John 4

Jisas Ni, Sameriya Amp Ti Kᵾn Ik Nitim

Ui ni kᵾn, Jisas ndi, Jon ni, tᵾpa mana ndupa, wamp minal nu tinditim. Uⱡ ei, Perisi wu nimbᵾ ndi, molk pᵾtᵾng. Wamp minal nu tᵾtᵾng uⱡ ei, kitip kᵾni wu ni kᵾⱡ ndi, mendpᵾⱡ etᵾng. Jisas elim mon. Jisas elim nga uⱡ itim nimbᵾ, Perisi wu nimbᵾ ndi, pᵾtᵾng ila, Juriya kona ni, wak ropa, Galili kona ila int mba pilpa kᵾn, Sameriya kona ila unt ekit urum.

Ni kᵾn, Sameriya kona peng ti, mbi tek, Saikar nᵾtmᵾn nila urum. Kona ni unt, Jekop ndi, elim nga mᵾi ti, kangᵾm Josep ngurum ni, nondpa mel titim. Jekop nga nu kut kona nila titim. Ant ni omba, peng im ila pelinga, Jisas nombuⱡa ruⱡ urum ei nga, kᵾmp ambuⱡnga omba, nu kut ᵾldᵾ ila murum. Ni kᵾn, Sameriya amp ti, nu kuⱡmba pilpa urum ila, Jisas ndi, kundpa nimba mel, “Na nu kot kulkᵾn ngui!” nitim. Elim nga kitip kᵾni wu ni kᵾⱡ, kona peng ila, rᵾng rarᵾp ruing purung. Wote, Sameriya amp ni ndi, punt ropa nimba mel, “Nim Jura wu, na Sameriya amp ei wote, nu kuⱡᵾp ngeimp, nᵾn ei ka!” nitim. Ni, Jura wamp mbᵾ kᵾn, Sameriya wamp mbᵾ kᵾn, el rui wamp morung ei nga pilpa nitim. 10 Wote Jisas ndi, nimba mel, “Nim Got nga mel gem ngurum uⱡ mbᵾ, pilkᵾn mbi ndukᵾn, wote na nu kulkᵾn ngui nᵾnt wu ei, akup kandkᵾn, mbi nduⱡina ndam, wu ei kᵾn, nu kot mawa etana! Wote, kont mba mul nu ei, kuⱡpa nim nguⱡnga,” nitim. 11 Amp ei ndi, kundpa nimba mel, “Nuim ye! Nu kut kona ei, ama mandpa tetᵾm. Nim nu kuⱡin ming ti kep, mon ku ei ka! Kont mba mul nu nᵾn ei, nil moⱡnga kulkᵾn, na nguin pilkᵾn nᵾn nda? 12 Tᵾn nga anda tipam Jekop ndi, nu kut kona ei, tᵾn ngurum. Unt, elim kᵾn, elim nga kangᵾmᵾl na, wote kng kau na nimbᵾ ndi, norung ku. Jekop ni wu mana, nim wu oⱡa mel nda?” nitim. 13 Wote Jisas ndi, punt ropa nimba mel, “Ya nu ei, kuⱡpa nom wamp ei, aldpa nu waka kuⱡmba ku. 14 Wote, wamp nam ti ndi, nu kuⱡᵾp ngamba nom wamp ei, aldpa nu waka kuⱡi naⱡᵾmba. Nu kuⱡᵾp ngᵾnt nu ei ndi, wamp ei nga numan rukᵾr orunga, nu pit kona mel raⱡpa, pukpa omba mba, mint moⱡmba. Nu ei, pukpa omba mba, mint moⱡmba ei, uⱡ nga kᵾnt nga kont mul uⱡ ei, kandpa tᵾpa ngumba,” nitim. 15 Amp ni ndi, nimba mel, “Nuim ei! Nu ei na ngui! Na wote, nu waka kuⱡi nᵾⱡimp. Wote, na nu kuⱡimp ont uⱡ ei, ui nᵾwimp mon!” nitim. 16 Wote Jisas ndi, amp ei, kundpa nimba mel, “Pukᵾn wanᵾm wu ei, ui nana, ya ila wangga!” nitim. 17 Amp ei ndi, nimba mel, “Na wu ti mon ei ka,” nitim. Jisas ndi, amp ni, kundpa nimba mel, “Nim wu ti mon, nᵾn ei, kupa nᵾn. 18 Nim unt wu 5 kat purᵾn, akup wu ti kᵾn morumbil ei, wanᵾm wu ti mon. Nim nᵾn ik ei, kupa nᵾn,” nitim. 19 Amp ei ndi, nimba mel, “Nuim ei! Nim Painui Wu ti pᵾnt ei ka! 20 Tᵾn nga Sameriya ila anda tipam ila mbᵾ ndi, ya komnga ila molk, Got nga mbi paka rondrung. Wote, enim Jura wamp mbᵾ ndi, tᵾn Jerusalem kona ila molk, Got nga mbi paka rundeing nᵾtmᵾn,” nitim. 21 Wote Jisas ndi, amp ni, kundpa nimba mel, “Na ik nᵾnt ei, mondkᵾn pili! Ui ti, ekit om ei kᵾn, Wuta nga mbi paka runding uⱡ ei, ya komnga ila mon. Wote, Jerusalem kona ila mon ku. 22 Enim Sameriya wamp mbᵾ, nam nga mbi paka rondᵾrmin uⱡ ei, pili napilik etmin. Tᵾn Jura wamp mbᵾ pilpᵾn, Got nga mbi paka rondᵾrmᵾn. Ei nambuⱡ emel, Got nga wamp etpa ti uⱡ ei, tᵾn Jura wamp mbᵾ kᵾn ekit orum. 23 Wote ui ti, ekit omba, ni akup ekit onum. Ei nga, Wuta nga mbi paka runding uⱡ ei, wamp mbᵾ ndi, Muⱡnga Wingti ei kᵾn, wote uⱡ kupa mbᵾ kᵾn iting. Wuta ei ndi, wamp i iti mbᵾ, numan ngurum. 24 Got elim Muⱡnga ei nga, elim nga mbi paka rondᵾk iting wamp mbᵾ, Muⱡnga ei kᵾn, ik kupa raⱡ nga pol ila mint, molk iteing,” nitim.

25 Amp ei ndi, Jisas ni, kundpa nimba mel, “Mesaiya ni, Wu Kraist nᵾtmin ni omba ei, na pilip mor. Omba kᵾn, uⱡ mbᵾ nga pora, tᵾn kundpa nimba,” nitim. 26 Wote Jisas ndi, amp ni, int ndupa, nimba mel, “Nim nᵾn wu ei, na akup nim kᵾn, ik nimbuⱡ morumbᵾⱡ ei ka!” nitim.

27 Wote, Jisas nga kitip kᵾni wu ni kᵾⱡ, andᵾk yant ok, kandrung ei, Jisas ni, amp ti kᵾn, ik nimba murum ila kandᵾk rot nᵾtᵾng. Wote, ik nᵾtᵾnggil ni nga, wu ti ndi kep, waldᵾk nᵾk mel, “Nim namba mel numan ngᵾn, muna nim amp ei kᵾn, namba ik ei, nᵾn nᵾk kep,” waldᵾk, pili napᵾtᵾng.

28 Wote amp ei, nu ming ei, tepa kelpa, wi kona peng nila mba, wamp nimbᵾ, kundpa nimba mel, “Wu ti ndi, na nga et uⱡ mbᵾ nga puⱡ ei, pilpa kelpa ninim ei, kᵾneing wᵾi! Wu ei, Kraist nda?” nitim. 30 Wamp nimbᵾ, ik ei pilik, kona peng ni, wak rok, Jisas murum kona nila orung.

31 Wote, ant ni kᵾn ku, kitip kᵾni wu ni kᵾⱡ ndi, Jisas kundᵾk, nᵾk mel, “Ik mbo wu ye! Nim rᵾng ti nui!” nᵾtᵾng. 32 Wote Jisas ndi, wu kᵾⱡ, kundpa nimba mel, “Na nga nuimp rᵾng mbᵾ tetᵾm ei, enim pili napilik mormin,” nitim. 33 Ei kᵾn, kitip kᵾni wu ni kᵾⱡ ndi, en enim nᵾk mel, “Wamp nam ti ndi, rᵾng mat ngum ei nga ninim nda?” nᵾtᵾng. 34 Jisas ndi, wu ni kᵾⱡ, kundpa nimba mel, “Na nga rᵾng ei, na tᵾpa mundrum wu ei nga numan pᵾtᵾm uⱡ mbᵾ mel, teng ndup kongun ngurum ei, etᵾp pora nduimp.

35 Enim ik ti, ei mel nᵾtmin. ‘Rᵾng rᵾpa romba ei nga kalimp 4 petᵾm,’ nᵾtmin. Na enim ik ti kundᵾp namp, pilik kai itᵾi! Rᵾng rᵾpa ropa kenim ei nga, rᵾng ting ui ei, nondpa enim. 36 Rᵾng tᵾm wu ei mel kaⱡmba, wote rᵾng tepa, uⱡ nga kᵾnt nga kont mul uⱡ ei, tᵾpa mou romba. Rᵾng rarum wu ei kᵾn, rᵾng tᵾm wu ei kᵾn, raⱡ kunda numan kai pilinggil. 37 Ik kupa nᵾtmin ni mel, wamp ti ndi, rᵾng rarum, wote wamp ti ndi, rᵾng tᵾtᵾm. 38 Ni mel, enim kongun iti natᵾtᵾng. Wote, wamp elpa mat, kongun mindil nok etᵾng kona ila, na ndi, enim tᵾp mundunt, rᵾng tᵾk mek, weing pᵾi,” nitim.

39 Sameriya wamp minal ndi, Jisas kᵾn mondᵾk pᵾtᵾng. Ei nambuⱡ emel, amp ni ndi, wamp mbᵾ, kundpa nimba mel, “Na nga it uⱡ mbᵾ pora, pilpa mbi ndupa, ninim ik ei nga etᵾng. 40 Wote, Sameriya wamp nimbᵾ, Jisas kᵾn ok, rᵾp ropᵾn muⱡamin nᵾtᵾng ila pilpa, kona nila moⱡpa, rumbᵾⱡ raⱡ tᵾpa mundrum. 41 Ik mbo inditim ni, wamp minal mondᵾk pilik, wote amp ni kundᵾk, nᵾk mel, “Nim nga keta ila ik pᵾnmin ni mon. Jisas elim nga keta ila ik punmᵾn ei, mᵾi kona wamp mbᵾ nga Etpa Tᵾmba Wu waⱡᵾm ei, nᵾmp pᵾnmᵾn!” nᵾtᵾng.

Jisas Ndi, El Wu Nuim Ti Nga Kangᵾm Etpa Titim

43 Rumbᵾⱡ raⱡ omba puⱡnga, Jisas Galili kona ila purum. 44 Ni kᵾn, Jisas elim ndi, nimba mel, “Painui wu ti nga mbi ei, elim nga mᵾi mang kona ila, tᵾk ou ndui nandᵾrmin,” nitim. 45 Wote Jisas ni, Galili kona ila rᵾk puⱡnga, wamp morung nimbᵾ ndi, rawe etᵾk tᵾtᵾng. Ei nambuⱡ emel, Jerusalem kona ila uⱡ rᵾpndi mat, Pasopa Ui ei kᵾn, itim kandrung ni nga, pilik etᵾng.

46 Wote, Galili nga Keina kona ila, Jisas ndi, mbo nu tᵾpa, wain rundrum ila int purum. Wote, gapman el wu ou ti nga kangᵾm ei, Kaperniyum kona ila kui roⱡnga pitim. 47 Jisas ndi, Juriya moⱡpa, Galili kona ila onum nᵾtᵾng ik ei, el wu ou ni pilpa, Jisas kᵾn purum. Mba kᵾn, kont kaimp ik ranggᵾpa, “Na nga kangᵾm ei, koⱡmba enim. Nim etkᵾn, tᵾn nᵾmp timp ont,” nitim. 48 Wote Jisas ndi, wu ei, kundpa nimba mel, “Enim uⱡ rᵾpndi ou ndupa mat, kandᵾk kᵾn, na nga ik ei, mondᵾk piling nᵾnmᵾn ye!” nitim. 49 Ni kᵾn, el wu ni ndi, yant ndupa, nimba mel, “Nuim ye! Na nga kang ei, kuⱡi nᵾⱡangga, pili nᵾkᵾn ui!” nitim. 50 Jisas ndi, wu ei, kundpa nimba mel, “Nim pi, nim nga kang ei kont moⱡmba ei ka!” nitim. Wu ni, Jisas nga ik ni, mondpa pilpa kᵾn, wote purum. 51 Kokila puⱡnga, elim nga kongun wu nimbᵾ ndi, yant ok, nᵾk mel, “Nim nga kang ei kont morum,” nᵾtᵾng. 52 Kang ei nga tipam ei ndi, waldpa nimba mel, “Kui nant kᵾn, wang nimba?” waldinga. Elim nga kongun wu nimbᵾ ndi, nimba mel, “Ukᵾ ou runggilmᵾ kui ropa wang nim,” nᵾtᵾng. 53 Kang ei nga tipam ni ndi, ui ei kᵾn, Jisas ndi, elim kundpa nimba mel, “Nim nga kangnᵾm kont moⱡmba,” nitim. Ik niting ni kᵾn, pilpa mbi ndurum. Ni kᵾn, elim kᵾn, elim nga wamp mbo kᵾⱡ pora, Jisas kᵾn mondᵾk pᵾtᵾng.

54 Jisas ni, Juriya kona moⱡpa, Galili kona yant urum ei kᵾn, uⱡ rᵾpndi raⱡ itim.

Copyright information for `MED