John 2

Jisas Ni, Kongun Puⱡ Mondpa Itim

Wote, rumbᵾⱡ raldika omba puⱡnga, Galili kona peng Keina ila, amp ti, wu ngorung nila, Jisas nga mam ni, ila murum ku. Jisas kᵾn, elim nga kitip kᵾni wu ni kᵾⱡ kᵾn, rung munduⱡina, puk morung ku. Wote, nu wain nok pora nduⱡmina, Jisas nga mam ndi, Jisas ni kundpa, nimba mel, “Nu wain ei, pora ninim,” nitim. Jisas ndi, int ndupa, nimba mel, “Amp ye! Nim ndi, na nga itimp uⱡ ei mel, nᵾkᵾn ngui ngᵾngi! Na nga ui ei, kokila petᵾm,” nitim. Wote, Jisas nga mam ndi, kongun wu ni kᵾⱡ, kundpa nimba mel, “Elim ndi, enim kundpa nim ik ei mel, pilik itᵾi!” nitim. Ku ming 6 kat titim ni kᵾⱡ, Jura wamp mbᵾ nga atinga rok uⱡ etmin ei nga, nu kulk, kump ki ⱡumᵾi rormin ming mam nimbᵾ, wei titim. Jisas ndi, kongun wu ni kᵾⱡ, kundpa nimba mel, “Ming mbila nu kulk mundᵾi!” Nilinga, nu kulk peka rondrung. Jisas ndi, kongun wu ni kᵾⱡ, kundpa nimba mel, “ Akup nu mbᵾ kulk, mek puk, rᵾng kaⱡᵾm rᵾp wu ei ngᵾi!” nitim. Wote, nitim ni mel etᵾng. Rᵾng rup itim wu ni ndi, nomba pitim mel, nu wain mendpᵾⱡ itim, “Apa ye! Nil kandᵾk tᵾng nda?” nimba pitim. Wote, kongun wu nu kulk, mek orung ni kᵾⱡ, pilik morung. Amp titim wu ni, wi ropa kundpa, nimba mel, “Wamp pora, nu wain kai mbᵾ, kuimp tek nok, wote akil tek, nu wain tᵾngᵾn iti nᵾti ei, etmin ni. Nim nu wain kai mat titᵾn ti, wote akup, nonmᵾn ei ka!” nitim. 11 Ni kᵾn, Galili nga kona peng Keina ila, Jisas ndi, puⱡ mondpa, uⱡ rᵾpndi ti itim ila, kitip kᵾni wu ni kᵾⱡ ndi, elim nga ronduⱡ ei kandᵾk, elim ni, mondᵾk pᵾtᵾng. 12 Wote, Jisas elim nga mam kᵾn, ᵾngᵾnᵾl kᵾn omba, elim nga kitip kᵾni wu ni kᵾⱡ kᵾn, Kaperniyum kona peng ila puk, ui mat morung.

Jisas Ni Manga Wingti Ou Ila Purum

13 Jura wamp nga Pasopa rᵾng nuing ui ni, nondpa elinga, Jisas ni, Jerusalem purum. 14 Wote, manga wingti ou ila, wamp minal kng kau na, sipsip na, kᵾi na mbᵾ, rarᵾp rok, ku moni int yant etᵾk, rat pol nimbila moⱡina kundrum. 15 Ni kᵾn, Jisas ndi, kan puⱡa ti tᵾpa, wamp na, kng sipsip na, kng kau na mel nimbᵾ, kan puⱡa ndi ropa, makrᵾpa mundpa, ku moni int yant etᵾng nimbᵾ, ropa mbuⱡ mbaⱡ etpa, rat pol nimbᵾ, ropa kongundpa itim. 16 Kᵾi na mat, tek morung wamp nimbᵾ, kundpa nimba mel, “Kelik mek pᵾi! Na nga Wuta nga manga ei, tᵾk mel rop manga rundi nᵾndᵾi!” nitim. 17 Kitip kᵾni wu ni kᵾⱡ ndi, Buk Wingti ila, ik ti petᵾm ei, omba ronduⱡ nga pᵾtᵾng.

“Got nim nga manga ei, na numan ngᵾmp kᵾn, na nga numan ei, ndip mel nonum,” nᵾtᵾm.
18 Wote, Jura wu nuim nimbᵾ ndi, yant nduk, Jisas waldᵾk nᵾk mel, “Nim namba uⱡ rᵾpndi ti, etana kandpᵾn, nim uⱡ mbᵾ nga ronduⱡ tekᵾn molkᵾn en, ei nana pilamin!” nᵾtᵾng? 19 Jisas ndi, punt ropa, nimba mel, “Manga wingti ou ei, rok tᵾk tiyangina, na ndi, rumbᵾⱡ raldika ila mendpᵾⱡ, rakᵾp timp,” nitim. 20 Jura wu nimbᵾ ndi, ik int nduk nᵾk mel, “Ya manga wingti ei rakᵾⱡina, pana 46 omba purum. Nim wu ei ndi, rumbᵾⱡ raldika ila, manga rakᵾp timp nun ei?” nᵾtᵾng. 21 Wote Jisas ndi, manga wingti nitim ni, elim nga kᵾng kᵾⱡ kundpa nitim. 22 Wote Jisas ndi, on kona ila, ⱡoporpa omba purum ni kᵾn, kitip kᵾni wu ni kᵾⱡ ndi, nitim ik ni, pilik tᵾk rondᵾk, Buk Wingti ila ik petᵾm mbᵾ kep, Jisas elim nga nitim ik nimbᵾ, kᵾmp kᵾm pilingina, kupa elinga, mondᵾk pᵾtᵾng.

Jisas Wamp Numan Kandrum Wu Ei

23 Wote Jisas ndi, Jerusalem kona peng ou ila, Pasopa ui ou morung ni kᵾn, Jisas uⱡ rᵾpndi mat itim ni, wamp minal ndi kandᵾk mondᵾk pᵾtᵾng. 24 Wote Jisas ndi, i etᵾng uⱡ ni, kandpa tᵾpa pei mundpa kᵾn, el elim ndi, wamp kᵾⱡ nga ki ila, ngui ngᵾnggᵾrᵾm. 25 Nambuⱡ emel, wamp nam ti ndi, wamp nga numan pᵾtmᵾn uⱡ ei nga, Jisas kundᵾk ni nandᵾtᵾng. Nambuⱡ emel, elim ndi, wamp nga numan rukᵾr kandrum.

Copyright information for `MED