mint ping ei nga nᵾmp ur.

11 Na kng sipsip rᵾp wu kai ei mor. Sipsip rᵾp wu kai ei ndi, sipsip mbᵾ nga nᵾndpa, koⱡmba ei nga morum. 12 Sipsip rᵾp itangga nᵾk, kandᵾk tᵾtmᵾn wu ei ndi, owa rakra orum kandrum ei kᵾn, kng sipsip mbᵾ, wak ropa purum. Nambuⱡ emel, kng sipsip mbᵾ, elim nga mon. Wote, elim rᵾp wu kai ti mon. I elinga, owa rakra ei ndi, omba kng sipsip ti roⱡnga, mat mbᵾⱡ mbaⱡ nᵾtmᵾn. 13 Kng sipsip rᵾp itangga nᵾk, kandᵾk tᵾtmᵾn wu ei purum. Ei nambuⱡ emel, elim ku moni nga kongun etᵾm ei ndi, sipsip kᵾⱡ nga pili napᵾtᵾm.

14 Na kng sipsip rᵾp wu kai ei mor. Wuta ndi, na pᵾtᵾm. Ei mel, na ndi, Wuta pᵾt ku. Wote, ei mel ku, na ndi, na nga kng sipsip mbᵾ pilip moⱡmba, wote na nga kng sipsip mbᵾ ndi, na pᵾtmᵾn. Na sipsip mbᵾ nga nᵾndᵾp kuⱡimp mor. 16 Na nga kng sipsip mormᵾn mbᵾ nga mat, paⱡa ekit orunga mormᵾn. Kng sipsip mbᵾ, na ndi, tᵾp mep rukᵾr wamba. Na nga ik ei, pilik ting. Wote, unt nga mormᵾn mbᵾ kᵾn, paⱡa tenda ila muⱡangina, rᵾp wu tenda ei ndi rᵾp etmba. 17 Na nga kont mul uⱡ ei, wak rop, wote yant timp. Ei nambuⱡ emel, Wuta ndi, na numan ngorum. 18 Wamp ti ndi, na nga kont mba mul uⱡ ei, tᵾpa mundᵾmba mel, kapⱡa mon! Na nga ronduⱡ ila, na nga kont mba mul uⱡ ei, wak ruing. Nanim pint mel ku, wak rop, wote nanim pint mel ku, yant timp. Uⱡ ei, Wuta ndi, na man ngumba iteimp nitim ei mel ku itimp,” nitim.

19 Ik nitim ni, Jura wamp pilik wamp oi nduk, rᵾⱡaip raⱡ etᵾk morung. 20 Ni kᵾn, wamp ou ndupa ndi, nᵾk mel, “Wu ei kur kit mondpa, wote kekilip ropa ninim ik mbᵾ, nambuⱡ emel, kum tenmin ei?” nᵾtᵾng.

21 Wote, wamp mat ndi, nᵾk mel, “Wu ti, kur kit mondpa ik ei mel, kapⱡa ni nanᵾmba. Wote, kur kit ei ndi, mong ti wamp ei, nambuⱡ etpa, mong ei, etpa piral ndumba?” nᵾtᵾng.

Jura Wamp Mbᵾ Ndi, Jisas Tᵾk Mbuⱡ Ngurung

22 Kona ⱡapta rurum ni kᵾn, Jerusalem kona ila manga wingti ou anggᵾtᵾm ei nga kumba tᵾtᵾng ui ni, ekit urum. 23 Ni kᵾn, manga wingti ei nga kᵾkaⱡ ekit orunga, titim nimbᵾ nga ti mbi tek, ‘Solomon nga kᵾpkᵾ titim muⱡmᵾn kona nila, Jisas andpa murum. 24 Kona nila moⱡnga, Jura wamp nimbᵾ ndi, Jisas tᵾk pok etᵾk molk, waldᵾk nᵾk mel, “Tᵾn ndi, nim wu nam ei, etᵾp pilmin nimbun elimina, ui mbᵾ ruⱡ enim? Nim kupa Kraist Got nga ngurum wu ti ndam, nᵾk kᵾn, piral ndana pilamin,” nᵾtᵾng. 25 Jisas ndi, punt ropa nimba mel, “Na uⱡ et mbᵾ, enim kundᵾp nit ni, wote enim na mondᵾk pili napᵾtmin. Na Wuta nga mbi ila uⱡ et mbᵾ ndi, na nga mbi ei, nimba mot ndurum. 26 Enim ndi, na mondᵾk pili napᵾnmin. Ei nambuⱡ emel, enim na nga sipsip mat mon. 27 Na nga sipsip mbᵾ ndi, na nga ik ei pilik, mbi ndᵾⱡᵾngina, na ndi, en enim pᵾt. Wote, na pur mel akil tek ormᵾn. 28 Na nga sipsip mbᵾ, uⱡ nga kᵾnt nga kont mba mul uⱡ ei ngur. Ei nga, kuⱡing mel mon. Na nga ki ila ambᵾⱡᵾp mor mbᵾ wamp ti ndi, roldpa tᵾmba mel, kapⱡa mon! 29 Wuta ronduⱡ pi wu, oⱡa orunga ei ndi, kng sipsip mbᵾ, na ngurum. Ei nga, elim nga ki ila, roldᵾk ting mel, kapⱡa mon! 30 Wuta kᵾn, na kᵾn tᵾl, wu tenda raⱡ mormbᵾⱡ,” nitim.

31 Ni kᵾn, aldpa Jura wamp nimbᵾ ndi ku aprᵾk tᵾk, Jisas ku ndi ruing pilik etᵾng. 32 Jisas ndi, wamp nimbᵾ, kundpa nimba mel, “Enim Wuta nga kongun kai mbᵾ mint, etᵾp tᵾp ora ndᵾr. Ei nga, uⱡ nant ei nga, pilik, na ku ndi ruing enmin?” nitim.

33 Aldpa, Jura wamp mbᵾ ndi, punt rok nᵾk mel, “Nim uⱡ kai mbᵾ etᵾn ei nga, nim ku ndi rui nᵾrmᵾn. Nim mᵾi kona wu mendpᵾⱡ ni, wote ninim tᵾkᵾn, Got randᵾn ei nga, nim ku ndi ruimin enmin,” nᵾtᵾng.

34 Ni kᵾn, Jisas ndi, punt ropa nimba mel, “Enim nga mi ik ila mon ti petᵾm ei ndi, nimba mel, ‘Enim mᵾi kona wamp mbᵾ, got ku morum,’” nitim. 35 Tᵾn pᵾnmᵾn ei, Buk Wingti ila ik petᵾm ei kupa. Uⱡ nga pemba ei nga petᵾm. Wote, Got elim nga ik ei, nimba ngurum wamp mbᵾ, Got ndi, mbi tepa, ‘got’ nᵾtᵾm. 36 Wote, na Wuta ndi, mbi ropa tᵾpa, mᵾi kona ila tᵾpa mundrum. Ei nga, na ndi, nanim Got kangᵾm nᵾnt. Ei nga, nambuⱡ emel, enim ndi, na Got tᵾp mana ndont nᵾnmᵾn. 37 Wuta nga kongun ronduⱡ mat, na ndi iti nᵾtᵾnt ndam, enim na kᵾn mondᵾk pili nᵾpilᵾi! 38 Wote na ndi, Wuta nga kongun ronduⱡ mat elimba. Wote enim ndi, na nga ik ei mondᵾk pili nᵾpiling ndam, na nga uⱡ rᵾpndi et mbᵾ, onunga kot tᵾk mendᵾk, mondᵾk pilᵾi! Ei etᵾk kᵾn, Wuta ei, na kᵾn morum. Wote na ei, Wuta kᵾn mor uⱡ ei pilik kun iting,” nitim. 39 Wote aldpa, tᵾp imp muⱡmin nᵾk elingina, kiyang nimba omba, ekit purum.

40 Ni kᵾn, Jisas nu Joran aldpa puⱡa ropa, noi orunga mba, wu Jon ndi, unt wamp nu tinditim kona nila mba murum. 41 Wamp minal Jisas murum nila, rᵾk ok molk, nᵾk mel, “Jon ndi, uⱡ rᵾpndi mat iti nᵾtᵾtᵾm. Wote, wu ei nga ik mat ninditim mbᵾ, akup omba, kupa enim,” nᵾtᵾng. 42 Wote, wamp minal ila morung nimbᵾ ndi, wu ei mondᵾk pᵾtᵾng.

Copyright information for `MED