John 3

Jisas Kᵾn Nikondimas Raⱡ Ik Nᵾtᵾnggil

Wote, Jura wamp mbᵾ nga Perisi wu nuim, Nikondimas nimba ti murum. Wu ni ndi, rumbuldi Jisas kᵾn mba, kundpa nimba mel, “Ik Mbo Wu ye! Nim ik mbo wu Got kᵾn molkᵾn, mana urᵾn ti kant. Ei kᵾn, wamp ti ndi, Got elim kᵾn muⱡi nambᵾⱡᵾm ndam, wamp ei, nim uⱡ rᵾpndi mat etᵾn mbᵾ mel, kapⱡa iti natᵾmba,” nitim. Jisas ndi, punt ropa, nimba mel, “Ya ik nᵾnt mbᵾ, ama kupa nᵾnt. Kont nga mi naming wamp ti ndi, Got nga wamp tᵾpa mumuk rui uⱡ ila, rukrᵾng mba mel mon!” nitim. Jisas nga nitim ik ni, Nikondimas ndi, waldpa nimba mel, “Wu anda etpa moⱡum ti, aldpa mam nga oⱡ ila, rukrᵾng pangga kᵾn, namba etᵾk, wote kont nga mondᵾk ming ei?” nitim. Jisas ndi, int ndupa nimba mel, “Ik kupa ei nᵾnt. Wamp ti, nu ei kᵾn, Nuim Got nga Muⱡnga raⱡ ndi, kont nga mi naminggil ndam, Got nga wamp tᵾpa mumuk rui uⱡ ila, rukrᵾng mba mel mon! Mᵾi kona wamp mbᵾ ndi, mondᵾk metmin wamp mbᵾ, mᵾi kona wamp rarmin. Wote Muⱡnga ndi, mondpa metᵾm wamp mbᵾ, tᵾpa Muⱡnga elim nga wamp randrum. Wamp kont nga, miyangga nᵾnt ik ni nga, nim pilkᵾn min ngᵾn mundi nᵾmᵾndi! Kona kᵾpkᵾ elim pᵾtᵾm ei mel, ropa omba mba mel mbᵾ, roka nduⱡnga, ik nᵾtᵾm ei pᵾtmᵾn. Wote, pepa orum kona ei kep, wote omba kona nil purum ei kep, tᵾn pili napᵾtmᵾn. Muⱡnga nga wamp kont nga, metᵾm ei nga puⱡi ei, ei mel ku petᵾm” nitim. Wote Nikondimas ndi, nimba mel, “Namba uⱡ ti nga nin ei, na pilip rondᵾnt ei ka!” nitim. 10 Aldpa Jisas ndi, Nikondimas kundpa, nimba mel, “Nim Isrel kona ei nga ik mbo wu kuimbal ni, nᵾmp kant! Ei wote, na ik nᵾnt ei, pilkᵾn rundᵾn ei ka! 11 Na ndi, ik kupa enim kundᵾp nᵾnt. Tᵾn ik pilip kongundpᵾn nimbun, wote mong raⱡ ndi, kandᵾrmᵾn mel, kun nimbun mot ndupᵾn nᵾtmᵾn. Ei wote, enim ndi, tᵾn nga ik ei, pilik ti natᵾtmᵾn. 12 Mᵾi kona ila nga, uⱡ petᵾm mbᵾ mel, oⱡa tᵾp nilmba, nim pilkᵾn kun iti natᵾn. Wote, muⱡ kona ila uⱡ mbᵾ nga, nint ndam, namba etkᵾn pilkᵾn kun itin? 13 Wote, wamp ti mul kona ila, oⱡa pi nᵾpᵾrᵾm. Wote, Muⱡᵾl Wu Kupa ei mendpᵾⱡ, muⱡ kona ila moⱡpa, mana urum.

14 Unt, kona kui waka ila, Moses ndi, kimbuⱡa mel ti, mim etpa, kuipa ropa mundrum. Ei mel, Muⱡᵾl Wu Kupa ei, i ku etᵾk tek, kuipa rok mundangina, na mondpa pilim wamp ti, uⱡ nga kᵾnt nga kont mul uⱡ ei, moⱡpa mint mba. 16 Ei kᵾn, Nuim Got ndi, tᵾn mᵾi kona ila wamp mbᵾ, kont minal kuⱡpa, elim nga kangᵾm mendpᵾⱡ ei, tᵾn ngurum. Ei nga, elim nga kangᵾm ei, mondᵾk piling wamp mbᵾ, uⱡ nga kᵾnt nga kont mul uⱡ ei, molk mint ping. 17 Wote Got ndi, kangᵾm Jisas tᵾpa mundrum ni, wamp kᵾmp tangga nimba, tᵾpa mundi nᵾmᵾndrᵾm, mon! Wamp pora etpa tangga nimba, tᵾpa mundrum. 18 Wamp ti, Got nga kangᵾm ei, mondpa pilim ndam, kᵾmp ti natᵾmba. Wote, wamp ti mondpa pili napilim ndam, wamp ei kᵾmp tᵾmba. Nambuⱡ emel, wamp ei, Got nga kangᵾm mendpᵾⱡ ei, mondpa pili napᵾtᵾm. 19 Wamp kᵾmp tᵾmba uⱡ ei mel, Jisas ni, rᵾⱡang ei, ya mᵾi kona ila mana urum. Ei mᵾi kona ila wamp mbᵾ ndi, kandᵾk kun iti natᵾk, rumbᵾⱡ ei kandᵾk, numan nguk, rᵾⱡang ei tᵾk mbaⱡ ngorung. Nambuⱡ emel, wamp mbᵾ ndi, uⱡ kit mbᵾ etᵾk morung. 20 Uⱡ kit etmin wamp mbᵾ ndi, rᵾⱡang ei kandᵾk, kit pilik, tᵾn nga uⱡ kit mbᵾ, para temba nᵾk, rᵾⱡang ila rukᵾr ui nawᵾrmᵾn. 21 Wote, uⱡ kupa mbᵾ etᵾm wamp ti, Got nga ik ei, teng ndupa etᵾm uⱡ mbᵾ, mot nangga, kᵾneing nimba, rᵾⱡang ila rukᵾr orum,” nitim.

Jon Ndi, Jisas Nga Puⱡ Ei Nimba Mot Ndurum.

22 Wote Jisas ndi, elim nga kitip kᵾni wu ni kᵾⱡ kᵾn, Juriya kona ila puk moⱡᵾngina, kitip kᵾni wu ni kᵾⱡ ndi, wamp mbᵾ nu tinditing. 23 Wote Jon ndi, i ku etpa, met Einon Selim kona ila, nondpa nu minal murum kona nila, wamp ok, mint moⱡina, nu tinditim. 24 Ni kᵾn, Erot ndi, Jon ni tᵾpa, kan ngui ngᵾngi kᵾn, uⱡ mbᵾ etpa murum.

25 Tᵾnggᵾt, Jura wu ti ndi omba, en enim nga ki ⱡumᵾi rui uⱡ ei nga, oⱡa tᵾpa nilinga, Jon nga kitip kᵾni wu ni kᵾⱡ kᵾn, ik porung. 26 Wote, Jon nga kitip kᵾni wu ni kᵾⱡ, elim kᵾn ok, nᵾk mel, “Ik mbo wu ye! Unt wu ti, nim kᵾn, nu Joran noi orunga oⱡnga, elim nga para ndukᵾn nitin. Akup wu ni ndi, wamp mbᵾ nu tᵾndᵾlnga, wamp pora wu ei kᵾn punmᵾn ei ka!” nᵾtᵾng. 27 Wote Jon ndi, ik ni punt ropa, nimba mel, “Got ndi, mel ti mana ndupa, ngui ngangᵾm ndam, wamp ti ndi, kun poⱡpa tᵾmba mel mon. 28 ‘Unt nit ni mel, enim akup kundᵾp nᵾnt, Got nga ngurum wu Kraist ei, na mon! Na nombuⱡa rung wu ei.’ 29 Amp kiyaka orum ei, amp tᵾmba wu ei nga mendpᵾⱡ orum. Amp tᵾmba wu ei nga, wamp mᵾn ti, nondpa moⱡpa, amp tᵾmba wu ei nga ik nᵾtᵾn ei, pilpa numan kai pᵾtᵾm. Uⱡ ei mel, Got nga ngurum wu Kraist ei, amp tᵾmba wu ei mel, wote wamp mᵾn ti, nondpa moⱡpa, numan kai pᵾtᵾm wu ei mel, na moⱡᵾp kᵾn, enim ndi, wu ei nga ik ninmin ei, pilip kai pᵾnt. 30 Elim nga mbi omba, oⱡa pangga, na, elim nga mana orunga muⱡimp.

31 Wu nam ti, oⱡa mana orum ei, wamp mbᵾ tᵾpa mana ndupa, oⱡa mel morum. Wote, wamp ti ndi, mᵾi kona ila orum wamp ei, mᵾi kona mel mbᵾ nga nᵾtᵾm. Wu ti, muⱡ kona moⱡpa, mana urum wu ei, wamp wei mbᵾ, tᵾpa mana ndupa, elim oⱡa mel morum. 32 El elim pilpa kandpa itim uⱡ mbᵾ nga, akup omba pora ndupa ninim. Ei wote, wamp ti ndi, ik ninim ei pilpa, ti natᵾtᵾm. 33 Wamp nam ti ndi, Got nga ik ei pilpa tᵾpa, ambᵾⱡᵾm ei ndi, Got kupa morum nimba. 34 Ei mel, Got nga tᵾpa mundrum wamp ei ndi, elim nga keta tᵾpa nᵾtᵾm. Ei nambuⱡ emel, Got nga Muⱡnga ei, elim kᵾn peka ropa morum. 35 Got ndi, kangᵾm numan ngumba kᵾn, muⱡ mᵾi raⱡ nga mel tetᵾm mbᵾ pora, elim nga kangᵾm nga ki ila tinditim. 36 Wote, wamp nam ti ndi, Kangᵾm mondpa pilim ndam, uⱡ nga kᵾnt nga kont mul uⱡ ei tepa morum. Wote, wamp nam ti ndi, kangᵾm tᵾpa pei mondum ndam, uⱡ nga kᵾnt nga kont mul uⱡ ei, ti natᵾmba. Got nga popᵾⱡ ei omba, wamp ei kᵾn moⱡmba,” nitim.

Copyright information for `MED