John 14

Got kᵾn Mbin Ei Nga Nombuⱡa Mam Ei Jisas

Jisas ndi, nimba mel, “Enim kit pilik, numan ou ndupa pili nᵾpᵾlᵾi! Got mondᵾk pilik, wote na kunda mondᵾk pilᵾi! Na nga wuta nga manga ila kᵾkaⱡ minal tetᵾm. Ei mel natilinga ndam, enim unt kundᵾp nilmba. Wote, akup mbo enim nga kona ti tᵾp kun itimp punt. Na mbo enim nga kona ti, tᵾp kun etᵾp pora ndup kᵾn, yant omp enim tᵾp mep pamba, na kᵾn rᵾp rop muⱡmin. Na mbi kona ei nga nombuⱡa mam ei, enim pilik mormin,” nitim. Tomas ndi, nimba mel, “Nuim ye! Nim pin kona ei, tᵾn pili napilip mormᵾn. Wote, kona ila mbin ei nga nombuⱡa mam ei, etᵾp pilimin mel nant nda?” nitim. Jisas ndi, ik punt ropa, nimba mel, “Nombuⱡa mam ei na. Ik kupa ei na, wote kont mba mul uⱡ ei na. Wamp ti, na tᵾpa waka ndupa, Wuta kᵾn mba mel mon. Enim na pilik mbi ndᵾng ndam, Wuta i ku etᵾk, pilik mbi nduing ku. Wote, akup ei kᵾn, enim ndi, wu ei kandᵾk pilik enmin,” nitim.

Wu Pilip ndi, nimba mel, “Nuim ye! Tipanᵾm tᵾn tᵾkᵾn ora ndui! Tᵾn kᵾnmin uⱡ ei ndi, tᵾn nga numan orunga wang nangga!” nitim. Jisas ndi, punt ropa, nimba mel, “Na enim kᵾn, ui ruⱡ etᵾp mormᵾn ni, wote nim na kandkᵾn, mbi ndui nandᵾn ei? Pilip, wamp nam ti, na kandpa, mbi ndurum ei ndi, Wuta kandrum. Ei kᵾn, nambuⱡ emel, ‘Wuta ei, tᵾn tᵾkᵾn ora ndui,’ nᵾn?” nitim. 10 Wu Pilip ye! Nim na mondkᵾn pili napᵾn ei? Na Wuta kᵾn moⱡmba, Wuta ei na kᵾn morum. Na ik enim kundᵾp nᵾnt mbᵾ, nanim ndi, ni nandᵾt. Wuta na kᵾn morum ei ndi, elim nga kongun mbᵾ enim. 11 Na Wuta kᵾn moⱡmba. Wuta ei, na kᵾn morum. Nᵾnt ik ei, mondᵾk pilᵾi! Ei mel mon ndam, na ent uⱡ mbᵾ kandᵾk kᵾn, mondᵾk pilᵾi! 12 Na ik kupa ei, enim kundᵾp nᵾnt. Na mondpa pilim wamp ti, na uⱡ ent mbᵾ mel etmba. Ama kupa nᵾnt, uⱡ ronduⱡ ou mat, na tᵾpa mana ndupa etmba. Nambuⱡ emel, na Wuta kᵾn punt. 13 Na mbi tek angᵾndᵾk, mawa eng ei mel pilip indimp. Uⱡ ei ndi, Wuta nga uⱡ ronduⱡ mbᵾ, kangᵾm kᵾn, etpa mot ndumba. 14 Wote enim ndi, na nga mbi tek angᵾndᵾk mel ti, mawa eng ndam, na ndi indimp,” nitim.

Jisas Ndi, Muⱡnga Wingti Mana Ndup Nguimp Nitim

15 “Enim ndi, na numan ngᵾng ndam, na nga mi ik kᵾⱡ pep rᵾi! 16 Na nga Wuta waldᵾp namba, Tᵾpa Rᵾpndi wamp elpa ti, enim ngumba. Ei Ik Kupa nga Muⱡnga ei, enim kᵾn omba, uⱡ nga kᵾnt nga moⱡpa mint mba. Mᵾi kona wamp mbᵾ ndi, Ik Kupa nga Muⱡnga ei, kandᵾk ting mel mon. Nambuⱡ emel, wamp mbᵾ ndi, Muⱡnga ei kandᵾk, wote pili napᵾtmin. Wote enim ndi, Muⱡnga ei pᵾtmᵾn. Ei nambuⱡ emel, enim kᵾn akup morum, wote moⱡpa mint mba.

18 Enim kangambuⱡa etpa mel muⱡi nᵾmbᵾⱡing. Na enim kᵾn yant uimp. 19 Ui onunga kot ila, mᵾi kona wamp mbᵾ ndi, na kᵾni nᵾkᵾning. Wote enim ndi, na kᵾning. Nambuⱡ emel, na kont mbo mor ei mel, enim kont puk muⱡing ku. 20 Wote, ui ei om kᵾn, na Wuta kᵾn mor. Wote, enim na kᵾn mormin. Wote, na enim kᵾn mor uⱡ ei, pilik kun iting.

21 Na nga mi ik kᵾⱡ pilpa tᵾpa, pep rorum wamp ei ndi, na numan ngurum. Wuta ndi, na numan ngorum ei mel ku, wamp ei numan ngumba. Wote na ndi, i ku etᵾp, wamp ei numan ngamba. Na nga puⱡ ei, wamp ei kᵾn, tᵾp ora nduimp,” nitim. 22 Wote, Juras (Iskariyot ei mon) ni ndi, nimba mel, “Nuim ye! Nambuⱡ emel, nim nga puⱡ ei, tᵾn kᵾn mint, nᵾkᵾn mot ndukᵾn, wote mᵾi kona wamp mbᵾ, kᵾn nᵾkᵾn, mot ndui nandᵾn?” nitim. 23 Wote, Jisas ndi, punt ropa, nimba mel, “Wamp nam ti ndi, na numan ngum ndam, na nga ik mbo endᵾnt mbᵾ, pep romba. Wuta ndi, wamp ei numan ngangga. Wote tᵾl ombuⱡ wamp ei kᵾn, rᵾk rᵾk muⱡᵾmbil 24 Wamp nam ti ndi, na numan ngui nganggᵾrᵾm. Ei ndi, na nga ik mbo endᵾnt mbᵾ, pep rui narᵾrᵾm. Man ik enim pᵾtmᵾn ei, na nga mon. Na tᵾpa mundrum Wuta ei nga ik, ei pᵾtmᵾn.

25 Na enim kᵾn kont moⱡᵾp, enim ik mbᵾ, kundᵾp nᵾnt. 26 Enim Tᵾpa Rapundpa, ronduⱡ ngumba ei, Muⱡnga Wingti ei ndi, etmba Muⱡnga ei, na nga mbi ila, Wuta ndi, ngumba mundangga uⱡ mbᵾ nga pora, mbo endᵾmba. Muⱡnga Wingti ei ndi ku, ya enim kundᵾp nit ik nimbᵾ, enim kᵾn etpa piral ndumba.

27 Na nga numan wang ni uⱡ ei, enim kᵾn wak ront ei, enim kᵾn piyangga! Mᵾi kona wamp mbᵾ nga numan wang ndui uⱡ etmin ei nga ngui ngangᵾnt. Ei kᵾn, enim numan ou nduk, pilik mundmong iti nᵾtᵾi! 28 ‘Na enim wak rop mbo, wote enim kᵾn yant uimp.’ Ei nga, enim unt kundᵾp nit. Enim na numan ngᵾng ndam, na Wuta kᵾn punt ei nga, kai pilik muⱡing. Ei nambuⱡ emel, na nga Wuta ei, na tᵾpa mana ndupa oⱡa, orunga morum. 29 Uⱡ mbᵾ, iti nᵾti kᵾn, na ndi, enim akup unt kundᵾp nᵾnt. Wote uⱡ mbᵾ em ei kᵾn, na mondᵾk piling. 30 Na enim kᵾn, ik minal ni nᵾnimp. Nambuⱡ emel, mᵾi kona rᵾp wu ei onum. Wu ei nga ronduⱡ ti ndi, na tᵾpa mana ndumba, mel mon! 31 Wote, mᵾi kona wamp mbᵾ ndi, na nga Wuta numan ngur uⱡ ei nga kandᵾk, poⱡ ndeing. Nambuⱡ emel, na Wuta ndi, iti nᵾtᵾm uⱡ mbᵾ pora, pep rop et. Wᵾiya, ya kona ei, wak rop kelip pamin!” nitim.

Copyright information for `MED