John 13

Jisas Ndi, Kitip Kᵾni Wu Ni Kᵾⱡ Nga Kᵾmp Ⱡumᵾi Rundrum.

Pasopa rᵾng nuing ui ei nondpa elinga, Jisas elim pitim ei, ya mᵾi kona wak ropa, Tipam kᵾn mba ui ei, nondpa itim. Mᵾi kona wamp mat, elim numan ngurum nimbᵾ nga kont minal kuⱡpa mba, wote elim kurum.

Jisas kᵾn elim kitip kᵾni wu ni kᵾⱡ kᵾn, epindama Pasopa rᵾng nok morung. Ni kᵾn, Saimon kangᵾm Juras nga numan ila, Seitan ndi, kunt ropa Jisas nga rᵾk moⱡmba. Jisas pitim ei, Got ndi, uⱡ ronduⱡ mbᵾ pora, elim nga ki ila tinditim. Wote, elim Tipam kᵾn moⱡᵾp, ur ei mel ku, aldpa rukᵾr mbi nimba pitim. Ei nga, Jisas run nimba anggilpa, wal pᵾki oⱡa ni kᵾⱡ, potpa tepa, muⱡ kil ngurmin kat tᵾpa, elim nga kan rᵾⱡi ila, kan ropa pendpa, nu ni tᵾpa, nu ming tila oi ndupa mondpa, elim nga kitip kᵾni wu ni kᵾⱡ nga kᵾmp nimbᵾ, ⱡumᵾi ropa, muⱡ kil ngurmin ni kᵾⱡ ndi, kil ngurum.

I etpa omba, Saimon Pita murum ila oⱡnga, Saimon Pita ndi, nimba mel, “Wu Nuim ye! Na nga kᵾmp raⱡ ⱡumᵾiya ruin en ei?” nitim.

Wote Jisas ndi, punt ropa nimba mel, “Na uⱡ ent ei nga, akup nim pili napᵾn. Wote nim molkᵾn, pilkᵾn kun itin,” nitim. Pita ndi, nimba mel, “Nim ndi, na nga kᵾmp raⱡ ⱡumᵾiya rundin mel kapⱡa mon!” nitim. Wote Jisas ndi, punt ropa nimba mel, “Nim nga kᵾmp raⱡ ⱡumᵾiya rui nᵾrᵾnt ndam, nim na kᵾn muⱡi nᵾmbᵾⱡᵾn, mon!” nitim.

Pita ndi, punt ropa, nimba mel, “Nuim ye! Na nga kᵾmp raⱡ mendpᵾⱡ mon. Na nga ki raⱡ kᵾn, peng kᵾn pᵾi, ⱡumᵾi rundil!” nitim.

10 Wote Jisas ndi, nimba mel, “Wamp nam ti, nu tepa kai em ndam, aldpa nu temba mel mon. Wote kᵾmp kᵾⱡ mint, ⱡumᵾi rangga kᵾn, kᵾng mbᵾ pora, eng nomba. Ei mel, enim nga kᵾng kᵾⱡ, eng nonum. Wote, wu tenda ti, mint mon,” nitim. 11 Jisas ndi wu tenda ti, eng nu nanᵾnᵾm nitim. Ei nambuⱡ emel, elim nga ruk moⱡmba ei nga pilpa nitim.

12 Wote, kᵾmp ⱡumᵾiya ropa pora ndupa, Jisas elim nga wal pᵾki oⱡa ni kᵾⱡ, tᵾpa pakᵾpa, elim murum nde pol nila int mba moⱡpa, nimba mel, “Uⱡ ent ei nga puⱡ ei, enim pilik kun enmin ei? 13 Na kundᵾk, ik mbo wu ei nᵾk, wote Wu Nuim ei nᵾk enmin, ei kupa! Ei na waⱡᵾm ei. 14 Na enim nga Ik Mbo Wu ei, wote enim nga Wu Nuim ei ndi, enim nga kᵾmp ⱡumᵾiya rondunt. Ei mel, enim ndi, i ku etᵾk, en enim rᵾk ila ti ndi, ti nga kᵾmp ⱡumᵾiya rundᵾi! 15 Na ndi, uⱡ to rop enim kᵾn ent ei mel, enim ndi, na nga kitip kandᵾk, i ku etᵾk, mek pᵾi! 16 Enim ik kupa ei, kundᵾp nᵾnt. Kindmant wu ti, elim nga wu nuim ei, tᵾpa mana ndumba, mel kapⱡa mon. Omba, nombuⱡa rᵾng wu ti ndi, elim tᵾpa mundum wu ti, tᵾpa mana ndumba mel mon ku. 17 Ik kupa nᵾnt ei, enim pilik mormin, pᵾnmin ei mel etᵾk, mek pung ndam, numan wang ni, uⱡ mbᵾ enim kᵾn pemba, nitim. 18 Ik nᵾnt ei, enim pᵾi kundᵾp ni nanᵾnt. Enim kᵾmp rop tit ei, nanim pilip mor. Wote, Buk Wingti ila ik petᵾm ei omba, kupa etmba. Enim ei ndi, nimba mel, ‘Wu ti ndi, na nga rᵾng tᵾpa nom ei ndi, na ruk muⱡᵾmba.’ 19 Uⱡ wote, pemba ei nga, enim kuimp tep kundᵾp nᵾnt. Wote, uⱡ ei pem kandᵾk kᵾn, Na Wu Nam Moⱡ, ei enim ndi, mondᵾk pil-ing. 20 Enim ik kupa ei, kundᵾp nᵾnt. Wamp ti, na ndi, tᵾp mundunt ei, nim wamp ti ndi, rawe etkᵾn tin ndam, ei na rawe etkᵾn tin. Wote, wamp nam ti ndi, na rawe etpa tᵾm ndam, na tᵾpa mundrum wu ei, rawe etpa tᵾmba ku,” nitim.

Juras Ndi, Jisas Rᵾk Murum

21 Jisas ik nimba pora ndupa, elim mbun tᵾpa nimba mel, “Na ik kupa ei, enim kundᵾp nᵾnt. Enim wu kᵾⱡ nga ti ndi, na ruk muⱡing,” nitim.

22 Ni kᵾn, kitip kᵾni wu ni kᵾⱡ ndi kundᵾk nᵾk mel, “Nam kundpa ninim nda?” Nᵾk pilik, rundᵾk ti ndi, ti kandrung. 23 Jisas ndi, kitip kᵾni wu ti, numan minal ngurum ni, elim kᵾn nondpa murum. 24 Wote wu ni, Saimon Pita ndi, peng walinga ropa nimba mel, “Wu nam ti, kundpa ninim nda?” waldᵾkᵾn pili nitim.

25 Kitip kᵾni wu ni ndi, Jisas murum nila nondpa mba moⱡpa, waldpa nimba mel, “Nuim ye! Nim nam kundkᵾn nᵾn?” nitim.

26 Jisas ndi, punt ropa nimba mel, “Bret ti tᵾp, kopung kandᵾp wu ti, ngamba tᵾm wu ei, waⱡᵾm ei,” nitim. Wote, bret ti tᵾpa, kopung kandpa, Saimon Iskariyot kangᵾm wu Juras ngurum. 27 Ni kᵾn, Juras ndi, bret ni tᵾpa ambuⱡnga, tᵾkrᵾpa mint, Seitan omba, Juras nga numan ila murum. Wote Jisas ndi, nimba mel, “Uⱡ itin ti, tᵾkᵾrkᵾn iti!” nitim. 28 Nde pol ila morung wu nimbᵾ ndi, Jisas nga nitim ik ni, tᵾk mindi namindᵾtᵾng. 29 Juras ku moni wal kᵾⱡ, rᵾp itim ei nga, kitip kᵾni wu ni kᵾⱡ ndi pilik, Jisas ndi, ui rᵾng ou ila rᵾng mat, rarᵾp ropa tangga, ninim nᵾk pᵾtᵾng. Wote, mat ndi pilik, mel mbᵾ tᵾpa, wamp kurpa mbᵾ ngangga nᵾk pᵾtᵾng. 30 Wote Juras ndi, bret ni tᵾpa, mepa, pena purum. Ni kᵾn, kona ni rumbᵾⱡ ropa pitim. 31 Juras ni, pena puⱡnga, Jisas ndi, nimba mel, “Akup Muⱡᵾl Wu Kupa ei, mbi ou tinim. Got elim Muⱡᵾl Wu Kupa ei kᵾn, mbi ou tinim. 32 Got nga mbi ou tᵾmba uⱡ ei, Muⱡᵾl Wu Kupa ei ndi, etpa mot ndum ndam, wote Muⱡᵾl Wu Kupa ei, elim mbi ou tᵾmba. Uⱡ ei, Got ndi, wamp mbᵾ kᵾn, etpa mot ndumba. 33 Na nga kangambuⱡa mbᵾ, na enim kᵾn ui ruⱡ etᵾp muⱡi nᵾmbᵾⱡimp. Ei kᵾn, enim ndi, na andᵾk kuring. Wote, na punt kona ila, enim ui nᵾwing. Ik ei, Jura wamp mbᵾ, kundᵾp nit ei mel, enim kᵾndᵾp nᵾnt.

34 Enim kᵾn, mi ik kont ti, nᵾmp ngᵾnt ei, enim ndi, wamp mat numan ngᵾi! Na ndi, enim numan ngur ei mel ku, enim ndi, wamp mat numan ngᵾi! 35 Enim ndi, wamp mat numan ngᵾng ndam, wamp elpa mbᵾ ndi kandᵾk, enim na nga kitip kᵾni wu kᵾⱡ, nᵾk piling,” nitim.

Pita Ndi, Jisas Elim Tᵾpa Mbuⱡ Ngumba Ei Nga Nitim

36 Saimon Pita ndi, Jisas waldpa nimba mel, “Nuim ye! Nim nant ila pin?” nilinga. Jisas ndi, punt ropa, nimba mel, “Na akup punt kona ila, nim uin mel mon. Wote, ui ti kᵾn, na pep rokᵾn uin,” nitim. 37 Wote Pita ndi, waldpa nimba mel, “Nuim ye! Akup na nambuⱡ emel, nim pep rop ui nᵾwimp. Na nim nga nindᵾp kuⱡimp mor ei ka!” nitim. 38 Jisas ndi, punt ropa, nimba mel, “Nim kupa, na nga nᵾndkᵾn kuⱡin, ei nga tᵾkᵾn, kun etkᵾn morᵾn ei? Na ik kupa ei, nim kᵾndᵾp nᵾnt. Kᵾi kulda rui nᵾri kᵾn, nim ndi, na kᵾni nakᵾndᵾr nᵾkᵾn, ronduⱡ mundkᵾn raldika indin,” nitim.

Copyright information for `MED