John 12

Amp Ti Ndi, Jisas Nga Kᵾmp ila Kopung Kᵾndrᵾm

Pasopa rᵾng normin ui ou ni nga rumbᵾⱡ 6 pelinga, Jisas ni, wᵾl Betani kona ila Lasarus wu kurum ti, ropa rot ndurum ni nga kona ila purum. Ni kᵾn, Jisas nga rᵾng kandrung. Amp Mata ndi, rᵾng nimbᵾ, mok roⱡnga, Jisas kᵾn Lasarus raⱡ, rat pol nila morunggil. I etᵾk moⱡᵾngina, Amp Mariya ndi, kopung mura rui kai ming ti, ku moni minal purum ti, mepa omba, Jisas nga kᵾmp pol nila, oi ndupa mondpa, wote elim nga peng ndi ni kᵾⱡ ndi, kil ngurum. Manga ni, kopung ei ndi, mura kai ropa murum. Wote, Jisas nga kitip kᵾni wu, rᵾk moⱡmba wu, Juras Iskariyot ni ndi, nimba mel, “Kopung ei ndi, ku moni K300 tᵾpᵾn, wote ku moni mbᵾ, wamp kurpa mbᵾ, mok ropᵾn nguimin. Ei nambuⱡ emel en?” nitim. Ik i etpa nitim ei, nambuⱡ emel, elim ku moni nga kum mepa nitim. Wamp kurpa norum mbᵾ nga mon. Elim nga mendpᵾⱡ pilpa nitim. Jisas ndi, nimba mel, “I ni nᵾni! Na kuⱡimp ei nga, na nga kᵾng kᵾⱡ, kopung kandpa tᵾpa kun endnim. Na enim kᵾn moⱡᵾp, mint pi nᵾpimp. Wote, wamp kurpa mbᵾ, enim kᵾn rᵾk rᵾk muⱡing,” nitim.

Lasarus Ni Ruimin Nᵾtᵾng

Jisas Betani kona ila mba murum ni, Jura wamp rᵾⱡaip ou ndupa ndi, pilik akil tek purung. Wamp purung ni, Jisas purum ni nga mendpᵾⱡ pilik, pi napᵾrᵾng. Lasarus on kona ila, Jisas ndi, ropa rut ndurum ni, kᵾning pilik purung. 10 Ni kᵾn, Pris wu kuimbal nimbᵾ ndi, Lasarus ni, kunda rop kundmin nᵾtᵾng. Ei nambuⱡ emel, Jisas ndi, Lasarus ropa rut ndurum uⱡ ni, Jura wamp mbᵾ ndi kandᵾk, en enim nga wu nuim nimbᵾ, wak rok Jisas mondᵾk pᵾtᵾng.

Jisas Ni, Jerusalem Puⱡnga Wamp Mbᵾ Ndi, Tᵾk Wu King Randrᵾng.

12 Utᵾma orunga, Jisas ni, Jerusalem yant urum. Ni kᵾn, Jura wamp minal, Pasopa rᵾng normin ui ou ila orung, wamp nimbᵾ ndi pᵾtᵾng. 13 Wamp nimbᵾ ndi, yaⱡa omung ranggᵾk tᵾk, nombuⱡa mam nila pᵾkaimp rok, ke nᵾk, Got nga mbi paka rondᵾk, nᵾk mel, “Got nga mbi paka ramin! Got nga mbi ila, tᵾpa angᵾndpa onum wamp ei, Got ndi, memp pindangga! Isrel wamp mbᵾ nga Wu King ei, Got ndi, memp pindangga!” nᵾtᵾng. 14 Ui ni kᵾn, Jisas ndi, kng donggi mbuⱡ ila moⱡpa urum. 15 Buk Wingti ila nitim ni mel,

“Nim Saiyon kona ye! mundmong iti nᵾti! Akup kng donggi kokila ti nga mbuⱡ ila moⱡpa onum ei, nim nga Wu King ei onum,” nᵾtᵾm.
16 Elim nga kitip kᵾni wu nimbᵾ ndi, uⱡ etᵾng nimbᵾ, pilik kun iti natᵾk morung. Wote, akil tepa, Jisas ⱡoporpa oⱡa moⱡpa, muⱡ kona purum ni kᵾn, Buk Wingti ila nᵾtᵾm ik, wote wamp ndi, etᵾng uⱡ nimbᵾ, piral nilinga, pilik kun etᵾng.

17 Jisas ndi, Lasarus ni, on kona ila ropa rᵾt nduⱡnga, kandrung wamp nimbᵾ ndi, uⱡ itim nimbᵾ, wamp mat kundᵾk nᵾtᵾng. 18 Wamp minal ndi ok, Jisas rawe etᵾk tᵾtᵾng. Ei nambuⱡ emel, Jisas ndi, uⱡ rᵾpndi ti etpa, Lasarus on kona ila ropa rᵾt ndurum ei nga etᵾng. 19 Wote, Perisi wu nimbᵾ ndi, ol tek, int yant etᵾk nᵾk mel, “Tᵾn namba uⱡ itmin? Mul kᵾmp mbila wamp mbᵾ pora, wu ei kᵾn puk kenmin. Tᵾn uⱡ ti kanda iti nᵾtmin ei, kanmin mon!” nᵾtᵾng.

Grik Wu Mat Ndi, Jisas Kᵾning Pilik Orung

20 Pasopa rᵾng normin ui ou nila, Grik wu mat, Jerusalem kona ila, Got nga mbi paka rundmin nᵾk purung. 21 Wote, Galili nga Betseita kona ila wu Pilip murum nila, puk nᵾk mel, “Wu nuim ye! Tᵾn Jisas kᵾnmin onmᵾn ei ka!” nᵾtᵾng. 22 Pilip ndi mba, Andru kundpa nilinga, rᵾp rokᵾⱡ, Jisas kundkᵾⱡ, ninggil purᵾnggil. 23 Jisas ndi, punt ropa nimba mel, “Muⱡᵾl Wu Kupa ei, akup mbi ou tᵾmba ui ei, nondpa enim. 24 Enim ik kupa ei, kundᵾp nᵾnt, wit mong tenda ti, mᵾi ila mana mba, kuⱡi naⱡᵾⱡᵾm ndam, elim tenda ei ku pemba. Wit mong ti, mᵾi ila mana mba, koⱡum ndam, wit minal milᵾ ropa, oⱡa omba, rᵾng mong ou ndupa rorum. 25 Wamp nam ti, elim nga kont mul uⱡ ei, ambuⱡpa gi ndum ndam, kont mba mul uⱡ ei, kandpa ti natmba. Wote, wamp nam ti, elim nga mul uⱡ ei, wamp mat nga nindpa, wak rom ndam, uⱡ nga kᵾnt nga kont mul uⱡ ei, kandpa tᵾmba. 26 Wamp nam ti, na nga kongun indimp nimba pilim ei, na kᵾn pep ropa wangga! Na munt kona ila rᵾp ropᵾl muⱡᵾmbil. Na nga kongun endim ti, Wuta ndi, tᵾpa ou ndumba,” nitim.

Jisas Elim Koⱡmba Ei Nga Nitim

27 Jisas ndi, nimba mel, “Akup na nga mundmong ei, mi enim ei nga, akup na namba nimp? Wuta o, na kᵾn pemba enim uⱡ ei, tᵾkᵾn munda, ei mon! Uⱡ pemba enim ei nga na ur. 28 Wuta o, nim nga mbi ei, oⱡa mba piyangga!” nitim. Ni kᵾn, muⱡ ila ik ti, mana ndupa nimba mel, “Na nga mbi ei, etᵾp tᵾp oⱡa mundᵾr. Ei mel ku, oⱡa mba piyangga!” nitim.

29 Wamp minal morung nimbᵾ ndi, muⱡ ila ik nitim ni pilik, nᵾk mel, “Kona guⱡ gaⱡa ninim!” nᵾtᵾng. Mat ndi, nᵾk mel, “Anggelo ti, Jisas kᵾn ik ninim!” nᵾtᵾng. 30 Wote, Jisas ndi, nimba mel, “Ik ei ndi, na tᵾpa rapᵾndᵾmba ui nawᵾnᵾm. Ik ei ndi, enim tᵾpa rapᵾndᵾmba, ei nga onum. 31 Akup ui ila, Got ndi, mᵾi kona wamp mbᵾ kᵾmp tᵾmba. Wote, mᵾi kona ila mel mbᵾ, nokᵾndrᵾm wu nuim ei, ropa mana ndumba. 32 Na nanim mᵾi kona ila oⱡa tᵾng ei kᵾn, na ndi, wamp mbᵾ pora etᵾp rukᵾr timp,” nitim. 33 I nitim ik ei, elim etpa koⱡmba mel nant ei nga pilpa nitim. 34 Wote, wamp nimbᵾ ndi, punt rok nᵾk mel, “Tᵾn nga mi ik ei ndi, nimba mel, ‘Got nga ngurum wu ei, kuⱡi naⱡᵾmba,’ uⱡ nga moⱡmba nᵾtᵾm. ‘Wote nim ndi, Muⱡᵾl Wu Kupa ei, mᵾi kona oⱡa ting nᵾn ei? Muⱡᵾl Wu Kupa ei nam?’” nᵾtᵾng. 35 Jisas ndi, punt ropa nimba mel, “Ui onunga wei kot ila, na nga rᵾⱡang ei, enim kᵾn temba. Akup rᵾⱡang tᵾnᵾm ei kᵾn, ping kona tila pᵾi. Wote, rumbᵾⱡ ei ndi, enim tᵾpa kum rui narangga! Nambuⱡ emel, rumbᵾⱡ ila nombuⱡa ila purum wamp ei, elim purum kona ei pili napilpa purum. 36 Akup rᵾⱡang ei, tek mormun ei kᵾn, mondᵾk pilᵾi! I etᵾk kᵾn, enim rᵾⱡang ei nga wamp muⱡing,” nitim. Jisas ndi ik ei, nimba pora ndupa kᵾn, wamp nimbᵾ, wak ropa, elim kiyang nimba mba, mo rurum.

Jura Wamp Mbᵾ Ndi, Mondᵾk Pili Napᵾtᵾng

37 Wote Jisas ndi, uⱡ rᵾpndi minal itim ni, wamp nimbᵾ ndi kandᵾk, mondᵾk pili napᵾtᵾng.

38 Wote, Painui wu Aisaiya nga nitim ik ni, omba kupa itim. Aisaiya ndi, nimba mel,

“Wu Nuim ye! ik nimᵾn ei, wamp namin ndi, pilik ting? Got ndi, wamp namin elim nga ronduⱡ ei, tᵾpa ora ndurum?” nitim.
39 Mondᵾk pili napᵾtᵾng uⱡ ei nga painui wu Aisaiya ndi, aldpa nimba mel,

40 “Got ndi, wamp mbᵾ etpa, numan ku randpa, etpa mong tᵾndpa elinga, wote pilik kun iti natᵾk, kandᵾk mbi ndui nandᵾk enmin. Got ndi, nimba mel, na nambuⱡ etᵾk numan ropᵾl rok, rukrᵾng wangina, na ndi, etᵾp timp,” nitim.

41 Aisaiya ndi, Jisas nga uⱡ eng nui mbᵾ, ur kump mel etpa kandpa kᵾn, ik ei nitim.

42 Ni kᵾn, Jura wu nuim mat ou ndupa, Jisas mondᵾk pᵾtᵾng. Wote, nᵾk ekit ndui nandrᵾng. Ei nambuⱡ emel, Perisi wu mbᵾ ndi, en enim atinga manga mbila, mon ning nᵾk pᵾtᵾng. 43 Uⱡ etᵾng ei, Got ndi, numan ngangga nᵾk, uⱡ ti iti natᵾk, wamp mbᵾ ndi, numan ngeing nᵾk etᵾng.

Jisas Nga Ik Ei Ndi, Mbᵾ Wamp Kᵾmp Tᵾmba

44 Jisas ndi, ik oⱡa ndupa nimba mel, “Wamp ti, na mondᵾp pilim ti, na mint mon. Wote na tᵾpa mundrum wu ei, kunda mondpa pilangga ku.” nitim. 45 Wamp nam ti, na kandpa mbi ndum ndam, na tᵾpa mundrun wu ei, kandpa mbi ndurum ku 46 Na ya mᵾi kona ila rᵾⱡang ei, mana ur. Ei nga, na mondpa pilim wamp ti, aldpa rumbᵾⱡ ila muⱡi nambᵾⱡmba. 47 Wamp nam ti ndi, na nga ik ei pilpa, pep rui narᵾm ndam, wamp ei na ndi, kᵾmp ti nᵾtimp. Na ya mᵾi kona ila wamp kᵾmp timp ei nga, ui nᵾwᵾr. Wamp etᵾp timp pilip mana ur. 48 Wamp nam ti na tᵾpa mbuⱡ ngumba. Na nga ik ei, tᵾpa roi ndum ndam, wamp ti ndi, elim kᵾmp tᵾmba. Ui pora nim ei kᵾn, na nga ik nᵾnt ei ndi, el elim kᵾmp tᵾmba. 49 Ya ik nᵾnt mbᵾ, nanim ni nanᵾnt. Na tᵾpa mundrum Wuta ei ndi, man ngumba ni nilinga, nᵾnt. 50 Na pᵾnt ei, Wuta nga man ik ei ndi, uⱡ nga kᵾnt nga kont mul uⱡ ei, tᵾpa ngumba. Na nᵾnt ik mbᵾ, Wuta ndi, na kundpa nilinga nᵾnt,” nitim.

Copyright information for `MED